Mak 12

Nɛra baa dɛ daah koo sɛɡla

(Mat 21:33-46; Luk 20:9-19)

1Yeesu kpɔ sɛɡla bol waa baɡle nɛra la dɛ ŋɔ, “Baa bɛlee fa lole dɛɛ parɛ daa baa kpɔ a nɔna dɛɛ ɛ sen. O ke a ɡɛ koo la, dɛ kwaa bɔr baa dɛɛ harame a nee dɛɛ do, dɛ chiɡri jɛŋla bela, bá so o ta dɛɛ daah koo la, dɛ kpɔ nɛra báa ɛ koo la toma, a koma telaa, bá dɔ ba bɔr. A habɔɔ la, o kpɔ koo la tɛɛ ba bá nyiŋi o ta tɛo, dɛ kaa harɛ bɛl ta.#Aes 5:1-2 2A koma saŋ aa baa tel la, o tomɛ o bonɔɔ bɛl ŋɔ ó ka lɛ o dibɔr ba tɛo. 3Bonɔɔ la aa laŋa la, nɛra la lawɔ dɛ lɔɔro dɛ doŋu o kaa. Ba ta on komɛlbwa tɛɛ o kaa. 4Koote la berɔ tomɛ o bonɔn-nɛɛte, asɛ ba lɔɔ o ɡe dɛ doo bol o nyu ta dɛ ɛo wilewile ken. 5Asɛ koo te la berɛ tomɛ o bonɔɔna la bɛl ja, asɛ nɛra la lawɔ dɛ kpoo. Gɛɛ o tomɛ toroma bane ja, asɛ ba lɔɔ bane dɛ kpo bane ɡe.

6Dɛ nɛn waa kaa ó tomɛ bwaa o ɡbaɡba bie waa dɛ nyinu ɡwaa komɛlbwa. O bonɔɔna la bwa aa baa tonɛ la, o bie laanee o ka mun tomɛ dɛ ŋɔ, ‘Ba na n bie nɔ te naa, baa heehroo.’

7Nɛra la aa na o bie la la, ba den ŋɔ, ‘Yoowa, baa la ɡbaɡba biee la. O mɛɛ toole naa, on dɛɛ ba o kapɛrɛ dii. Hé ɡel ya kpoo, ásɛ dɛ o mɛɛ baa sewaa, dɛ kwaa la ɛ ya kwa.’ 8Ba lawɛ bie la dɛ kpoo dɛ kpɔɔ viɡri koo la baŋ.”

9Asɛ Yeesu bɔɔ ba ŋɔ, “Ɛrɛɛ hɛɛ lii kɛŋɔ a ɡɛ koo te nɔ ɛɛ ɛɔ wɔ? Wɛɛ ba kpoo a ɡɛ nɛra laanee, dɛ́ kpɔ koo la do nɛnfala nɔn ta. 10Ba chwerɔ do Korowii Tɔn la bini ŋɔ,

‘Bwe la mamaala aa vɛoh dɛ liiru konsala

laanee bera ba lawɛ dea la kpoŋe la.#Yel 118:22-23

11Korowiirii ɡela a ɛ ɡɛ, asɛ a ɛ yaa nyokpowa.’

He ta a ɡɛ waa nɔ kure ka aa?”

12Yeesu aa bol a ɡɛ waa nɔ dɛ kpɔ sɛɡle la, dɛ Juu tena nomonome la dɛ́ nyin bɔr dɛ́ lawɔ, dɛkalkɛŋɔ dɛ ba jemɔ kɛŋɔ banee o sɛɡle. Kɛ dɛ ba dɛ ɔmɛ nɛnlaa baa lɔ bela la, dɛ ɡelo dɛ kaa.

Toɔ bɔe wepɛɛre

(Mat 22:15-22; Luk 20:20-26)

13Baa kaala la, ba kaa tomɛ Farisii tena ne Hɛrɔd habɔɔ tena bane ŋɔ bá ba haɡre Yeesu bela wepɛɛre ne dɛ́ lawɔ. 14Asɛ ba ba ŋɔ o be ŋɔ, “Nomoa, ya jemɔ kɛŋɔ he dɛ bol kasinteŋ. He ta waa bolɛ dɛɛ ɔmɛ a habɔɔ kɛŋɔ a dɛ do bane som, kɛɛ a dɛ we bane bambile nɔ. Haa nɛra siebɔr nyiŋi dɛɛ bol waa kɛŋɔ bɛl ɛ kooro kɛɛ nomoa kɛɛ bechala nɔ. Korowii ŋwɛnɛɛ hɛɛ baɡle nɛra kasinteŋ ne. Webeŋkpoŋii yaa nyin ya jemɛ. Onee kɛŋɔ ya Mmara nɔ dɛ tɛ yaa ŋwɛnɛ kɛŋɔ yá bɔ toɔ dɛ́ɛ tɛ Rom Koojen Siisa la aa, kɛɛ waa yaa ŋwɛnɛ tɛ?” 15Dɛ Yeesu jemɛ ba wepɛɛre la mun dɛ ŋɔ, “Ɛrɛɛ hɛɛ haɡre mɛ bela nɔɔ? Hé kpɔ suuɡa bwe ba ń na.” 16Anee ba kpɔ bɛl tɛo, asɛ o bɔɔ ba ŋɔ, “Ume nyu ne o sɔnee dawɛ suuɡa nɔ ta nɔɔ?”

Asɛ ba chaŋe ŋɔ, “Koojen Siisa laanee.”

17Asɛ Yeesu ŋɔ ba be ŋɔ, “Oo. Amɔ hé kpɔ kwaa aa ɛ Koojen Siisa kwaa la tɛo, dɛ́ kpɔ kwaa aa ɛ Korowii kwaa la tɛ Korowii.”

Asɛ o waa ɛɛ ba anebɛlbwa.

Seo ta ira wepɛɛre

(Mat 22:23-33; Luk 20:27-40)

18Anee Saduki tena ba Yeesu be. Dɛ baa yarada kɛŋɔ nɛn sewaa, wɛɛ berɔɔ ir ja. 19Ba baa bɔɔ Yeesu ŋɔ, “Nomoa, Mosis fa chwerɛ Mmara bɛl tɛ yaa ŋɔ, dɛ baa sewɔ ɡel o haah dɛ ba ta bii dɔe yaa, a chɛ kɛŋɔ o nime kɛɛ o dɔɔ kpɔ haah la mo dɛ́ loɡle bii, ásɛ a ɡɛ bii la ɛ lale la bii. 20Hahbeŋkpoŋ bibaala banuanɛɛ fa lole, asɛ o binomoa la ba mo haah dɛ ba sewɛ, dɛ o ta bie dɔe. 21Asɛ onla waa teŋɛ binomoa la nɛɛ la ɡe kpɔ haah la mo dɛ ba sewɛ, dɛ o ɡe ne o ta bie lolɛ. Gɛɛ bitoorote la ɡe mo haah la dɛ ba sewɛ, dɛ o ta bie dɔe. 22Bii la bwa mo haah la ka lɔ nyoa dɛ ba serewe, dɛ ba ta bii dɔe. A bwa habɔɔ la, haah la ɡe baa sewɛ. 23Aah dɛ nɛra bwa seo bini ira tɔpere la baa tel asɛ bibaala la bwa ir aa, ba bini umee dɛɛ ba haah la jaa ɛɛ yɔ? Ba nɛra banuanɛ la bwa ɡee fa moo.”

24Anee Yeesu chaŋ ba ŋɔ, “He kono kwaraa! Haa wola Korowii Waa baa chwera ne o kpeɡri waa jemɛ la waa. 25Nɛra baa ir seo ta naa, baa soo kɛŋɔ nyundua toroma, dɛkalkɛŋɔ baa haahna moe ba, baa jaranar ɡe yala ba. 26Nɛra seo ta ira ɡe la nɔ, dɛ he dɛ lii Mosis Tɔn bini waa ane aa dɛ baɡle dawii fuih la wa aa, ba chwerɛ bela ɡɛ Korowii aa ŋɔ Mosis be ŋɔ, ‘Menee Korowii he nabaala Abraham ne Aesek dɛ Jekɔb aa tomɔ la aa?’ 27Lala laa dɛɛ tomɛ Korowii, weeraa dɛɛ tomɔ. Anomanta, he kono kwaraa!”

Korowii Mmarare la bini onjen

(Mat 22:34-40; Luk 10:25-28)

28Dɛ Tɔnjereme bɛl ɡe ba bela dɛɛ no waa baa dɛ pɛɛro wɛɛ baɡle a bini la, dɛ na kɛŋɔ waa la ŋwɛnɛ taa Yeesu bola la. O ɡe bɔɔ Yeesu ŋɔ, “Mosis Mmarare la bini umee ɛ onjen ɡwaa a bwa nɔ?”

29Asɛ Yeesu ŋɔ, “A bwa bini onjen laanee nɔ, ‘Israel tena, hé no. N Naa Korowii nɔ habɔɔ Dɔɔ bɛlbwa toole kpa. 30Hé nyin N Naa Korowii he bambile bwa, he hweera, he liire, ne he bokpeɡa bwa ne.’ 31Onjen waa teŋa nɛɛ laanee nɔ. ‘Nyin he dɔŋ kɛ he ɡbaɡba.’ Mmara bɛlbwa toole dɛ ɛ onjen dɛ ɡwaa anɛ nɔ.”#Lew 19:18

32Asɛ Tɔnjereme la ŋɔ Yeesu be ŋɔ, “Jam, he ɛ wa, Nomoa. He waa nɔ bwa ɛ kasinteŋ. Korowii beŋkpoŋ ɡboo lole. Komɛlbwa toole dɛ dɔ yaa ka ja o nɛ. 33A chɛ kɛŋɔ yá nyinu ya bambile ne ya liire ne ya bokpeɡa bwa ne, dɛ́ nyin ya dɔŋa kɛŋɔ yaa dɛ nyin ya ɡbaɡba la. A ɡɛ mmarare anɛ nɔ ta teŋaa wera ɡwaa ɡɛ bwa yaa kpoo kwaa dɛ fuah dɛɛ tɛ Korowii, dɛ che kwaa kaa tɛo.”

34Yeesu aa naa kɛŋɔ baa la chaŋe waa la wejema ne la, o ŋɔ o be ŋɔ, “He sie dɛ chaah Korowii Kora waa la ta.” A habɔɔ la, nomɛlbwa ta berɛ hɛlɛ waa dɛ bɔɔro waane kpa.

Kristo la wepɛɛre

(Mat 22:41-46; Luk 20:41-44)

35Yeesu aa ba dɛ baɡle waa Korowii Dea la, o bɔɔ ba ŋɔ, “Aah ɛrɛ waa Tɔnjerema la ŋɔ Kristo la Korowii aa baɡɛ nyoa ŋɔ wɛɛ tomɔɔ ásɛ o ba lɛ yaa la ɛɛ ɛ Devid naa nɔɔ? 36Dɛkalkɛŋɔ Korowii Domadɛɛɡe fa ir Devid nɛɛ dɛ ɡel o baɡle Kristo waa dɛ ŋɔ,

‘N Naa Korowii ŋɔ n Dɔɔ be ŋɔ

ó ba so nomombɔr o diɡ ta ka tel kɛŋɔ

waa ba o dɔma ne harɛ ásɛ o tiɡri ba nɛ.’#Yel 110:1

37Aah Devid kwaraa fa aa dɛ yerɔ o dɔɔ nɔ, ɛrɛɛ a berɛ ɛ o ɛ Devid naa ɔ?”

Nɛnlaa la no o wobol la silɛɛ ne.

38Waa dɛ baɡ ba la, o ŋɔ, “Hɛ́ɛ nyiŋi Tɔnjerema la kɛrɛdɛ. Ban yon do laalajena ásɛ nɛra bwa na ba dɛɛ ɡuŋ ba harɛ yaware ta la. 39Ba dɛ nyin nomombɔra soɡa kohona cheremi deene, ne nomombɔra soɡa tɔpejena dii cheremibɔra la. 40Ba sie beɡre kwa, dɛɛ kam kwaa luhaahna deremi, dɛ berɛ saah dɛɛ soŋe Korowii wobojaŋa ne nɛra sie ta. Ba kembɔr ɛɛ do kanee taeh!”

Luhaah bɛl suuɡa tae wa

(Luk 21:1-4)

41Yeesu kaa so Korowii Dea suuɡa tae daka bɔr dɛɛ nyiŋi nɛra baa ta suuɡa dɛɛ do o bini la, dɛ dɔɔhna bane dɛ do suuɡajena tenten. 42Belaa luhaah nyaa bɛl ɡe ba do suuɡa bwejeɡre anɛ.

43Asɛ Yeesu yerɛ o habɔteŋra la dɛ ŋɔ ba be ŋɔ, “Kasinteŋ, luhaah nyaa nɔ do suuɡajena dɛ ɡwaa nɛra nɔ bwa, 44dɛkalkɛŋɔ o dea suuɡa bwaa o ɡbaa ba do daka nɔ bini la. Kɛ dɔɔhna la te suuɡa bini tama baa naa kɛŋɔ ba laa kpɔ aa, aa ba nɛɛ we la, anee ba kpɔ baa do la.”

Právě zvoleno:

Mak 12: mzw

Zvýraznění

Sdílet

Kopírovat