Oblíbené biblické verše z Looma 1

Sdílet

Me a handi na tsonyi mu uyabisa Musamu wu Mubwe ve, mu tooni ati, Musamu wu mubwe ni matwala ma Nzambi ali mu usalila, mu uyobolo pasi nde wu bibaayaka mu usiila nde imiinu. Hati a tsomi mu Bayudaayo, titswene mu Bangeleke.

Mu mbuli, Musamu wu Mubwe bibaayaka mu umweese bunuubu: Nzambi ubatsikaha butsiitsa bwa baatu, mu taangu yi bo bali mu usa hiitu mu nde, we bu basonehe mu Libuuku la Ngidi: «Mutsiitsa uba moonyi mu imiinu.»

Mu tooni ati, umata bu Nzambi havangi tsi, mbiili a nde yi yibavelemonehele, yi yili matwala ma nde ma nzyeni, na bu nde ali, bibamonehele mu mavaanga ma nde. Ni mu buuna, bo utwala uleele ve ti, bo a bayaabi ve.

Bo bayaabi Nzambi. Ka bo a bubakiinza nde ve, na bo a bubayusa nde we bu hwafwana ve. Bo bamiidunga hutso matsimi ma maavele lisuunga, na mitima mya bo, mi myavele buyedi, myamiisohomo hutso a pipidi.

Bo bubasobo imbuli hya Nzambi mu mapfuta, bo bubakunda na bubaasalila mavaanga ma Nzambi ŋa mbuha Muvaangi a tsi, wu bu baayuusa mu bilima na bilima. Amen!

Umata hu yulu, Nzambi ubamweese kesi a nde huli baatu ba bubaveleyusa nde na ba bubaavaanga ma mabi. Bo bali mu upfubaha imbuli mu ngaabi a bo.

Ni mu buuna, Nzambi hayeholo bo mu ubaavaanga ma tsumihili. Bakadi ba bo, a bali mu ubwepfuuta taangi na balumi ba bo ve, buuna bo ubapfuuta taangi aka bomo na bomo bakaasu. Bumosi kaka huli babahala, bo a bali mu ubwepfuuta taangi na bakadi ba bo ve. Bo bali na peyu yindahi mu upfuuta taangi bomo na bomo babahala. Maana mavaanga ma tsonyi bo bali mu usa, na bo bali mu uyaka tsyembili yi yaayelemene mu udunga hwa bo. Bu bo babisi uyaaba Nzambi, Nzambi atiimbi bo ŋa busu bu buyedi bwa bo bu bwadunga, na bo bali mu uvanga ma maavelefwana.

Bo bali mu ubinuha ti bo na buyedi, ka bo bamiiyama maladi. Ŋa mbuha uva muyusu huli Nzambi wu avelekwa, bo bubakunda bifwita, bifwaani bya baatu ba bubakwa, banyunyi, banyama ba miilu mina, na banyama ba bubayene mu bali.