2 Kolɛtɩkʋɛ 13
13
'Lelɛ'bɔɔwintɛ
1'Bɩa 'nɩ di 'le 'a mʋ ‑wɔn, ‑ye ɛ mɔ 'klɛɛ 'wɔ a ta a nɔnɔ. 'Nɩ di 'le, ‑ye 'n di nahuin ꞊nʋ lɛ poo ‑bati, ‑ʋ nu dɛ 'klan. ‑Tɛ Nyɩsʋacrɩɩnɩɛɛ 'a ꞊tutue nu, kɛ'ɛ nɩ, 'n di ‑bati a ‑gbɛ a pupue nu. Nyɩsʋacrɩɩnɩɛ a ‑gbɛ, ɛ nɔ 'nɩ: «'Bɩa nahuon ‑ye 'bɔ yɛɛ 'a 'be ‑ye ‑tɩ, ɛ nye 'nɩ ‑hʋa, bɔ kɔ ‑hɛhɩpʋʋ 'hɔn, ta, ‑ʋʋ ‑tɩɩ ‑do a ‑gbɛ ꞊tu, ɔɔ ꞊tu. 'Bɩa nɛ‑ ɛ 'de, ʋ 'deɛ bʋ po ‑bati a ‑gbɛ.» 2'Na 'wɔ a 'hɔn a nɔnɔ, 'n ya o 'le 'a mʋ ‑wɔn, 'n ‑gbɛ o nahuin 'bii nɩ, kɔ nahuin ꞊nʋ, ‑ʋ nu o dɛ 'kuku. ‑Tɛ ti nɩ lɛ 'mʋ ‑gbo, 'n 'de wɛn 'le a die, kɛɛ, 'nɩɩ lele 'a mʋ 'nɩ ‑gbɛ, ‑ɛ mɔ, 'bɩa 'nɩ di 'le, nahuin 'bii, ‑ʋ nu dɛ 'kuku, 'n diu lɛ poo ‑bati. 3A nye 'nɩ ‑hʋa, 'ke ba yie, 'bɩa ‑Yusu 'Klɩsʋ 'bɔɔ 'le 'mʋ 'mʋ naa, 'bɔɔ 'prɛ. 'Bɩa 'nɩ di 'le, a di dɛ a ‑gbɛ 'nɩ 'ye. ‑Yusu 'Klɩsʋ a ‑gbɛ, 'bɔɔ ‑kʋan nu, 'ke 'le 'a mʋ ‑hɛyri, 'a 'klɩ 'nɩ ‑wɛ ꞊le 'le, 'ɔɔ 'a mʋ 'a 'klɩ a kenɩnɩɛ tɔɔ. 4Ti ꞊nʋ ‑kɔ 'yri ʋ kʋɔ la 'o tu 'yie 'mʋ, ꞊nɩ 'ye ‑nɔ 'nɩ, ɔ 'de 'klɩ kɔ. Kɛɛ, ɔ ‑hɔn 'le 'kʋkʋnyʋ ‑hɛyri 'mʋ nɩ, 'ɔ 'hrɩ 'klɔ. ‑Tɛ ti nɩ lɛ 'mʋ ‑gbo, 'ke 'le Nyɩsʋa a 'klɩ 'kwli 'mʋʋ nɩ, 'ke ɔ nɩ 'le 'klɔ. ‑A ‑mɛ ‑ye, ‑a kɔ ‑Yusu 'hɛɛn, ‑a ‑mʋɛ nɩ. 'A ‑tɩ, 'ke 'le 'pɩa ‑ye ke, ‑a 'de 'klɩ kɔ. Kɛɛ, 'ke 'le 'pɩa ‑ye ke, ɔ kɔ ‑a mʋ 'hɛɛn, ‑a nɩ 'klɔ. 'A ‑tɩ, 'bɩa ꞊ba di 'le 'a mʋ ‑wɔn, Nyɩsʋa a 'klɩɩ nɩ, ‑a di ‑kʋan 'yri nuu.
5'Nɩɩ 'a mʋ 'nɩ le, ba 'jɩjra 'a nɩ dɩɔnʋ ‑tɛɛ, ‑ɛ die nu, a 'mue 'ye, 'bɩa 'ba kuo ‑Yusu ꞊wlʋ ye. 'N pue ‑tɛɛ, a yie nɩ, 'ke ‑Yusu 'Klɩsʋ nɩ 'le 'a nɩ ꞊wlɩ ke. 'N pue ‑tɛɛ, a 'nɩ ‑hre ꞊le nahuin ꞊nʋ wlɔn lɛ, ‑ʋ plɛ, ʋ kuo ‑Yusu ye ꞊wlʋ, 'plɩɩ ‑ye hɩ'ɩ nɩ, ʋ 'dio ꞊wlʋ ye kuo. 6Kɛɛ, 'n pue ‑tɛɛ, a die 'nɩ 'ye, ‑ɛ mɔ, ‑a ‑mɛ ‑ye, ‑a ‑wɛ 'le ‑ba tʋɛ 'a mʋ nɩ, ‑ɛ mɔ, ‑a mʋ mɔ ‑tɛɛ a ‑Yusu a ‑wɔnnaanyʋ'ʋ nɩ. 7Kɛɛ, ‑a 'nɩ ‑hʋɛ ꞊le, ‑ba tʋɛ 'a mʋ, ‑ɛ mɔ, ‑a mʋ mɔ ‑Yusu a ‑wɔnnaanyʋ'ʋ nɩ. ‑Aa da Nyɩsʋa, 'ke 'o 'a mʋ ‑wɔn, ‑ɛ die nu, a 'nɩ ꞊han dɛ 'klan ꞊de nu. Mɔ, ꞊ba 'de 'hru 'ye, 'ke ‑ba tʋɛ 'a mʋ, ‑ɛ mɔ, ‑a mʋ mɔ ‑Yusu a ‑wɔnnaanyʋ'ʋ nɩ, dɛ ‑aa ‑hʋa, nɛ‑ mɔ, ba nu ꞊hapʋdɛ. 8꞊Baa lɛ 'pʋprɛ nu, ɛ 'we ꞊nɔ ye, ‑a 'die 'le ‑wɛ, 'ke 'le ‑a nɩ ‑kʋan 'kwli 'mʋ, ‑ba ‑wɔn ‑tɩ a ‑tɛɛ ye. Dɛɛ ‑do ‑a ‑wɛ 'le ‑ba nu, nɛ‑ mɔ dɛ ꞊nʋ, ‑ɛ 'sii 'o ye. 9'Bɩa 'ba nɩ 'klɩ ke, 'ke 'o Nyɩsʋa a 'hru wlɔn, ꞊betɩ ‑a ‑mɛ ‑ye, ‑ba 'de 'klɩ ke nɩ, ‑ye ‑aa nu 'manʋ. 'A ‑tɩ, ‑aa da Nyɩsʋa, ‑ɛ die nu, ɔ 'mʋ 'a mʋ 'mʋ ‑hɛ, a 'mʋ ye 'mʋ mu, 'ke 'o 'a 'hru wlɔn.
10Ɛ nɩ ke 'mʋ, 'nɩɩ 'a mʋ ‑wɔn 'crɩɩ, ‑ɛ die nu, a 'mʋ 'o dɛ 'kuku a nunue gbo hie, ‑ɛ die nu, 'bɩa 'nɩ nyre 'le 'a mʋ ‑wɔn, 'nɩ ꞊han 'a mʋ 'nyrɛ ꞊hɛn. 'Ɛ mɔ ‑tɛɛ, Nyɩsʋa ‑nyi 'mʋ 'klɩ, 'ke ꞊bo ‑ha 'le 'a mʋ lɛ. Kɛɛ, ɔ 'de 'mʋ 'klɩ ‑nyi, 'ke ꞊bo ‑wɔ 'a mʋ gbo. Kɛɛ, ɔ ‑nyi 'mʋ 'klɩ nɩ, ‑ɛ die nu, 'mʋ 'a mʋ 'mʋ ‑hɛ, a 'mʋ ye 'mʋ mu, 'ke 'o Nyɩsʋa a 'hru wlɔn.
11'Na 'dɩayuo ‑a. 'N gba 'klɛɛ 'a mʋ wlu. 'Nɩɩ 'a mʋ 'nɩ le, 'ke ba mu ye 'mʋ, 'ke 'o Nyɩsʋa a 'hru wlɔn. Ba ‑nyinyi 'klɩ. Ba kɔ win a 'mʋlɛ'wʋnwɔnlɛ, kɔ, ba kɔ kegbowɛɛnlɛ. 'Bɩa 'baa lɛ 'a nunue nu, ‑ye Nyɩsʋa, ‑ɔ nʋɛ ‑a mʋ 'mʋ, kɔ, ‑ɔɔ ‑a mʋ kegbowɛɛnlɛ ‑nyi, ɔ di 'o 'a mʋ ‑wɔn 'nɩ nɩ.
12Ba ‑nyinyi 'wio ‑tɛɛ, ‑ɛ 'we ꞊nɔ 'dɩayuo ye. Nyɩsʋa a nahuin 'bii ‑gbo, ‑ʋ nɩ nɔ, ʋ ꞊gba 'a mʋ wlɔn lɛ ‑tɛɛ.
13'Nɩɩ da Nyɩsʋa, 'ke 'o a 'bii a ‑ta 'mʋ, 'ke ‑a nɩ Kʋkɔnyɔ ‑Yusu 'Klɩsʋ bɔ 'cipi 'o, bɔ nu 'a mʋ ꞊hapʋdɛ 'mʋ, kɔ, Nyɩsʋa bɔ ‑nyi 'a mʋ 'a 'mʋnʋɛlɛ, kɔ, Nyɩsʋa a ‑Hihiu bʋ nue, ba ‑mʋɛ.
Právě zvoleno:
2 Kolɛtɩkʋɛ 13: ted
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 1995, Wycliffe Bible Translators Inc. All rights reserved.