Mazatec, Chiquihuitlán: Compromisu xi majo xi casahmi nina cojo xuta New Testament

© 1991, Wycliffe Bible Translators, Inc.
℗ 1989/1993 Wycliffe

Compromisu xi majo xi casahmi nina cojo xuta

Hya xi camá ne, casahmi chaja sa jo nixtin xi cuechu suhi tsëhë pascua ne, sacuaha xcusun niji ne, hya chini pan xi tsajin san rë. Ngajan xi nahmi xi matitjun jan cojo cha maestru tsëhë ley ne, jemu tivangui me chuva rë xi cuindacha me Jesús, cojo sa xi cuma cjuaha me me tsiquehen me me. Peru cachja me cojo xicjin me cuitjin:
―‍Ndatjin xi cuinechanyan ne, cuatju suhi sehe chjahanhma cha, ta sá xi tsajin ne, tu cumacjan rë xutacjín hane cumá ngu suë jyë.

Hya ne, Jesús ne, nandya Betania quitaha me. Tacun me ndava cha Simón, cha xi camandaja tsëhë chíhin cjan rë xi cafaha rë chuxin yojo rë. Hora xi tacun me tijinë me niñu ne, cafehe ngu na xi yaha na ngu frascu ndyojo, hincha aceite tsëhë nardo xi jercu hnga chjí rë. Hane xi cavotohosun na rcu frascu hiscan hincha aceite jan ne, sehe quiji cavitejnu na aceite jan rcun Jesús. Ngujo me xi siu jan ne, camacjan rë me xi cuatjin casahmi na. Hane sehe cachja me ngajñi rë me cojo xicjin me cuitjin:
―‍¿Mé má cuatjin tu catsinguetsun na aceite vë? Sá xi xteña vë, sacú tujún sacuaha tujún xi sacu rë ngu mosu xi casahmi xa ngu nu, hane tujún vëhë ne, cuma cuisecoo rë xuta yuma. ―‍Cuatjin cachjataha me na.
Ngajan xi cachja Jesús cuitjin:
―‍Xi canujuun tsëhë na. ¿Mé má cuatjin tivichuncjun tsëhë na? ta, jemu venguichji rë xcusun xi casahmi na cojo ná. Xuta yuma ne, yëjë nu yëjë nixtin siu me ngajñi nuju. Peru ha ndaja ngahan ne, hacuiin jyë nixtin tejña cojo nuju. Na vihi ne, casahmi na hacutjin xi chutaha na. Hane cojo chaja sa xi cueya ngahan ne, cavitejnu ná na aceite xi cuëhëchjine ni na yojo naha xi seyaniji ngahan. Cuichjá quixë cojo nuju ta tuyani tsëhë jingujyë ngasunhndë xi cuichja xuta cjua tsëhë Nina ne, hacuaha cueyanangui me na vihi cojo sa xi xuta xi yahnga ne, cumachaya rë me xcusun xi casahmi na cojo ná. ―‍Cuatjin cachja Jesús.

Hya xi camá ne, cha Judas tsëhë nandya Queriote, cha ladu rë Jesús tsëhë cha xi tejó jan ne, quiji cha xcun nahmi xi matitjun ne, cavëhë chihin cha cjua cojo rë me xi sahmi me entregadu cha Jesús cojo rë nahmi jan. Hya xi cahndë nahmi xi matitjun jan cjua rë Judas ne, jercu ndama camahani rë me. Hacuaha ngutjen ni cachja me ta, sua me cha tujún. Hane ngajan xi cha Judas jan ne, cavetsihin cavangui cha chuva rë hacutjin xi cuma sahmi entregadu cha Jesús.

Hya xi camá ne, nixtin tjun tjun tsëhë suhi xi chini pan xi tsajin san rë, nixtin xi hacuaha niquihin chu tsánga tsëhë suhi tsëhë pascua ne, hya ne, cha ladu rë Jesús ne, cavinenguise cha cojo rë me cuitjin:
―‍¿Jani hiscan xi meje nuju xi cuanguin cuihinchjini xi xinëë nguixun tsëhë suhi vi?
Ngajan xi catsingatju me jo cha ladu rë me quiji cha tixa. Hane cuitjin cachja me cojo cha:
―‍Tangun nandya Jerusalén. Hane ngajan cuechuntuhun ngu cha xi nduva ne, quisun rcu cha ngu nisa nandá. Tangun cojo cha hacutjin cjui cha. Hane ndihya xi cuisehen cha ne, tinújun cojo me xi nai rë ndihya jan cjua vihi: “Cuitjin chja maestru ta, ¿jarë cuartu hiscan xi sinë nguixun me cojo niji tsëhë pascua?” Cuatjin tinújun cojo me. Hane me vëhë ne, cjue tsingacun nuju me ngu cuartu jyë ngajan ndihya ngahnga hiscan xi ha tjin chjine. Hane ngajan tuhunndujun xi xinëë.
Hane ngajan xi cavetju cha xi cuacun jan quiji cha. Xi cafehe cha nandya Jerusalén ne, cuatjin camá tu tjin cachja Jesús cojo cha. Hane cavëhë ndaja cha xi sinë nguixun me cojo rë cha.

Xi quiji hora jan ne, cafehe Jesús cojo yëjë tejó cha ladu rë me. Hane quiji me caviyuju me. Sehe cavetsihin cajinë me. Hora xi tijinë me jan ne, ngajan xi cachja Jesús cuitjin:
―‍Nguehe cuichjá cojo nuju cjuaquixi ta ngu ngayun xi nechan tichine cojo nuju nguehe ne, nihñu ná entregadu. ―‍Cuatjin cachja me.
Ngajan xi jemu choho camá rë cha, cavetsihin cha cachja cha chuva ngu chuva ngu cha, cuitjin cachja cha:
―‍Hacuiin ngahan.
Ngajan xi cachja Jesús cuitjin:
―‍Ngajñi nuju xi tejó ngayun, ngajan jiyajñi ngu xi sahmi cuitjin. Ngu me xi ngu ni tyuva tsinguísehen quinda niñu naha cojo ne, me vëhë xi sahmi ná me entregadu. Ngahan xi Quihndi rë Xuta Jain ne, hatuxa tjin xi cueyá ta, xujun rë Nina ne, cuatjin chja. Peru xuma cha xi cuiteña ná. Vengui sa chji rë sá xi catsiin camahani cha.

Hora xi ha camatiña xi cuijnetaha sinë me niñu ne, cafaha Jesús ngu niñutsju, hane casua me nacuechji rë Nina, sehe cavotohocja me niñutsju jan. Hane sehe casua me ngu rquí ngu rquí niñu jan cha ladu rë me, hane cuitjin cachja me cojo cha:
―‍Juhun vihi ta, vihi ne, yojo naha. ―‍Cuatjin cachja me.
Hacuaha cafaha nga me ngu vasu xi hincha xan rë uva, hane casua nga me nacuechji rë Nina. Hane sehe casua me tsë tsë cahvi cha jima ngu cha ladu rë me. Hacuaha cachja me cojo cha cjua vihi:
―‍Vihi jni naha xi cuetju ná ngatsë rë xuta. Xcusun vihi ne, ngu compromisu xatsë xi sehe tivëhëchihin Nina cojo xuta cojo sa xi jni naha ne, vëhë cuaxëtje rë xuta. Cuichjá quixë cojo nuju ta ha quihndë cueen xan rë uva nguehe ngasunhndë. Cuëhë, peru hisca hya xi nduva Nina cuitexa me ngasunhndë, hya cuëhë, peru hacuiin tangun cumá. ―‍Cuatjin cachja Jesús cojo cha ladu rë me.

Xi cajnetaha cajinë me ne, casë me ngu tsëhë Nina. Sehe cavetju me quiji me Naxi Olivu. Hane sehe ngajan xi chja me cojo cha ladu rë me cuitjin:
―‍Ngayujun ni ngayun cumanguaintacuun cojo ná ta cuma sacuaha camahindu xcun xujun rë Nina xi chja cuitjin: “Nina ne, tsiquehen me cha xi sahmi cuidadu rë chu tsánga. Hane chu tsánga ne, cuitsojo chu.” Cuatjin cumá, peru hya xi cúya nga cjuahñu naha ne, cjué titjun tsujun hiscan distritu Galilea.
Ngajan xi cachja cha Pedru cojo Jesús cuitjin:
―‍Ha ndasa ngayëjë cha xi cuicun vi cuejña suva cha ngayun ne, peru ngahan ne, cuejñaa nuju suvun.
Ngajan xi cachja Jesús cojo cha cuitjin:
―‍Cuichjá quixë cojo ri ta tajñu ni xi chaja sa squindaya xahnda ne, ha jyan ndiya cuinoje xi hyiin yo ngahan. ―‍Cuatjin cachja me.
Peru cha Pedru ne, cavuya cachja nga cha cjua vihi:
―‍Ha ndasa hisca cueya cojo nuju ne, peru cuichjaain xi hveen yo ngayun. ―‍Cuatjin cachja cha.
Hacuaha cuanitjin ni cachja cha xi yahnga.

Hya xi camá ne, cavetju me quiji me ngu cahndë́ xi hmí rë Getsemaní. Ngajan xi cachja me cojo cha ladu rë me cuitjin:
―‍Nechun ni nguehe ne, cjuë́ cuisiajme cojo Nina. ―‍Cuatjin cachja me.
Hya xi camá ne, cavaxë me cha Pedru cojo cha Jacobo cojo cha Juan, quiji me cojo cha. Ha xcun xi ha cjui cjui me jan ne, cavetsihin jemu casercun rë me, hacuaha macjincacun me. Ngajan xi cachja me cojo cha cuitjin:
―‍Jercu choho má camahani rë xahasen naha. Xi má ná ne, cueya tsëhë. Nechun ni nguehe cuacun ngayun cojo ná. ―‍Cuatjin cachja me.

Sehe ngajan xi Jesús ne, quiji me hitsë ni nguvan. Hane ngajan cafañatsacjan me, cafehya rë me Nina sá xi tjin tu mé ni xi cumá cojo sa xi cuatjiin me cjuacjintacun xi cuatju me jan. Hane cuitjin cafehya rë me Nina:
―‍Papá. Xi cumá nuju ngayun ne, yëjë ni xcusun ne, hacuiin chja cuma. Vëhë xi tiféhya nuju xi naxuntjun ná tsëhë cjuacjintacun xi cuátju cumá. Cuatjin meje ná, peru cjua xi cuinújun ne, cuatjin catama. ―‍Cuatjin cafehya rë me Nina.
Hya xi camá ne, cavuya cafehe nga me hiscan siu cha ladu rë me xi quijicojo me jan. Hane xi vutsejen me ne, siufë cha. Ngajan xi chja me cojo cha Pedru cuitjin:
―‍Simón, ¿mé má tsjuñife? ¿Há camaji cavacun ngayun cojo ná hisca ngu hora? Nechun quicun, hacuaha chjahyun rë Nina cjuandaja rë me, cojo sa xi hacuiin chjaha chuva nuju cojo cjuatacun nuju. Xahasen nuju ne, ndaja meje rë xi nihñu, peru yojo nuju ne, chuva caa rë. ―‍Cuatjin cachja me cojo cha.

Hya xi camá ne, quiji nga me ngu ndiya hitsë ni nguvan. Hane ha cjua vëhë nga ni cavuya cafehya rë me Nina. Hya xi cavuya nga me ne, siufë nga cha ladu rë me xi jyan jan, tsëhë xi ha quihndë ticaain rë cha xi jemu nijña rë cha. Xi catsingasca Jesús cha ne, sacuinyiin rë cha mé cuichja cha cojo me.

Xi cavuya me xi quiji me má jyan ndiya ne, cachja me cojo cha ladu rë me jan cuitjin:
―‍Ha tsjuñufun cuaha. Juun, peru ha camá. Ha cavechu hora xi ngahan, Quihndi rë Xuta Jain, cjuaha ná xuta tsehen ta, ha caxteña ngahan. Tisatjunhngun, cuanguen chutsejen ta, ha nduva cha xi sahmi ná entregadu. ―‍Cuatjin cachja me.

Ha tu tichja cuaha Jesús cojo cha ladu rë me ne, cafehe cha Judas, cha xi cojo jiyajñi ngajñi rë cha xi tejó jan. Hacuaha jercu cjín xuta tivisecoo rë cha hora xi nduva cha. Yaha me quicha. Yaha me ya. Nahmi xi matitjun cojo cha maestru tsëhë ley cojo xuta changá jan ne, me vëhë cavitexa me xutacjín jan xi quiji jaha me Jesús. Chaja sa xi cjuehe cha Judas cojo xutacjín jan hiscan tacun Jesús ne, ha cachja cha cojo xuta jan cjua vihi:
―‍Cha xi cjuë́ cuitátsuha xi suá rë nina ne, cha vëhë xi hacui cha. Chjuhun cha, hacuaha nihñu cha, sehe tangun cojo cha. ―‍Cuatjin cachja cha.
Xi tu cavechu cha hiscan nduva Jesús cojo cha ladu rë me xi yahnga jan ne, ngutjen quiji casahmi tiña cha tsëhë me, hacuaha casua cha me nina cuitjin:
―‍Cuhndanu, Maestro. ―‍Cuatjin cachja cha.
Cafë cachja cha cuitjin ne, sehe cavitatsuha cha Jesús. Hya xi camá ne, quiji xuta jan ne, cafaha me Jesús.
Ngajan xi ngu cha xi secun jan ne, cavaxë cha quicha nduju rë cha, hane cavaja rë cha ngu cha mosu rë nahmi xi matitjun ne, cavatësun cha ngu ladu tyjavañuju. Ngajan xi cachja Jesús cuitjin:
―‍¿Mé má sacuaha vangun chjuhun xuta chëjë ne, cuatjin nduvun chjuhun ná? ta, quichuhun quicha quichuhun ya. Ngahan ne, nchunchujun ni cavitejñaya yungun xi matitjun, cavicuyá rë xuta, hane ¿mé má cachjuun ná ngajan? Juun, peru cuatjin tijima cojo sa xi cuetjucaa jain hacutjin camahindu xcun xujun rë Nina.
Hya xi camá ne, cha ladu rë Jesús ne, cavejña suva cha me, hane cafë yëjë cha cavanga cha.

Ngu sa cha jan yaja cha ngu tsjian tu të ni. Hane xi tu meje cjuaha xuta cha jan ne, tsjian ni rë cha cama cafaha me. Peru cha vëhë ne, cama cavanga cha tu quixti ni.

Hya xi camá ne, quijicojo xuta jan Jesús xcun nahmi xi matitjun. Hane xi cafehe cha cojo Jesús jan ne, sehe camatangun yëjë ni nahmi xi matitjun cojo xuta changá cojo cha maestru tsëhë ley. Ngajan xi cha Pedru ne, quijitjengui cha Jesús tu cjin tu cjin ni. Cafehe cha hiscan ndatsen ndava nahmi xi matitjun jan. Hane ngajan cavéjña cha cojo cha nísë tjehen ndava ndihi, tsihasu rë cha yojo rë cha cojo cha nísë jan.
Hane nahmi xi matitjun jan cojo yëjë sa xuta xi matitjun ne, cavangui me xuta xi tsinguixi jyë́ rë Jesús, cojo sa xi cuma tsiquehen me me. Peru tsajin mé jyë́ rë Jesús casacu rë me. Ha ndasa jemu cjín xuta xi cavinchajyë me Jesús ne, peru suva cjuandesu yëjë ni cjua xi cachja me ta, hacjahi chja ngu ne, hacjahi chja ngu. Hacuiin tangun má cjua rë me. Ngujo me ne, chja me ta cahndë me xi cuitjin cachja Jesús: “Ngahan ne, tsinguétsun yungun xi matitjun xi casahmi xuta vë, hane cahntsua xi jyan nixtin ne, sahme nga ngu. Peru hacuiin cojo tsja xuta xi cuma hya.” Cuahaxutjin cahndë me xi cachja Jesús. Hisca me xi cuacun jan ne, hacuaha hacuiin tangun camá cjua rë me.
Ngajan xi nahmi xi matitjun tsëhë nahmi xi yahnga jan ne, casecunvasen me, hane sehe cavinenguise me Jesús cuitjin:
―‍¿Há chjayinnguiin hisca xi ngu cjua tsëhë jyë́ riji xi vincha xuta xi cuicun vi? ―‍Cuatjin cachja me.
Hane Jesús ne, tu jyuu ni casecun me. Hisca ngu cjua cafayanguiin me. Hya xi camá ne, cavinenguise nga nahmi xi matitjun jan ngu ndiya cojo Jesús cuitjin:
―‍¿Há ngaye xi Quihndi rë Nina naja? ¿Há ngaye xi catsingatju me xi cumá titjun tsijin?
Ngajan xi cafayangui Jesús cuitjin:
―‍Juun, ngahan. Hacuaha cjuehe nixtin xi chutsujun ná xi tejña ladu quixi tsëhë Nina. Hacuaha chutsujun ná xi cuinduva ngajñi rë yufí, xi cúya nga tsëhë Nina.
Hane ngajan xi nahmi xi matitjun jan ne, jemu camacjan rë me ne, hisca tsjian rë me cavicheya me. Hane cuitjin cachja me:
―‍¿Mé sa cjua xi mameje? Ngayun ne, ha canuhyun hacutjin xi tsixcuehyu cha Nina. ¿Mé xi nújun quihndë?
Ngajan xi yëjë xuta jan ne, cachja me ta meje rë xi cueya Jesús.
Hane cavetsihin ngujo me cavëhë natya me Jesús. Hane hacuaha cavatsa me xcun Jesús, sehe cavetsihin cavaja me. Sehe ngajan xi cachja me cuitjin:
―‍Tinoje yo xi cavaja ri.
Hya xi camá ne, cavetsihin xi cha nísë jan ne, jemu cavaja cha me.

Jinguyëjë rë xi cuatjin tijima ne, cha Pedru ne, tacun cha ndatsen ndihya. Hya xi camá ne, hora vëhë canduva ngu na xi sahmi xa ndava nahmi xi matitjun jan. Hane cavëë na xi tacun cha Pedru tsihasu rë cha yojo rë cha hiscan tacun ndava ndihi. Hane casecun na cafahacuenda na cha. Sehe ngajan xi cachja na cojo cha cuitjin:
―‍Ngayun ne, ladu rë Jesús tsëhë nandya Nasaret ngayun.
Ngajan xi cachja cha Pedru cuitjin:
―‍Hisca hveen mé xi noje.
Hya xi camá ne, sehe cavetju cha quiji cha casecun cha hiscan tu cuiseen ni tsëhë ndatsen ndihya. Hane ngajan xi na xi sahmi xa tsëhë nahmi jan ne, cafahacuenda nga na cha hiscan quisecun cha. Hacuaha cavetsihin nga na cachja na cojo xuta xi hinchacun jan cuitjin:
―‍Cha vëhë ne, ladu rë Jesús má cha.
Xi tu cahndë cha Pedru xi cuatjin cachja na jan ne, ngutjen cafayangui cha xi quixiin xi chja na. Xi cafë ngu hora lihndi ne, hacuaha cachja xuta xi hinchacun jan cojo cha cuitjin:
―‍Quixi jain xi ladu rë Jesús má ngaye ta distritu Galilea ne, ngajan nangui riji.
Sehe ngajan xi hisca Nina caveyanangui cha Pedru ne, cachja cha xi hvíin cha me, cuitjin cachja cha:
―‍Vëë Nina jain xi hveen yo me xi nújun vë.
Hane hora vëhë ne, cajihnda xahnda. Hya xi camá ne, catsinguitsjen cha Pedru cjua xi cachja Jesús cojo cha xi cachja me cuitjin: “Chaja sa xi squihndajo xahnda ne, ngaye ne, ha jyan ndiya cuinoje xi hyiin yo ngahan.” Hora xi catsinguitsjen cha cjua vëhë ne, cajihnda cha.

Poslouchat San Marcos 14