Oblíbené biblické verše z Cenisihs 27

Sdílet

Taka kaye Kishemanitoo kika miinik kaa⁠kimiwaninik kiishikonk kaa⁠onciinik, taka kaye oka oshihtoonan kikihtikewahkamikoon ci⁠wenooci nihtaawikihcikemakaninikin. Taka kaye niipiwa' kika miinik pahkweshikanan, shoomina' kaye ke⁠onci oshihtooyan shoominaapo. Pemaatisiwaatc kaye kika pamiihtaakook, kahkina kaye kaa⁠pepahkaanwewaanakisiwaatc pemaatisiwaatc kika ociciinkwanapiihtaakook. Kika okimaahkantawaak kaye tipinawe kitinawemaakanak, i'i kaye kimaamaa okosihsa' kika ociciinkwanapiihtaakook. Ke⁠macakimihkwaa hsa ta⁠macakimaawak, ke⁠shawenimihkwaa hsa tahsh ta⁠shawentaakosiwak,” kii‑ihkitowan.

Iihswaa tahsh kii‑ihkito, “Tepwe hsa kwayahk kii‑ishinihkaanaawintipan ahpii Cekap kii⁠wiinsotc, aaniihsh mii 'i ehkitoomakaninik owiinsowin i'i kaa⁠pi wayeshimitc aasha niishwaa. Ekii otaahpinamawitc kaawiih tipinawewisiwakipan niin nihtam ekii nihtaawikiwak, inashke tahsh kaye ninkiih kiimooci mahkamik kaawii ishi shawentaakosiwakipan.” Miitahsh kaa‑ani ihkitotc, “Kaawiin ina kikii ishkonansiin kekoon ci⁠shawentaakosiyaan?”

Miitahsh Aaisik, kaa'inaatc Iihswaan, “Inashke tahsh kiin, aanti keshi kapehshiyan o'omaa ahkiink, kaawiin kekoon kika nihtaawikihtoohsiin, kaawiin kaye kiishikonk ta⁠onci shaapopiihsinoon keshi kihtikeyan. Kipashipa'ikewihkomaaniink hsa kiin kika ontaatis, kika pamiihtawaa hsa kaye kiicihkiwensi. Ahpii tahsh ani tipenintisoyan, mii hsa 'i kaawiin awahshime kika tipenimikohsii.”

Iihswaa tahsh okii'inaan oteten, “Nintete, kii⁠mihcipeshikwan ina kishawencikewin? Nintete, taka keniin shawenimihshin.” Miitahsh kaa⁠ishi kishiiwetc ekii mawitc.