Kiembu - 2002 KENBS (NT) Drama

Vuva wa ûguo, Jesû nîwaringire îria rîa Galili (rîrîa rîcîkene na rîîtwa rîngî îria rîa Tiberia) Andû eengî nîmaamûrûmîrîre nîûndû nîmoonete Jesû akîringa ciama cia kûvonia arwaru. Jesû na arutwa ake nîmaaunûkirie vandû karîmarî îgûrû na magîkara nthî vo. Na vîndî ya kîrugo Kîam pasaka yarî vakuvî. Rîrîa Jesû aaroririe akîona andû eengî mathiîte varîa aarî, nîwaûririe Filipu atîrî, “Nîtûruta irio cia kûrîwa nî andû aya onthe kû?” (Jesû aaûririe ûguo nîguo agerie Filipu, nwatî ke mwene nîwaicî ûrîa eendaga gwîka.)
Filipu nîwacokerie Jesû atîrî, “Mîgate ya dinarii magana maîrî ndîngîgana andû aya onthe wana wa mûndû angîvewa gacunjî kanini atîa.”
Na mûrutwa wake wîngî wetagwa Enderea mûrwang'ina na Simoni Petero nîwerire Jesû atîrî, “Ava varî na kamwana karî na mîgate îtano ya mûtu wa cairi na nthamaki igîrî, nwatî ino itingîgana andû aya onthe.”
Nake Jesû nîwamerire atîrî, “Îrani andû mekare nthî. Navo vau vaarî na nyaki nyîngî. Kwoguo andû onthe nîmeekarire nthî.” Navo vaarî arûme ta ngiri ithano. Jesû nîwocire mîgate îo, agîcokeria Ngai ngatho na akîmînenganîra îgaîrwe andû arîa meekarîte nthî. Nîwacokire agîoca nthamaki icio, agîcokeria Ngai ngatho na akîinenganîra igaîrwe andû kûringana na kîthimi kîrîa wa mûndû endire. Rîrîa andû onthe maarîre na makîvaa, Jesû nîwerire arutwa ake atîrî, “Ûnganiani cienywa irîa ciatigara nîguo tûtigate wanarî kîndû.” Kwoguo nîmaaûnganirie cienywa irîa ciatigarîte cia mîgate ya mûtu wa cairi na igîcûra ciondo îkûmi na igîrî.
Rîrîa andû arîa maarî vo moonire Kîamma kîrîa Jesû aaringire, nîmaaugire atîrî, “Na ma ûyû nîke Mûrathi ûrîa warî aûke gûkû nthî!” Na rîrîa Jesû aamenyire atî andû maarî vakuvî kûmûnyita nîguo mamûtue mûthamaki, nîwacokire Karîmarî rîngî arî wenga.


Kîvwaî Kîam mûthenya wa ûcio, arutwa a Jesû nîmaanyûrûrûkire makîthiî îriarî, na magîtwa îtarûrî nîguo maringe mûringo ûcio wîngî, meerekerete îtûûrarî rîa Kaperinaumu. Nakuo nîgwatukire na Jesû ndaarî mûthiîu kûrî o. Na vîndî îo, rûkûngi rûnene nîrwavurutanaga kûu îriarî na gûkîgîa makûmbî manene ma manjî. Na vîndî îrîa arutwa maathiîte rûgendo rwa kilomita ta ithano kana ithathatû marî îtarûrî, nîmoonire Jesû athiîrîrîte manjîrî îgûrû na erekerete na kûrîa maarî. Nao nîmaamakire mûno. Jesû nîwamerire atîrî, “Nînie! Tigani kûmaka.” Nao nîmaakenire Jesû atwa îtarûrî. Na wa rîo îtarûrî nîrîakinyire kûrîa maathiîte.

Mûthenya ûcio wîngî andû arîa meekarîte mûringo ûrîa wîngî wa îria nîmaaicî atî kwarî na îtarû rîmwe tu na Jesû ndaatonya îtarûrî rîu vamwe na arutwa ake, nwatî arutwa ake maaringire marî onga. Namo matarû mengî marîa maaumîte îtûûrarî rîa Tiberia maakinyire rûtere rwa îria vakuvî na varîa andû maarîrîrîte mîgate, Mwathani aarîkia gûcokia ngatho. Rîrîa andû eengî moonire atî Jesû na arutwa ake matiarî vo, nîmaatwîre matarûrî mau na makîthiî îtûûrarî rîa Kaperinaumu kûmûcaria.

Rîrîa andû meethîrîrie Jesû mûringo ûcio wîngî wa îria, nîmaamûririe atîrî, “Mwarimû, nîkwa ûûkire gûkû rî?”
Nake Jesû nîwamacokerie atîrî, “Nîramwîra na ma atî mue mûranjaria nîûndû nîmûrarîre mîgate mûkîvaa, nwatî tî nîûndû atî nîmûrataûkîrwe nî ûrîa ciama ciakwa irendaga kwonania. Mûtikenogagie mûgîcaria irio irîa icûkaga, nwatî îînogagieni mûgîcaria irio irîa itacûkaga na ivecanaga mwoyo wa tene na tene. Ino nîcio irîa mûkaavewa nî Mûrû wa Mûndû nîûndû Ngai Îthe nîwonanîtie atî nîmûmwîtîkîru.”
Nao nîmaamûririe atîrî, “Tue twagîrîrwe nî gwîka atîa nîguo twîkage ûrîa Ngai endaga?”
Nake Jesû nîwamacokerie atîrî, “Ûndû ûrîa Ngai endaga mwîke nî gwîtîkia mûndû ûrîa ke aatûmire.”
Kwoguo andû nîmaamûririe atîrî, “Nî Kîamma kîrîkû ûgûtûringîra nîguo twakîona tûgwîtîkie? We nîwîka atîa? Methe metû ma tene nîmaarîre maana werûrî wa ta ûrîa mandîko matheru maugîte atî, ‘Ke nîwamavere mûgate kuuma îgûrû marîe.’ ”
Nake Jesû nîwamerire atîrî, “Nie nîramwîra na ma atî Musa ndaamûva irio kuuma îgûrû. Ngai Vava nîke ûmûvecaga mûgate ûrîa wa ma kuuma îgûrû. Ke ûrîa umîte îgûrû nîke mûgate ûrîa Ngai avecanaga, na nîke ûvecaga andû mwoyo.”
Nao andû nîmaamwîrire atîrî, “Mûthuuri ûyû tûvecage mûgate ûcio vingo cionthe.”
Nake Jesû nîwamerire atîrî, “Nie nînie mûgate wa mwoyo. Mûndû wa wonthe ûkaga kûrî nie ndakaavûta na mûndû wa wonthe ûmbîtîkagia, ndakaanyonda. Na wata ûrîa namwîra, mue nîmûmonete nwatî mûtirambîtîkia. Andû onthe arîa Vava amvete nîmagûka kûrî nie. Na nie ndirî vingo ngeengata mûndû wa wonthe ûrîa ûûkaga kûrî nie. Nie naumire îgûrû ngîûka gûkû nthî nîguo mvingie wendi wa ûrîa wandûmire, nwatî tî wendi wakwa. Naguo wendi wa ûrîa wandûmire nî atî nie ndiagîrîrwe nî gûta mûndû wana ûmwe wa arîa amveere, nwatî mbagîrîrwe nîgûkaamariûkia onthe mûthenya wa mûthiia. Nîûndû wendi wa Vava nî atî mûndû wa wonthe ûrîa wonaga Mûriû na akamwîtîkia nîwagîrîrwe nî kûgîa na mwoyo wa tene na tene. Nanie nîngaamûriûkia mûthenya wa mûthiia.”
Nao andû nîmaambîrîrie kûnuguna nîûndû Jesû nîwaugire atîrî, “Nie nînie mûgate ûrîa wanyûrûrûkire kuuma îgûrû.” Nao nîmaaugaga atîrî, “Na ma ûyû nî Jesû mûvîcî wa Josefu. Tue nîtwîcî îthe wana ng'ina. Rîu ke arauga aumîte îgûrû nîkî?”
Nake Jesû nîwamacokerie atîrî, “Tigani kûnuguna gatagatîrî kenyu. Gûtirî mûndû ûngîûka kûrî nie, tiga nwanga Vava ûrîa wandûmire andeterete ke. Nanie nîngaariûkia mûndû ûcio mûthenya wa mûthiia. Kwandîkîtwe mavukurî ma arathi atî, ‘Andû onthe nîmakaathomithua nî Ngai!’ Mûndû wa wonthe ûrîa wîgucaga Vava na akethomithia maûndû kuuma kûrî ke nîaûkaga kûrî nie. Ûguo tî kuga atî kûrî na mûndû wanona Vava. Nwatî ke ûrîa umîte kûrî Ngai nwake tu wonete Vava. Nie nîramwîra ûma: mûndû wa wonthe wîtîkîtie arî na mwoyo wa tene na tene. Nînie mûgate wa mwoyo. Methe menyu ma tene maarîre maana werûrî na magîkua. Nwatî mûgate ûrîa ûnyûrûrûkaga kuuma îgûrû nî wa mwanya mûno, nîûndû mûndû wa wonthe ûrîa ûûrîcaga ndagaakua. Nie nînie mûgate wa mwoyo ûrîa wanyûrûrûkire kuuma îgûrû. Mûndû wa wonthe ûrîcaga mûgate ûyû, agaatûûra tene na tene. Mûgate ûyû nî mwîrî wakwa ûrîa ngaavecana nîguo andû magîe na mwoyo.”
Nao andû nîmaarakarire mûno na makîambîrîria kûrania atîrî, “Mûndû ûyû angîtûva mwîrî wake atîa tûrîe?”
Nake Jesû nîwamerire atîrî, “Nie nîramwîra ûma: mwarega kûrîa mwîrî wa Mûrû wa Mûndû na mûnyue nthakame yake, mûtikaagîa na mwoyo ndaarî yenyu. Mûndû wa wonthe ûrîcaga mwîrî wakwa na akanyua nthakame yakwa, arî na mwoyo wa tene na tene na nîngaamûriûkia mûthenya wa mûthiia. Nîûndû mwîrî wakwa nî irio cia ma, na nthakame yakwa nî kîndû gîa kûnyua Kîam ma. Mûndû wa wonthe ûrîcaga mwîrî wakwa na akanyua nthakame yakwa nîwîkaraga ndaarî yakwa, nanie ngekara ndaarî yake. Nie natûmirwe nî Vava mûtûûra mwoyo na wa nanie ndûûraga mwoyo nîûndû wake. Na njîra wata îo mûndû wa wonthe ûrîcaga mwîrî wakwa nîatûûraga mwoyo nîûndû wakwa. Ûyû nîguo mûgate ûrîa wanyûrûrûkire kuuma îgûrû. Ndwîkariî ta mûgate ûrîa warîrwe nî methe menyu ma tene na vuvarî magîkua. Nwatî mûndû wa wonthe ûrîa ûrîcaga mûgate ûyû nîagaatûûra tene na tene.”
Jesû aaugire maûndû mama rîrîa aathomithanagia îvoerorî rîrîa rîarî Kaperinaumu.

Nao arûmîrîri eengî a Jesû nîmegwire maûndû mau na makiuga atîrî, “Kîthomo gîkî nî kîûmû mûno. Nû ûngîgîtîkîra?”
Wana atarî mwîre nî mûndû Jesû nîwaicî atî arûmîrîri ake nîmaanugunaga. Kwoguo nîwamaûririe atîrî, “Maûndû mama nîmo maratûma mwende gûtiganîria wîtîkio wenyu? Î narîo mûkona Mûrû wa Mûndû akiunûkia acokete kûrîa aarî mbererî? Roho wa Ngai nîke ûvecanaga mwoyo. Mwîrî ndûvecanaga mwoyo. Ciugo icio namwîra nîcio itûmaga mûgîe na Roho wa Ngai ûrîa ûvecanaga mwoyo. Nwatî kûrî na amwe gatagatîrî kenyu mataretîkia.” (Na kuuma mûthenya ûrîa Jesû aambîrîrie kûthomithania, nîwaicî andû arîa matetîkîtie na akamenya mûndû ûrîa ûkaamûcukanîrîra.) Jesû nîwacokire akîmeera atîrî, “Gîkî nîkîo kîrarî gîtûmi gîa kûmwîra atî gûtirî mûndû ûngîûka kûrî nie tiga nwanga avotithîtue nî Vava.”
Na kuuma vîndî îo arûmîrîri eengî a Jesû nîmaamûtigire na matiacoka kûmûrûmîrîra rîngî. Kwoguo Jesû nîwaûririe arutwa ake îkûmi na aîrî atîrî, “Mue namue nîmûrenda kûthiî?”
Nake Simoni Petero nîwamûcokerie atîrî, “Mwathani tûngîgûtiga tûkathiî kûrî û? We ûrî na ciugo cia mwoyo wa tene na tene. Tue nîtwîtîkîtie na tûkamenya atî we nîwe ûrîa Mûtheru kuuma kûrî Ngai.”
Nake Jesû nîwamacokerie atîrî, “Na kinthî nie tî nie naamûthuurire mûrî îkûmi na aîrî? Nwatî ûmwe gatagatîrî kenyu nî ngoma!” Jesû aaragia ûvoro wîgiî Judasi mûvîcî wa Simoni Mûsikariota, nîûndû wana ethîrwa Judasi aarî ûmwe wa arutwa arîa îkûmi na aîrî, ke nîke warî acukanîrîre Jesû.

Poslouchat Joh 6