Oblíbené biblické verše z Galatia 5

Sdílet

Mar tu orang yang iko tu Roh Kudus pe mau, tu Roh Kudus mo bantu pa dia hidop rupa ini: ja basayang, sukacita, hidop deng hati tenang, pangsabar, pangbae, ja beking tu bae, bole mo percaya akang, lemah lembut deng bole kuasai diri sandiri. Nyanda ada atoran yang se sala tu orang yang ja beking bagitu.

Kita pe maksut bagini: ngoni musti hidop iko tu Roh Kudus pe mau, kong deng bagitu ngoni nyanda mo beking tu keinginan yang nyanda bagus.

Kalu tu Roh Kudus so kase hidop yang baru pa torang, mari jo torang hidop iko tu Roh Kudus pe mau.

Sapa jo yang so jadi Kristus Yesus pe orang, dia itu so nyanda beking tu keinginan yang nyanda bagus deng tu nafsu yang besae, itu bole mo se sama deng dia so se mati tu sifat itu di kayu salib.

Tu keinginan-keinginan yang nyanda bagus, itu dapa lia dari kalakuan yang rupa ini: ja baseks bebas, beking tu kalakuan yang caparuni, beking tu hal-hal yang nyanda pantas for beking, ja basemba hal laeng yang bukang Tuhan, pake ilmu sihir, binci pa orang laeng, ja baku ambe, mangiri pa orang laeng, pangmara skali, cuma pikir diri sandiri, suka beking orang-orang tapica-pica deng baku beda pendapat sampe baklompo-klompo, mangiri sampe badendam, pangmabo, beking pesta mabo-mabo sampe beking tu hal-hal sambarang, deng hal-hal laeng yang nyanda bagus lei. Tentang samua tu hal-hal nyanda bagus itu, ni hari kita se inga ulang pa ngoni sama deng tu kita so perna bilang pa ngoni waktu dulu lei, kita bilang bagini: orang yang hidop ja beking tu hal-hal itu, dia nyanda mo dapa bagean waktu Tuhan Allah Berkuasa sbagai Raja pa Dia pe orang-orang.

Sudara-sudara, Tuhan Allah so pangge pa ngoni for iko pa Dia supaya ngoni bole bebas dari taika deng tu atoran-atoran itu. Cuma ngoni jang bapikir kalu ngoni so bebas trus ngoni bole beking tu kalakuan yang nyanda bagus iko apa jo tu ngoni suka, bukang bagitu kasiang. Mar yang butul, ngoni baku-baku sayang jo deng baku-baku bantu jo.

Tu keinginan yang nyanda bagus, itu baku malawang deng tu keinginan dari Roh Kudus. Bagitu lei deng tu keinginan dari Roh Kudus, itu baku malawang deng tu keinginan yang nyanda bagus. Soalnya tu keinginan yang nyanda bagus deng tu keinginan yang dari Roh Kudus baku malawang, sampe itu beking torang nyanda beking tu hal-hal yang torang suka mo beking.

Soalnya tu dasar dari samua atoran di kitab Taurat bagini, “Sayang jo pa orang laeng sama deng ngoni sayang pa ngoni pe diri sandiri.”

Torang jang angka-angka diri sandiri, jang torang baku pancing mara, kong jang torang baku mangiri.

Sudara-sudara, Kristus so se bebas pa torang dari tu atoran-atoran di kitab Taurat, so itu no torang memang so bebas. So lantaran itu torang musti tetap kuat deng tu torang pe percaya pa Dia, kong jang se biar lei tu torang pe diri jadi budak ulang taika deng tu atoran-atoran kitab Taurat itu.