Mak 16

Yeesu seo ta ira wa

(Mat 28:1-8; Luk 24:1-12; Jɔn 20:1-10)

1Ona Tɔpere la aa ɡara la, Mɛɛre waa le Maɡdala la ne Jems nya Mɛɛre ne Salome, yawɛ tɛɛɡa ane a sɔɔh aa soma ŋɔ bá fee kpɔ ka fɔɡle Yeesu lale la. 2Kwasiara waa ɛ tɔpeloɡle tɔ mun aa dɛ kpɔ la, dɛ ba tel bela baa huɡe Yeesu la. 3Baa dɛ ba la, dɛ ba dɛ bɔɔ dɔŋa ŋɔ, “Umee dɛɛ ba bwe la ɡbila le bɔɔ la nyoa tɛ yaa ɔ?”

4Baa ta sie nyiŋi la, dɛ bwejen la ɡbilo le bɔɔ la nyoa. 5Baa jo bɔɔ la bini dɛ bonɔɔ bɛl soɡe diɡ pera, dɛ do wurpoŋ, asɛ ba bwara yɔr.

6O ŋɔ ba be ŋɔ, “He bɛ ɡel he bwara yɔr,” dɛ bɔɔ ba ŋɔ, “Yeesu waa le Nasarɛt baa kpaaro pɛl daɡaɡre ta la lalee hɛɛ nyin nɔ naa? O toole bonɔ kpa. Waa sewa la, o iro. Hé na bela baa huɡo la. 7Hé la dɛ ka ŋɔ o habɔteŋra la ne ba dɔŋ Pita be ŋɔ o dɛ tɔ sie kaa Galilia harɛ. Belaa hɛɛ ba o nae ɡɛ o fa aa bola la.”

8Asɛ ba nyoa kpo, ba kpɔ bochela chwa le bɔɔ la bini. Baa dɛ kaa la, dɛ ba dɛ ɔmɛ, anomanta, ba ta wobɛlbwa bolɛ nomɛlbwa be.

Yeesu kpɔ o te chaɡle Mɛɛre waa le Maɡdala

(Mat 28:9-10; Jɔn 20:11-18)

9Kwasiara waa ɛ tɔpeloɡle tomun aa dɛ kpɔ Yeesu aa ir seo ta la, o tɔ sie kpɔ o te baɡle Mɛɛre waa le Maɡdala la. Yeesu fa doŋi kwaa aa dɛ ir nɛra nɛɛ anuanɛ le ɡɛ haah nɔ nɛ. 10Mɛɛre laŋɔ dɛ ka ŋɔ nɛra ba fa aa dɛ teŋɛ Yeesu nɛɛ la be waa la waa naa la. Waa la ba be dɛ ba koh Yeesu seo la waa dɛɛ ɛ lwe dɛɛ wi siniire mɛrmɛr ken. 11Waa ŋɔ ba be ŋɔ Yeesu berɔ ir seo ta dɛ ŋɔ o te nao la, ba ta on yaradae.

12A habɔɔ la, Yeesu berɔ beɡre o te dɛ ba ba nɛra banɛ be, dɛ ba le Jerusalam dɛɛ kaa.#Luk 24:13-35 13Ba ɡe aa laŋa ka bol ba bala kabora la be la, ba ta yaradae.

Yeesu kpɔ o te chaɡle o habɔteŋra

(Mat 28:16-20; Luk 24:36-49; Jɔn 20:19-23; Weɛ 1:6-8)

14A habɔɔ la, o kpɔ o te chaɡle o habɔteŋra fi dɛ beŋkpoŋ la, dɛ ba dɛ di kwa. O pwaah ba ba yarada nyae ne ba bambikpeɡ la waa kɛŋɔ baa wola ba bala baa tɔ sie nao la yaradae la.

15Yeesu ŋɔ ba be ŋɔ, “Hé kaa harɛ ta bobɛlbwa dɛ́ ka bol Amanesoma la baɡle nɛwɛnyina bwa.#Weɛ 1:8 16Nomɛlbwa waa yarada ásɛ ba sɔɔ nee la, Korowii ɛɛ kpɔ o wechɔɡaa kɛo. Kɛ naate waa wola yaradae la, wɛɛ di bolchɔɡee. 17Nɛra baa yarada n waa la ɛɛ ɛ wejenaa, ásɛ nɛra na dɛ́ jemɛ kɛŋɔ n nɛraa ban. Baa dɔ kpeɡrii dɛ́ won che n sɔn ta dɛɛ doŋi kwaa aa dɛ ir nɛra nɛ. Korowii Domadɛɛɡe ɛɛ ir ba nɛɛ baa bol wobofala.#Luk 10:17 18Dɛ harɛkwaa dom ba aa, wobɛlbwa aa ba ɛɛ ba. Dɛ ba nyɔ tɛɡchɔɡa kwara naa, baa sewa ba. Baa wonoo kpɔ ba nɔɔra dawɛ weela tena nɛɛ bá dɔ bokpeɡa.”#Weɛ 28:3

19Ya Dɔɔ Yeesu aa bol waa ba be tonɛ la, Korowii kpɔɔ kaa nyundua, o ka so nomombɔr o diɡ ta.#Luk 24:50-53; Weɛ 1:9-11; Hib 8:1 20Asɛ o habɔteŋra la kaa bobɛlbwa dɛ kaa bol Korowii Waa la. Dɛ Korowii teŋɛ ba nɛɛ asɛ ba we-ɛɛla baa dɛ ɛ la ɡel nɛra jemɛ kɛŋɔ ba waa baa bola dɛɛ ɡaaɡe la ɛ kpela.

Právě zvoleno:

Mak 16: mzw

Zvýraznění

Sdílet

Kopírovat