Yela 137
137
Baa lawɛ Israel tena kaa harɛfale ta wiile
1Ya soɡe Babelɔn harɛ
neerare nyoo, belaa
ya lii Saayɔn waa dɛ wi.#Neh 1:4; Ɛse 3:15
2Belaa ya kpɔ ya janjelare
saɡɛ daa ta, dɛ ɡel a lɔe.
3Nɛra baa lawɛ yaa la
ŋɔ yá ɡo yela, ba ŋɔ
yá ɡo yela lɛ ba sie ŋɔ,
“Hé ɡo yela aa dɛ baɡle
Saayɔn waa ya no.”
4Yaa lɔ harɛfale ta nɔ,
ɛrɛɛ yaa ba wona ɡo yela
tɛ Korowii ɔ?
5Jerusalam, dɛ n soh he wa aa,
Korowii ɡel n bɛ won
kpɔ nɔn lɔ janjela kpa.
6Dɛ n ta he waa liire
kɛŋɔ henee dɛɛ tɛ mɛ
silɛɛ kohona naa,
Korowii ɡel n bɛ
won ɡo yela kpa.
7N Naa Korowii,
lii waa Edom tena aa ɛa
awola Babelɔn tena
aa pɔ Jerusalam tena nɛɛ la.
Ba do lɔŋɔre ŋɔ,
“Hé kuuɡu, ó bwa chɔ harɛ.”
8Babelɔn tena,
ɡɛ haa kpɔa ɛ yaa nɔ,
Korowii swee andɛɛɡa
tɛ nɛra baa bá bɔ
heya a kem.
9Nɛra baa bá lawɛ he
bechasɔɔhne,
dɛ́ kpɔ ba cha bwea la,
Korowii swee ba andɛɛɡa.
Právě zvoleno:
Yela 137: mzw
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.