Pilipae 4
4
Mwaanie O Haꞌa-ere, Taꞌe O Ke Lodoa Mola Mo Ola Diana I Saemu
1Maeni eesiku maaꞌi, nou manata diana huniꞌomu toꞌohuu, na saeku uri ne ke tohungei lae kaꞌu mei leesiꞌomu. Iꞌomu oto domana rorodara manikuluꞌe nakue, na no ko tohungei ilenimwaꞌe hiitoꞌo haahiꞌomu. Oto aena aana walu ola urine, maeni eesiku maaꞌi, nge omu ke iiꞌo susu mola peꞌie hiiwalaimolinge aana a Aalaha.
2Na iꞌomoreꞌi a Iuodia na Sintiki, no ko eitanaiꞌomoreꞌi uri more ke uure ruru, na more ke neꞌie taꞌa-taꞌa mei sae loꞌu i lalo aana a Aalaha mala e ro mwaasine keni. 3Na iꞌoe a oaku toꞌohuu,#4:3 Oana a Pol nge e ere i sulie ngeena, kie kaꞌa saie ike satana, taꞌe ingeie ngaeta mwane e asu diana peꞌie a Pol aani tarohaꞌinilana Tataroha Diana. nou saetoꞌo aana uri o ke peꞌie e ro keitaꞌaa ngeena. Aana kirerue tohungei peꞌi diana aaku huni tarohaꞌinie Tataroha Diana, peꞌie a Klemen na mo iini loꞌu weu nge iidumilana satada e lae oto i laona uusu-uusu ni meurihe huu.
4Omu ke ile-ilenimwaꞌe tarau haahie a Aalaha. Na no ko heꞌi unue loꞌu uri omu ke ile-ilenimwaꞌe. 5Omu ke haataꞌinie manekonga iꞌomu aana ahutana iinoni, aana karaꞌinie oto a Aalaha kei ooli loꞌu mei. 6Omu ke suꞌuri tolahiꞌe loꞌu aana nga mei ola, taꞌe omu ke aarea mola a God. Na omu ke sukaa taꞌena nga ola omu saetoꞌo aana, peꞌi paalahelana wau i saemiu. 7Oto hanuelamanga a God nge nga iini e saꞌa neꞌisae talihana, ke si kakalie saemiu na mo loꞌongaꞌinge iꞌomu i lalo aana Kraes Jisas.
8Oto ie, maeni eesiku, mei wala ooreta ineu huniꞌomu, uri omu ke lolodoa mo ola toꞌohuu na mo ola diana i saemiu. Na omu ke loꞌo-loꞌongaꞌi mola i sulie mo ola oodo, na mo ola manola, na mo ola e lio diana, na mo ola mwala e sai haꞌamaꞌu eeni, na mo ola e malisine lahenga haahiꞌi, na taꞌena nga mei ola e diana loꞌu liutaa urine. 9Omu ke dau oto i sulie mo ola nge nou haꞌa-uusuliꞌomu eeni, na loꞌu mo iini omu rongoꞌi eeku, na mo iini nge omu leesiꞌi eeku noꞌone. Omu kei teꞌurine, nge a God iini ko nii-niie hanuelamanga ke si iiꞌo peꞌiꞌomu.
A Pol E Paalahea Mo Pilipae Haahie Niinge Ikire
10No ko tohungei ilenimwaꞌe oto liutaa na no ko paalahea a Aalaha ikie aana omu ko heꞌi haataꞌinie loꞌu uri omu manata diana taane ue hunieu aana mo ola omu haꞌatolaꞌi mei hunieu. Nou kaꞌa unue ike uri omu rohu oto mwaanieu, taꞌe uri omu kaꞌa toꞌo maholo mola huni peꞌieu. 11No ko ere urine, kaꞌa ike i sulie uri nou kaꞌa toꞌo aana walu ola nou saetoꞌo aani. !Haꞌike! Taꞌe a God e haataꞌinie mola aaku tala hunie uri ne ke iiꞌo ni saemangonga, maꞌalana iiꞌonga ineu e uri taa. 12Nou saie oto taungei iiꞌonga aani meitalenga, na aani toꞌo-toꞌonga noꞌone. Nou saie mola ne kei iiꞌo ni ilenimwaꞌenga uri taa suli maholo, maꞌalana uri ne ke hiolo wa ne ke ngau ni pote loꞌu, wa maꞌalana uri nou kaꞌa toꞌo aana nga mei ola wa nou toꞌo aani taane. 13Ko lae urine aena aana nanamanga nge a Kraes e niie hunieu, nge ko haꞌa-aꞌailaꞌaau huni lio oodoie taꞌena nga ola kei reu eeku.
14Oto aana maꞌalana e urine, na e tohungei diana aana omu peꞌi diana aaku i laona maholo e aasa hunieu. 15Iꞌomu mo Pilipae, omu saie mola maholo nou aehota laeliwala aana Tataroha Diana wau aana poꞌo ni henue iꞌomu i Masedonia. Omu saie mola uri maholo nou lae mwaanie leune, nga taꞌa-taꞌa soihaadaꞌinge e kaꞌa peꞌieu ike aana maholona. Taꞌe iꞌomu haliꞌite nge omu sai loꞌongaꞌinieu aani niinge. 16Na maholo nou meitale noꞌone wau i Tesalonaeka nga mo maholo omu haꞌatola ola wau huni peꞌieu. 17Nou kaꞌa unue ike leune mola uri hunie omu ke nii huni peꞌieu tarau, taꞌe saeku mola uri waaite nge a God kei niie huniꞌomu ke paine. 18Nou leesie taane nga taa omu haꞌatolaa mai, na niinge iꞌomu e lae liutaa aana loꞌu nga taa nou saetoꞌo aana. Oto nou kaꞌa saetoꞌo aana ike loꞌu nga mei ola, aena aana a Epaprodaetas e pwani niie oto peꞌinge iꞌomu hunieu. Niinge iꞌomu e urihana oto uuraaꞌinge e wasu mangoni nge a God ko ilenimwaꞌe haahie. 19Na i tehulaꞌana a Jisas Kraes, God ineu ke si niie walu ola omu saetoꞌo aani huniꞌomu mwaanie ahutana mo tohungei ola diana ingeie. 20Aena urine, kie ke haꞌamanikuluꞌaa God Aamaka taraureꞌi. !Iau, ke urine oto!
Mei Wala Ooreta
21Saediananga ineu hunie ahutemiu mo iini omu hiiwalaimoli aana a Jisas Kraes nge omu iiꞌo wau i leune. Na mo eesikaelu mai peꞌieu ie kire ko niie noꞌone wau saediananga ikire huniꞌomu. 22Ahutana mwala nge kire hiiwalaimoli na kire iiꞌo mai leu i Rom, na oto liutaa mo eesikaelu nge kire ko esu weu i nume a inemauri, kire ko niie noꞌone wau saediananga ikire huniꞌomu. 23No ko eitanaie a God uri hahuꞌana manata-diananga a Jisas Kraes Aalaha ikie ke iiꞌo peꞌiꞌomu.
Právě zvoleno:
Pilipae 4: apbNT
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2016, Wycliffe Bible Translators, Inc. All rights reserved.