Oblíbené biblické verše z Rum. 1

Sdílet

Nu uwempratin chicham Yusa kakarmari̱ji̱a̱i̱ ti kakaram asa ashí shuaran Krístun nekas enentáimtuinia nuna uwemtikramniaiti. Tuma asamtai natsantatsjai. Nekas Israer shuarnasha tura chíkich shuarnasha núnisaṉ uwemtikramniaiti.

Nu chichamnum Yus enentáimsamia nu páantaiti. Ju̱i̱ti, áyatik Yusan nekas enentáimtuiniakui Yuska “péṉkeraitme” tíminiaiti. Yus Papiniumsha núnisaṉ tawai “Yusan nekas enentáimta nuna Yus ‘péṉkeraitme’ tutai tuke Yusja̱i̱ shiir wekasattawai.”

Kame yámankamtaikniumia̱ Yus wáinchataitiat ni najanamuri̱ji̱a̱i̱ ju̱ka paant nekaamniaiti. Nekas Yus asa tuke kakarmaiti. Nusha ti paant asamtai nu shuar tsaṉkurnarchartatui.

Yusan nékainiayat shiir awajsacharmiayi tura yumiṉsacharmiayi. Tuma ásar aya antra nunak enentáimtuiniak ni enentái̱ tunaaja̱i̱ piakai.

Yusna imiá nekasa nuna nakitrar antsu wait chichaman anturkar nuna túrin áiniawai. Yusak tuke shiir awajsatniun iniaisar antsu ni najanamun tikishmátainiak shiir awajénawai. “Antsu tuke Yusak shiir awajnásti” tajai.

Shuar nekas chichaman nakitrar yajauchin túrataj tusar surimiainiawai. Túrawar tuke tunaarintin áiniawai. Nu shuaran Yus ti kajerkar ti asutiátniun nayaimpinmaya̱ paant awajsaiti.

Nuna túrin ásarmatai Yus natsanmainia nuna wakeruktinian tsaṉkatkarmiayi. Túramtai nuwa̱sha áishmaṉja̱i̱ tsaniṉtinian nakitrar nuamtak yajauch awajnáiniawai. Núnisaṉ áishmaṉsha nuwa̱ja̱i̱ tsaniṉtinian iniaisar nuamtak áishmaṉkak tsanirmanainiawai. Ti wakerunainiak ti natsanmainia nuna yajauch túrunainiawai. Tura yajauch túruiniak ni aya̱shi̱ wáitsatniunak sumamawarmiayi. Tura tuke Yusan nakitiáinia asamtai ti yajauch enentáimiainiak peṉké túrachminia nuna túrawarti tusa Yus tsaṉkatkarmiayi.

Tura tí nekajai tuíniayat enentáimcha núnin ajasárai. Túmainiak jákachmin Yus imiá shiira nuna iniaisar shuar jakamnia nakumkamun shiir awajénawai. Tura nu arant nanamtinniasha napincha kuntinniasha yajasmancha nakumkar nuna shiir awajénawai.