Mak 6
6
Ba vɛh Yeesu Nasarɛt
(Mat 13:53-58; Luk 4:16-30)
1Yeesu ne o habɔteŋra la le bela dɛ ba o ɡbaɡba bwɛ. 2Ona Tɔpere la aa tela la, o la cheremi dea dɛ ka chaɡle wa. Nɛra baa lɔ bela dɛ no la, a ɛɛ ba anebɛlbwa. Ba ŋɔ, “Ɛrɛɛ baa nɔ ɡe ɛ dɛ jemɛ waa nɔ nɔɔ? Bɔkwa wejemaa o dɔ ken dɛ won nyokpowaa nɔ bwa dɔŋa ɛɛ nɔɔ? 3Kapenta te la laa aa? Mɛɛre bie la laa aa? Jems ne Josef ne Judas#Jud 1:1 dɛ Seemɔn wa dɔɔ la laa aa? O nimambii laa lɔ ya be bonɔ naa?” Anomanta, ba siwi ta on sui.
4Belaa Yeesu ŋɔ ba be ŋɔ, “Korowii keame dɔ sɔn bobɛlbwa, kɛ o bwɛɛ ne o nɛra ne o dem tena be te, o ta sɔn dɔe.” 5O ta wone ɛ nyokpowaane bela, nemenɛ weela tena tamaa banee o kpɔ o nɔɔra dawɛ ba nɛɛ dɛ chaah ba. 6Yeesu bwara yɔr ba yarada baa wola on yaradae la wa.
Yeesu tomɛ o habɔteŋra fi dɛ banɛ
(Mat 10:5-15; Luk 9:1-6)
Asɛ o la bwɛɛre la aa bɛne bela la ta ka bol Amanesoma la chaɡ ba. 7Yeesu yerɛ o habɔteŋra fi dɛ banɛ la ba cheme o sie, dɛ pɛ ba banɛnɛ dɛ tɛɛ ba kpeɡri kwaa aa dɛ ir nɛra nɛɛ la nɛ, dɛ tom ba ŋɔ bá ka ɛ o toma.#Luk 10:1-12
8O kah ba ŋɔ, “He bɛ komɛlbwa sese kpɔ, nemenɛ daŋɡbale ɡbosoroo. He bɛ kondikwaa kwaraa kpɔ. He bɛ pure kpɔ. He bɛ suuɡa ɡe kpɔ. 9He won naŋɡawa doe, kɛ he bɛ batakaani bele anɛnɛ kpɔ.” 10Dɛ berɛ ŋɔ, “Bwɛɛ bɛlbwa haa la o ta la, dem haa ka jo o ta la, hé so bela ka tel kɛŋɔ haa le bwɛɛ la ta. 11Dɛ ba ta heyaa lɛɛ silɛɛ ne bwɛɛ la ta naa, hé pee he napaala teera ta bela, ásɛ a baɡle kɛŋɔ he kpɔ Korowii Waa ba ba be ba vɛah.”#Weɛ 13:51
12Belaa ba ɡe le dɛ ka bol waa la ŋɔ nɛ́ra charɛ ba liire dɛ́ le wechɔɡa ta. 13Ba doŋi kwaa aa dɛ ir nɛra nɛɛ pirim, dɛ́ kpɔ noo fɔɡle weela tena baa wara, dɛ́ chaah ba weela.#Jem 5:14
Jɔn waa dɛ sɔ nɛra Korowii nee nyu teŋa
(Mat 14:1-12; Luk 9:7-9)
14Yeesu waa perɛ bobɛlbwa, nomɛlbwa no o wa. Kooro Hɛrɔd ɡe noɔ. Bane ŋɔ, “Jɔn o fa aa dɛ sɔ nɛra Korowii nee la, onee. O weero le seo ta, a waa o won nyokpowaa nɔ ɛɛ la.”
15Nɛra bane ɡe ŋɔ, “Korowii keame Elaejaa.”
Asɛ bane ɡe ŋɔ o ɛ keame kɛŋɔ keamebena la ken.
16Belaa Kooro Hɛrɔd aa no waa nɔ la, o ŋɔ, “Jɔn maa ɡela ba teŋe o nyu la weero.”
17Dɛ kooro la mo o ɡbaɡba nime Felep haah baa yerɔ Hɛrɔdeas, asɛ Jɔn ŋɔ o be ŋɔ o ta an aŋwɛnɛ ta ɛɛ. 18Jɔn aa ŋɔ ɡɛ la nomanta, kooro la ɡelɔ ba lawɔ dɛ doo kpɛɛ dɛ kpɔɔ ka do dea. 19Hɛrɔdeas lɛ Jɔn kɔrɔ dɛɛ nyinu dɛ́ kpo, kɛ o ta wone. 20Kooro la ɔmɛ Jɔn, dɛkalkɛ Jɔn ɛ nɛndɛɛɡe o waa toɡre, anomanta, o nyiŋu kɛrɛdɛ. Jɔn aa dɛ bol waa la, kooro la bwara yɔrɔ, kɛ ane a bwa, o no waa la silɛɛ ne.
21Tɔpere aa tela kɛ kooro la di o lola tɔpere la, o ɛ kondikwaa dɛ yawɛ sene dɛ hɛlɛ, dɛ lɛ o koranar baa sawɔ ne Galilia nomonome bwa sie. 22Asɛ Hɛrɔdeas bihaah ba dɛ ba sa, o waa lɛ kooro la ne nɛra o ne baa cheme bela la sie.
Anee kooro la ŋɔ tolo la be ŋɔ, “Baɡle kon haa dɛ nyin ásɛ n kpɔ tɛɛ.” 23Kooro la ŋwɛɛ ntam baɡle tolo la kɛ, “Komɛlbwa haa dɛ nyin la, mɛɛ tɛɛ, hale n kora pera.”
24Anee bihaah la le kaa o nya be dɛ ka bɔɔro ŋɔ, “Bɔkwa konee ń lɛɔ?” Namee Hɛrɔdeas dɔ ŋwɛnɛ kɛ o kpo Jɔn.
O ŋɔ o bie la be ŋɔ ó ka ŋɔ ó tɛo Jɔn waa dɛ sɔ nɛra Korowii nee la nyu.
25Tolo la berɛ ba warane dɛ ba ŋɔ kooro la be ŋɔ, “N dɛ nyin kɛ he kpɔ Jɔn waa dɛ sɔ nɛra Korowii nee la nyu dawɛ korɔ ta ba tɛ mɛ taraken.”
26Waa nɔ we kooro la nɛɛ kɛrɛdɛ, kɛ o ntam waa ŋwɛɛra la ne nɛra baa soɡe bela la nomanta, waa nyin kɛŋɔ o koni o ntam la. 27Buɡ la ta, o tomɛ o sooja bɛl ŋɔ ó ka teŋe Jɔn nyu ba. O kpɔ o kere dɛ ka teŋe Jɔn nyu dea bela baa doo la, 28dɛ kpɔ dawɛ korɔ ta, dɛ kpɔ ba tɛ tolo la. Tolo la ɡe kpɔ ka tɛ o nya. 29Jɔn habɔteŋra la aa no waa nɔ la, ba balɔ dɛ ba kpɔɔ ka huɡe.
Yeesu tɛ nɛra kaɡboŋa banue kondikwaa ba di
(Mat 14:13-21; Luk 9:10-17; Jɔn 6:1-14)
30Nɛra Yeesu aa tom ba la berɔ ba o be, dɛ ba bol anla baa ɛa ne anla baa baɡla dɛ chaɡlo. 31Anee o ŋɔ ba be ŋɔ, “Hé ba ya kaa bobɛl nomɛlbwa aa wola toole, ásɛ he ka onɛ tama,” dɛkalkɛ nɛra baa bala dɛɛ kaa la warɔ, ba ta bɔr dɔe dɛ́ di kwaa kwara.
32Anomanta, Yeesu ne o habɔteŋra la ɡbo jo ɡbera bini dɛɛ kaa bela nomɛlbwa aa wola toole. 33Jaah nɛra pirim na ba kɛ baa dɛ kaa, dɛ jemɛ kɛ banee, dɛ le bwɛɛre ta chwa dɛ ti ba. 34Yeesu aa le ɡbera la bini la, dɛ nɛnlaa tenten lɔ bela. Ba waa domɛ o tea, dɛkalkɛ dɛ ba do kɛ peera aa wola teɡre dɔe ken. Anomanta, o chaɡ ba waa taeh.
35Bɔr aa dɛ ɛ jɔmɔra la, o habɔteŋra la ba o be dɛ ba ŋɔ, “Nomoa, bonɔ ɛ kpɔɡ bini, bɔr ɡe dɛ jo. 36Anomanta, ŋɔ ba be bá kaa bwɛɛre aa bar bonɔ nɔ dɛ́ ka yawɛ kwaane di.”
37Anee Yeesu chaŋ ba ŋɔ, “Hé nyin kwaa tɛɛ ba bá di.”
Anee ba ŋɔ o be ŋɔ, “Yaa wonoo dɔ suuɡa damanta kɛŋɔ denaarere lafraanɛ dɛ́ yawɛ paanoo tɛ nɛra nɔ bwa dɔŋ bá di aa?”
38Yeesu bɔɔ ba ŋɔ, “Paanoo aŋwɛnɛɛ he dɔɔ? Hé ka nyiŋi na.”
Baa kaa nyiŋi na la, ba balɔ dɛ ba ŋɔ o be ŋɔ, “Ya dɔ paanoo anue ne pɛŋa anɛ.”
39Belaa Yeesu ŋɔ ba be ŋɔ bá ɡel nɛra la pɛ dɛ́ so kpɔɡlor la ta. 40Asɛ ba pɛ dɛ so, bane lafare, bane ɡe fifraanunue. 41Yeesu kpɔ paanoo anue la ne pɛŋa anɛ la dɛ ha sie dɛ nyiŋi nyundua dɛ jam Korowii, dɛ mɔne paanoo la do o habɔteŋra la nɔɔra ta dɛ ŋɔ bá bɔne tɛɛ ba, dɛ mɔne pɛŋa la ɡe tɛɛ ba ŋɔ bá bɔne tɛɛ ba, 42ba bwa di dɛ vaɡre. 43Baa dia tonɛ la, Yeesu habɔteŋra la tɔɔ paanoo la ne pɛŋa baa dia a ka la pɛ do wɛɡrɛjena fi dɛ anɛ bini, a bwa su. 44Nɛra baa di paanoo la, ba baala ɡbo ɛɛ ɛ kaɡboŋa banuee.
Yeesu valɛ nee sie
(Mat 14:22-33; Jɔn 6:15-21)
45Belaa o ɡel o habɔteŋra la jo ɡbera bini dɛ tɔ sie kaa baŋ bobɛl baa dɛ yerɛ bela Bɛtsaeda, asɛ o ɡe ɡel nɛra la peɡre. 46Nɛra la aa kaala la, o teehnɔ kaa bwe bɛl doa dɛ ka soŋe Korowii bela.
47Bɔr aa baa ɡarɛ bwa, dɛ Yeesu habɔteŋra la lɔ mobaah, asɛ a ka o ɡbo che baŋ. 48O nao kɛŋɔ baa won tawɛ kɛrɛdɛ kpa, dɛkalkɛŋɔ dɛ peu tao dɛɛ chem ba. Jabal loɡla sii saŋ la, o valɔ kpɔ nee la sie dɛɛ kaa ba be, dɛ fe ɛɛ nyin o tel ba kɛrɛdɛ. 49Ba nao kɛŋɔ waa dɛ valɛ nee sie, dɛ lii kɛŋɔ lalee, dɛɛ dooɡe lɔŋɔre. 50Ba bwa sekwara aa nao la, ba jum jaoh.
Asɛ Yeesu bol waa ba be warane ŋɔ, “Hé lawɛ bambile. Menee! He bɛ ɔmɛ.” 51O jo ba be ɡbera la bini. Waa joa la, peu la helɔ. O habɔteŋra la bwa bwara hwaoh taeh. 52Ba liire aa do toŋɡboŋ baa wola paanoo la waa la mun noɛ la, a ɡelɔ ba bwara hwah.
53Ba tawɔ ka chuɡe moo la baŋ le Gɛnɛsarɛt harɛ ta, dɛ lawɛ ɡbera la vɔwɛ.#Mat 14:34-36 54Buɡ la ta, baa le ɡbera la bini la, nɛra jemɛ Yeesu. 55Anomanta, ba chwao jo bwɛɛre aa lɔ bela la ta, dɛ che weela tena le ba kalaŋre ta, dɛ kpɔ ba ba bela baa noa kɛ Yeesu lole la. 56Bobɛlbwa Yeesu aa laŋa, bwɛjeɡre ta, bwɛjena ne daamune ta la, ba kaa che weela tena ba bil yaware ta, dɛ soŋo ŋɔ ó ɡel weela tena la leɡe o batakaare nyoa. Banɔ la baa leɡo la bwa ɡbaŋrɔ.
Právě zvoleno:
Mak 6: mzw
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
Mak 6
6
Ba vɛh Yeesu Nasarɛt
(Mat 13:53-58; Luk 4:16-30)
1Yeesu ne o habɔteŋra la le bela dɛ ba o ɡbaɡba bwɛ. 2Ona Tɔpere la aa tela la, o la cheremi dea dɛ ka chaɡle wa. Nɛra baa lɔ bela dɛ no la, a ɛɛ ba anebɛlbwa. Ba ŋɔ, “Ɛrɛɛ baa nɔ ɡe ɛ dɛ jemɛ waa nɔ nɔɔ? Bɔkwa wejemaa o dɔ ken dɛ won nyokpowaa nɔ bwa dɔŋa ɛɛ nɔɔ? 3Kapenta te la laa aa? Mɛɛre bie la laa aa? Jems ne Josef ne Judas#Jud 1:1 dɛ Seemɔn wa dɔɔ la laa aa? O nimambii laa lɔ ya be bonɔ naa?” Anomanta, ba siwi ta on sui.
4Belaa Yeesu ŋɔ ba be ŋɔ, “Korowii keame dɔ sɔn bobɛlbwa, kɛ o bwɛɛ ne o nɛra ne o dem tena be te, o ta sɔn dɔe.” 5O ta wone ɛ nyokpowaane bela, nemenɛ weela tena tamaa banee o kpɔ o nɔɔra dawɛ ba nɛɛ dɛ chaah ba. 6Yeesu bwara yɔr ba yarada baa wola on yaradae la wa.
Yeesu tomɛ o habɔteŋra fi dɛ banɛ
(Mat 10:5-15; Luk 9:1-6)
Asɛ o la bwɛɛre la aa bɛne bela la ta ka bol Amanesoma la chaɡ ba. 7Yeesu yerɛ o habɔteŋra fi dɛ banɛ la ba cheme o sie, dɛ pɛ ba banɛnɛ dɛ tɛɛ ba kpeɡri kwaa aa dɛ ir nɛra nɛɛ la nɛ, dɛ tom ba ŋɔ bá ka ɛ o toma.#Luk 10:1-12
8O kah ba ŋɔ, “He bɛ komɛlbwa sese kpɔ, nemenɛ daŋɡbale ɡbosoroo. He bɛ kondikwaa kwaraa kpɔ. He bɛ pure kpɔ. He bɛ suuɡa ɡe kpɔ. 9He won naŋɡawa doe, kɛ he bɛ batakaani bele anɛnɛ kpɔ.” 10Dɛ berɛ ŋɔ, “Bwɛɛ bɛlbwa haa la o ta la, dem haa ka jo o ta la, hé so bela ka tel kɛŋɔ haa le bwɛɛ la ta. 11Dɛ ba ta heyaa lɛɛ silɛɛ ne bwɛɛ la ta naa, hé pee he napaala teera ta bela, ásɛ a baɡle kɛŋɔ he kpɔ Korowii Waa ba ba be ba vɛah.”#Weɛ 13:51
12Belaa ba ɡe le dɛ ka bol waa la ŋɔ nɛ́ra charɛ ba liire dɛ́ le wechɔɡa ta. 13Ba doŋi kwaa aa dɛ ir nɛra nɛɛ pirim, dɛ́ kpɔ noo fɔɡle weela tena baa wara, dɛ́ chaah ba weela.#Jem 5:14
Jɔn waa dɛ sɔ nɛra Korowii nee nyu teŋa
(Mat 14:1-12; Luk 9:7-9)
14Yeesu waa perɛ bobɛlbwa, nomɛlbwa no o wa. Kooro Hɛrɔd ɡe noɔ. Bane ŋɔ, “Jɔn o fa aa dɛ sɔ nɛra Korowii nee la, onee. O weero le seo ta, a waa o won nyokpowaa nɔ ɛɛ la.”
15Nɛra bane ɡe ŋɔ, “Korowii keame Elaejaa.”
Asɛ bane ɡe ŋɔ o ɛ keame kɛŋɔ keamebena la ken.
16Belaa Kooro Hɛrɔd aa no waa nɔ la, o ŋɔ, “Jɔn maa ɡela ba teŋe o nyu la weero.”
17Dɛ kooro la mo o ɡbaɡba nime Felep haah baa yerɔ Hɛrɔdeas, asɛ Jɔn ŋɔ o be ŋɔ o ta an aŋwɛnɛ ta ɛɛ. 18Jɔn aa ŋɔ ɡɛ la nomanta, kooro la ɡelɔ ba lawɔ dɛ doo kpɛɛ dɛ kpɔɔ ka do dea. 19Hɛrɔdeas lɛ Jɔn kɔrɔ dɛɛ nyinu dɛ́ kpo, kɛ o ta wone. 20Kooro la ɔmɛ Jɔn, dɛkalkɛ Jɔn ɛ nɛndɛɛɡe o waa toɡre, anomanta, o nyiŋu kɛrɛdɛ. Jɔn aa dɛ bol waa la, kooro la bwara yɔrɔ, kɛ ane a bwa, o no waa la silɛɛ ne.
21Tɔpere aa tela kɛ kooro la di o lola tɔpere la, o ɛ kondikwaa dɛ yawɛ sene dɛ hɛlɛ, dɛ lɛ o koranar baa sawɔ ne Galilia nomonome bwa sie. 22Asɛ Hɛrɔdeas bihaah ba dɛ ba sa, o waa lɛ kooro la ne nɛra o ne baa cheme bela la sie.
Anee kooro la ŋɔ tolo la be ŋɔ, “Baɡle kon haa dɛ nyin ásɛ n kpɔ tɛɛ.” 23Kooro la ŋwɛɛ ntam baɡle tolo la kɛ, “Komɛlbwa haa dɛ nyin la, mɛɛ tɛɛ, hale n kora pera.”
24Anee bihaah la le kaa o nya be dɛ ka bɔɔro ŋɔ, “Bɔkwa konee ń lɛɔ?” Namee Hɛrɔdeas dɔ ŋwɛnɛ kɛ o kpo Jɔn.
O ŋɔ o bie la be ŋɔ ó ka ŋɔ ó tɛo Jɔn waa dɛ sɔ nɛra Korowii nee la nyu.
25Tolo la berɛ ba warane dɛ ba ŋɔ kooro la be ŋɔ, “N dɛ nyin kɛ he kpɔ Jɔn waa dɛ sɔ nɛra Korowii nee la nyu dawɛ korɔ ta ba tɛ mɛ taraken.”
26Waa nɔ we kooro la nɛɛ kɛrɛdɛ, kɛ o ntam waa ŋwɛɛra la ne nɛra baa soɡe bela la nomanta, waa nyin kɛŋɔ o koni o ntam la. 27Buɡ la ta, o tomɛ o sooja bɛl ŋɔ ó ka teŋe Jɔn nyu ba. O kpɔ o kere dɛ ka teŋe Jɔn nyu dea bela baa doo la, 28dɛ kpɔ dawɛ korɔ ta, dɛ kpɔ ba tɛ tolo la. Tolo la ɡe kpɔ ka tɛ o nya. 29Jɔn habɔteŋra la aa no waa nɔ la, ba balɔ dɛ ba kpɔɔ ka huɡe.
Yeesu tɛ nɛra kaɡboŋa banue kondikwaa ba di
(Mat 14:13-21; Luk 9:10-17; Jɔn 6:1-14)
30Nɛra Yeesu aa tom ba la berɔ ba o be, dɛ ba bol anla baa ɛa ne anla baa baɡla dɛ chaɡlo. 31Anee o ŋɔ ba be ŋɔ, “Hé ba ya kaa bobɛl nomɛlbwa aa wola toole, ásɛ he ka onɛ tama,” dɛkalkɛ nɛra baa bala dɛɛ kaa la warɔ, ba ta bɔr dɔe dɛ́ di kwaa kwara.
32Anomanta, Yeesu ne o habɔteŋra la ɡbo jo ɡbera bini dɛɛ kaa bela nomɛlbwa aa wola toole. 33Jaah nɛra pirim na ba kɛ baa dɛ kaa, dɛ jemɛ kɛ banee, dɛ le bwɛɛre ta chwa dɛ ti ba. 34Yeesu aa le ɡbera la bini la, dɛ nɛnlaa tenten lɔ bela. Ba waa domɛ o tea, dɛkalkɛ dɛ ba do kɛ peera aa wola teɡre dɔe ken. Anomanta, o chaɡ ba waa taeh.
35Bɔr aa dɛ ɛ jɔmɔra la, o habɔteŋra la ba o be dɛ ba ŋɔ, “Nomoa, bonɔ ɛ kpɔɡ bini, bɔr ɡe dɛ jo. 36Anomanta, ŋɔ ba be bá kaa bwɛɛre aa bar bonɔ nɔ dɛ́ ka yawɛ kwaane di.”
37Anee Yeesu chaŋ ba ŋɔ, “Hé nyin kwaa tɛɛ ba bá di.”
Anee ba ŋɔ o be ŋɔ, “Yaa wonoo dɔ suuɡa damanta kɛŋɔ denaarere lafraanɛ dɛ́ yawɛ paanoo tɛ nɛra nɔ bwa dɔŋ bá di aa?”
38Yeesu bɔɔ ba ŋɔ, “Paanoo aŋwɛnɛɛ he dɔɔ? Hé ka nyiŋi na.”
Baa kaa nyiŋi na la, ba balɔ dɛ ba ŋɔ o be ŋɔ, “Ya dɔ paanoo anue ne pɛŋa anɛ.”
39Belaa Yeesu ŋɔ ba be ŋɔ bá ɡel nɛra la pɛ dɛ́ so kpɔɡlor la ta. 40Asɛ ba pɛ dɛ so, bane lafare, bane ɡe fifraanunue. 41Yeesu kpɔ paanoo anue la ne pɛŋa anɛ la dɛ ha sie dɛ nyiŋi nyundua dɛ jam Korowii, dɛ mɔne paanoo la do o habɔteŋra la nɔɔra ta dɛ ŋɔ bá bɔne tɛɛ ba, dɛ mɔne pɛŋa la ɡe tɛɛ ba ŋɔ bá bɔne tɛɛ ba, 42ba bwa di dɛ vaɡre. 43Baa dia tonɛ la, Yeesu habɔteŋra la tɔɔ paanoo la ne pɛŋa baa dia a ka la pɛ do wɛɡrɛjena fi dɛ anɛ bini, a bwa su. 44Nɛra baa di paanoo la, ba baala ɡbo ɛɛ ɛ kaɡboŋa banuee.
Yeesu valɛ nee sie
(Mat 14:22-33; Jɔn 6:15-21)
45Belaa o ɡel o habɔteŋra la jo ɡbera bini dɛ tɔ sie kaa baŋ bobɛl baa dɛ yerɛ bela Bɛtsaeda, asɛ o ɡe ɡel nɛra la peɡre. 46Nɛra la aa kaala la, o teehnɔ kaa bwe bɛl doa dɛ ka soŋe Korowii bela.
47Bɔr aa baa ɡarɛ bwa, dɛ Yeesu habɔteŋra la lɔ mobaah, asɛ a ka o ɡbo che baŋ. 48O nao kɛŋɔ baa won tawɛ kɛrɛdɛ kpa, dɛkalkɛŋɔ dɛ peu tao dɛɛ chem ba. Jabal loɡla sii saŋ la, o valɔ kpɔ nee la sie dɛɛ kaa ba be, dɛ fe ɛɛ nyin o tel ba kɛrɛdɛ. 49Ba nao kɛŋɔ waa dɛ valɛ nee sie, dɛ lii kɛŋɔ lalee, dɛɛ dooɡe lɔŋɔre. 50Ba bwa sekwara aa nao la, ba jum jaoh.
Asɛ Yeesu bol waa ba be warane ŋɔ, “Hé lawɛ bambile. Menee! He bɛ ɔmɛ.” 51O jo ba be ɡbera la bini. Waa joa la, peu la helɔ. O habɔteŋra la bwa bwara hwaoh taeh. 52Ba liire aa do toŋɡboŋ baa wola paanoo la waa la mun noɛ la, a ɡelɔ ba bwara hwah.
53Ba tawɔ ka chuɡe moo la baŋ le Gɛnɛsarɛt harɛ ta, dɛ lawɛ ɡbera la vɔwɛ.#Mat 14:34-36 54Buɡ la ta, baa le ɡbera la bini la, nɛra jemɛ Yeesu. 55Anomanta, ba chwao jo bwɛɛre aa lɔ bela la ta, dɛ che weela tena le ba kalaŋre ta, dɛ kpɔ ba ba bela baa noa kɛ Yeesu lole la. 56Bobɛlbwa Yeesu aa laŋa, bwɛjeɡre ta, bwɛjena ne daamune ta la, ba kaa che weela tena ba bil yaware ta, dɛ soŋo ŋɔ ó ɡel weela tena la leɡe o batakaare nyoa. Banɔ la baa leɡo la bwa ɡbaŋrɔ.
Právě zvoleno:
:
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.