Oblíbené biblické verše z लुका 6

Sdílet

आपो ता तमने बी भगवान आपहे: माणहु डाबी-डाबीन, अने हीलाय-हीलाय्‌न ह़ीग लगाड़ीन तमारा खोळा मे पोखड़हे; काहाके जे माप सी तमु मापहु तीहयात माप सी तमारी वाटु बी मपायहे।”

भलाय करवा वाळो माणेह आह़फा ना मन मे गेथी भलाय नी वात नीकाळे; अने कुहर्‌यो माणेह आह़फा ना मन मे गेथी कुहराय नी वात नीकाळे; काहाके जे मन मे भरायलु रेय तीहयु तीना मन मे गेथु नीकळे।

पण आपणा वेरी ने मोंग करो, अने तीमनी भलाय करो: अने मे कोयने एमेत आपही तां तीहयु पासु लेवा नी आह करीन नी आपु। अने ता तमने घणु मोटु ईलाम जड़हे; अने तमु आखान डायला भगवान ना सोरा-सोरी बण जहु, काहाके भगवान तीमनी पोर गीण करे जे भगवान पांह गेथु हात करीन बी भगवान ने घणो वारु से नी केय, अने तीमनी पोर बी गीण करे, जे कुहराय कर्‌या करे।

जीसम तमारो ह़रग वाळो बाह गीणाळ्‌ळो से तेमेत तमु बी गीणाळ्‌ळा बणो।

“अने कोयनो नीयाव ना करो, ता तमारो बी नीयाव नी हये; तमु कोय पोर गुनो ना लगाड़ो ता तमारी पोर बी गुनो नी लगाड़े। बीजा ने माफी आपो ता तमने बी माफी जड़ जहे।

पण मे मारी वात ह़मळन्‌या ने केम: “आपणा वेरी ने मोंग कर; जे तमारी कुहराय करे, तीमनु भलु कर, जे तमने सराप आपे, तीमने तमु बरकत आपो। जे तमारो वाक काडीन तमारु आबरु लेय तीमनी जुगु वीन्‌ती करो।

अने जे वेहवार नी हेर तमु बीजा सी कर र्‌या; तीहयो वेहवार तमु बीजा ह़ाते बी कर्‌या करो।”

जे तमारा एक गाल्‌या पोर थापड़ देय, तीनी भणी आपणु बीजु गाल्‌यु बी ह़ाम्‌बु कर देवो। जे तमारो कोट हापकीन डगलु बी हापकवा हीन्‌डे, तीने मारु डगलु ना हापके करीन नी केजो। जे तमारी पांह कंय मांगे, तां तमु तीने आप देवो अने जे तमारी पांह तारी चीज हापकी लेय, तीनी पांह पासु मांगवा नु हेर नी करजो।

“कानु बी वारलु झाड़ आसवु नी हय, जीनी मे रीकामा फोळ लागे, अने कानु बी रीकामु झाड़ आसवु नी हय, जे वारला फोळ लावे।

आखा झाड़ नी ओळखाण तीमना फोळ नी लारे हये। काहाके माणहु कटाळस्‌या झाटवा मे गेथा, गुलर ना फोळ नी तोड़े; अने कटाळस्‌या झाड़ मे गेथा अंगुर नु फोळ नी तोड़े।