Oblíbené biblické verše z Filipi 1

Sdílet

Tuhan Allah so mulai bakarja pa ngoni pe hati, Dia bakarja beking tu bae pa ngoni, kong kita yakin butul kalu Dia mo se trus tu karja itu sampe klar, sampe di hari Kristus Yesus datang ulang.

Kong kita basombayang akang for ngoni, kita minta pa Tuhan supaya lebe hari tu ngoni pe basayang pa orang lebe tatamba, ngoni lebe mampu mangarti banya hal, deng lei ngoni bole mo se beda mana yang butul deng yang nyanda butul. Deng bagitu ngoni bole tau mo pili mana yang paling bae supaya ngoni bole hidop deng hati yang bersi, kong di hari Yesus Kristus datang ulang, ngoni nyanda ada sala apa-apa.

Soalnya for kita, kita hidop cuma for Kristus, kong kalu kita mati, itu kita pe untung lantaran kita bole mo sama-sama deng Kristus.

Tiap kali kita inga pa ngoni, kita bilang makase pa Tuhan Allah tu Tuhan yang kita ja semba.

Jadi yang penting skarang, ngoni musti hidop sama deng tu cara hidop yang pantas for tu orang yang so percaya tu Kabar Bae tentang Kristus. Ngoni musti hidop sama deng itu supaya kalu kita pigi pa ngoni ato kalu kita blum sempat pigi pa ngoni, kita bole tau kalu ngoni samua tetap kuat percaya deng samua satu hati, ngoni sama-sama berjuang se tau tu Kabar Bae pa orang-orang supaya dorang bole jadi percaya.

Kita baharap deng yakin kalu kita nyanda mo malo deng apa tu kita da beking di samua hal, kong itu no tu kita pe keinginan lei yang paling dalam. Mar kita baharap trus supaya kita brani for beking tu Yesus da suru pa kita sama deng tu kita da beking dari dulu. Jadi for kita, nyanda masala kalu kita mo hidop ato mo mati, yang penting tu Kristus bole mo dapa hormat dari apa tu kita da beking pa kita pe hidop.

Soalnya Tuhan Allah so bantu pa ngoni supaya jadi percaya pa Kristus, mar bukang cuma itu, supaya lei ngoni bole rasa tu siksa lantaran ngoni percaya pa Dia.