Oblíbené biblické verše z Efesus 1

Sdílet

Kita minta lei pa Tuhan Allah supaya se trang tu ngoni pe hati, deng supaya ngoni bole mangarti butul tentang tu harapan for mo dapa slamat dari Tuhan Allah tu da pangge pa ngoni for iko pa Dia. Deng kita minta lei pa Dia supaya ngoni lei mangarti butul kalu pe luar biasa skali tu samua yang Dia so janji mo kase pa Dia pe orang-orang. Trus kita minta lei pa Tuhan Allah supaya ngoni bole mangarti butul kalu pe hebat skali tu Dia pe kuasa yang bakarja pa torang yang percaya. Tu kuasa itu no tu Tuhan Allah pe kuasa yang luar biasa skali, yang Dia da pake waktu Dia se hidop ulang pa Kristus sampe Kristus taangka ka sorga kong dudu di tampa yang paling terhormat di sabla kanan dari pa Tuhan Allah. Tu kuasa itu so ada pa Kristus, kong kuasa itu jao lebe tinggi dari samua kuasa yang ada, jao lebe tinggi dari samua yang pegang prenta, deng jao lebe tinggi dari samua yang berkuasa di bumi deng di langit. Dia berkuasa bukang cuma skarang, mar Dia berkuasa sampe slama-lamanya.

Soalnya seblum Tuhan Allah beking ni dunia, Dia so pili pa torang for mo percaya pa Yesus Kristus. Dia pili pa torang supaya torang bole hidop kudus deng nyanda ada sala apa-apa di muka pa Dia. Tuhan Allah sayang pa torang, so itu dari lei dulu skali Dia so tentukan torang ini jadi Dia pe anak-anak. Torang jadi Dia pe anak-anak itu lewat Yesus Kristus, itu no tu Dia pe mau yang Dia suka beking.

Yesus Kristus mati kong Dia pe dara tacura, kong lewat Dia pe dara itu Tuhan Allah se bebas pa torang dari torang pe dosa-dosa lantaran torang so percaya pa Kristus, jadi torang bole dapa ampung dari torang pe dosa-dosa. Kong samua itu torang dapa lantaran Tuhan Allah pe sayang pa torang yang pe basar skali.

Mari jo torang puji pa Tuhan Allah, Dia itu Bapa dari torang pe Tuhan Yesus Kristus. Dia so kase samua berkat rohani dari sorga pa torang lantaran torang so percaya pa Kristus.