Lewi Dea Tena 13
13
Bwadabii weechɔɡa Mmarare wa
1Korowii berɔ ŋɔ Mosis ne Arɔn be ŋɔ, 2“Bwadabii weela kɛŋɔ ɔr kɛɛ kure, kɛɛ wee foɡra aa dɛ ba wona ɛ weela aa bu lawɛ nɛn aa, bá kpɔ naate ka baɡle Arɔn kɛɛ o bibaala baa ɛ sɔfore la bini bɛl. 3Sɔfo la nyiŋi ŋwɛr la dɛ pona aa lɔ o ta la too, asɛ ŋwɛr la yɛ kaa bini naa, amɔ dɛ bwadabii weechɔɡa aa dɛ buu. Sɔfo la ɛɛ ŋɔ weela la ɛ weela aa dɛ bu nomanta, naate la kah doŋa. 4Kɛ dɛ ŋwɛr la bini too dɛ o ta yɛɛ kaa bini pona la ɡe ta toe yaa, ate sɔfo la chɛ kɛŋɔ ó pere naate le o bala bini tɔpera anuanɛ. 5Tɔpenuanɛ wee la baa tel aa, sɔfo la berɛ ba nyiŋu ja. O baa nyiŋi dɛ na kɛŋɔ ŋwɛr la ta do ɡɛ o fa aa doa, o ta yɛɛ kaa sie naa, ó pero le o bala bini tɔpera anuanɛ ja. 6Tɔpera anuanɛ la baa tel ja o ba nyiŋu dɛ na kɛŋɔ o sie chɔɔ kɛrɛdɛ o ta yɛɛrɛ ɡe aa, sɔfo la ɛɛ ŋɔɔ doŋa bɛlbwa toole o nɛɛ kpa, kur pɛɛpɛɛ. A ɡɛ nɛn la ka chɛɡɛ o laala, ásɛ o doŋa bwa le o nɛ. 7Kɛ dɛ sɔfo la baa nyiŋi dɛ ŋɔ doŋa toole o nɛɛ kpa, asɛ a habɔɔ kur la berɛ yɛ aa, a chɛ kɛ ó berɛ kpɔ o te ka chaɡle sɔfo la ja. 8O berɔ ba nyiŋu dɛ kur la yɛo waa, ó ŋɔ naate kah doŋa. A ɛ weechɔɡa aa dɛ bu.
9Nomɛlbwa bwadabii weebuula aa lɔ o nɛɛ la chɛ kɛŋɔ bá lawɔ ba sɔfo sie. 10O baa nyiŋu na dɛ ɔr la too asɛ pona aa lɔ o sie la ɡe to o bini la beɡre ŋwɛr aa, 11dɛ a ɛ bwadabii weechɔɡa dɛ do o bwadabii ta. Sɔ́fo la ŋɔ o be ŋɔ o kah doŋa. A ta chɛ kɛ ó pero le o bala bini dɛ́ nyiŋu mɔɔ, dɛkalkɛ doŋa dɔɔ do o nɛ.
12Dɛ sɔfo la nao kɛŋɔ weela la lɔ naate bwadabii bwa ta, le o nyundua ba ta harɛ naa, 13wɛɛ berɔɔ nyiŋu. Dɛ o nao kɛŋɔ weela la lawɛ o bwadabii bwa kpelaa, ó ŋɔ naate be ŋɔ doŋa toole o nɛ. O bwadabii bwa aa toa nomanta, amɔ dɛ doŋa bɛlbwa toole o nɛ. 14Kɛ a habɔɔ o berɛ ŋwɛr aa, dɛ o kah doŋa. 15Sɔfo la berɛ ba nyiŋu, dɛ o na ŋwɛr kpelaa, ó ŋɔ o be ŋɔ o kah doŋa. Ŋwɛr waa pila la dɛ́ chaɡle kɛŋɔ a ɛ weechɔɡa aa dɛ bu. 16Kɛ dɛ ŋwɛr la sewɔ o buɡ la berɛ to aa, náate la berɛ kpɔ o te ka chaɡle sɔfo la 17ásɛ o kwaa nyiŋu ja. Dɛ ŋwɛr la buɡ too waa, ásɛ sɔfo la ŋɔ o be ŋɔ doŋa bɛlbwa toole o nɛɛ kpa.
18Dɛ ɔr ɔrɛ nomɛl dɛ ba tonɛ, 19asɛ o buɡ la to kɛɛ dɛ swɛɛraa, a chɛ kɛ naate kpɔ o te ka chaɡle sɔfo. 20Sɔfo la nyiŋu dɛ́ na kɛŋɔ o buɡ la kaa bini asɛ pona aa lɔ o bini ɡe to aa, ó ŋɔ o be ŋɔ o kah doŋa. A ɛ weebuula dɛ ba ɛ ɔr la buɡ ta. 21Kɛ dɛ sɔfo la nyiŋi naate dɛ pona aa toa toole o ta, o ta berɛ kaa bini o sie chɔ kɛrɛdɛ naa, a chɛ kɛ ó pero le o nɛra bini tɔpera anuanɛ. 22Dɛ o buɡ la berɔ yɛɛraa, sɔfo la ŋɔ o be ŋɔ o kah doŋa. A ɛ weebuula. 23Kɛ dɛ buɡ la ta, do ɡɛ waa doa o ta yɛɛraa, dɛ ɔr la pɛl la ɡboo. Sɔ́fo la ŋɔ o be ŋɔ doŋa bɛlbwa toole o nɛ.
24Dɛ nii ɡee fuh nomɛl asɛ o ŋwɛr la chɛchɛr dɛ to kɛɛ dɛ swɛɛraa, 25sɔfo la nyiŋu. O baa nyiŋu dɛ na kɛŋɔ pona aa lɔ o ta la too asɛ o buɡ la kaa bini naa, amɔ dɛ weebuula baa jo o ta. Sɔ́fo la ŋɔ o be ŋɔ o kah doŋa. 26Kɛ dɛ pona aa lɔ o ta la ta toe asɛ o buɡ la ɡe ta bini kaalɛ o sie chɔ kɛrɛdɛ naa, a chɛ kɛ sɔfo la pero le o nɛra bini tɔpera anuanɛ. 27Tɔpenuanɛ wee la telaa, sɔfo la berɛ ba nyiŋu. O baa na kɛŋɔ ŋwɛr la yɛo waa, ó ŋɔ o be ŋɔ o kah doŋa. A ɛ bwadabii weebuula. 28Kɛ dɛ buɡ la ta, do ɡɛ waa doa, o ta yɛɛrɛ o sie chɔ kɛrɛdɛ naa, amɔ dɛ nii laanee ɡela a ba ɡɛ. Sɔ́fo la ŋɔ naate be ŋɔ doŋa bɛlbwa toole o nɛ. O ɛ nii la fuih pɛl ɡbo.
29Baa bɛlbwa kɛɛ haah ŋwɛr aa ɛ o nyu kɛɛ o taŋɡbaɡre la, 30a chɛ kɛŋɔ sɔfo ba nyiŋu na ɡɛ waa doa. Ŋwɛr la kaa bini asɛ o bini pona ɛ solmen a ta berɛ warɛ kpa aa, dɛ bwadabii weebuula kɛŋɔ masakurkur aa dɛ we nyu kɛɛ taŋɡbaɡre laanee. Sɔ́fo la ŋɔ o be ŋɔ o kah doŋa. 31Kɛɛ dɛ sɔfo la baa nyiŋu dɛ na kɛ ŋwɛr la ta bini kaalɛ, o pona sie chɔ kɛrɛdɛ naa, ó pere naate le o nɛra bini tɔpera anuanɛ. 32Tɔpenuanɛ wee la telaa, sɔfo la berɛ ba nyiŋi ŋwɛr la. O baa nyiŋi dɛ o ta yɛɛrɛ, o pona ɡe ta solmen ɛɛ dɛ kaa bini naa, 33naate la chɛ kɛŋɔ bá fonɛ o ŋwɛr la bɔr bar. Sɔfo la ɛɛ berɔɔ pero le o nɛra bini tɔpera anuanɛ ja. 34Tɔpera anuanɛ la baa tel ja aa, sɔfo la chɛ kɛ ó nyiŋi ŋwɛr la ja. O nao kɛŋɔ o ta yɛɛrɛ kaa bini bɛlbwa naa, ó ŋɔ o be ŋɔ o ta doŋa bɛlbwa kaeh. Náate la chɛɡɛ o laala, dɛ doŋa bɛlbwa toole o nɛɛ kpa. 35Kɛ dɛ ŋwɛr la berɔ yɛ a habɔɔ baa ŋɔ o be ŋɔ doŋa toole o nɛɛ la aa, 36sɔfo la berɛ nyiŋu ja. Dɛ ŋwɛr la yɛo kpela aa, sɔfo la bɛ berɛ nyiŋi na kɛŋɔ pona aa ɛ solmen lɔ o ta kɛɛ a toole o ta kpa. Ó den ŋɔ o be ŋɔ o kah doŋa. 37Kɛ dɛ sɔfo la liiree kɛŋɔ ŋwɛr la ta yɛɛrɛ, asɛ pona aa dɛ chaɡle kɛŋɔ o dɛ tonɛ ba o ta naa, amɔ dɛ o tonɔ. Sɔ́fo la ŋɔ naate la be ŋɔ doŋa toole o nɛɛ kpa.
38Dɛ akaba lɔ baa kɛɛ haah nɛ aa, 39sɔfo la chɛ kɛ ó nyiŋi naate dɛ́ na. Dɛ kompoŋa la ta denɛ to kpelkpel ɡɛ naa, amɔ dɛ bwadabii weepɛɛ, doŋa toole naate nɛ.
40Dɛ baa nyu ɡbao o nyumpona bwa tonɛ kwaraa naa, doŋa bɛlbwa toole o nɛ. 41Dɛ o tile bɔr ɡe ɡboo ɡbaa aa, doŋa toole o nɛ. 42Kɛ dɛ ŋwɛr waa swɛɛra dɛ to lɔ o nyu bela waa ɡbaa la ta kɛɛ o tile ta naa, amɔ dɛ weebuulaa. 43Sɔfo la chɛ kɛŋɔ ó nyiŋi ŋwɛr la. O baa nyiŋi dɛ na kɛŋɔ o swɛɛrɔ dɛ to kɛŋɔ weebuula aa, 44weela la ɡelɔ naate kah doŋa. Sɔ́fo la ŋɔ o be ŋɔ o kah doŋa, weechɔɡa lɔ o nyu ta.
45Nɛn waa dɔ ɡɛ weebuula nɔ la chɛ kɛŋɔ wɛ́ɛ do laalajɛɡle, dɛ bɛ o nyumpona lee dɛ́ kpɔ kon tɔ o nyoa ásɛ dɛɛ dooɡe lɔŋɔre ŋɔ, ‘N kah doŋa! N kah doŋa!’ 46Weela la taa lɔ o nɛɛ nɔ, ɡɛɛ doŋa ɡe ɛɛ ba o nɛɛ doe. A chɛ kɛ ó le nɛra bini, dɛ́ ɡbo ka so bela baa soɡa la dahara.
Kwaa aa fɔɔla Mmarare
47Dɛ kwaane le yatɔɔle kɛɛ yal baa wola on nyarɛ mɔɔ ta dɛ fɔɔlo, 48dɛ pee pona nee ba sɔɔh kɛɛ jisepondɛɛɡe kɛɛ oltɔn ne komɛlbwa soo siwi baa kpɔ oltɔn ɛo ta naa, 49dɛ a ɡɛ konfɔɔla nɔ le yal, kɛɛ kon baa kpɔ oltɔn ɛo, kɛɛ yal baa sɔɔh dɛ lɛɡre o ta kɛ papo-lwɛɛ, kɛɛ konswɛɛma aa, dɛ a ɛ kombuula. A chɛ kɛ bá kpɔa ka chaɡle sɔfo. 50Sɔ́fo la nyiŋi kon la na, dɛ́ kpɔ le nɛra bini tɔpera anuanɛ. 51Tɔpenuanɛ wee la, o baa nyiŋi ja dɛ kwaa la ta lɔ kon la ta dɛ yɛɛraa, a ɛ konchɔɡa dɛ ɡel kon la kah doŋa. 52A chɛ kɛ sɔfo la fuh kon la, konfɔɔla aa yɛɛra jo o ta la wa.
53Kɛ dɛ sɔfo la baa nyiŋi dɛ konfɔɔla la ta kon la ta yɛɛraa, 54ó ŋɔ bá ka chɛɡɛ kon la dɛ́ kwaaro bil bokɛre tɔpera anuanɛ ja. 55A habɔɔ baa chɛɡɛ kon la, sɔfo la ɛɛ nyiŋuu na ja. Dɛ o ta do ɡɛ waa doa, hale dɛ o ta yɛɛrɛ kwaraa ɡe aa, doŋa ta lɔ o ta. Dɛ o sie kɛɛ o habɔɔ bɛlbwa taa a lɛɡre aa, fuih chɛ kɛ ba fuuh. 56Kɛ dɛ kon la chɛɡa habɔɔ sɔfo la nyiŋo dɛ na kɛŋɔ konfɔɔla la ta lɔ kon la ta tama aa, ó kɛɛ baŋ bela konfɔɔla la aa lɛɡra la le o ta. 57Ba berɔ naa kon la ta naa, amɔ dɛ yɛɛraa a yɛɛ. Fuih chɛ kɛ bá den fuh kon la. 58Ba chɛɡɛ kon la asɛ konfɔɔla aa lɔ o ta la bwa kaalaa, a chɛ kɛ bá kwaa chɛɡɔ nɛɛtena, dɛ doŋa bɛlbwa toole o ta kpa.”
59Gɛɛ mmarare aa chɔ le tɛ konfɔɔla aa won yatɔɔle kɛɛ yal baa wola on nyarɛ mɔɔ, kɛɛ pee pona nee ba sɔɔh kɛɛ jisepondɛɛɡe, kɛɛ komɛlbwa soo siwi baa kpɔ oltɔn ɛo ta joe la, ne ɡɛ baa jemɛ kɛŋɔ doŋa bɛlbwa toole a ta, ne doŋa aa lɔ a ta la bwa waa do.
Právě zvoleno:
Lewi Dea Tena 13: mzw
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.