Kaala 36
36
1Mosis ŋɔ, “A chɛ kɛ Besalɛl ne Oholiab dɛ banɔ la Korowii aa tɛɛ ba liire ne wejema kohona la, bá won jemɛ ɡɛ bwa baa ɛ dɛ́ do Korowii Dea la, dɛ pa mun dɛɛ ɛ o toma ɡɛ Korowii aa do ba la.”#Kaa 31:1-11
Nɛra la ba koŋkɛɛla ne a ɡwaa
2Ate, Mosis yerɛ Besalɛl ne Oholiab dɛ banɔ la Korowii aa tɛɛ ba liire ne wejema ba bambile lawɛ toma la ɛɛ bwa ŋɔ bá ba. 3Anee Mosis kpɔ saraha kwaa Israel tena aa kpɔa ba ŋɔ bá kpɔ ɛ Korowii Dea la toma tɛɛ ba. Nɛra ta tea dɛ teŋɛ kpɔ kwaa baa tɛ chɔɔ bɛlbwa bambile bwa ne. 4Asɛ nɛra baa dɔ toma ɛɛ wejema dɛɛ ɛ Korowii Dea toma la ɡel toma ɛɛ, 5dɛ la ka ŋɔ Mosis be ŋɔ, “Nɛra la ba laala ne a berɛ ɡwaa ɡɛ aa hiah ya kpɔ ɛ toma la ɡɛ Korowii aa chaɡla la.”#Kaa 25:2
6Belaa Mosis ɡel nɛra baa lɔ bela baa soɡa la bwa no kɛŋɔ baa kɛɛ dɛ haahnee yoo, bɛlbwa bɛ komɛlbwa ta ba ŋɔ bá kpɔ kwaa Korowii Dea la kpa. Gɛɛ a do ba bara nɛra la ba ɡel ane bala, 7dɛkalkɛ dɛ laala baa dɔa dɛ́ kpɔ ɛ toma la berɔ ɡwaa.
Korowii Tɛnte Dea la
8Nɛra baa dɔ kwaa ɛɛ wejema dɛ ja tom-ɛɛra la nɛɛ la kwaa Korowii Tɛnte Dea la dɛ kpɔ jisepondɛɛɡe ne jiseburum ne jisekɔl dɛ jiseswɛm sɔh pateesanre fi. Dɛ ɡel nɛn waa dɔ kwaa sɔeh wejema ɛ Kerobim dawɛ a ta. 9Pateesanre la bwa kɛrɛdɛ. A jaŋne lɔ naɡale fifraanaarɛ dɛ anɛ, asɛ a paɡri ɡe ɛ naɡale anumɛl. 10Ba kpɔ pateesanre anue pɛ, dɛ lɔ anue la ɡe pɛ ɡɛ tenten. 11Ba kpɔ yal waa ɛ burum dɛ ɛa tora do pateesanre anue baa nyara pɛ la bɛl nyoa, asɛ dɛ ɛ ɡɛ tenten pateesan anue kar la ta. 12Tora fifraanuee lɔ pateesan beŋkpoŋ nyoa, fifraanue ɡe do onɔ la nyoa a bwa sie chaɡɛ dɔŋa. 13Asɛ dɛ kpɔ suuɡaswɛm ɛ kwaa fifraanue baa doa tora a sie chaɡɛ dɔŋa lawɛ tora la pɛ dɔŋa, a ɡel Korowii Tɛnte Dea la bwa ɛ beŋkpoŋ.
14Ba kpɔ boohpona sɔh pateesanre bɔle Korowii Tɛnte Dea la kɛŋɔ tɛnte dea ken. A bwa lɔ pateesanre fi dɛ beŋkpoŋ. 15Ba ɛ pateesanre la bwa a ɛ kɛrɛdɛ. Bɛlbwa jaŋne lɔ naɡale fifraanaarɛ dɛ anue, asɛ a paɡri ɡe naɡale anumɛl. 16Ba lɔ pateesan la anue pɛ dɔŋa a ɛ beŋkpoŋ, asɛ dɛ lɔ anumɛl kar la ɡe pɛ a ɛ beŋkpoŋ. 17Ba do tora fifraanue pateesanre baa lɔa pɛ la nyoo bela, asɛ dɛ berɛ do fifraanue onɔ la ɡe nyoa ta ɡɛ tenten. 18Ba kpɔ ayaawa ɛ kwaa fifraanue dɛ doa tora, a lawɛ dɔŋa pɛ, a ɡel Tɛnte Dea la bwa ɛ beŋkpoŋ. 19Ba kpɔ pebal tɔne baa doa konswɛɛma tɔ tɛnte dea la. Asɛ dɛ kpɔ mpo nae tɔne ɡe bɔlo ja.
20Ba kpɔ akaasia daa kwaa dachiɡri dɛ́ kpɔ kwaa Korowii Tɛnte Dea la. 21Dachiɡe bɛlbwa jaŋne ɛ naɡale fi dɛ anue, asɛ o daŋa ɡe ka tama ó ɡwaa naɡale anɛ, 22asɛ dɛ sɛh o mun o dɔ naa anɛ asɛ a bwa ɛ beŋkpoŋ. Gɛɛ ba ɛ dachiɡri aa lɔ Korowii Tɛnte Dea la ta bwa. 23Dachiɡri fifraanɛɛ ba ɛ a do o weekaŋle harɛbɔr pera, 24asɛ dɛ ɛ suuɡapoŋa loɡa fifraanaarɛ do a mune ta. O nakpale anɛ la bɛlbwa dɔ suuɡapoŋa loɡ beŋkpoŋ. 25O berɔ ɛ dachiɡri fifraanɛ a do o weekaŋle nyunduabɔr pera, 26ne suuɡapoŋa loɡa fifraanaarɛ, o nakpale anɛ la bɛlbwa dɔ suuɡapoŋa loɡ beŋkpoŋ. 27Ba ɛ dachiɡri anumɛl cheɡ o wee cholibɔr ɡe, 28asɛ dɛ ɛ dachiɡri anɛ o loŋkoni anɛ ta wee cholibɔr bela. 29O loŋkoni anɛ dachiɡri nɔ chɛ kɛŋɔ bɛlbwa lawɛ o dɔŋ le mun ta dɛ́ ka su nɔnloɡ beŋkpoŋ ta nyundua. Gɛɛ anɛ la bwa ɛɛ ba doe. 30Dachiɡri la ɛ anuatoro ne suuɡapoŋa loɡa fi dɛ anumɛl, asɛ suuɡapoŋa loɡa anɛ do daa bɛlbwa mun ta.
31Ba kpɔ akaasia daa ɛ doli, asɛ anue dawɛ dachiɡri aa lɔ Korowii Tɛnte Dea la baŋ bɛl, 32anue ɡe do baŋ bɛl, asɛ anue dawɛ dachiɡri aa lɔ wee cholibɔr pera baŋ bɛl la ɡe ta. 33Ba dawɛ dola baah ta o le baŋ bɛl dɛ ba kaa baŋ bɛl nyoa ta, asɛ a do daa baa paaɡa la baah ta. 34Ba kpɔ suuɡaswɛm bɔle daa la bwa, dɛ kpɔ suuɡaswɛm ɛ nɔnloɡa aa lawɛ doli la kpoŋe. Dɛ berɛ kpɔ suuɡaswɛm ɛ doli la ɡe.
35Ba kpɔ jiseburum ne jisekɔl ne jiseswɛm dɛ jisepondɛɛɡe nyarɛ pateesan la, asɛ nɛn waa jemɛ kwaa sɔeh ɛ Kerobim dawɛ o ta. 36Akaasia dachiɡri anaarɛɛ ba ɛ tɛo, dɛ kpɔ suuɡaswɛm bɔle a bwara. Dɛ kpɔ suuɡaswɛm ɛ kwaa aa lawɛ pateesan la kpoŋe, asɛ suuɡapoŋa loɡa anaarɛ do daa la mune. 37Korowii Tɛnte Dea doonyoa bela la, ba kpɔ jiseburum ne jisekɔl ne jiseswɛm dɛ jisepondɛɛɡe nyarɛ pateesan, dɛ ɡel nɛn waa dɔ kwaa sɔeh wejema ɛ kwaa dawɛ o ta, 38asɛ dɛ ɛ dachiɡri anue ne kwaa aa dɛ ba pateesan la lawa kpoŋe. Ba kpɔ suuɡaswɛm ɛ daa la nyunduuni ne a bwara bwa, asɛ dɛ kpɔ ayaawa ɡe ɛ loɡa anue do a mune ta.
Právě zvoleno:
Kaala 36: mzw
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.