Oblíbené biblické verše z Filipenses 2

Sdílet

Nuna mayikiwan ama chikinakuyëtsu ni yachaq tukuyëtsu, sinöqa pïmëtapis allipaq churar respetayë. Kikikikunalla alli kawayänëkipaq yarpakachäyänëkipa rantin wakinkunapis alli kawayänanpaq yarpakachäyë.

Jesucristo kawashqannö qamkunapis kawayë.

Pëqa Dios këkarpis manam ciëlullachötsu täkurqan. Puëdiq këninta jaqirirmi imëka sirwikuq nunanölla kananpaq noqantsiknö yurikurqan. Nuna karmi Teyta Dios munashqanta rurar cruzchö wanurqan.

Pë munashqannö kawayänëkipaqmi alli yarpëta y poderta kikin qoyäshunki.

Tsëmi Teyta Dios pëta churashqa llapanpitapis mas puëdiq kananpaq. Pëpa shutin churarqan llapanpitapis mas poderyuq kaqtam. Tsëmi ciëluchö kaqkuna, patsachö kaqkuna y infiernuchö kaqkunapis Jesucristuman qonqurikuyanqa. Tsëchömi pïmë nunakunapis niyanqa Jesucristo Señornintsik kashqanta. Tsënö nirmi Teyta Diosta llapanpis alabayanqa.

Mana penqapänakushpa y mana liryakushpa imëpis shumaq kawakuyë. Tsënö kawayaptikiqa Diospa wamran kayashqëkita käyikurmi pipis mana wasëki rimayanqatsu. Tsëmi mana cäsukuqkunapa markanchö tärarpis imëka paqaschö aktsi cuenta kayanki.

Kuyë wawqikuna y panikuna, tsënö këkaptinqa qamkunawan këkar yachatsiyashqaqkunata cäsukuyashqëkinölla karuchö këkaptïpis cäsuyämë. Salvashqana kayashqëki musyakänanpaqqa Teyta Diosta mantsakur llapan shonqïkikunawan pë munashqannö kawakuyë.