Oblíbené biblické verše z Тархъанлъи 10

Sdílet

БЕТӀЕРГЬАНАС Мусада абуна: «ПиргӀавнасухъе а. ПиргӀавнасулги гьесул цересел гӀадамазулги ракӀазулъе Дица согӀлъи биччазе буго, гьезда гӀаламатал рихьизаризе рукӀине, ва дуцаги хадубккун лъималазда ва гьезулги лъималазда бицине букӀине Дица цӀоб тун мисриязе гьабураб жазаялъул ва гьезда рихьизарурал хӀикматазул. Гьебмехалъ нужеда лъан букӀина Дун БЕТӀЕРГЬАН вукӀин».

БЕТӀЕРГЬАНАС Мусада абуна: «Зодобе квер борхе ва Мисриялде бецӀлъи рещтӀине буго – лахӀчӀегӀераб бецӀлъи». Мусаца зодобе квер борхана, ва лахӀтугӀан чӀегӀераб бецӀлъи рещтӀана тӀолабго Мисриялде лъабго къоялъ. Лъабго къоялъ гӀадамазда кӀолеб букӀинчӀо я цоцада рихьизе, я чӀараб бакӀалдаса доре-гьанире рагъаризе. ГӀизраилазулин абуни, ай гьезул чӀей бугеб бакӀалда, канлъи букӀана.

Мусаца Мисриялде тӀаде гӀанса борхана ва БЕТӀЕРГЬАНАС ракьалде тӀаде биччана бакъбаккул гьури. ТӀубараб сордо-къоялъ гьури пуна ва рогьалиде гьороца босун бачӀана гарцӀ. Кутакалда гӀемераб гарцӀ тӀаделъана Мисриялде ва гьелъ тӀолабго улка цӀезабуна. ГарцӀазул гьединаб чабхъен цебеккун киданиги букӀинчӀо ва хадубккунги киданиги букӀине гьечӀо.