Ayore - 2018 GP (NT) NonDrama

Ayore - 2018 GP (NT) Drama

Ayoreo 1982 Misión Nuevas Tribus, Cochabamba, Bolivia

Mu uje chise direjnímei iji dire puyai quigade ga jé u uje chequedíe ore choberipísi ore ódedie yui. Uje ore chijna dapesudi casodé cucha ai unéño, jé aja acéiteode ore. Ga ore ujórigui chequei nóna ore to. Mu uje ore chise Jesús ode casé mu cucarané casé que dépoji dasoca casé rĩ. Uje ore suru gai ome diríca múñi. Ga jĩrique ore chacája cucarané edo ajei mu que ore chimo Jesús ajnoquetígo iji. Enga jé u uje chajuque ore agutedie. Uje que ore chimo uté atíguiji go, ga a ca ore chiraja dasocáringome raque. Mu diga ore chajire dejoi mu ore chimo jnacare gáreode iji uje ore iguidedie chijninguese te. Enga chequedíe udire ore chajire jnumone uje ore todópisa ore gu. Mu jnacare gáreode udore ore narare ga ore chósi tome ore:
–¿Gotique gu a uje uacacueyoi ayoré uecárique iji ducódedie udaji gari a? Uje uacacuei tuté Jesús e que déji de gotique. E ecápo que rĩ. ¿Ga jé ca ajnusináño uru casodica uje chósi tome uaque uje qué déji uacari iji uacaniri Galiléa ica ya? Uje chósi tome uaque ica: "A ore tẽra Dupade utocaidi uyu ome jnani sijnángone jne ujeta ore chimate yu aja jnutique ga a ore cho dajuñame yu ga a ore chajo yu aja curesérique jne. Mu a chise dire gadiótigo jne ujetiga gadióguiji yui ga jé u ujeta yĩrijíapo jne rĩ iji yúringárique toque."–
Jecute jĩrique ore jnusinapísa Jesús uru casodica gotígo ome ore. Ga jĩrique ore jno ga ore chajnésara dedai. Mu jĩrique ore chatata pujnoméone udore jnese ome Jesús irógode ore uje chojmára ore iji yirídai. Jé upo ome udore ore jnese rĩ uje ore déji ore gari. Ga ore cho dojñame ore jnese. Enga chequedíe uje ore oite pujnomei tome Jesús irógode apóstoles ore jnese ga ore íode u udojo: María Magdaléna u uñáraque. Juána u uñáraque. María uje Jacóbodaté u uñáraque to. Jé aja ore jõráringui chequei to rĩ. Mu Jesús irógode ore cho ũrusóji chequedíe udire ore. Ga ore chotigasipise ore ome ore ojñane quigode.
Mu Jesús irógode apóstol uñai Pédro qué chajmita Jesús ode jogadi to. Ga jno ga chayopísiji yui jeta jé ũrepísi chequedíe ome ore ojñaiso. Uje chise ga chajire ajei mu Jesús iguidi casodé borapeque ueracho doi ti ejoi. Mu que Jesús déji go. Jecute jĩrique chajni ga tijapísa cuchade udore uje tocade ome ore ga chopise dáyugu aja daqui.


Mu jé diri uté u uje Jesús acadique gárerigo ore chicai ore idánique uje i tu Emaús. Uje kilómetros déji chojmára iji yirídai iji Emaús, Jerusalén ore ujai. Enga ore tijapísa cucha dacadode udore uje ore cho dojña ome ñane aja dajei iji Emaús yui. Mu uje qué ore déji dojñane udore gai uje ore catecã́ri ñane ome Jesús adode mu Jesús diga sose udore ore yui ga jec u uje nóna ore to aja dajei. Uje ore chimo uté uje sose ore yui mu a ca toguipis ome ore ujetiga ore chiraja uté gosi iji úringárique ayoré. Mu jé jogadi u uje Jesús catecã́ri ore ga chósi tome ore:
–¿Gotique que a uacojñane udore gajnengónique? ¿Gotique to a uje uacoyópise uacáyugu a?–
Mu udore uñeque chajnai uté uruode uje i tu Cleófas ga chósi tome:
–Ayorébui ore jnese iji Jerusalén údode ore chudute pujnomé ichai tuté jnese. ¿Mu a ca adute cuchade udore to a?–
Enga jé u uje Jesús chajnai ore ga chojninga:
–¿Jé gotígo a cucha tocachugode a uje uacacatecãchoi uñane ome a?–
Enga ore chajnai uruode ga ore chósi tome:
–Yicatecãcoi ñane ome Jesús ucácasicá uje idai tu Nazaret ica. Dupade uruode atatasṍri proféta u ica enga cucha pitijabácho uruode jé aja ipesudode rĩ ome ayoréode uyoque jnese. Enga ujopié garani u Dupade. Yoquicatecãraitigade udojo gajnengórone upo rĩ uje que yirajágo gotique gu a uje judíode yocasutedie, jé aja ore angarádejnane sacerdóteo ore juéga uté ica ujetiga chuque ga pajója curesei. Yocopise yocáyugu gu uje yocajéode u ica múñi ujetiga e Dupade ojningai utocaidi u uté to ica ujetiga chiqueta uyoc iji yocuniri, israélgosode ore uyoc, ome yocumajósoningo. Mu quene dirode gadióguiji uté yui uje ore chujé diríca. Jé isocai tu ome direjnímei tuqué to. Uje yocopise yocáyugu uje yoquijoranie chequei ore di uté ujnomei údi que. Mu ore ojñane chajuque yocagutedie que. Uje ore tibágui uje qué durasape múñi, e íjnongome ajnoquetígo iji ode jogadi. Mu uje qué ore déji Jesús ode jogadi mu uje que ore chimo cucháriguiji ga jé u uje ore chajni. Mu chiese gaté unirísoningo chiqueta raja ore iji uje chiese Jesús ucácasé ecápo rĩ. Jecute jĩrique yoquijorane uñéngo ore tibágui Jesús ode casé jogadi to, mu jé adi tu chequedíe uquidé ore ojñane uje que ore chimo Jesús iji ode gotique.
Jecute Jesús chajnai ore ga chósi tome ore:
–¿A ca pijnimique uacãrírique jõ ome uacajné casodica pacajnaquéo? Uje a arajáyo Dupade uruode atatasórone, jnani bajaque urusarane quigode ica mu a ca anguretáyopise go. ¿Jé ca ũré yu a ome quigode udojo uje déji Dupade uruode ga utocaidi tuté Crísto a qué pujuyape bajaque jne? Mu udojo quigade ga jec u uje chise dáringárique dacasuté pujnuéngaisṍre ome yoque jnese.–
Jecute jĩrique Jesús doi daruode quigode ome Moisés urusarane, jé aja profétade ore urusarane jnese ga cho quique quigode ome ore. Enga chósi tome ore:
–A yingomome Dupade uruode quigode ome uaque jne. Mu a yajirigode u uru quigode uje chatata datocaidi Crísto ujnoméone ome uaque.–
Jecute doi Moisés urusarane quigode ome ore bajaque. Mu chatapója Dupade uruode atatasórone jnani bajácho ore urusãratígo quitígo jnese rĩ.
Enga quigode jé u udore uje Jesús chacate ore aja dajei. Enga ore chise daqui ore idai uje a ore chácariji jne. Mu Jesús chãra re iji ujetiga qué jnome gatei. Ga jogadi jé u uje ore nejé Jesús údode ga ore chojningame:
–Ácarabíji yocari to iji de. Uje guedé e jnopise arĩ́e. Ga e idógosi dejai uje a dejágome ua jne gu.–
Jecute Jesús chacája ore gari iji ore upusiédi to. Mu uje e ore chamáta ñane aja dagapié ejode ujetiga e ore taque ga Jesús chisa arurétigo mu qué catecã́ri dayé Dupade bajaque. Enga jé u uje chajugája jnumi ga jé u uje chisi ome dajorane ore to. Enga quene ore chiraja Jesús ome úringai Jesús. Uje quene ore áyipiedie chuchẽre dabáyode. Mu uje e ore chiraja úringai Jesús, ga jé jogadi u uje bijnapome ore rĩ. Jecute ore chojningame ñane:
–¿Ga jé déji ua to que a, uje uté nóna yógaja dajei ga yajmárangopúsu acajnaquéode quigode que aja dajei údode uje cho quique Dupade uruode quigode ome yoque?–
Uje e ore chiraja uje Jesús jé ũré uje ecápo rĩ ga que ore chajirape cuchárique. Enga jĩrique ore jno ga ore chajnésarapo Jerusalén rĩ. Uje ore di ga ore chise Jesús irógode ore uje chojmára ore iji yirídai uje qué ore déji dajorane uñéngo ore gari to. Mu uje ore chise dajorane ore uje ore déji Jerusalén mu jĩrique ore chojningame dajõra díode:
–Jé ũrepise uje yocangarádejnai Jesús e ecápo rĩ. Ga Simón Pédro chimópise to que.–
Jé basa ga ore cho dojñame ore to. Ga ore chósi tome ore:
–Jé cho yoque rĩ uje yocangarádejna casica chiquetápo raja yoque to ga nóna yógaja dajei to que. Ga chacásõra yóguiji yocatigai iji yoquiyaridi guiguíjna que. Ga chajuque arurei iji jnumi ome yoque que. Ga qué chajuguína arurei tome yoque to. Mu udore u uje jĩrique yirajágo úringai Jesús.–


Mu uje qué ore déji dojñane udojo gai ome ñane mu jé jogadi u uje Jesús chiquetápo raja ore rĩ ga chósi tome ore:
–Yajéode u ujetiga pajesereringai déji uaque.–
Mu chajuque ore agutedie jnese ga ore todópisa. Enga ore josipise eti poré gatéraque u ujetiga chiqueta raja ore. Mu Jesús catecã́ri ore ga chósi tome ore:
–¿Gotique gu a uje uacatodóyo yu a? ¿Gotique gu a uje uacabóyoja yu? Ga uacajoso poré gatéragaja yu. Cajicho to gojni yijmainie, jé aja yirídade rĩ, ojnaquéro casidé ore piedie udire. Jé uyu u arĩ́e. Ajocáso yu gojni á. Uje jé uyu u. Uacarajáyopise to uje poré gatéraque que toc ujetiga pãrírique déji. Jé chopo ome ajnoquetígo rĩ. Mu uacapáñañoji yu uje cuchade udojo déji yu jnese. Ga que toc ujetiga poré gaté yu go.–
Iji uté uruode udojo quigade ga jé u uje chingongara ojnaquérodie piedie aja ore iji dajmainie. Jé aja darídade rĩ.
Mu que ore chirajapise dasocáringome re uje ore tija rac enga ore ninapo raque rĩ. Mu ca ore áyipie déji jórogui ujeta Jesús upúsu. Mu Jesús narare ga chojninga:
–¿Cuchárique qué déji de ujetiga yagábu to a?–
Enga jé u uje ore doi oyite petique ga ore chisi ome mu uñu oyídi uté. Ga ore chátaja cuténique petique. Jecute chisa udore ga jĩrique tagu iji ore iquei. Mu jĩrique cho quique cuchade udore jnese ujeta ore chiraja quigode. Ga chósi tome ore:
–Yajnéone pujuyaquéo u udore uje yingo uaque ica uje qué yugúsi uaque ica ujeta tocadepe jnese. Uje a amóño to iji Moisés urusarane quigode. Jé aja Dupade uruode atatasórone proféta urusarane quigode. Jé aja David urusarane quigode rĩ uje David urusarane udore i tu Sálmos. Uje udore ore urusarane jnese quigode u yajnéone cucha dacacho udore.–
Ga quene jogadi tu uje ore chirajapise purusarane udojo quigode uje chopise quigome ore gu. Ga chósi tome ore:
–Uje ore urusarane iji darujna aode quigode upúsu udojo: Uje Dupade utocaidi Crísto gajnei tu ujetiga pujuya bajaque. Mu chise díningo uje gadióguiji yui ga jec u ujetiga gajnei tupo rĩ ujetiga niji iji dagachotique, dáringárique toque ga ecápo rĩ. Mu gajnei upo rĩ ujetiga anguresóningo ore jno ujnomei údi aja quedéjnane, ujetiga ore chingome ore iji punirone jnese. Enga ore gaite bajai tu ore idai Jerusalén ujetiga ore chingoba ore iji bajac. Mu ore oidi tuté pujnomei turásu ujetiga ore chósi tome: "Beyoi ga ecãcho uacáyipiedie quigode, uacatígo ome uacasijnaringuéone. Ga jé jogadi tu jne ujetiga Dupade utocaidi Crísto chĩro uacasijnaringuéringo." Enga a yipijogúsorone u uaque jne. A yiroque yai Dupade Ujopié aja uaque jne uje chichaga uaque nanique. Mu jé ayáyo iji de ore idáidatéi Jerusalén, jé aja deréjnai ujetiga Dupade Ujopié uaté chise uaque to uje garani tu gatajnoquei.–


Enga jé u uje Jesús chijnime ore iji ore idáidatéi ga chijna ore aja ore idánique uje i tu Betánia. Ga jé u uje Jesús chãrai dajmanáyone iji gaté iji ore gai ujetiga chacacãre ore. Mu uje chejna dacacãrátigade udojo guesi ga noñome ore, ga jno ga chicai gaté. Ga ore chicotapise Jesús ga jec u uje ore chajniapója Jerusalén rĩ ga ore nínapúsu rágaja dajei. Enga jecucha ore ijója Dupade iguíjna cuchábi ujetiga ore jno daninaquei uté údi ome Dupade uje ore chicota. Amén. Qui jé upúsu.

Poslouchat Lúcas 24