Ticuna - 1986 WBT (NT) Drama

Rü yemawena ga Ngechuchu rü naxtaxa ga Gariréaarü tocutüwa naxũ. Rü norü toéga ga gumá naxtaxa rü Tibéria nixĩ.
Rü muxü̃ma ga duü̃xü̃gü rü Ngechuchuwe narüxĩ. Yerü marü nüxü̃ nadaugü ga yema cua̱xruü̃gü ga Tupanaarü poramaxã naxüxü̃ ga yexguma duü̃xü̃gü ga ida̱xaweegüxü̃ca̱x yataanexẽẽgüãgu.
Rü yexguma ga Ngechuchu rü wüxi ga ma̱xpǘnewa ínaxü̃ãchi. Rü yéma narüto namaxã ga norü ngúexü̃gü.
Rü marü ningaica ga yema Yudíugüarü peta ga Üpetüchiga.
Rü yexguma Ngechuchu nüxü̃ dawenügu rü nüxü̃ nadau ga yema muxü̃ma ga duü̃xü̃gü ga nawe rüxĩxü̃. Rü Ferípena naca, rü ñanagürü: —¿Rü ngextá tá naxca̱x tataxe i paũ naxca̱x i ñaa duü̃xü̃gü nax nachibüexü̃ca̱x? —﻿ñanagürü.
Rü yema ore Ferípexü̃ ñanagürü yerü nüxü̃ nacuáxchaü̃ ga ta̱xacümaxã tá nax nangãxü̃ãxü̃. Natürü nümatama ga Ngechuchu rü marü nüxü̃ nacua̱x ga ta̱xacü tá nax naxüxü̃.
Rü yexguma Ngechuchuxü̃ nangãxü̃ ga Ferípe, rü ñanagürü: —Woo chi naxca̱x itaxegügu i 200 i diẽru naguxü̃ i paũ, rü taxũchima nüxü̃́ ningu ega woo wüxichigüna íxraxü̃ ĩ̱xãchigügügu —﻿ñanagürü.
Rü yexguma ga André ga Ngechuchuarü ngúexü̃ ga Pedru ga Chimóü̃ naenexẽ, rü ñanagürü: —Nua nangẽxma i wüxi i buxü̃ rü nüxü̃́ nangẽxma i 5 i paũ i chebádanaxca̱x rü taxre ta i choxni. ¿Natürü ta̱xacüwa name i ngẽma naxca̱x i ñaa muxũchixü̃ i duü̃xü̃gü? —﻿ñanagürü.
Rü yexguma ga Ngechuchu rü ñanagürü: —¡Ẽcü, namaxã nüxü̃ pixu i duü̃xü̃gü nax ínatogüxü̃ca̱x! —﻿ñanagürü. Rü yema nachicawa rü namete̱xeane ga gumá maxẽ. Rü gumáte̱xewa narütogü ga duü̃xü̃gü. Rü 5,000wa nangu ga yexguma yatügüxica ixugügu.
Rü yexguma ga Ngechuchu rü nanade ga yema paũgü, rü Tupanana moxẽ naxã. Rü yemawena rü norü ngúexü̃güxü̃ nayanu nax yema duü̃xü̃gü ga yéma rütogüxü̃xü̃ yanuaxü̃ca̱x. Rü yexgumarüxü̃ ta ga choxni rü nüxü̃ nayanu. Rü meama nachibüe ga guxü̃ma ga yema duü̃xü̃gü.
Rü yexguma marü mea nachibüegu ga guxü̃ma, rü Ngechuchu norü ngúexü̃güxü̃ namu rü ñanagürü nüxü̃: —¡Penade i ngẽma naxchipe̱xegü i íyaxügüxü̃ nax tama naxaiya̱xü̃xü̃ca̱x! —﻿ñanagürü.
Rü yema norü ngúexü̃gü rü nanade ga yema naxchipe̱xegü ga yema 5 ga paũwa íyaxüxü̃, rü 12 ga pexchi namaxã nanaxüãcugü.
Rü yexguma yema duü̃xü̃gü nüxü̃ daugügu ga yema cua̱xruxü̃ ga Tupanaarü poramaxã naxüxü̃ ga Ngechuchu, rü ñanagürügü: —Aixcümaxü̃chi daa nixĩ ya Tupanaarü orearü uruxü̃ ga gumá ínanguxẽẽcü —﻿ñanagürügü.
Natürü ga Ngechuchu rü nüxü̃ nicua̱xãchi nax norü ãẽ̱xgacüxü̃ yangucuchixẽẽgüchaü̃ãxü̃ ga yema duü̃xü̃gü. Rü yemaca̱x nüxna nixũgachi rü yéamaxü̃ra naxũ nawa ga guma ma̱xpǘne nax nüxicatama nayexmaxü̃ca̱x.


Rü yexguma marü nachütagu, rü yema Ngechuchuarü ngúexü̃gü rü wenaxarü naxtaxacutüwa naxĩ.
Rü poraãcü naxẽane, rü tama ínangu ga Ngechuchu. Rü yemaca̱x wüxi ga ngue ga taxü̃negu nichoü̃, rü inaxĩãchi nax tocutüwa naxĩxü̃ ga Capernáü̃arü ĩanewa nax nangugüxü̃ca̱x.
Rü yexguma yaxãü̃yane rü inaxǘ ga tacü ga buanecü. Rü yemaca̱x poraãcü nayuape.
Rü yexguma marü 5 ga quirumétru yaxãgügu, rü Ngechuchuxü̃ nadaugü nax dexáchiüétügu yaxũxü̃. Rü nüma ga norü ngúexü̃gü rü poraãcü namuü̃e.
Natürü nüma ga Ngechuchu rü ñanagürü nüxü̃: —Choma chixĩ. ¡Rü taxṹ ipemuü̃exü̃! —﻿ñanagürü.
Rü yexguma ga nüma ga norü ngúexü̃gü rü taãẽãcüma Ngechuchuxü̃ nayauxgü ga naweü̃wa. Rü yexgumatama ínangugü ga yema ínaxĩxü̃wa.

Rü moxü̃ãcü ga yema duü̃xü̃gü ga naxtaxaarü tocutügu rüchoxü̃, rü nüxü̃ nicua̱xãchitanü nax Ngechuchuarü ngúexü̃gü rü nagu naxĩxü̃ ga guma ngue ga taxü̃ne ga nügümaxã wüxicane. Rü nüxü̃ nacua̱xgü ta nax Ngechuchu rü tama nawe naxũxü̃.
Rü yexguma yemagu ínaxĩnüeyane, rü yoxocüne ínangugü ga náigü ga ngue ga itaxü̃ne ga ĩane ga Tibériawa ne ĩxü̃ne. Rü norü ngaicamana nangugü ga yema nachica ga ngextá Ngechuchu ínachibüexẽẽxü̃wa ga yema muxü̃ma ga duü̃xü̃gü ga yexguma moxẽ inaxãxgu naxca̱x ga yema paũ.
Rü yexguma yema duü̃xü̃gü nüxü̃ daugügu nax yéma natauxexü̃ma ga Ngechuchu rü norü ngúexü̃gü, rü guma nguegügu nichoü̃ nax Capernáü̃arü ĩanegu Ngechuchuca̱x yadaugüxü̃.

Rü yexguma guma naxtaxaarü tocutüwa nangugügu ga yema duü̃xü̃gü, rü Ngechuchuxü̃ yexma nayangaugü. Rü nüxna nacagüe, rü ñanagürügü: —Pa Ngúexẽxẽruxü̃, ¿ñuxgu nixĩ i nua cunguxü̃? —﻿ñanagürügü.
Rü Ngechuchu nanangãxü̃, rü ñanagürü nüxü̃: —Aixcüma pemaxã nüxü̃ chixu rü cha̱u̱xca̱x pedaugü yerü meama pechibüe nawa ga yema õna ga pexna chaxãxü̃. Rü tama yema cua̱xruxü̃gü ga nüxü̃ pedauxü̃ ga Tupanaarü poramaxã chaxüxü̃xü̃ca̱x nixĩ i cha̱u̱xca̱x pedaugüxü̃.
¡Taxṹ i naxca̱x pexoegaãẽgüxü̃ i õna i paxãma gúxü̃! Rü narümemae nixĩ i naxca̱x pexoegaãẽgü i ngẽma õna i maxü̃ i taguma gúxü̃ pexna ãxü̃. Rü ngẽma nixĩ i maxü̃ ya Tupana Nane ya duü̃xü̃xü̃ ixĩcü tá pexna ãxü̃, erü Chaunatü ya Tupana rü marü nanango̱xẽxẽ nax aixcüma Nane chixĩxü̃ —﻿ñanagürü.
Rü yexguma ga nümagü rü nüxna nacagü, rü ñanagürügü: —¿Ta̱xacü tá taxüe nax tayanguxẽẽxü̃ca̱x i ngẽma Tupana toxü̃́ naxwa̱xexü̃? —﻿ñanagürügü.
Rü Ngechuchu nanangãxü̃ rü ñanagürü nüxü̃: —Rü ngẽma nüma ya Tupana nanaxwa̱xexü̃ nixĩ nax nüxü̃́ peyaxõgüxü̃ ya yimá Nane ya núma namuãcü —﻿ñanagürü.
Rü yexguma ga nümagü rü nüxna nacagü, rü ñanagürügü nüxü̃: —¿Ta̱xacürü cua̱xruxü̃xü̃ tá toxü̃ cudauxẽxẽ nax cuxü̃́ tayaxõgüxü̃ca̱x nax aixcüma Cristu quixĩxü̃? ¿Rü ta̱xacü i to i mexü̃ tá toxca̱x cuxü i ñu̱xmax?
Yerü nũxcümaü̃güxü̃ ga tórü o̱xigü, rü chianexü̃wa ga taxúema íxãpataxü̃wa nanangõ̱xgü ga yema paũ ga maná. Rü Tupanaarü ore i ümatüxü̃wa rü ñanagürü:
“Moiché rü daxũcüã̱x ga paũmaxã nanachibüexẽxẽ ga duü̃xü̃gü”,
—﻿ñanagürü i ngẽma orewa.
Rü Ngechuchu nanangãxü̃ rü ñanagürü nüxü̃: —Aixcüma pemaxã nüxü̃ chixu rü tama nixĩ ga Moiché yixĩxü̃ ga nüxna naxãxü̃ ga yema paũ ga daxũcüã̱x, natürü Chaunatü ga Tupana nixĩ ga nüxna naxãcü. Rü nüma nixĩ i ñu̱xma i pexna naxããxü̃ i ngẽma paũ i aixcüma ixĩxü̃ i daxũwa ne ũxü̃.
Erü ngẽma paũ ya Tupana ixãxü̃, rü yimá Nane ya daxũguxü̃ i naanewa ne ũcü nixĩ. Rü nüma nixĩ i maxü̃ nüxna naxãxü̃ i ñoma i naanecüã̱x i duü̃xü̃gü —﻿ñanagürü.
Rü nümagü ga duü̃xü̃gü rü ñanagürügü nüxü̃: —Pa Corix, ¡guxü̃guma toxna naxã i ngẽma paũ! —﻿ñanagürügü.
Rü Ngechuchu ñanagürü nüxü̃: —Choma nixĩ i ngẽma paũ i maxẽxẽẽruxü̃ chixĩxü̃. Rü yíxema texé ya chowe rüxũxẽ rü tagutáma tataiya. Rü texé ya choxü̃́ yaxṍxe rü tagutáma tita̱xawa.
Natürü marü pemaxã nüxü̃ chixu rü woo nax choxü̃ pedaugüxü̃ rü tama choxü̃́ peyaxõgü.
Rü guxãma ya yíxema duü̃xẽgü ya Chaunatü choxna tüxü̃ mugüxe rü chorü duü̃xü̃gü tixĩgü. Rü texé ya choxü̃́ yaxõgüxe rü taxũtáma tüxü̃ chaxoo̱x.
Yerü tama choxrütama ngúchaü̃ nax chaxüxü̃ca̱x nixĩ nax daxũguxü̃ ga naanewa ne chaxũxü̃. Natürü núma chaxũ nax chanaxüxü̃ca̱x i norü ngúchaü̃ ya Chaunatü ya núma choxü̃ mucü.
Rü ngẽma norü ngúchaü̃ ya Chaunatü ya Tupana ya núma choxü̃ mucü nixĩ nax taxúexü̃ma ichayarütauxẽẽxü̃ ya yíxema choxna tüxü̃ namugüxe. Rü ngẽma nanaxwa̱xexü̃ nixĩ nax tüxü̃ yuwa ícharüdagüxẽẽxü̃ i naanearü gu̱xgu.
Rü Chaunatü ya Tupanaarü ngúchaü̃ nixĩ nax guxãma ya texé ya Nanexü̃ daugüxe rü nüxü̃́ yaxõgüxe tüxü̃́ nangẽxmaxü̃ i maxü̃ i taguma gúxü̃. Erü choma tá nixĩ i tüxü̃ ícharüdagüxẽẽxü̃ i naanearü gu̱xgu —﻿ñanagürü.
Rü yexguma yema orexü̃ naxĩnüegu ga yema Yudíugü, rü inanaxügüe nax Ngechuchuchiga chixri yadexagüxü̃, yerü ñanagürü ga Ngechuchu: —Choma nixĩ i paũ i daxũguxü̃ i naanewa ne chaxũxü̃ —﻿ñanagürü.
Rü ñanagürügü: —¿Taux ẽ̱xna ñaa yixĩxü̃ i Ngechuchu i Yúche nane? Rü yixema rü tüxü̃ tacua̱x ya nanatü rü naé. ¿Rü ñuxãcü i nüma i “Daxũwa ne naxũxü̃”, ñaxü̃? —﻿ñanagürügü.
Rü Ngechuchu ñanagürü nüxü̃: —¡Nüxü̃ perüxoe nax chixri chauchiga pidexagüxü̃!
Taxúema chauxü̃tawa tangu ega tama choxna tüxü̃ namuxgu ya Chaunatü ga gumá núma choxü̃ mucü. Rü texé ya chauxü̃tawa ngugüxe rü choma rü tá wena tüxü̃ chamaxẽxẽxẽ i naanearü gu̱xgu.
Nũxcümaü̃güxü̃ ga Tupanaarü orearü uruü̃güarü poperawa naxümatü i ore i ñaxü̃:
“Tupana tá guxãxü̃ nangúexẽxẽ”,
ñaxü̃. Rü ngẽmaca̱x guxãma ya texé ya Chaunatüxü̃ ĩnüxẽ rü naxü̃tawa ngúxe, rü chauxü̃tawa taxĩ.
Taguma texé Chaunatü ya Tupanaxü̃ tadau. Rü chaxicatama nixĩ i nüxü̃ chadauxü̃ erü naxü̃tawa ne chaxũ.
Aixcüma pemaxã nüxü̃ chixu rü yíxema choxü̃́ yaxṍxe rü tüxü̃́ nangẽxma i maxü̃ i taguma gúxü̃.
Choma nixĩ i paũ i maxẽxẽxẽruxü̃ chixĩxü̃.
Rü nũxcümaü̃güxü̃ ga perü o̱xigü rü chianexü̃wa ga taxúema íxãpataxü̃wa nanangõ̱x ga yema paũ ga maná ga Tupana nüxna ãxü̃. Natürü woo nanangõ̱xgü ga yema paũ rü nayueamatama.
Natürü ñaa paũ i pemaxã nüxü̃ chixuxü̃ i daxũwa ne ũxü̃ rü chomatama chixĩ. Rü guxãma ya texé ya choxü̃ yaxúxe ñoma paũ tangṍxü̃rüxü̃ rü tá namaxecha.
Chomatama nixĩ i paũ i maxẽxẽxẽruxü̃ i daxũwa ne chaxũxü̃. Rü texé ya ñaa paũ ngṍxe rü guxü̃gutáma namaxecha. Erü ngẽma paũ i choma tüxna chaxãxü̃ rü chaxunetama nixĩ. Rü ichanaxã i chaxune nax namaxẽxü̃ca̱x i ñoma i naanecüã̱x i duü̃xü̃gü —﻿ñanagürü ga Ngechuchu.
Rü yexguma ga yema Yudíugü rü poragaãcü nügümaxã nidexagü, rü ñanagürügü: —¿Ñuxãcü tá i ñaa yatü i naxü̃ne tátama tüxü̃ nangõ̱xẽẽxü̃? —﻿ñanagürügü.
Rü Ngechuchu ñanagürü nüxü̃: —Rü choma rü aixcüma pemaxã nüxü̃ chixu rü ngẽxguma pema rü tama namaxã pexãwemügügu i naxü̃ne ya yimá Tupana Nane ya duü̃xü̃xü̃ ixĩcü rü tama nawa pexaxegügu ya nagü, rü taxũtáma pexü̃́ nangẽxma i maxü̃ i taguma gúxü̃.
Texé ya chaxunemaxã ãwemüxẽ rü chaugüwa axexe rü tüxü̃́ nangẽxma i maxü̃ i taguma gúxü̃. Erü choma rü tá tüxü̃ chamaxẽxẽ ega naanearü gu̱xgu.
Erü chaxune rü õnaxü̃chi nixĩ rü chaugü rü axexü̃xü̃chi nixĩ.
Texé ya chaxunemaxã ãwemüxe rü chaugüwa axexe rü chowa tayaxũ̱x rü choma i tümawa.
Chaunatü ga núma choxü̃ mucü rü namaxü̃. Rü nüma choxna nanaxã i maxü̃. Rü ngẽxgumarüxü̃ ta i choma rü tá tüxna chanaxã i maxü̃ ya yíxema choxü̃ yaxúxe rü choxü̃́ yaxṍxe.
Marü pemaxã nüxü̃ chixu nax choma rü paũ i daxũwa ne ũxü̃ chixĩxü̃. Natürü choma rü tama yema paũ ga maná ga nũxcümaü̃güxü̃ ga perü o̱xigü ngõ̱xgüxü̃rüxü̃ chixĩ. Yerü woo ga yema paũ nax nangõ̱xgüxü̃ ga perü o̱xigü rü nayueamatama. Natürü texé ya choxü̃ yaxúxe, ñoma paũ tangṍxü̃rüxü̃, rü choxü̃́ yaxṍxe rü guxü̃gutáma tamaxü̃ —﻿ñanagürü.
Rü Ngechuchu rü duü̃xü̃gümaxã nüxü̃ nixu ga yema ore ga yexguma nangúexẽẽãgu ga Yudíugüarü ngutaque̱xepataü̃wa ga Capernáü̃wa.

Rü yexguma nüxü̃ naxĩnüegu ga yema ngu̱xẽẽtae, rü muxü̃ma ga yema duü̃xü̃gü ga nawe rüxĩxü̃ rü ñanagürügü: —Ngẽma tamaxã nüxü̃ yaxuxü̃, rü naguxchaxüchi nax nüxü̃ icuáxü̃ nax ñuxũ ñaxü̃. ¿Ñuxãcü texé tüxü̃́ natauxcha nax naga taxĩnüxü̃? —﻿ñanagürügü.
Natürü ga Ngechuchu rü nüxü̃ nacua̱xama ga yemaacü nügümaxã nax íyadexagüxü̃ naxca̱x ga yema ngu̱xẽẽtae, rü yemaca̱x nüxna naca, rü ñanagürü: —¿Ẽ̱xna peãxẽwa nangu̱x i ngẽma ore?
Rü ngẽxguma peãẽwa nangu̱xgu i ngẽma ore i pemaxã nüxü̃ chixuxü̃, rü ¿ta̱xacügu chi perüxĩnüexü̃ ega nüxü̃ peda̱u̱xgu nax wenaxarü daxũwa naxũxü̃ ya Tupana Nane ya duü̃xü̃xü̃ ixĩcü nax noxri ne naxũxü̃wa naxũxü̃?
Tupanaãxẽ ya Üünecü nixĩ i inaxãxü̃ i maxü̃ i taguma gúxü̃. Rü tama pexene nixĩ i pexü̃ maxẽxẽẽxü̃. Rü ngẽma ore i pemaxã nüxü̃ chixuxü̃ rü peãxẽca̱x nixĩ, rü ngẽma orewa nangẽxma i maxü̃ i taguma gúxü̃.
Natürü tangexma i petanüwa ya ñuxre ya tama yaxõgüxe —﻿ñanagürü. Rü yema ñanagürü ga Ngechuchu yerü noxriarü ügügumama marü nüxü̃ nacua̱x ga texé tá nüxü̃́ nax yaxõgüxü̃, rü texé tá cúãcü ínaxuaxü̃xü̃.
Rü ñanagürü ta: —Rü ngẽmaca̱x marü pemaxã nüxü̃ chixu rü taxuacüma texé chauxü̃tawa tangu ega tama Chaunatü chauxü̃tawa tüxü̃ muxgu —﻿ñanagürü.
Rü yexgumacürüwa inanaxügüe ga nüxna nax yaxĩgachixü̃ ga muxü̃ma ga yema duü̃xü̃gü ga noxri nawe rüxĩchiréxü̃. Rü marü tama nawe ínaxĩĩxü̃.
Rü yexguma ga Ngechuchu rü norü 12 ga ngúexü̃güna naca, rü ñanagürü nüxü̃: —¿Ẽ̱xna pema rü tá ta choxna pixĩgachitanüchaü̃? —﻿ñanagürü.
Natürü Chimóü̃ ga Pedru rü nanangãxü̃, rü ñanagürü: —Pa Corix, ¿Texéxü̃tawa chi taxĩxü̃ ega cuxna tixĩgachitanügu? Erü cuma rü cuxü̃́ nangẽxma i ore i nawa nangẽxmaxü̃ i maxü̃ i taguma gúxü̃.
Toma rü marü cuxü̃́ tayaxõgü, rü nüxü̃ tacua̱x nax cuma quixĩxü̃ ya Cristu ya Üünecü ya Tupana Nane —﻿ñanagürü.
Rü Ngechuchu nüxü̃ nangãxü̃, rü ñanagürü: —¿Taux ẽ̱xna choma yixĩxü̃ ga pexü̃ chidexechixü̃ ga pemax ga 12? Natürü petanüwa nangẽxma i wüxi i Chatanáarü duü̃xü̃ ixĩxü̃ —﻿ñanagürü.
Rü Yúda ga Icharióte ga Chimóü̃ nanechiga nixĩ ga yadexaxü̃ ga Ngechuchu. Yerü Yúda tá cúãcü ínanaxuaxü̃ woo ga nüma rü wüxi ga yema 12 ga Ngechuchuarü ngúexü̃tanüxü̃ nixĩ.

Poslouchat Ore i mexü̃ ga Cuáü̃ ümatüxü̃ 6