The Ebira Audio Bible

Ebira - 1981 Edition (NT)

Ebira First Bible © Bible Society of Nigeria, 2014.

Ịhị ẹkụhị ana a sịị̄ rị eche ana aā hị́ Ịpẹntịkọsị si tù, dị avaba ọdọwụ nịnị kụ́ gụ aha ọnya nị. Kẹnẹ, dị ẹ vana aa wụ́ ịsa ịrẹyị, ọ mẹ̀ hụrẹ ẹbẹẹba ee chíi vẹ nị. Aa sụ́ ịrẹyị, ahị ọbanyị òo rere aa tụ́ kuku-kuku avọọ, dị ọ dọ avaba irehi ịzị ẹnịnị hi nị. Di e re ịsa ana yà anka ịrarẹ ịra avọọ, dị ọ gà, dị ọnyọọnya na yà ịrẹsụ ọzịnya-ọzịnya nị. Dị Ụhwẹ Ọnịnị dọ ayị avaba ẹnịnị ene hi ịzọọ, dị ẹ kụkụ aa sị ẹkụra ọsaa kà ịrẹyị, anka Ụ́hwẹ Ọnịnị mẹ̀ sị ụkata yị wa nị.
Ụmẹ ọnọọ, â nyị Aniju nịnị ana hụrẹ avaba ẹhẹ vẹ ana va ra Ijerusarẹmị. Ẹnịnị ệ nyị ahẹkẹ Ohomorihi ẹtẹẹtẹrẹ. Ẹ mẹ̀ maanị wụ́ ịrẹyị, dị aza hara gụ ịzọọ nị. Ô hí wa irenu ẹtẹẹtẹrẹ, agụvị ka ọzọza ộ wụ́ ka odeyi nịnị aa sị ẹkụra anịị kà ịrẹyị. Ô hí wa irenu pooro, dị ẹyaa kà a yị ẹngụ ka, “Áa vị Anigariri aza ana aa kà ịrẹyị aanị vị? Ọ mẹ zị ọọ, dị ị kụkụ vana aa wụ́ ka ẹ yaa kà ẹkụra ayị? Ẹkụra ọnị ị hụrẹ vẹ yị: Ipatiya beri Imediya ọnịrị Erami beri Imesopotamiya ọnịrị Ijudiya beri Ikapadosiya; Ịpọntụsị ọnịrị Esiya, beri Ihwirigiya ọnịrị Ipamihwiriya, Ijipiti ọnịrị oze eyi Iribiya ọgụrị Isayirini. Aza ẹnyị ẹ rẹ hụrẹ Iroomi vẹ. Aza ẹnyị ẹ yị vị Aniju, ọsa vị azọga ana dọ ahẹkẹ Aniju nịnị. Aza ẹnyị ayị ẹ rẹ hụrẹ Ikirete beri Arebiya vẹ. Dị ị maanị yị hụrẹ ẹkụra irenyi-irenyi vẹ, ya yị wụ́, ẹ màa sị ẹkụra ayịị kà ụkọrọ ohyozirenu oni Ohomorihi mẹ.” Ô hí wa irenu, ẹ yị yẹ ịsị ẹẹ kà; dị ẹyaa họ̀ ẹngụ ka, “Sị ẹ vị iruvo ọsọnị kẹ?” Dị aza ẹnyị aa mẹ ọdọwụ nịnị isiya nị, dị ẹ ka, “Aza ẹnẹnị ẹ sị eche hú ẹtẹẹrẹ!”

Dị Ipita kwẹẹtẹ jẹẹ beri ẹnị ẹwụrọnya ana vọ, di o nowu tụ́ ẹba, dị ọ kà a yị aza ẹnẹẹ ka, “Ẹwụ nịnị anda ayị Anijudiya ọnịrị ẹwụ nịnị ana ra hi Ijerusarẹmị, batọ ịrẹyị amị, dị ma kà a wụ nịnị iruvo ịsị ẹ mẹ aanị. Aza ẹnẹnị e yi hú eche, anka u mè ro o nịnị. Vị agogo ịhịịna ẹnẹnẹ sụ́ kẹnẹ aanị nị.” Ama ịrẹyị oni Ijowẹrị ọnịsẹ vịdị kà tịtẹ ọ sẹ nị.
Ọ kà Ohomorihi kà a ka, “Ịnị ụmẹ ọdịrẹma,
ọnị vaa tụ́ Ụhwẹ Ọnịnị anịị ká avaba anẹhẹẹ vẹ.
Ezi anọrụ ọnịrị ezi anẹẹ awụ nịnị vaa kà ịsẹ,
ezwọọmụha awụ nịnị vee re ẹtẹ,
azọkụ awụ nịnị vaa ra ụra.
Ọ kà, ịnị ụmẹ ọnọọ, ezi ahụ anị nịnị,
a hị́ ọnọrụ a hị́ ọnẹẹ, ọnị rẹ vaa sị Ụhwẹ Ọnịnị anịị yị wa,
dị ẹ yaa kà ịsẹ.
Ọnị vaa mẹ̀ ụkọrọ ohyozirenu ini eguhi ẹbẹẹba,
dị ọnị rẹ sị apọtẹrẹwa zụ̀ ini eteesu:
A vaa nyị anya ọnịrị ịra beri areyi ọbanyị.
Ọyị vee hozi,
dị ụhwẹ ee ví anka anya avọọ,
dị ẹkụhị ọnọọ ò ve tù oni Ohomorihi Ananyị yị vaa sị vaa mẹ̀ ịsa ọbanyị ọnị ọza vee re.
Ịnị ụmẹ ọnọọ, ọza tụra ọza ana àa hị́ Ohomorihi Ananyị yị,
ọ vaa dọ ọ há.”
Ẹwụ nịnị Anisirẹrị, sị ụtọ pe ịrẹyị ọnọnị nịnị! Ohomorihi ộ sị ụvọ tụ́ ọọ yị Ijeesu Anịnazarẹtị, ka ọ̀ọ mẹ̀ ụkọrọ ohyozirenu, dị ọ̀ọ sị apọtẹrẹwaa zụ̀ wụ nịnị. Ẹwụ nịnị ụvọta ộ yẹ ọsọnị, agụvị ka ịdị awụ nịnị ịzẹnị gẹdẹ-gẹdẹ ọ yà mẹ̀ ẹ nị. Ohomorihi ana yẹ avaba ịsa, ộ vịdị mẹ eto anị tịtẹ ka à sị ọọ chire wu nịnị ụvọ, dị ụ mẹ ka aza edivi ẹ̀ kanyị ọọ za ọchị apavahị, dị ụ vavọọ wụ ọọ nịnị nị. Ama Ohomorihi ộ ha a hụụnị isu, ộ dọ ọ hụụnị ụvọ isu, agụvị ka ọ yị rụra mẹ ka isu ọ̀ za a. Idevidi ộ vịdị kà a ini oze Ijeesu ka:

“Mee re Ohomorihi Ananyị yị ọ́vịdị amị ụpọsa-ụpọsa;
ọ yà eyi ụvọrị amị, ẹ yị nyị ịsị ẹ zụ mẹ mị.
Agụvị avọọ ayị amị ee hine, maa kà ịrẹyị ịrajẹ.
Mâ sị ayị tụra a, agụvị ka mâ yẹ ka
ọ yị vaa navọ ka ma yà ini eku pooro.
Ọ yị rẹ vaa navọ ka Ọza ọnịnị anị ò sú, dị ọ̀ vụ̀ ne ta.
Ọ raà sị oze zụ̀ mị ka maa yàra obooro.
Ayị amị re vee hine ẹtẹẹtẹrẹ, agụvị ka mâ yàra beri ọọ.”
Ẹwụ nịnị ẹyịnyara amị, jẹẹ ma kà a wụ nịnị gedebee ini oze Idevidi ada ayị. Idevidi ô sú, di e ne e nị. Ikuta anị yà ịdị ayị ịzẹnị pooro tù ajịnị. Idevidi vị ọnịsẹ, ộ yẹ ka Ohomorihi ô hyeku ka ọnya ini ezi anị ọ vaa vị ohinọyị ana vaa dọ Idevidi ịrẹsụ nị. Idevidi ộ vịdị sị ịsa ana vaa mẹ re, dị ọ kà a tịtẹ ka Ikirisiti vaa haa hụụnị isu, ọ yị vaa yà ini eku pooro, ẹngụ anị ọ yị rẹ vaa vụ̀ụ ne ta.
Ijeesu ọnọọ Óhomorihi sị ha hụụnị isu, dị avaba ayị aa dọ ivenuu tụ́ ịnị anị aanị nị. Ohomorihi ọ raà sị Ijeesu tụ́ ẹba, dị ọ yaayịtẹ éyi ụvọrị Ohomorihi nị. Ọ raà dọ Ụhwẹ Ọnịnị hụụnị ụvọ Ohomorihi Ada anị, anka Óhomorihi mẹ̀ vịdị kà a ka ẹ yị zụ nyị ka ọnị ọ yị vaa sịị yọ. Ụhwẹ Ọnịnị ọnọọ Íjeesu sị yị oni u wee re, dị ụ raa wụ́ nịnị aanị nị. Idevidi ọnị ụvọta ọ yị hịrẹ nọ ẹbẹẹba, ama ộ kà a ka:
“Ohomorihi Ananyị yị ộ kà a yị Ananyị mị ka:
Yaayịtẹ éyi ụvọrị amị
pooro dị ma sị ọnịvị awụ
tụ́ ịzị ụ waa kụ́ ahụụ hi.”
“Agụvị avọọ ẹwụ nịnị Anisirẹrị, yẹ nịnị ịzẹyịza ka Ijeesu ọnọọ ọnị ụ kanyị za ọchị nịnị, ọnị Óhomorihi mẹ Ananyị yị ọnịrị Ọdọzaha nị!”
Aza ẹnẹnị mẹ̀ wụ́ ịrẹyị ẹnẹnị, ayị ẹnịnị ẹ sị sụ̀ enyi. Dị ẹ kà a yị Ipita ọnịrị odeyi nịnị ana vọ, dị ẹ ka, “Ẹwụ nịnị ẹyịnyara amị, sị a vọrọ ka ya mẹ?” Dị Ipita kà a yị wa ka: “Ro ịnẹ, varẹma hụụnị ebira odivi awụ nịnị, dị à mẹ̀ ọyịhwọzenyi yị ọzịnya-ọzịnya awụ nịnị ịnị ịrẹha Ijeesu Ikirisiti, dị Ohomorihi ọ̀ vagu wu ịnị ịvị awụ nịnị, dị ọ̀ rẹ sị Ụhwẹ Ọnịnị mẹ wụ nịnị ẹyịza. Oto oni Ohomorihi wo aanị, vị áawụ nịnị ọnịrị éezi ewu nịnị ọnịrị áaza ana ra hi aha onoze huuu, avaba aza oni Ohomorihi Ananyị yị va naa hị́ ọ vị nị.”
Ipita ộ kà ịrẹyị ọrụrụ-ọrụrụ yị wa, dị aa dá ịpẹẹ yị wa ẹtẹẹtẹrẹ, ka ẹ̀ dọ ẹngụ ẹnịnị hụụnị ụya ana aa vẹ ịrẹsụ aza edivi ụmẹ ọnọnị. Aza ana sị ịrajẹ dọ ịrẹyị anị, â mẹ̀ ọyịhwọzenyi yị wa. Ịhị ọnọọ ẹhụụ aza ẹnị akahị-akahị oze ẹẹta (3,000) ọ vaka ọdọwụ nịnị nị.

Ẹnịnị ệ sị ụmẹ ẹnịnị tịtẹ kụkụ aa kọsẹ ịdị odeyi nịnị, dị ẹyaa sị ayịị yị ẹngụ, di e re dudu aa rị ịsọyịrị Ananyị yị, di e re dudu aa mẹ̀ aduwa nị. Apositeri nịnị ệ mẹ̀ ụkọrọ ohyozirenu ọnịrị apọtẹrẹwa irenyi-irenyi ana mẹ ka angwa o hí avaba aza. Avaba ẹnị ana dọ wụ́ vị ana vabẹ, di e re dudu aa gà ịsị ẹ̀ẹ nyị nị. Ệ ná ịsị ẹ nyị ọnịrị ogu ẹnịnị, dị ẹ gà ẹkẹhị anị, anka ị́sa mẹmẹ aa rị ọzọza ụya nị. Eyinị-eyinị ẹ sịị̄ kụ́ gụ ini irehi Ohomorihi ịnị ayị ọnya nị. Di e dudu aa rị ịsaa vaabẹ ini eehi ẹnịnị, dị ẹyaa sị ịrajẹẹ gà ịsọyịrị ẹnịnị nị. Ệ sị ọọ rọ ẹngụ ẹnịnị ẹngụ. Dị ẹyaa ga Ohomorihi nị; ẹhẹ ẹnịnị ô zé avaba aza eyi. Eyinị-eyinị, dị Ananyị yị aa kụ́ aza ọnị ọ sị dọ há vaa vaka ịragụ ẹnịnị.

Poslouchat Odeyi 2