Oblíbené biblické verše z 1 Corintios 12

Sdílet

As ni taq' u Tiixhla Espíritu vib'a'nile' sqe skujununilaj, ti' uva' la kuloch ve't qib' sukuvatzaj.

Esti'e' ni val sete, tan ech qatine' k'atz u Cristoe' eche' b'an ta'n u kuchi'ole', tan unvatzul kuxh qatine' sukuvatzaj tuk' u Cristo.

Tan asoj ni paleb'e unb'ooj u kuchi'ole' umaj k'axk'o, as kajayil chit u kuchi'ole' ni nachon u ch'o'me'. Asoj la ik'ul unb'ooj u kuchi'ole' umaj b'a'nil, as kajayil chit u kuchi'ole' nichiib' ve'te'.

Tan at unq'a qitz'in qatzike' uva' aq'el itxumb'al ta'n u Tiixhla Espíritu. As ati uva' ni taq' u Tiixhla Epíritue' itxumb'al ti' talat isuuchil u yole' uva' kat ik'uch Aak ste. As ati uva' at k'ujleb'al ik'u'l ta'n u Tiixhla Espíritu ti' ik'uchat u nimla b'a'nile' uva' tetz u Tiixhe'. As ati uva' ni tx'olon ib'a'nxisat unq'a aach'o'me' ta'n u Tiixhla Espíritu. As ati uve' kat taq' u Tiixhla Espíritu itxumb'al ti' ib'anat unq'a k'uchb'al tetz vib'a'nil u Tiixhe' uva' xo'veb'al chittu'. As ati uva' at itxumb'al ti' talat isuuchil viyol u Tiixhe' ta'n u Tiixhla Espíritu. As ati uva' kat taq' u Tiixhla Espíritu itxumb'al ti' ipal stuul ma tetz Tiixh u yole' uva' ni talpe' moj ye'le. As ati uva' kat taq' u Tiixhla Espíritu ti' iyolb'et ka't yolb'al. As ati uva' kat taq' u Tiixhla Espíritu itxumb'al ti' talat isuuchil unq'a yole' uva' ni talpu tu uma't yolb'al.

As jank'al unq'a b'a'nile' uve' aq'el te unq'a qitz'in qatzike', as uma'l kuxh u Tiixhla Espíritu ni aq'on ste. As Aake' ni jatxon unq'a tijle'me' xo'l unq'a qitz'in qatzike' tuk' vitxumb'ale'. As Aak kuxhe' ootzin tetz ab'il la taq' Aak ste.

Aq'al uva' ye' la tal umaj u kuchi'ole' teesat tib' k'atz unq'a imoole'. Pet eela chit la el u kuchi'ole' svatzaj ti' ilochat tib' skajayil.

As jit eela unq'a qijle'me' uve' ni taq' u Tiixhla Espíritu sqe. As uma'l kuxhe' u Tiixhla Espíritu uve' ni aq'on sqe. As jit eela unq'a aq'one' uve' nu kub'ane' ti' toksal iq'ii u Tiixhe'. As uma'l kuxh u kuB'ooq'ole' uve' ni aq'on u qaq'one'. As jit eela unq'a b'a'nile' uve' at kan sukuxo'l. As uma'l kuxhe' u Tiixhe' uve' ni b'anon unq'a b'a'nile' skajayil sukuxo'l.

Pet kat taq' ve't u Tiixhe' qijle'm, o' uva' o' niman tetz Aak. As at o' uva' o' apóstol. As at o' uva' o' q'ajsan tetz viyol u Tiixhe'. As at o' uva' o' chusunaal. As at o' uva' ni k'uchun unq'a nimla b'a'nile' uva' tetz u Tiixhe' uve' nim talche'. As at o' uva' ni b'a'nxisan unq'a aach'o'me'. As at o' uva' at kutxumb'al ti' kulochat u kumoole'. As at o' uva' ni ilon isuuchil unq'a qitz'in qatzike'. As at o' uva' nu kuyolon tu uma't yolb'al.

As eche' u kuchi'ole' tan ye'le uva' uma'l kuxh koj ni taq'onvukat. Pet kalab' kuxh taq'on ati.

Pet jit'e'che' tan ab'iste u tetz u kuchi'ole' uva' b'iil kuxh ni taq'onve' uva' ni qile', as a'e' uve' pal chit itxakon sqi'.

Tan asoj ta'n kuxh u b'aq' kuvatze' at ti' u kuchi'ole', as eche' la koj uch qab'in ve'te'. Asoj ta'n kuxh u kuxikine' at ti' u kuchi'ole', as eche' la koj uch kusijon ve'te'. As Tiixh kat k'ujb'a'n kan uva' ab'iste u taq'on u kuchi'ole' nib'an sijununila, eche' uva' nisa' Aak. Tan asoj uma'l kuxh ni taq'onvukat u kuchi'ole' skajayil, as va'len ve't tilone' u kuchi'ole' la ib'ane'.