Oblíbené biblické verše z Rum. 8

Sdílet

Yus anea asakrin ashí naṉkatamjinia nuja̱i̱ Yus pujurtamji. Tura nuja̱i̱ péṉker awajtamji. Nu paant nékaji. Tura Ni wakerimia núnisaṉ Ní shuar awajtámsaitji.

Kristu aneṉkrattairi̱ya̱ akantámkitin peṉké atsawai. Nuna ti paant nékajai. Jákatniusha, iwiaakmasha, nayaimpinmaya̱ suntarsha, ashí nayaimpinmasha tura nuṉkanmasha akupin ainia nusha, yamái írunna nusha, ukunam átatna nusha, yakí̱ írunna nusha, nuṉká írunna nusha, kame ashí Yus najanamu írunna nusha Yusa aneṉkrattairi̱ya̱ peṉké akantámkichminiaitji. Yusa aneṉkrattaisha ii Uuntri̱ Jesukrístu túrunamuja̱i̱ paant wainji.

Nu arantcha ii kakarmachu nekapeakrin Yusa Wakaní̱ yáintmaji. Kame Yus áujsatniusha nékachkurin iin yáintmaji. ¿Warí seattajⁱ tura itiur seatjik? Nu nékatsji. Tura itiurchat pujakur ti wáitiakrincha Yusa Wakaní̱ iin áujturmaji.

Wats, nuikia Yus iin yáintmakrin ¿yaki iin nupettamkattajⁱ?

Túrasha yamaikia Jesukrístuja̱i̱ tsaniṉkiaru áinianka Yuska “tunaan túrawar jákatniunam wétin áiniawai” tatsui. Nu shuar ni aya̱shi̱ wakerana nuna umirtsuk antsu Yusa Wakaní̱ wakerana nuna umirainiawai.

Aya̱shnia nuna enentáimtuinia nú shuar jákatniunam wénawai. Antsu Yúsnan enentáimtuinia nuka Yusja̱i̱ shiir nawamnaikiar tuke pujusártatui.

Tuma ai̱ṉ Kristu iin anenma asakrin Niji̱a̱i̱ ti nupetmakuitji.

Maa, yamái ti wáitiakrisha ukunmaṉka nayaimpiniam ti shiir pujakur nu wáitsamu kajinmátkittiaji.

Kristu ti anenma asakrin iin akantámkitin atsawai. Wáitiakrisha, itiurchat íṉkiuakrisha, shuar áintramkurnisha, tsukamakrisha, entsatai̱ atsakuisha, tsuumainja̱i̱sha tura mantamnakrisha nuja̱i̱ “Kristu anentsui” tíchamniaitji. Nuka Kristu aneṉkrattairi̱ya̱ akantámkitin jeatsui.

Tura Yus ii enentái̱n enentáimtaj nuna nékaiti. Tuma asa ni shuari̱ asakrin ni Wakaní̱ ni wakeramuja̱i̱ métek seatramkurin ántawai.

Ashí shuar Yusa Wakaní̱ timiaja̱i̱ métek wekainia nu, nu shuar nekas Yusa uchirí̱nti.

Aya̱sh wakeramun umirainia nu, aya̱shnia nunak enentáimtuiniawai. Antsu Yusa Wakaní̱ wakeramun páchinia nuka Yúsnan enentáimtuiniawai.

Ni Uchirí̱ncha suritramkachmiaji antsu ashí iin jarutramkarat tusa akuptúrmakmiaji. Tura asa ni Uchirí̱ji̱a̱i̱ ashí ti shiira nuna suramsashtatjik.

Nu Wakan “nekas Yusa uchirí̱nme” ii enentái̱n túramji. Tura ni uchirí̱ ajasu asakrin Yus timia núnisaṉ ashí Níniun suramsattaji. Krístun ashí susattana núnisaṉ iincha suramsattaji. Yamái Krístunu takaakur wáitiakrikia ukunam Krístuja̱i̱ métek ti shiir awajnástatji.

Aya aya̱sh wakeramun enentáimtuinia nú shuar Yusa nemasri̱ áiniawai. Yus akupeamun nakitiáinia ásar ni táman umirkatniun peṉké jeainiatsui.

Tsawant jeamtai Yus ashí ni shuari̱n Niji̱a̱i̱ métek ti shiir awajsártatui. Nuiṉ nekas Yusa uchirí̱ ainia nu ti paant nekanattawai. Nu tsawantan wáinkiatniun ashí Yus najanamu írunna nu ti nákainiawai.

Yamaisha ashí Yus najanamu ainia nu, nuwa̱ jatema waitia núnis ti wáitiainiawai.