1 Tesalonaeka 2
2
A Pol E Asu Hiitoꞌo I Tesalonaeka
1Maeni eesiku maaꞌi, omu manataꞌinie oto noꞌone, uri laenga iꞌemeelu weu i seemiu ngeena e kaꞌa totowai ike mola, taꞌe nga tohungei mei ola diana e maau taane mai mwaanie laenga ngeena. 2Omu saie taane uri i naꞌona melu lae mai seemiu i Tesalonaeka, mwala e tohungei teungeꞌiniꞌemeelu na kire ere aaelasiꞌemeelu oto hiitoꞌo wau i Pilipae. Taꞌe maꞌalana mwala hunge kire sare uure honosiꞌemeelu, a God ikie e peꞌi diana aameelu taane mola huni aatopuri aana maꞌunge na huni haꞌarongoꞌomu aana Tataroha Diana a God. 3Oto omu sai kohie mola uri melu kaꞌa haꞌa-olaꞌomu ike aani loꞌongaꞌinge takalo, wa aani eeronga, wa aani pwelonga. 4!Haꞌike! A God e lio hilisiꞌemeelu oto na e norutoꞌo oto aameelu uri melu melisine oto tarohaꞌinilana Tataroha Diana. Oto maholo melu ko ere, melu kaꞌa ere ike mola i sulie saena mwala, taꞌe oto i sulie saena God, iini e saenanau uri melu ke asu toꞌohuu nana, na e lio hilisiꞌemeelu huni esu nana. 5Na oto mala omu saie, melu kaꞌa lupweꞌi laheꞌomu ike mola aani wala diana huni haꞌa-olaꞌomu. !Haꞌike! A God e saie taane oto noꞌone uri melu kaꞌa saehanalie ike mo ola diana iꞌomu, 6na melu kaꞌa loꞌohie ike noꞌone uri iꞌomu wa nga mwala aaopa loꞌu kire ke laheꞌemeelu. 7E toꞌohuu oto. Iꞌemeelu, melu neꞌie oto mo hurulaꞌaa a Kraes, mo iini peine oto liutaa haahie soihaadaꞌinge. Oto iꞌemeelu mo hurulaꞌaa, melu sai haaraiꞌomu hunie taꞌena nga ola. !Taꞌe melu kaꞌa dau rarahiꞌomu ike! !Haꞌike oto ooꞌoo! Melu tohungei deu rako mola aamiu mala huꞌe ko lio i sulie kele wee-wee ingeie maholo ko haꞌasusuhie. 8Na aena aana melu tohungei manata diana huniꞌomu, melu ko ilenimwaꞌe mola huni peꞌiꞌomu, kaꞌa ike mola aani unulana Tataroha Diana a God huniꞌomu, taꞌe noꞌone aani toliꞌaasilana maurihaꞌameelu i tehulaꞌamiu.
9Maeni eesiku maaꞌi, nou saie uri omu ko aama-aamasitoꞌo taane aana weonga iꞌemeelu aana melu esu susue rodo na aatowaa mwaanie melu haꞌahiꞌeie nga iini eemiu maholo melu lae-laeliwala aana Tataroha Diana a God namiu. 10Maholo melu oꞌoꞌo peꞌiꞌomu mo iini omu hiiwalaimoli, tolahameelu e diana, na e oodo, na e maaꞌi takoiꞌomu. Oto omu meni saie mola leune e toꞌohuu, na a God na e saie noꞌone urine. 11Omu saie taane noꞌone mola uri melu peꞌi diana aamiu oto mala aamana mo mwela ko peꞌi diana aana mo kalena. 12Aana melu ere-ere haꞌasusuꞌomu, na melu eitanaiꞌomu huni tola i sulie a Jisas, na melu ere hatongaꞌi huniꞌomu hunie omu ke iiꞌo aani iiꞌonga diana i maana a God. Aana e haaraiꞌomu hunie omu ke neꞌi iinoni aana aalahanga ingeie na hunie omu ke iiꞌo peꞌie aana manikuluhaꞌana.
13Melu ko lae peꞌi paalahea God oto liutaa haahie maholo melu lae mai haꞌarongoꞌomu aana walana God, omu rongo peꞌi hiiwalaimolinge aana uri walana God toꞌohuu na e kaꞌa walana ike mola iinoni. Na walana God ngeena ko esu taane oto i lalo aamiu mo iini omu hiiwalaimoli aana. 14Maeni eesiku, nga taa e raꞌusiꞌomu ngeena e rau taane oto noꞌone aana mo soihaadaꞌinge a Kraes Jisas aana poꞌo ni henue i Jiudia. Iꞌomu, omu sapesalu aana mwala iꞌomu loꞌu mola kire taungeꞌiniꞌomu, na e urihana noꞌone loꞌu mola ikire kire sapesalu aana mwala ikire mo Jiu kire taungeꞌinire. 15Mwala ngeena kire horo maesie mo propet na Aalaha ikie a Jisas, na kire taungeꞌiniꞌemeelu noꞌone aana kire oohe aasiꞌemeelu mwaanie hanuena. Kire haꞌasaewasuliꞌaa God na kire tohungei waelie taꞌena nga iinoni, 16aana kire sare uure honosiꞌemeelu mwaanie haꞌa-uusulilana mo Aapoloa Aaopa i sulie haꞌa-uuringe a God. Oto aena kire dau urine, mo oorahaꞌaanga ikire ko pei-peine loꞌu mola hiitoꞌo, na saewasunge a God e hule oto aada.
A Pol E Sare Maatolie Loꞌu Mo Tesalonaeka
17Maeni eesiku maaꞌi, maꞌalana melu oopa kaꞌu mwaaniꞌomu aena aana mwala kire dau rarahiꞌemeelu, taꞌe melu kaꞌa pupulongosiꞌomu ike. Melu ko eriꞌapasie taane uri melu ke leesiꞌomu loꞌu, 18aana melu tohungei sasare aalihoꞌi loꞌu weu i seemiu. Ineu a Pol maraaku, nou deu aahonga aana nga mo maholo taane huni lae mai seemiu, taꞌe a Satan e uure honosiꞌemeelu mola. 19Iau, melu tohungei sare hule i seemiu loꞌu, aena aana melu tohungei norutoꞌo aamiu uri aana maholo a Jisas Aalaha ikie kei ooli mei, taꞌe omu sai uure maꞌutaꞌa mola, na melu sai ilenimwaꞌe haahiꞌomu hule aana melu uure aana totomwameelu. 20Iau, iꞌomu nge omu ke si da melu ke uure aana totomwameelu peꞌie ilenimwaꞌenga.
Právě zvoleno:
1 Tesalonaeka 2: apbNT
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2016, Wycliffe Bible Translators, Inc. All rights reserved.