Hibru 8
8
Sɔfonomoa waa cheɡa tɛ fɔofale
1Waa yaa dɛ bol laanee kɛŋɔ ya dɔ Sɔfonomoa. O soɡe nomombɔr Korowijen kookara la jwɛɛh nyundua.#Mak 16:19 2Korowii Dea bini tenten la, belaa wɛɛ di sɔfore. O ɛ Korowii Tɛnte Dea ɡbaɡba, nɛwɛnyini laa doo.
3Sɔfonomoa bɛlbwa tomaa kɛŋɔ wɛɛ fuh kwaa dɛɛ tɛ Korowii, dɛɛ ɛ saraha ɡe. Anomanta, a hiaoh kɛŋɔ ya Sɔfonomoa nɔ ɡe dɔ kwaa waa kpɔ dɛɛ tɛ Korowii. 4Dɛ o fe lɔ harɛ bonɔ naa, o fe aa Sɔfo ɛɛ ba, dɛkalkɛŋɔ sɔfore lɔ harɛ ta dɛɛ ɛ saraha ɡɛ Mosis Mmara aa baɡla la. 5Ba sɔfore toma baa dɛ ɛ la, chaaraa baa chaa ɡɛ baa dɛ ɛa Korowii doa la. A tenten laa. A waa Mosis fa aa dɛ ba Korowii Tɛnte Dea baa dɛ tomɔ o bini la ɛɛ la, Korowii ŋɔ o be ŋɔ, “Nyiŋi dɛ ɛ komɛlbwa kɛrɛdɛ kɛŋɔ maa baɡle bwe la doa la.” 6Taraken nɔ, ba tɛ Yeesu sɔfore toma o ɡwaa harɛ bonɔ sɔfore. Fɔofale la waa cheɡɛ nɛwɛnyini ne Korowii baah ta dɛ fɔwɛ la ɡe ɡwaa ombene la, dɛkalkɛŋɔ a cheɡɛ Korowii nyobaɡa aa do wer la ta.
7Dɛ fɔobene la fe wer, waane toole o ta naa, onfale fe ta hiaih kpa. 8Kɛ Korowii nao kɛŋɔ o nɛra chɔɡ fɔobene la, a waa o ŋɔ,
“Saŋ bɛl ɛɛ bao, ásɛ n ne Israel
ne Juu tena fɔwɛ fɔofale bɛl.#Jer 31:31-34
9O ne fɔo la n ne ba naawa aa fɔwa a ɡɛ saŋ
maa laɡ ba le Ijipt harɛ ta la aa beŋkpoŋ ɛɛ ba,
dɛkalkɛŋɔ ba naawa fa ta fɔo la ta teŋɛ.
Anomanta, n ɡe laa sie kpɔ ba nɛ.
10Fɔo n ne Israel tena aa dɛ ba fɔwa kerekeree la.
Mɛɛ kpɔ me Mmaraa do ba nyu bini,
dɛ́ chwerɔ do ba bambile bini,
ásɛ dɛ ɛ Korowii baa dɛɛ tom mɛ,
ásɛ ba ɡe ɛ n nɛra.
11Aa berɛ hiah kɛŋɔ nomɛlbwa
baɡle o dɔŋ kɛɛ o nime ŋɔ,
‘A wer kɛŋɔ he jemɛ Korowii’ kpa,
dɛkalkɛŋɔ ba bechale ne nomonome
bwa ɛɛ jem mɛɛ.
12Mɛɛ sune ba nɛɛ dɛ́ kpɔ
ba waa aa wola toɡrɛ kɛ ba,
maa ba wechɔɡa waa lii kpa.”
13Korowii aa dɛ bol fɔofale waa nɔ, onloɡle la berɛ ombene. Waa berɛ ombene nɔ, o kpeɡri tonɔ, wɛɛ ba nyoɡra.
Právě zvoleno:
Hibru 8: mzw
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.