Mak 5
5
Yeesu chah baa bɛl kwaa aa dɛ ir o nɛ
(Mat 8:28-34; Luk 8:26-39)
1Yeesu ne o habɔteŋra la tawɔ kaa Galilia Moo la baŋ Gerasa harɛ ta. 2Belaa Yeesu aa le ɡbera la bini la, baa bɛl kwa aa dɛ ir o nɛɛ wɛɛ chɔ lala huɡribɔr den ba chemo. 3A ɡɛ baa nɔ, ba fa yon lawɔ dɛ doo kpɛɛ, asɛ o yon laa kpɛɛ la kuuɡi. Hale ba dɛ doo jɔɡrɔre, asɛ o yon laa chaa. 4Anomanta, nomɛlbwa aa won on lawɛ dɛɛ doo kpɛɛ ne jɔɡrɔre kpa. 5Asɛ o chwa ka do lala huɡribɔr ne bela bwea ane aa lole. Belaa o do chɔɔ ne jwaana bɛlbwa dɛɛ valɛ bwea la dor dɛɛ dooɡe lɔŋɔre, dɛ kpɔ bwea dɛɛ mɔne o bwara.
6Gɛɛ a do baa nɔ aa na Yeesu bojaŋ kɛ o dɛ ba la, o chwa dɛ ka ɡuŋi Yeesu sie, 7dɛ kpɔ takpeɡ ŋɔ, “Yeesu, Nemenɛ Korowii Bie, bɔkwaa hɛɛ nyin n be nɔ? N kpɔ Korowii dɛɛ soŋe, bɛ men weweele do.” 8Baa la bol ɡɛ waa nɔ, dɛkalkɛŋɔ dɛ Yeesu tɔ sie ŋɔ, “Konchɔɡe, le baa nɔ nɛ!”
9Belaa Yeesu bɔɔro ŋɔ, “He sɔne ɛrɔɔ?”
O ŋɔ, “N sɔne Dɔm, dɛkalkɛŋɔ ya warɔ pirim.” 10Anee o soŋe Yeesu kohona ŋɔ o bɛ an doŋi le harɛ la ta.
11Bela la, dɛ parakooni damanta ane lɔ diŋɡoŋ bɛl ta dɛɛ di. 12Anee kwaa la aa dɛ ir baa la nɛɛ la soŋe Yeesu ŋɔ ó ɡel a kaa parakooni la nɛ. 13Asɛ Yeesu tɛa ŋwɛnɛ, a le baa la nɛɛ dɛ ka jo parakooni la nɛ. Belaa parakooni damanta dɛ ɛ kaɡboŋa anɛ la bwa chwa biribiribiri dɛ wili diŋɡoŋ bɛl dɛ ka lee moo la ta dɛ serewe kwaraa.
14Belaa nɛra baa dɛ nyiŋi parakooni la chwa, dɛ la bwɛɛ la ta ne daamune aa bɛne bela la ta, dɛ ka bol waa aa chiɡa la. Asɛ nɛra la le ba bwɛɛre ta dɛ ka na waa aa chiɡa, 15dɛ la bela Yeesu aa lole la, dɛ ka na kɛ baa la konchɔɡa damanta fa aa ir o nɛɛ la, a bwa kaalɔ, o liire ba harɛ, o do laala dɛ so. Baa nao la, ba ɔmɔ. 16Nɛra baa lɔ bela dɛ na la bol nɛra be waa aa chiɡ baa la ne parakooni la nɛ. 17Belaa ba soŋe Yeesu ŋɔ ó le ba harɛ ta dɛ kaa.
18Waa dɛ jo ɡbera bini la, anee baa la soŋo ŋɔ ó ɡel o ne o kaa. 19Asɛ Yeesu vɛh dɛ ŋɔ o be ŋɔ, “Kaa dem he nɛra be, dɛ́ ka bol wejena Korowii aa ɛa tɛɛ, ne he sum waa naa la chaɡ ba.” 20Baa la chiɡ ŋwɛnɛ ta kaa, dɛ ka bol bela bwɛɛre fi ane aa pɛa baa yera Dekapɔles la tena be wejena Yeesu aa ɛa tɛo, asɛ a ɛ ba bwa nyokpoa.
Bitolo bɛl waa sewa ne hanweelate bɛl wa
(Mat 9:18-26; Luk 8:40-56)
21Yeesu aa jo ɡbera bini dɛ berɛ kaa moo la baŋ le la, nɛnlaa bane baro cheme, o do nee nyoa. 22Belaa cheremi dea nomonome la bɛl baa dɛ yerɔ Jaerɔs ba bela dɛ ba na Yeesu, dɛ ɡuŋi o sie dɛ lawɛ o nakpala, 23dɛ soŋo ŋɔ, “N poori, nomoa, n bihaah bwara dɛ weo wɛɛ ba sewa. Ba dɛ́ ba kpɔ he nɔɔra dawɛ o nɛɛ ásɛ o bwara do kpeɡri o ir.”
24Baa la ne Yeesu aa dɛ kaa la, dɛ nɛnlaa bane teŋɛ o nɛ dɛ fiilo do baah ta dɛɛ taɡɔ. 25Dɛ haah bɛl ɡe lole chal ɛɛ fuɡo bene fi dɛ anɛ, 26o chah, o komɛlbwa tonɛ, kɛ weela la ɡe ta ɡwaa o nɛ. 27Waa no Yeesu ɡbɔɡa la, o lii o nyu bini kɛŋɔ dɛ o la bela dɛ ka dɔ bɔr jo nɛnlaa la bini dɛ ka leɡe Yeesu batakaare kwaraa naa, wɛɛ ɡbaŋroo. 28Dɛ ir dɛ la bela dɛ ka jo ba baah ta, dɛ ka che Yeesu habɔɔ dɛ leɡe o batakaare. 29Buɡ la ta, chal la aa dɛ fuɡo la teŋe. O na o bwadabii bini kɛ o weela la kaalɔ.
30Belaa Yeesu na kɛŋɔ kpeɡri ane le o bini. O berɛ habɔɔ nɛnlaa la baah ta dɛ bɔɔ ba ŋɔ, “Umee leɡe n batakaare nɔɔ?”
31Anee o habɔteŋra la ŋɔ, “He ɡbabir nao kɛŋɔ nɛnlaa nɔ aa bare cheme dɛɛ taɡɛ dɔŋa nɔ warɔ, ɡɛɛ he berɛ ŋɔ nomɛl leɡe naa?”
32Anee Yeesu nyiŋi nɛra la bini kɛŋɔ o ken fe ɛɛ na naatee yaa? 33Haah la aa naa ɡɛ Yeesu aa ɛa tɛo la, o kpɔ ɔmee ne bochela dɛ ba ɡuŋi o sie, dɛ bol o weela la bwa waa baɡlo. 34Yeesu ŋɔ o be ŋɔ, “Tolo, he yarada lɛɛ. Kaa bosɔɔhna ne, ásɛ he bwara do kpeɡri.”
35Yeesu nyoa ta aa lɔ waa waa dɛ bol la ta la, nɛra bane le cheremi dea nomoa la dem dɛ ba ŋɔ nomoa la be ŋɔ, “He bihaah la sewɔ. Ɛrɛɛ hɛɛ ha nomoa nɔ jaɔ?”
36Yeesu ta waa baa dɛ bol la ta teŋɛ, dɛ ŋɔ nomoa la be ŋɔ, “Bɛ ɔmɛ, kɛ yarada mɛ.”
37Yeesu ta ɡelɛ nomɛlbwa teŋɛ o nɛ, nemenɛ Pita ne Jems dɛ Jɔn waa ɛ Jems nime la. 38Baa tel nomoa la dem la, Yeesu na nɛra baa dɛ do ɡbɔɡa dɛɛ wi kohona. 39Waa jo bela la, o ŋɔ, “Ɛrɛɛ hɛɛ do ɡbɔɡa dɛɛ wi nɔɔ? Bie la ta sewɛ, domii wɛɛ chɔ.” 40Waa ŋɔ ɡɛ la, ba mamɔ.
Anee o doŋi ba bwa le buse, dɛ kpɔ bie la mɛɛ ne o nya, ne o habɔteŋra batoro la baa ja o nɛɛ la jo bela bie la aa chɔa la, 41dɛ ka lawɛ bie la nɔn, dɛ kpɔ ba wobol ŋɔ, “Talita kum!” O munii kɛ, “Tolo, n ŋɔ hé ir che.” 42Buɡ la ta, bitolo la ir che dɛ valɛ. Ba bwa bwara yɔr. 43Yeesu kah ba ŋɔ ba bɛ ɡel nomɛlbwa no, kɛ bá nyin kwaa tɛ bie la ó di. Gɛ saŋ la dɛ bie la dɔ bene fi dɛ anɛ.
Právě zvoleno:
Mak 5: mzw
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
