Oblíbené biblické verše z Tootaraanamii 6

Sdílet

Miihsh ci⁠saaki'ekipan kaaTipenciketc kiKishemanitoomiwaa misiwe piko kite'iwaank, misiwe kaye kitahcaahkowaank, ehpiihciyek iko ci⁠saaki'ekipan.

Weweni tahsh kika kihkino'amawaawaak kiniicaanihsiwaak. Kika tashintamawaawaak ahpii kii⁠namatapiyek kitaawiniwaank, kiini pimohseyek kaye inkociko kii‑ishaayek, kiih⁠pimihshinek kaye, ahpii kaye kii⁠wanishkaayek.

Ono tahsh ihkitowinan kaa⁠wiintamawinakook noonkom kaa⁠kiishikahk mooshak ta‑ayaawan kite'iwaank!

“Oo Isriyalak, taka noontamok! KaaTipenciketc iitok kiKishemanitoominaan, wiin ehta mihci peshiko!

Akwahpitook tahsh ono kininciiwaank, kiskahtikowaank kaye ishi kikishkamok ke⁠onci waniihkehsiwek!

Kiwaahkaa'ikaniwaank kaye kaashi ayishkwaantemaahtikowank i'imaa kaye kihci ishkwaantemiink ishi oshipii'amok o'o kaa'ininakook!”

Wiin hsa ehtako kika kohtaanenimaawaa kiKishemanitoomiwaa, wiin ehtako kaye kika anami'ehtawaawaa, wiin ehtako kaye owiinsowin kika ahpi wiintamowaam.

“Ahpii tahsh ani ishihsek kaaTipenciketc kiKishemanitoomiwaa piininek i'imaa ahkiink kaakii ahshotamawaatc kaakii okehteya'aamiyek Eparahaaman (Abraham) , Aaisikoon (Isaac) , Cekapoon (Jacob) kaye, kika miinikowaa kihci ootenawan kaa⁠onishihshininikin kiinawaa kaakii oshihtoohsiwek. Waahkaa'ikanan hsa kaye ta⁠mamooshkinewan kekoonan kaa⁠onishihshinkin, kiinawaa kaakii ahtoohsiwek. Ta‑ayaawan tahsh onta'ipaanan kiinawaa kaakii waanihkaatansiwek. Shoominaahtikook kaashi nihtaawiki'intwaa, aalip (olive) tinowaahtikook kaye ta‑ayaawan kiinawaa kaakiih kihtikaatansiwek. Ahpii tahsh wiihsiniyek, wiinke tewiihsiniyek, kehcinaac iko ayaankwaamisik ci⁠waniihkenotawaahsiwek kaaTipenciketc kaakiih pi'onci saakiciwininek weti Iicipahkiink (Egypt) kaakiih tashi wehsaani'ikooyek e⁠mihtanohkii'ikooyekipan.

“Miiwan itahsh ono kahkina inaahkonikewinan kaaTipenciketc kiKishemanitoomiwaa kaakii inanooshitc cishi kihkino'amawinakook, ci⁠na'ihtamowek, ci⁠tootamowek kaye weti ahkiink kaa⁠ishaawek kaawiih tipinawewisiyek. Kiinawaa hsa, kiniicaanihsiwaak kaye, kooshihsiwaak kaye, ci⁠kohtaanenimek kaaTipenciketc kiKishemanitoomiwaa, ci⁠kanawentamowek kahkina otihkitowinan, otinaahkonikewinan kaye kaa⁠wiintamawinakook. Minihk iko ke⁠pimaatisiyek i'i ci‑ishihcikeyek miihsh kinwesh ci⁠pimaatisiyek.

Kika ishihcikem itahsh kaye kweyahkonaakwahk, wenishihshik kaye enaahsamiitc kaaTipenciketc, ci⁠minohseyek. Miitahsh ci⁠piintikeshkaayek i'i ahki wenishihshik ci⁠tipinawewisiyek kaaTipenciketc kaakii ayiici ahshotamawaakopanen kikehteya'aamiwaapanii' ewii miinaatc.

KaaTipenciketc kiKishemanitoomiwaa kaa‑ayaatc mekweya'ii eshi'ayaayek aaniihsh tinowi kaa⁠ontentank Kishemanitoo. KaaTipenciketc kiKishemanitoomiwaa onishkaatisiwin ohsha ta‑aahkwentaakwanini ke⁠otihsikoyek. Wawiinke kaye kika nihshiwanaaci'ikowaa wiihkaa miinawaa ci⁠ayaawaahsiwek o'omaa ahkiink.”

Keko kaye pahkaan manitook piminisha'waahkekwaanik, ini kaye pemaatisiwaatc kaa⁠waahkaashkawinekwaa kaa⁠omanitoomiwaatc.

“Keko kaye kakweci'aahkek kaaTipenciketc kiKishemanitoomiwaa kaakiih tootawekipan weti Masa (Massah) ecikaatek.