Lewi Dea Tena 15
15
Nee aa le nɛn bini dɛ ɛ doŋa
1Korowii ŋɔ Mosis ne Arɔn be ja ŋɔ 2bá bol Israel tena la be ŋɔ, “Baa waa so pɛɛpɛɛ o bane ɛɛ le la, a nee la ɛ doŋa, 3hale a ta teŋɔ dɛɛ ba kɛɛ dɛ teŋaa, aa ɡeloo ó kah doŋa. Waa aa che a ta o kah doŋa laanee nɔ, 4komɛlbwa waa chɔ o ta kɛɛ dɛ so o ta la berɛ doŋa kon. 5Nomɛlbwa waa leɡe o chɔɔbɔr chɛ kɛŋɔ ó chɛɡɛ o laala dɛ́ sɔ ne. O kah doŋa ka tel jɔmɔra. 6Nomɛlbwa waa so komɛlbwa naate aa soɡe o ta ka la, ó chɛɡɛ o laala dɛ́ sɔ ne. O kah doŋa ka tel jɔmɔra.
7Nomɛlbwa ɡe waa kpɔ nɔn leɡe a ɡɛ nɛn la chɛ kɛŋɔ ó chɛɡɛ o laala dɛ́ sɔ ne, naate kah doŋa ka tel jɔmɔra.
8Dɛ o berɔ ta nentane ta nɛn doŋa bɛlbwa aa wola toole o nɛ aa, naate chɛ kɛŋɔ ó chɛɡɛ o laala dɛ́ sɔ ne, naate kah doŋa ka tel jɔmɔra.
9Komɛlbwa ɡe a ɡɛ nɛn nɔ aa teeh so o ta la kah doŋa. 10Nomɛlbwa waa leɡe kon naate aa soɡe o ta la kah doŋa ka tel jɔmɔra. Nomɛlbwa waa ka kpɔ komɛlbwa a ɡɛ nɛn la aa soɡe o ta la chɛ kɛ ó chɛɡɛ o laala dɛ́ sɔ ne, dɛ o kah doŋa ka tel jɔmɔra.
11Nomɛlbwa a ɡɛ nɛn nɔ aa leɡo dɛ o ta nɔɔra samɛ mɔɔ la chɛ kɛŋɔ ó chɛɡɛ o laala dɛ́ sɔ ne, naate la kah doŋa ka tel jɔmɔra.
12Dɛ vii ɡee naate leɡaa, a chɛ kɛŋɔ bá paɡro. Dɛ komɛlbwa sese baa kpɔ daa ɛo ɡee yaa, a chɛ kɛ bá looru.
13Ba chah nomɛl waa do ɡɛ naa, tɔpera anuanɛ mɔɔ naate won laa doŋa kpɔ o nɛ. A chɛ kɛ ó chɛɡɛ o laala, dɛ́ dɔ nee waa dɛ palɛ ba tɛo ó sɔ, dɛ doŋa bɛlbwa toole o nɛɛ kpa. 14Ásɛ tɔpenuatoro wee ta la, ó kpɔ kulukukure anɛ kɛɛ borɔnoma bii anɛ ba, n Dea Cheremibɔr doonyoa bela men Korowii sie, dɛ́ kpɔ ba tɛ sɔfo. 15Sɔfo la kpɔa dɛ́ kpɔ bɛl ɛ wechɔɡa kpɔe dɛ kɛ saraha, ásɛ dɛ kpɔ bɛl la ɡe ɛ saraha baa fuah. Gɛɛ wɛɛ ba ɛɛ dɛ́ soŋe naate la weela tɛo n sie dɛ́ laa doŋa kpɔ o nɛ.
16Dɛ baa bane bala aa, a chɛ kɛŋɔ ó ɛ nee dɛ́ sɔ o bwara bwa, o kah doŋa ka tel jɔmɔra. 17Dɛ komɛl kɛŋɔ yal kɛɛ dɛ oltɔn taa o bane la jo aa, a chɛ kɛ bá chɛɡɔ, o kah doŋa ka tel jɔmɔra. 18Dɛ baa la ne haah chɔɔ waa, a chɛ kɛ bá bwa sɔ ne. Ba bwa kah doŋa ka tel jɔmɔra.
19Dɛ haah bwara chɔɡɔ aa, dɛ o kah doŋa tɔpera anuanɛ. Nomɛlbwa waa leɡo la kah doŋa ka tel jɔmɔra.
20Komɛlbwa waa chɔ o ta kɛɛ dɛ so o ta bochɔɡa saŋ la bwa kah doŋa. 21Bɛlbwa waa leɡe o chɔɔbɔr la chɛ kɛŋɔ ó chɛɡɛ o laala dɛ́ sɔ ne, naate kah doŋa ka tel jɔmɔra. 22Nomɛlbwa leɡe komɛlbwa waa so o ta la chɛ kɛ ó chɛɡɛ o laala dɛ́ sɔ ne, o kah doŋa ka tel jɔmɔra. 23Dɛ kon naate aa chɔ o ta kɛɛ dɛɛ so o taa nɛn leɡe aa, naate kah doŋa ka tel jɔmɔra.
24Dɛ haah la bochɔɡa ta leɛ mɔɔ baa lawɔ ka chɔ aa, dɛ baa la ɡe kah doŋa tɔpera anuanɛ, o kwaa waa chɔ a ta la ɡe bwa kah doŋa.
25Dɛ chal dɛ fuɡe haah dɛ biɡri dɛ o bochɔɡa laa, kɛɛ dɛ o bochɔɡa saŋee a ta teŋe dɛɛ fuɡo waa, dɛ o kah doŋa ɡɛ tenten a yon do o bochɔɡa saŋ mɔɔ o chal teŋe la. 26Komɛlbwa waa chɔ o ta kɛɛ dɛ so o ta ɡɛ saŋ nɔ la kah doŋa ɡɛ tenten o bochɔɡa saŋ waa kah doŋa la. 27Nomɛlbwa waa leɡo la kah doŋa. A chɛ kɛ naate chɛɡɛ o laala dɛ́ sɔ ne. O kah doŋa ka tel jɔmɔra.
28Dɛ chal la fuɡo tonɛ o dɔ chaah naa, ó so tɔpera anuanɛ mɔɔ, dɛ doŋa la le o nɛ. 29Tɔpenuatoro wee ta la, ó kpɔ kulukukure anɛ kɛɛ borɔnomare bii anɛ ba tɛ sɔfo la n Dea Cheremibɔr doonyoa bela. 30Sɔfo la kpɔ beŋkpoŋ ɛ wechɔɡa kpɔe dɛ kɛ saraha, ásɛ bɛl la ɡe ó kpɔ ɛ saraha baa fuah. Gɛɛ wɛɛ ba ɛɛ dɛ́ kpɔ soŋe naate la doŋa waa kaah la tɛo n sie.
31Anɔɔ hɛɛ ba ɛɛ dɛ́ ɡel Israel tena laa ba te dɛɛ kpɔ doŋa waa ta, dɛ bɛ doŋa kpɔ kah n Tɛnte Dea waa lɔ he bini la dɛ́ ba serewe.”
32Waa aa chɔ le tɛ baa o bane aa dɛ ba dɛ o ta haah chɔe dɛ kah doŋa, 33ne haah o bochɔɡa saŋ aa tela kɛɛ chal aa dɛ fuɡo pɛɛpɛɛ, kɛɛ baa haah lawa ka chɔ o doŋa kaeh saŋ laanee la.
Právě zvoleno:
Lewi Dea Tena 15: mzw
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.