Oblíbené biblické verše z Риминхн 1

Sdílet

Би Сән Зәңгәс ичҗәхшв. Энтн иткдг улсиг цугтаһинь аврхин төлә бәәх Бурхна күчн. Хамгин түрүнд Сән Зәңг евреймүдиг, дарунь буру номта улсиг аврна.

Бурхн яһҗ күүг чик седклтә кедгиг Сән Зәңг үзүлҗәнә. Энүг эклцәс авн сүл күртл Бурхн иткләр дамҗад кенә. Энүнә тускар: «Иткләр дамҗад чик седклтә болсн күн җирһх» гиҗ бичәтә.

Делкә үүдснәс авн Бурхна үзгддго бәәдл, Терүнә мөңк күчн болн заң-бәрц үүдәлтәрнь хәләхлә медгднә. Тиигәд әмтнд бийән харсхин төлә келдг үг уга.

Бурхиг тедн медсн бийнь Бурхн гиҗ туурулсн уга, Терүнд ханлтан өргсн уга. Теднә ухань хоосн. Теднә ухан тату, толһань хар санаһар дүүрв.

Иим улс Бурхна туск үнниг худлас сольв. Үүдәчд биш үүдәврт тедн шүтәд церглдг болв. Олн әмтн Үүдәчиг мөңк туурултха. Тиигтхә!

Күүнә зарһ яһҗ кехән Бурхн үзүлв. Цуг кесн килнцәрнь болн му йовдл һарһсарнь Бурхн әмтиг засглх. Учрнь: Бурхна туск медрл теднд ил, яһад гихлә, Бурхн эн медрл теднд секв. Зуг тедн хар саната йовдл һарһхларн, талдан улс үнниг бичә медтхә гиҗ бәрнә.

Иигәд Бурхн тедниг бийсиннь ичртә бахмҗднь бәрүлв. Күүкд улс чигн хоорндан бузртаһар холвата болв. Залус бас күүкд улсла биш нег-негнләһән зута юм һарһҗ ниилцхәв. Тедн эндү йовдл һарһсндан авх йоста засквр авцхав. Әмтн Бурхна туск медрлиг ухандан эс бәрсәр Бурхн тедниг ичр уга сананднь бәрүлв. Тиигәд тедн ичр уга йовдлмуд һарһна.

Тиим улс бийән цецнд тоолҗана, болв йирдән һәргтә болҗ һарв. Үкл уга Бурхнд мөргхин ормд тедн үкдг күүнә, шовудын, мал-аһрусна, мөлкдгүдин бәәдлтә кегдлмүдт шүтнә.