Oblíbené biblické verše z RUM 5

Sdílet

Bang inah jalan Allah pepoléng penika Néh ngan uleu', uban lem lu' pu'un maneu' penyala' keto, inah Kristus matai ngeliwah uleu'.

Hun lu' ngelan tong Allah kenat bé' lu' duah kenin uban lu' jam Allah éh pika lu', éh mena' Sahéé' Ni'ai Néh ngan uleu'.

Kenat péh uleu' murung kenin dalem kekat penusah lu', uban uleu' jam kekat penusah inah, inah éh mihin uleu' omok ngeretep ngan kebit kenin, ngan hun lu' ngeretep ngan kebit kenin kenat, inah mihin lu' reken kenin ngan sukup mu'un kenin, ngan hun néh pu'un kenat petem kenin lu' ngelan adang uleu' omok tai pemung ngan Allah.

La'ah uban uleu' pu'un jian kepéh ngan Allah naneu' pengelan lu' tong Iah, inah éh mihin uleu' tunuk ngan Allah kepéh naneu' Tuhan Yésus Kristus éh kenelan lu'. Uban neu' pengelan lu' tong Iah, pu'un Iah lepah mihin uleu' tavin Allah éh jalan lu' alaa' urip maréng éh nena' Néh ngan lu'. Murung kenin lu' uban uleu' ngelan adang uleu' omok pemung ngan Allah lem kekat pengaren Néh ngan paléu' jian pekua' barei' Iah pu'un jian.

Uban lem lu' to lemoo' ngan bé' omok piso jin kesa'at lu', tovoo' jaka' éh kevéléé' Allah ke' Kristus matai ngeliwah uleu' kelunan éh sa'at.

Naneu' dahaa' Néh éh pega' inah jalan Iah maneu' lu' jian kepéh ngan Allah, hun néh kenat adang Iah pu'un ngelepu lu' jin kemerek Allah kepéh da'.

Barei' Adam ngelapah tong sohoo' Tuhan inah maneu' kelunan pinaa' kepéh pu'un penyala'. Barei' inah kepéh naneu' jah kelunan éh kivu sohoo' Tuhan, inah éh Kristus, inah éh mihin kelunan pinaa' omok jian kepéh ngan Allah.

Bang bé' éh kenat awah, bang inah kepéh uleu' murung kenin dalem Allah naneu' Tuhan Yésus Kristus éh kenelan lu' éh matai ke' Néh mihin lu' tavin Allah dokoo' uleu' omok bakéh Néh kepéh.