Luk 1
1
1Nomoa Teɔfelɔs, nɛra warɔ dɛ takapɔ ŋɔ baa chwerɛ waa aa chiɡ ya binii. 2Ba chwerɛ waa yaa noa dɛ le nɛra baa kpɔ siwi naa mumpar la, dɛ faa ɛ a toma dɛɛ bol Korowii Waa la. 3Nomoa, n ɡbaɡba nyiŋi a ɡɛ waa nɔ bini kɛrɛdɛ dɛ le mumpar, anomanta, n liiro kɛ aa maɡroo kɛ n chwerɛ dɛ baɡle a bini ɡɛ aa teŋa beŋkpoŋa beŋkpoŋa dɛ tɛɛ,#Weɛ 1:1 4ásɛ he won jemɛ waa baa bol he be la bini kasinteŋ bwa kɛrɛdɛ.
Jɔn waa dɛ sɔ nɛra Korowii nee lola wa
5Gɛ saŋ Hɛrɔd aa ɛ kooro Juda harɛ la, dɛ Sɔfo bɛl lole baa yerɔ Sekaria, asɛ o ɛ Abija be pera sɔfore la bɛl. Dɛ o haah sɔne Ɛlesabɛt. Dɛ sɔfore deene la bɛl biee o ɡe. 6Dɛ ɡɛ nɛra banɛ nɔ bwa ɛ nɛndɛɛɡa ba waa aa su Korowii siwi, baa no Korowii wa, dɛɛ teŋɛ a bwa ta kɛrɛdɛ. 7Sekaria moo, ba bwa ba hwɛɛh, kɛ dɛ ba ta bie dɔe, dɛkalkɛŋɔ dɛ Ɛlesabɛt ɛ hambara.
8Awola bɛl, Abia be pera sɔfore toma telo, asɛ Sekaria do Korowii Dea dɛɛ ɛ o Sɔfo toma. 9Gɛ sɔfore yon dɛɛ ɛ la, ba ta chacha mɔɔ dɛ leo ŋɔ ó jo Korowii Dea dɛ́ ka fuh daawiile a sɔɔh aa soma. 10O jo bela, asɛ nɛnlaa la bwa che buse dɛɛ soŋe Korowii ásɛ o fuh daawiile a sɔɔh aa soma la tonɛ.
11Belaa Korowii nyundua torome forɛ le ba Sekaria be Korowii Dea bela, dɛ ka che bela waa dɛ fuh daawiile a sɔɔh aa soma la diɡ bɔr. 12Sekaria aa na nyundua torome la la, a ɛo anebɛlbwa, asɛ ɔmee lawɔ. 13Anee nyundua torome la ŋɔ o be ŋɔ, “Sekaria, dɛɛ berɛ ɔma! Korowii no he wesoŋa. He haah Ɛlesabɛt ɛɛ lolɛ bibaalee tɛɛ, ásɛ he pa o sɔn Jɔn.#Mum 25:21 14Dɛ o lolaa, he bambile ɛɛ sɔɔhnee he sie lɛ, nɛra sie lɛ pirim, bá hɛɡre. 15Wɛɛ ɛ nɛnjen Korowii bee. Waa sen kɛɛ kwaa aa dɛ dɛɛ te bɛlbwa nyɔe ba. Waa lɔ o nya tea bini kwaraa la, Korowii Domadɛɛɡe la dɛ ba o nɛɛ soɡa kpeɡri nɛ.#Kur 6:2-5 16Wɛɛ ɡeloo Israel tena charɛ ba liire, dɛ́ ba N Naa Korowii be. 17Wɛɛ dɔ Korowii Domadɛɛɡe ne kpeɡrii kɛŋɔ Korowii keame Elaeja ken, dɛ́ tɔ ya Dɔɔ sie, dɛ́ ɡel eehnanar ne ba bii nyoa pɛ, dɛ́ berɛ deŋnekpeɡ tena liire ba nɛra ba wa aa dɛ su Korowii siwi ŋwɛnɛ ta. Gɛɛ wɛɛ ba ɛɛ dɛ́ nyin nɛra cheɡ ya Dɔɔ, ásɛ o balaa, ba won lɛo dɛ́ tomɔ.”#Mal 4:5-6
18Belaa Sekaria bɔɔ nyundua torome la ŋɔ, “Ɛrɛɛ hɛɛ ba ɛɛ n jemɛ kɛ ɡɛ waa nɔ ɛ kpela ɔ? Dɛkalkɛŋɔ n ne n haah bwa hwɛɛhrɔ.”
19Anee nyundua torome la chaŋo ŋɔ, “Menee Gebreɛl#Dan 8:16 maa dɛ che Korowii sie la. Onee tom mɛ ŋɔ ń ba bol Amanesoma nɔ he be. 20Kɛ haa wola n waa nɔ yaradae dɛɛ tɔŋ mɛ nomanta, hɛɛ berɛ amumuu dɛ́ ka tel kɛŋɔ waa nɔ bwa aa ɛa dɛ ɛ kpela mɔɔ he won bol wa. Jemɛ kɛŋɔ waa nɔ maa bola nɔ saŋ telaa, a bwa ɛɛ ɛo kɛrɛdɛ ken.”
21Gɛ saŋ Sekaria aa lɔ Korowii Dea bela la, dɛ nɛra cheɡɛ buse dɛɛ kpao. A ɛɛ ba nyokpoa kɛ waa biɡri bela la. 22Waa le Korowii Dea bela dɛ ba buse la, o ta wone bol waa nɛra la be. Anomanta, ba nao kɛŋɔ o na komɛl deera ta bela. Anee ɡela waa wola won waa bol dɛ kpɔ nɔɔra ne nyu dɛɛ baɡle waa la.
23Sekaria toma aa tonɛ Korowii Dea bela ɡɛ saŋ la, o kaa o bwɛ. 24Waa nɔ habɔɔ la, Sekaria haah Ɛlesabɛt jo tea, dɛ kpɔ o te sɔh dem korobie anue. 25Ɛlesabɛt cheɡɛ a ɡɛ waa nɔ ta, dɛ ŋɔ, “Name te N Naa Korowii laa sihiih kpɔ n sie ta, ásɛ n won jo nɛra bini.”
Nyundua torome baa bol Yeesu lola wa
26Ɛlesabɛt tea la korobie anumɛl ta la, Korowii nyundua torome baa dɛ yerɔ Gebreɛl la le Korowii be dɛ ba bwɛɛ bɛl baa dɛ yerɔ Nasarɛt waa lɔ Galilia harɛ ta la ta. 27Tolo bɛl waa wola baa jemɛ bwa baa yerɔ Mɛɛre bee o ba. Dɛ Mɛɛre dɛ ba Josef yala ɡɛ saŋ. Kooro Devid deaa Josef le. 28Nyundua torome la ba Mɛɛre be dɛ ba ŋɔ, “Korowii nɛnnyini, jam. N Naa Korowii cheɡɛ he habɔɔ.”
29Waa nyundua torome la aa baa bol Mɛɛre be la ɛo anebɛlbwa, asɛ o lii o nyu bini ŋɔ, “Bɔkwa waa nɔɔ?” 30Belaa nyundua torome la ŋɔ o be ŋɔ, “Dɛɛ berɛ ɔma, kɛ Korowii tɛɛ hɛɛra. 31Hɛɛ kpoŋe tea dɛ́ lolɛ bibaa, ásɛ dɛ pa o sɔn Yeesu. 32Wɛɛ ɛ nɛnjenii, ásɛ baa yerɔ Nemenɛ Korowii Bie. N Naa Korowii dɛ ba on o naa Devid kora la dɔŋ cheɡa ó di.#Aes 9:7 33Wɛɛ ɛ Jekɔb naanar bwa sekwaraa kooro o kora aa wola jaɡa dɔe ba.”
34Anee Mɛɛre ŋɔ nyundua torome la be ŋɔ, “Maa wola baa jemɛ mɔɔ nɔ, ɛrɛɛ waa nɔ ɛɛ ba ɛɛ dɛ́ won maɡre ɔ?”
35Belaa nyundua torome la ŋɔ, “Korowii Domadɛɛɡe ɛɛ ba he bee, ásɛ Nemenɛ Korowii kpeɡri tɔ he nɛ, ásɛ he kpoŋe tea. Anɔ taa aa ba cheɡa bie haa dɛ ba lola la ɛ nɛn o wa aa do ɡoroŋ, ásɛ baa yerɔ Korowii Bie. 36Dɛɛ no! He lole Ɛlesabɛt baa dɛ lii kɛŋɔ o hwɛɛhrɔ ŋɔ waa lolɛ la, taraken o jo tea. Korobie anumɛlee nɔ, kɛ o ɡe fe ɛ hambara. 37Na, wobɛlbwa ta Korowii ɛɛ tele.”
38Anee Mɛɛre ŋɔ, “N Naa Korowiirii dɔɔ mɛ, anomanta, ó ɛɛ mɛ ɡɛ bwa haa ŋɔa nɔ.” Asɛ nyundua torome la le Mɛɛre be dɛ kaa.
Mɛɛre laŋɔ ka chɔɔ Ɛlesabɛt
39A ɡɛ waa nɔ ta la, Mɛɛre iro dɛ kpɔ yɔra chiɡ ŋwɛnɛ ta ka le Juda deŋɡarere harɛ bobɛl dɛ kaa Sekaria bwɛ, 40dɛ ka jo Sekaria dem dɛ ka chɔɔ Ɛlesabɛt. 41Ɛlesabɛt aa no Mɛɛre taa la, anee bie la aa lɔ o tea bini la lɔ kpeɡri nɛ, asɛ Korowii Domadɛɛɡe ba so Ɛlesabɛt nɛ. 42Belaa o kpɔ takpeɡ bol waa ŋɔ, “Korowii sweere andɛɛɡa ɡwaa haahna bwa, dɛ swee he bie waa lɔ he tea bini la ɡe andɛɛɡa. 43N ɡee umeo n Dɔɔ nya ɛɛ ba ba chɔɔ mɛ nɔɔ? 44Buɡ la ta, he wobol aa chole n deŋna ta la, bie waa lɔ n tea bini la den kpɔ silɛɛ ne hɛɡra dɛ lɔ. 45He na som kɛ haa no n Naa Korowii wobol dɛ yarada kɛŋɔ ɡɛ waa la ɛɛ ɛo nɔ.”
Mɛɛre yel waa ɡoa kpɛɛ Korowii
46Anee Mɛɛre ŋɔ,
“N dɛ kpɛɛ Korowii n bambile bwa ne.#1Sa 2:1-10
47N sie lɛ Korowii waa ɛ n Lɛɛ la nɛ.
48O nyiŋi n ɡe maɡa nɔ dɔŋ maa ɛ nɛŋɡwɛɡre nɔ nɛ,
dɛ ɡel nomɛlbwa ɛɛ ba taraken lee
dɛɛ bol n waa ŋɔ n na som,
49dɛkalkɛ Nemenɛ Korowii ɛ wejena tɛ mɛ.
O chɛ duura.#Yel 71:19
50Nɛra te bwa baa dɛ ɔmɔ la, o dɛ na ba sum,
dɛɛ na ba biirere sum, dɛɛ na ba ɡe biirere
ne ba naanar bwa sum.
51O chaɡle o kpeɡri dɛ doŋi nɛra baa dɛ lii
ba te nɛnjena la ba peɡre.
52O ir kpeɡnɛra ba kora ta,
dɛ ɡɔɔ nɛŋɡwɛɡra baa di kpeɡri.
53O tɛ nyaara kondɛɛɡa ba di,
dɛ doŋi dɔɔhna ba kpɔ nɔŋɡbala kaa.
54O lii nyobaɡa waa baɡɛ ya naawa la,
dɛ lawɛ o bonɔɔna Israel tena bini kpoŋe wobɛlbwa ta,
dɛɛ sune ba nɛ,
55ɡɛ tenten waa baɡɛ Abraham ne o naanar nyoa
kɛ wɛɛ na ba sumii saŋ bɛlbwa la.”
56Belaa Mɛɛre so Ɛlesabɛt be dɛ ɛ korobie atoro mɔɔ dɛ kaa o bwɛ.
Jɔn waa dɛ sɔ nɛra Korowii nee lola wa
57Ɛlesabɛt lola aa tela la, o lolɛ bibaa. 58O nɛra ne o bala aa no ɡɛ Korowii aa na o sum dɛ ɛ wedɛɛɡa tɛo la, o ne ba bwa sie lɛo.
59Bie la aa dɔ yawanyoa la, ba balɔ ŋɔ ba ba teŋe o pen, dɛ fe ɛɛ nyin bá kpɔ o mɛɛ Sekaria sɔn pao. 60Anee o nya Ɛlesabɛt ŋɔ, “Akai! A chɛ kɛ yá pao Jɔn!”
61Belaa ba ŋɔ o be ŋɔ, “Aah, he lole bɛlbwa ta ɡɛ sɔn nɔ dii yɔ!” 62Asɛ ba kpɔ nɔɔra dɛ baɡle waa Sekaria be, dɛ bɔɔro sɔn waa dɛ nyin kɛŋɔ ba kpɔ pa o bie la. 63Belaa Sekaria ɡel ba nyin dapɛɡa tɛo, asɛ o chwerɛ o ta dɛ baɡle kɛŋɔ, “Bie la sɔne Jɔn.” Nɛra baa lɔ bela la ŋɔ ba ta nyokpowaa nɔ dɔŋa nae bwa. 64Buɡ la ta la, Sekaria o fa aa wola won bol waa la nyoa chaarɔ, o won bol wa, dɛɛ kpɛɛ Korowii kɛŋɔ waa ɛ wejena tɛo la. 65Belaa ɔmee lawɛ nɛra baa lɔ bela la bwa, asɛ ba kpɔ ɡɛ waa nɔ perɛ Juda deŋɡarere harɛ bwɛɛre la bwa ta. 66Nomɛlbwa waa no waa nɔ la, o liira o nyu bini ŋɔ, “Ɛrɛɛ ɡɛ bie nɔ ɛɛ ba doe yɔ?” Ba nao kɛŋɔ Korowii teŋɛ bie la nɛ.
Sekaria yel waa ɡoa kpɛɛ Korowii
67Jɔn mɛɛ Sekaria ɡe la, Korowii Domadɛɛɡe baa so o nɛ, asɛ o won bol waa aa dɛ ba bala kerekere, dɛ ŋɔ,
68“Hé ɡel ya kpɛɛ Korowii Israel tena aa dɛ tomɔ,
dɛkalkɛŋɔ o cha o nɛra dɛ lɛ yaa le wahala ta.
69O tɛ yaa nɛnjen o le o bonɔɔ Devid dea,
dɛ ŋɔ ó ba lɛ yaa.
70O cheɡɛ o keamere la nɛɛ dɛ bol wubwa
71ŋɔ wɛɛ lɛ yaa le ya dɔma ne nɛra baa hah
yaa bwa sekwaraa nɔn taa,
72dɛ́ na ya sum ɡɛ waa baɡɛ ya naawa nyoa la,
dɛ́ lii o fɔo o ne baa fɔwa la.
73O ne ya naa Abrahamee fɔwɛ fɔo la,
asɛ o ŋwɛɛ ntam baɡlo
74kɛŋɔ wɛɛ lɛ yaa le ya dɔma nɔn taa
ásɛ ya tomɔ yaa wola ɔmɛ,
75ásɛ ya ɛ nɛndɛɛɡa ya waa do ɡoroŋ
o sie ya soɡa bini bwa.”
76Anee Sekaria bol waa o bie la be ŋɔ,
“N bie, baa yerɛɛ Nemenɛ Korowii keamee,
dɛkalkɛŋɔ hɛɛ tɔ ya Dɔɔ siee,
dɛ́ kwaa bɔr tɛo ásɛ o ba,#Mal 3:1
77ásɛ dɛ ŋɔ o nɛra be ŋɔ, dɛ ba charɛ ba liire
dɛ le ba wechɔɡa ta naa,
wɛɛ kpɔɔ kɛ ba dɛ́ lɛɛ ba.
78N Naa Korowii tea aa dɛ domɛ
nɛn nɛɛ kohona nomanta, wɛɛ ɡeloo
o wee ɛɛ chaah yaa,
79ásɛ dɛ chaah ya banɔ la yaa lɔ
biro ta dɛɛ ɔmɛ seo la, dɛ́ chaɡle yaa
deŋnesɔɔhna ŋwɛnɛ.”
80Kenii a do asɛ Jɔn kpeɡ, dɛ dɔ nomonliire. O soɡe pua hɛŋle ɡbo harɛ, dɛ ka tel kɛŋɔ tɔpere waa pa o toma mun Israel tena bini aa tela.
Právě zvoleno:
Luk 1: mzw
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
