Oblíbené biblické verše z پولُسئے کاگد په رومیان 1

Sdílet

پرچا که چه وشّێن مِستاگا پَشل و شرمندگ نه‌آن، اے هُدائے زۆر و توان اِنت که هر ایمان آرۆکا نجاتَ دنت، ائولا یَهودی و رندا دَرکئومان.

چێا که وشّێن مِستاگئے تها هُدائے راستاوری و آدلی زاهرَ بیت، هما راستاوری که ائوَلا تان آهِرا چه ایمانا رسیت، اَنچُش که نِبیسگ بوتگ: ”هما که چه ایمانئے برکتا راستاوَر و بێمئیار اِنت، هما زِندگَ مانیت.“

چه دنیائے جۆڑ کنگا بگر تان انّون هُدائے چێر و اندێمێن جئوهر، بزان آییئے اَبدمانێن زۆر و هُدایی تَب و سَرِشت چه آییئے جۆڑ کرتگێن چیزّان گِندگ و زانگَ بیت. نون مردمان نیمۆنے نێست.

هرچُنت که آیان هُدا زانت، بله آییارا هُدایی اِزّتِشَ ندات و آییئے شُگرِشَ نگپت. اِشیئے بدلا، وتی ناهودگێن پِگر و هئیالانی تها گار بوتنت و آیانی ناسرپدێن دل تهاریا مان پۆشِت.

آیان هُدائے راستی گۆن درۆگا سئودا کرت و اَڈّ کنۆکئے بدلا، اَڈّ کرتگێنانی پرستش و هِزمتَ کرت، هما اَڈّ کنۆک که تان اَبد ستا و سنا کرزیت. آمین.

هُدائے کَهر و گَزب چه آسمانا زاهِرَ بیت و مردمانی سجّهێن هُداناپرمانی و بَدکاریانی سرا کپیت، چێا که مردم گۆن وتی رَدکاریان راستیا لَگَتمالَ کننت.

پمێشکا هُدایا هم آیانی شرمناکێن هئوا و هئوسانی تها آ یله کرتنت. آیانی جنێنان وتی اَسلێن راه و رهبند یله دات و ناراهێن نزّیکّیئے نێمگا شتنت. همے پئیما، مردێنان گۆن وتی جنێنان راه و رَهبندێن نزّیکّی یله دات و وت‌مان‌وتا هئوا و هئوسانی آسا کپتنت، مردێنان گۆن مردێنان شرمناکێن کارَ کرت و اے گُمراهیئے اَلّمێن سِزا آیانی جندا رَست. اَنچُش که آیان هُدائے پَجّاه آرگ اَرزش ندات، همے پئیما هُدایا بێننگێن پِگر و هئیالانی تها یله کرتنت تانکه ناراهێن کارانی تها بکپنت.

هرچُنت که وتا دانااِشَ گوَشت، بله آیانی هۆڈی و اَهمکی رۆچ په رۆچ گێشَ بوت. نمیرانێن هُدائے شان و شئوکتِش گۆن هما بُتان سئودا کرت که هاکیێن اِنسان و بالی مُرگ و چارپاد و لاپکَشّانی رنگ و دْرۆشما اَتنت.