Oblíbené biblické verše z Abharuumi 8

Sdílet

Tumanyiri ega, Waryubha arakora amangʼana gonsego okureeta amajomu, kubhantu bhonsego bhanú bhamuhanjiri, bhanú bhaabhirikirwa okurekana na obhwendi bhwaye.

Mmanyiri kwa obhuheene ega, kitariho ekintu kinú kiratura okutwahukanʼya na obhuhanje bhwa Waryubha. Kora bhakaabha bhamaraika, kasi abhatungi bhanú bharingi mumasaaru, kasi ebhibhumbwa bhya eginguru, kasi amangʼana ganú gareebhuka kwibhaga rinu kasi kwibhaga rinú riraaja, kasi kyokyonse kinú kiringi murwire, kasi mukyaro kya abhaku, kasi ekintu kyokyonse mukyaro munu. Waryubha arigendererya okutuhanja, nyoore turingi abhahoru, kasi tukwiri. Obhuhanje bhuyo, abhutubhwiri kubheetu okuhitira ku Kiristu Yeesu, Omukuru weetu.

Hamwi na gayo, Omutima Omurabhu ngʼo aratubheera obhunyooheeru bhwetu. Bheetu tutamanyiri okumusabha Waryubha kya ego ereenderwa, nawe, Omutima Omurabhu omwenego, ngʼo aratusabhira ku Waryubha kwa ekiriro kya obhusurumbaru kinú kitakutura okugambwa.

Mbe bhoono, tugambe-ki eguru ya amangʼana gayo? Nyoore Waryubha aringi orubhaara rwetu, niwi aratura okutuhiga?

Mbe bhoono, Waryubha ataribhajibhya abhantu bhanú bhagwateeni na Kiristu Yeesu.

Abhantu bhanú bharoorokereribhwa na ameetegeerero ga obhusimuka bhwa okukora obhusarya, bharanyoora oruku rwa koko. Nawe, abhantu bhanú bharoorokereribhwa na ameetegeerero ga Omutima Omurabhu, bharanyoora obhuhoru bhwa koko na omurembe.

Nawe, kora nyoore gayo gonsego garatuujira, bheetu turagendererya okuhiga bhukongʼu, kwa okubha turabheerwa na Kiristu unú atuhanjiri.

Oni niina obhuheene ega, enyanko yeetu ya eribhaga rinu, etaringi ekintu, nkaairingʼaanʼya na obhukuru bhunú Waryubha arituhaana kwibhaga rinú riraaja.

Bhoono n-kintu-ki kinú kiratura okutwahukanʼya na obhuhanje bhwa Kiristu? Kitariho! Kora nyoore ekaabha enyanko enduru, ekaabha entambara, ekaabha etaabhu, ekaabha enjara, ekaabha okubhurwa emyenda, ekaabha engʼanga ya oruku, kasi okwitwa.

Waryubha unú areekomya gonsego ganú garingi mumitima gya abhantu, ngʼo amanyiri ameetegeerero ga Omutima Omurabhu, kwa okubha Omutima uyo, arasabhira abhantu bha Waryubha kya ego Waryubha ahanjiri.

Bhonsego bhanú bharoorokereribhwa na Omutima wa Waryubha, bhayo mbo abhaana bha Waryubha.

Abhantu bhanú bharoorokereribhwa na obhusimuka bhwabho bhwa obhusarya, obhungʼeeni bhwabho bhuhanjiri okukora obhusarya. Nawe, bhanú bharoorokereribhwa na Omutima Omurabhu, obhungʼeeni bhwabho bhuhanjiri okukora amakorwa ganú garangʼarira Omutima Omurabhu.

Waryubha ataamumaahira ekyabhira Omwana waaye omumwemwe, nawe, yaamuruusya naho akwe kurusumo rwetu bhonsego. Nyoore yaakora ego, bhoono, atarituhaana amajomu agandi gonsego?

Omutima uyo omwene arakomererya mumitima gyetu ega, bheetu m-baana bha Waryubha. Mbe, kwa okubha bheetu m-baana bha Waryubha, tubheeri abhagabhi bhaaye. Turinyoora engabho yeetu hamwi na Kiristu. Na kwa okubha turasanga munyanko hamwi na Kiristu, kweki turigungibhwa hamwi nawe.

Abhantu bhanú bharoorokereribhwa na obhusimuka bhwabho bhwa obhusarya, bhayo m-basigu bha Waryubha. Bhatakwikirirya okugwata amaragiriryo gaaye, kweki bhatakutura okugagwata.

Ebhibhumbwa bhyonsego bhinú bhyabhumbwa, bhiraganyirira kwa enamba enene eribhaga rinú Waryubha aryorokya, kya ego bharingi abhaana bhaaye.

Tumanyiri ega, okuhikira bhoonwego, ebhibhumbwa bhyonsego bhirakuura bhukongʼu kwa obhururu, kya omukari unú ararumwa obhusungu kwibhaga rya okwibhura.