ᐧᕌᒥᓐ 14
14
ᐊᑳᐐ ᑎᐹᔅᑯᓐ ᐊᐙᓐ
1ᐊᑳᐐ ᐋᑎᐙᔨᒫᐦᒄ ᐊᓐ ᐊᐙᓐ ᐋᑳ ᑳ ᔮᐃᒋᑳᐳᑦ ᑖᑆᔮᔨᐦᑎᒧᐎᓂᐦᒡ, ᓰᑎᐤ ᐅᑎᓈᐦᒄ᙮ ᐊᑳᐐ ᑎᐹᔅᑯᓈᐦᒄ ᒥᒄ ᐊᓂᔮᔨᐤ ᐊᐦᐄᒡ ᐋ ᐄᔑ ᑖᑆᐦᑎᐦᒃ ᐋᐦᐋᑳ ᓈᔥᒡ ᐋᐱᑎᓃᔨᒡ᙮ 2ᐹᔨᒄ ᐊᐙᓐ ᐅᑖᑆᔮᔨᐦᑎᒧᐎᓂᒡ ᒥᒄ ᐋ ᐃᓯᓈᑯᐦᒡ ᒑᒀᓐ ᓂᑭ ᒌ ᒦᒋᓐ ᐄᑖᔨᐦᑎᒻ᙮ ᐋᒄ ᑯᑎᒃ ᐊᐙᓐ ᐋᐦᐋᑳ ᔮᐃᒋᑳᐳᑦ ᑖᑆᔮᔨᐦᑎᒧᐎᓂᐦᒡ ᒥᒄ ᓂᐦᑖᐅᒋᐦᒋᑭᓐ ᒦᒋᒥᔨᐤ ᒦᒋᐤ᙮ 3ᐊᓐ ᐊᐙᓐ ᐋᑳ ᑳ ᒥᑐᓐ ᐎᔮᔥ ᐄᑖᔨᐦᑎᒥᐦᐄᑯᑦ ᒥᒄ ᐊᓂᔮᔨᐤ ᐋ ᐃᓯᓈᑯᓃᔨᒡ ᒑᒀᔨᐤ ᐋ ᒦᒋᑦ ᐊᑳᐐ ᒋᑭ ᐅᐦᒋ ᐋᑎᐙᔨᒫᐤ ᐊᓂᔮᔨᐤ ᐋᑳ ᒥᒄ ᐊᓂᔮᔨᐤ ᐋ ᐃᓯᓈᑯᓃᔨᒡ ᒑᒀᔨᐤ ᑳ ᒦᒋᔨᒡ᙮ ᑭᔮᐦ ᒫᒃ ᐊᓐ ᐊᐙᓐ ᐋᑳ ᒥᒄ ᐊᓂᔮᔨᐤ ᐋ ᐃᓯᓈᑯᓃᔨᒡ ᒑᒀᔨᐤ ᑳ ᒦᒋᑦ ᐊᑳᐐ ᒋᑭ ᐅᐦᒋ ᑎᐹᔅᑯᓈᐤ ᐊᓂᔮᔨᐤᐦ ᐊᐙᔨᐤᐦ ᒥᒄ ᐊᓂᔮᔨᐤ ᐋ ᐃᓯᓈᑯᓃᔨᒡ ᒑᒀᔨᐤ ᑳ ᒦᒋᔨᒡ᙮ ᐙᔥ ᒋᔖᒥᓂᑑ ᓂᒧᐃ ᐋᑎᐙᔨᒥᑯᔨᐤ᙮ 4ᐊᐙᓐ ᒌᔨ ᑳ ᐐᐦ ᑎᐹᔅᑯᓂᒥᑦ ᑯᑎᒃ ᐊᐙᓐ ᐅᑖᐱᒋᐦᐋᑭᓐᐦ᙮ ᒥᒄ ᐅᒋᒫᒻ ᒋᑭ ᐎᔮᔨᐦᑎᒥᔨᐤ ᑯᐃᔅᒄ ᐋᐦᑎᒀ ᑭᔮᐦ ᒫᒃ ᐋᑳ ᑯᐃᔅᒄ ᐋᐦᑎᒀ᙮ ᑯᐃᔅᒄ ᒫᒃ ᒋᑭ ᐃᔨᐦᑐ ᐙᔥ ᑭᔅᒋᐦᐅᔨᐤ ᒋᔖᒥᓂᑑ ᒑ ᒌ ᔮᐃᒋᑳᐳᐦᐄᑯᑦ ᑖᑆᔮᔨᐦᑎᒧᐎᓂᐦᒡ᙮
5ᐹᔨᒄ ᐊᐙᓐ ᑎᑯᓂᔨᐤ ᐊᓂᔮᔨᐤ ᐋ ᒌᔑᑳᔨᒡ ᐋ ᒋᐦᑳᔮᑎᒥᐦᐄᑯᑦ᙮ ᑯᑎᒃ ᐊᐙᓐ ᐹᔨᑯᓂᐦᒡ ᐄᔑ ᑭᓂᐙᐱᐦᑎᒻ ᒥᓯᐙ ᐋ ᒌᔑᑳᔨᒡ᙮ ᒥᓯᐙ ᒫᒃ ᐊᐙᓐ ᒋᐱᐦ ᐎᔮᔨᐦᑎᒻ ᑖᓐ ᓂᐦᐋᐤ ᒑ ᐄᔑ ᑭᓂᐙᐱᐦᑎᐦᒃ ᐐᔨ ᐅᔮᔨᐤ᙮ 6ᐊᓐ ᐊᐙᓐ ᑳᐦ ᑎᑯᓃᔨᒡ ᐋ ᒌᔑᑳᔨᒡ ᐊᐅᔅᑖ ᐋ ᒋᔅᑎᒫᐙᔨᑎᒥᐦᐄᑯᑦ ᐃᔥᐱᔥ ᑯᑎᒋᔨᐤ ᐋ ᒌᔑᑳᔨᒡ, ᐐᐦ ᒋᔥᑖᔨᒫᐤ ᑎᐹᔨᐦᒋᒑᓯᐤ ᐋᔪᐎᒄ ᐅᔮᔨᐤ ᐙᐦᒋ ᑎᒃ᙮ ᐋᒄ ᐊᓐ ᐊᐙᓐ ᒥᒄ ᐋ ᐃᓯᓈᑯᓃᔨᒡ ᒑᒀᔨᐤ ᑳ ᒦᒋᑦ ᐐᐦ ᒋᔥᑖᔨᒫᐤ ᑎᐹᔨᐦᒋᒑᓯᐤ ᐅᔮᔨᐤ ᐋᐦᑎᒃ ᐙᔥ ᓂᓈᔅᑯᒫᐤ ᒋᔖᒥᓂᑑ ᐊᓂᔮᔨᐤ ᒦᒋᒥᔨᐤ ᐅᐦᒋ᙮ ᑭᔮᐦ ᒫᒃ ᐊᓐ ᐊᐙᓐ ᒥᒄ ᐱᔥᒡ ᐋ ᐃᓯᓈᑯᓃᔨᒡ ᒑᒀᔨᐤ ᑳ ᒦᒋᑦ ᐐᐦ ᒋᔥᑖᔨᒫᐤ ᑭᔮᐦ ᐐᔨ ᑎᐹᔨᐦᒋᒑᓯᐤ ᐅᔮᔨᐤ ᐋᐦᑎᒃ᙮ ᑭᔮᐦ ᐐᔨ ᒫᒃ ᓂᓈᔅᑯᒫᐤ ᒋᔖᒥᓂᑑ᙮ 7ᓂᒧᐃ ᐙᐙᒡ ᐹᔨᒄ ᐋᐦᑎᔒᐦᒄ ᒋᑎᐹᔨᒦᓱᓈᓂᐤ ᐋ ᐱᒫᑎᓰᔨᐦᒃ᙮ ᑭᔮᐦ ᒫᒃ ᓂᒧᐃ ᐙᐙᒡ ᐹᔨᒄ ᒋᑎᐹᔨᒦᓱᓈᓂᐤ ᐴᓂᐱᒫᑎᓰᔨᐦᒄ᙮ 8ᐙᔥ ᒫᒀᒡ ᐋ ᐱᒫᑎᓰᔨᐦᒄ ᑎᐹᔨᐦᒋᒑᓯᐤ ᐋᐅᒄ ᒋᐱᐦ ᒋᔅᑖᔨᐦᑖᑯᐦᐋᓂᐤ᙮ ᑭᔮᐦ ᒫᒃ ᐄᔥᐱᐦ ᐴᓂᐱᒫᑎᓰᔨᐦᒀ ᐐᔨ ᒋᑭ ᒋᔅᑖᔨᐦᑖᑯᐦᐋᓂᐤ᙮ ᐱᒫᑎᓰᔨᐦᒀ ᑭᔮᐦ ᒫᒃ ᐳᓂᐱᒫᑎᓰᔨᐦᒀ ᑎᐹᔨᐦᒋᒑᓯᐤ ᐋᐅᒄ ᑖᐹᔨᒥᑎᐦᒄ᙮
9ᐙᔥ ᙭ ᒌ ᐴᓂᐱᒫᑎᓰᐤ ᑭᔮᐦ ᒦᓐ ᑳᐤ ᒌ ᐱᒫᑎᓰᐤ ᒑ ᒌ ᐅᑎᐹᔨᐦᒋᒑᓰᒥᑐᑖᑯᑦ ᑖᐱᔥᑯᓐ ᐊᓂᔮᔨᐤ ᑳ ᐱᒫᑎᓰᔨᒡ ᑭᔮᐦ ᐊᓂᔮᔨᐤ ᔖᔥ ᑳ ᐴᓂᐱᒫᑎᓰᔨᒡ᙮ 10ᒌᔨ ᒫᒃ ᐐ᙮ ᒑᒀᔨᐤ ᐙᐦᒋ ᐐᐦ ᑎᐹᔅᑯᓂᑦ ᒌᒋᔖᓐ? ᒑᒀᔨᐤ ᐙᐦᒋ ᐋᑎᐙᔨᒥᑦ? ᐙᔥ ᒥᓯᐙ ᒋᑭ ᐎᑎᔅᑭᐎᑳᐳᔥᑎᐙᓂᐤ ᒋᔖᒥᓂᑑ ᒑ ᒌ ᑎᐹᔅᑯᓂᑎᐦᒄ᙮ 11ᐊᒀᒋᔥᑖᒡ ᒋᐦᒋᒥᓯᓂᐦᐄᑭᓂᐦᒡ,
ᐋ ᐃᔥᐱᔥ ᒑᔥᑎᓈᑖᔮᔨᐦᑖᑯᐦᒡ ᑖᑆᐦ ᐋ ᐱᒫᑎᓰᔮᓐ ᐃᔨᐤ ᒋᔖᒥᓂᑑ ᑎᐹᔨᐦᒋᒑᓯᐤ, ᒥᓯᐙ ᐊᐙᓐ ᓂᑭ ᐅᒋᐦᒌᐦᑯᓂᐱᔥᑖᒄ᙮ ᒥᓯᐙ ᐊᐙᓐ ᓂᑭ ᒫᒥᐦᒋᒥᐦᒄ᙮
12ᒥᓯᐙ ᐋᐦᑎᔒᐦᒄ ᒋᐱᐦ ᐙᐐᐦᑎᒧᐙᓂᐤ ᒋᔖᒥᓂᑑ ᑖᓐ ᑳᐦᑐᐦᒄ ᑭᔮᐦ ᒫᒃ ᒑᒀᔨᐤ ᐊᓂᔮᔨᐤ ᐙᐦᒋ ᑐᐦᒄ᙮
ᐊᑳᐐ ᑐᑐᐤ ᒌᒋᔖᓐ ᒑ ᒌ ᒥᒋᐦᑐᑎᐦᒃ
13ᐋᔪᐎᒄ ᐋᓐ ᐋᒄ ᐃᔥᐱᔥ ᑎᐹᔅᑯᓂᑐᑖᐤ᙮ ᑎᔨᑯᒡ ᒋᐱᐦ ᐄᔑ ᐎᔮᐦᑎᓈᓂᐤ ᐋᑳ ᒑ ᐅᐦᒋ ᑐᑎᒥᐦᒄ ᒑᒀᓐ ᒑ ᒌ ᑐᑖᑯᑦ ᒌᒋᔖᓂᐤ ᒑ ᒌ ᒥᒋᐦᑐᑎᐦᒃ᙮ 14ᐋ ᐐᒑᐅᒃ ᑎᐹᔨᐦᒋᒑᓯᐤ ᒌᓴᔅ ᐋᑯᑖᐦ ᐙᐦᒋ ᒋᔅᒑᔨᐦᑎᒫᓐ ᒥᓯᐙ ᐋ ᐃᓯᓈᑯᐦᒡ ᒦᒋᒻ ᒑ ᒌ ᒦᒋᔨᐦᒄ᙮ ᒥᒄ ᒫᒃ ᒥᔔ ᐋᐦᑎᑯᓃᒀ ᐊᐙᓐ ᒑᒀᔨᐤ ᐋ ᐄᑖᔨᐦᑎᐦᒃ ᐋᑳ ᒑ ᓂᐦᐋᔨᐦᑎᒥᐦᐄᑯᔨᑯᐱᓈᓂᐦᐄ ᒋᔖᒥᓂᑑ ᐋ ᒦᒋᑦ ᑭᔮᐦ ᒫᒃ ᐋ ᒥᓂᐦᒀᑦ ᐊᑑᒡ ᑭᔨᑆ ᒦᒋᐤ ᑭᔮᐦ ᐊᑑᒡ ᒥᓂᐦᒀᐤ ᐊᓂᔮᔨᐤ ᒑᒀᔨᐤ᙮ 15ᐙᔅᑎᐙᔨᐦᑎᒥᐦᐋᐅᑖ ᒌᒋᔖᓐ ᒥᒄ ᐊᓂᔮᔨᐤ ᐅᐦᒋ, ᐋ ᐃᓯᓈᑯᐦᒡ ᒑᒀᓐ ᐋ ᒦᒋᔨᓐ ᓂᒧᐃ ᒌ ᓵᒋᐦᐋᐤ ᐊᓂᔮᔨᐤ ᐋ ᑑᐎᑦ᙮ ᐊᑳᐐ ᒫᒃ ᒋᑭ ᐅᐦᒋ ᐃᓯᓈᑯᓐ ᒌᒋᔖᓐ ᒑ ᒌ ᓂᔑᐎᓈᑎᓰᑦ ᐊᓐ ᐋ ᐊᔨᑎᔨᓐ ᒥᒄ ᐋ ᐃᓯᓈᑯᐦᒡ ᒑᒀᓐ ᐋ ᒦᒋᔨᓐ, ᐙᔥ ᒌ ᓂᐳᔅᑎᒫᑰ ᙭᙮ 16ᐊᑳᐐ ᑭᔮᐦ ᒋᑭ ᐅᐦᒋ ᑐᑖᓐ ᒑᒀᓐ ᒑ ᒌ ᐅᐦᒋ ᒥᒋᐋᔨᒨᒥᑖᑯᐦᒡ ᐊᓂᒌ ᐋᑳ ᑳ ᑖᑆᔮᔨᐦᑎᐦᒡ ᐋᐦ ᐋᑦ ᐋᑳ ᐎᔮᔥ ᐄᑖᔨᐦᑎᒥᐦᐄᑯᔨᓐ ᐋᐦ ᑐᑎᒥᓐ ᐊᓐ ᑳᐦ ᑐᑎᒥᓐ᙮ 17ᐙᔥ ᐊᓂᑖᐦ ᒋᔖᒥᓂᑑ ᐅᒋᐦᒋᐅᒋᒫᐎᓂᐦᒡ ᑖᐹ ᓂᒥᔮᔨᐤ ᑖᓐ ᐋ ᐄᔑ ᒦᒋᓱᑦ ᐊᐙᓐ ᑭᔮᐦ ᒫᒃ ᒑᒀᔨᐤ ᒫᓂᐦᒀᑦ ᓈᔥᒡ ᑳᓂᐙᐱᐦᑖᑭᓂᐎᔨᒡ᙮ ᐋ ᑯᐃᔅᑯᑖᑏᓯᔨᐦᒄ ᑭᔮᐦ ᐋ ᒥᔪ ᐐᒑᐅᑯᒡ ᐄᔨᔨᐅᒡ ᑭᔮᐦ ᒫᒃ ᐋ ᒥᔻᔨᐦᑎᒥᐦᒄ ᒋᑖᐦᐄᓈᐦᒡ ᐋᐅᒄ ᒑᔅᑖᔨᐦᑖᑯᐦᒡ ᒋᔖᒥᓂᑑ ᐅᒋᐦᒋᐅᒋᒫᐎᓂᐦᒡ᙮ ᐱᔮᐦᒋ ᐊᐦᒑᐦᒄ ᒫᒃ ᒥᔨᐙᐤ ᐅᔮᔨᐤ ᒑ ᒌ ᐄᔑ ᐱᒫᑎᓰᓈᓂᐎᔨᒡ᙮ 18ᐊᓐ ᒫᒃ ᐊᐙᓐ ᑳᐦ ᐋᐱᑎᔒᔥᑎᐙᑦ ᙭ ᐅᔮᔨᐤ ᐋ ᐄᔑ ᐱᒫᑎᓰᑦ ᒋᔖᒥᓂᑑ ᓂᐦᐋᔨᐦᑎᒥᐦᐋᐤ᙮ ᑭᔮᐦ ᒫᒃ ᒋᑭ ᒋᔅᑖᔨᒥᑰ ᑯᑎᒃ ᐊᐙᔨᐤᐦ᙮
19ᓲᐦᒃ ᒫᒃ ᒨᔥ ᐐᐦ ᐄᔑ ᐱᒫᑎᓰᑖᐤ ᒑ ᒌ ᒥᔪ ᐐᒑᐆᑐᔨᐦᒄ ᑭᔮᐦ ᒑ ᒌ ᐐᒋᐦᐄᑐᔨᐦᒄ ᒑ ᒌ ᔮᔨᒋᑳᐳᐎᔨᐦᒄ ᐊᑐ ᒋᑖᑆᔮᔨᐦᑎᒧᐎᓈᐦᒡ᙮ 20ᐊᑳᐐ ᒋᑭ ᐅᐦᒋ ᓂᔑᐎᓈᒋᐦᑖᐙᓐ ᑖᓐ ᑳ ᐄᔑᐦᑖᐙᑦ ᒋᔖᒥᓂᑑ ᒌᒋᔖᓐ ᐅᐱᒫᑎᓰᐎᓂᔨᐤ, ᒦᒋᒥᔨᐤ ᐅᐦᒋ᙮ ᒥᓯᐙ ᒦᒋᒻ ᐱᔮᐦᑭᓐ ᒥᒄ ᒫᒃ ᐊᑳᐐ ᒥᒌᐦᑐᑦ ᒑ ᒌ ᒦᒌᓐ ᒑᒀᓐ ᒑ ᑐᑖᑰᒀ ᒌᒋᔖᓐ ᒑ ᒌ ᒥᒋᐦᑐᑎᐦᒃ᙮ 21ᐊᐅᔅᑖ ᒋᑭ ᒥᔻᔑᐤ ᐋᑳ ᒑ ᒌ ᒦᒋᔨᓐ ᐎᔮᔅ ᑭᔮᐦ ᐋᑳ ᒑ ᒥᓂᐦᒀᔨᓐ ᒑᒀᓐ ᒑ ᑐᑖᑰᒀ ᒌᒋᔖᓐ ᒑ ᒌ ᐱᐦᒋᔑᐦᒃ᙮ ᐊᑳᐐ ᒋᑭ ᐅᐦᒋ ᑐᑖᓐ ᒑᒀᓐ ᒑ ᑐᑖᑰᒀ ᒌᒋᔖᓐ ᒑ ᒌ ᐱᐦᒋᔑᒃ᙮ 22ᐋᑯᔥ ᒥᒄ ᒋᔖᒥᓂᑑ ᑭᔮᐦ ᒫᒃ ᒌᔨ ᒋᑭ ᒋᔅᒑᔨᐦᑖᓈᐙᐤ ᑖᓐ ᐋ ᐄᔑ ᑖᑆᐦᑎᒥᓐ ᐊᓂᔮᔨᐤ ᒑᒀᔨᐤ ᒑ ᒦᒋᑯᐱᓈ ᐊᐙᓐ ᑭᔮᐦ ᑖᓂᔮᔨᐤ ᐋᑳ ᒑ ᒦᒋᑯᐱᓈ ᑭᔮᐦ ᒫᒃ ᒑᒀᔨᐤ ᒑ ᒌ ᒥᓂᒀᑯᐱᓈ ᑭᔮᐦ ᑖᓂᔮᔨᐤ ᐋᑳ ᒑ ᒥᓂᒀᑯᐱᓈ᙮ ᒥᔻᔨᐦᑎᒻ ᐊᓐ ᐊᐙᓐ ᑳ ᒑᔥᑎᓈᑖᔨᐦᑎᐦᒃ ᑯᐃᔅᒄ ᐋ ᐃᓯᓈᑯᓃᔨᒡ ᑖᓐ ᐋ ᑎᒃ᙮ 23ᐊᓐ ᐊᐙᓐ ᐊᔮᐱᒡ ᑳ ᒦᒋᑦ ᒦᒋᒥᔨᐤ ᐋ ᐄᑖᔨᐦᑎᐦᒃ ᐋᑳ ᒑ ᒦᒋᑯᐱᓈ ᑎᑯᓂᔨᐤ ᐋ ᐄᔑ ᐊᑖᒫᔨᐦᑖᑯᓯᑦ ᐊᓂᔮᔨᐤ ᐋᐦᑎᒃ᙮ ᐙᔥ ᑐᑎᒻ ᐊᓂᔮᔨᐤ ᒑᒀᔨᐤ ᐋ ᑖᑆᐦᑎᐦᒃ ᐋᑳ ᒑ ᑐᑎᒧᑯᐱᓈ᙮ ᒥᔔ ᐋᐦ ᑐᑎᒧᐦᒀ ᒑᒀᓐ ᐋ ᑖᑆᐦᑎᒧᒄ ᐋᑳ ᒑ ᑐᑎᒧᑯᐱᓈ ᒌ ᒥᒌᐦᑐᑖᓈᓂᐤ᙮
Právě zvoleno:
ᐧᕌᒥᓐ 14: crls
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2016, Wycliffe Bible Translators, Inc. All rights reserved.