Génesis 5
5
Adanpa mirayninmanta
(1 Cr 1.1-4)
1Kaykunan Adanpa miraynin runakunaqa karqaku. Qallariyninpin runata Dios ruwarqa, rikch'ayninman rikch'ayniyoqta 2qarita warmitawan. Hinaspan ruwasqan p'unchaw paykunata bendecispa “runakuna”, nispa suticharqa.
3Adán pachak kimsa chunka (130) watayoq kashaqtinmi huk qari wawanpas kallarqataq. Chay wawanqa payman rikch'akuqmi karqa. Paymanmi sutinta churarqa Set sutiwan. 4Adanqa pusaq pachak (800) watataraqmi kawsarqa wawan Setpa wañusqanpa qepanmanqa. Chay tiempopin Adanpaqa kallarqataq qari wawankuna hinallataq warmi wawankunapas. 5Adanqa kawsarqa esqon pachak kimsa chunka (930) watankaman. Hinaspan wañukapurqa.
6Setqa pachak pishqayoq (105) watayoq kashaspan, huk qari wawanta churiyarqa. Paymanmi sutinta churarqa Enós sutiwan. 7Setqa pusaq pachak qanchisniyoq (807) watataraqmi kawsarqa wawan Enospa nacesqanpa qepanmanqa. Chay tiempopin Setpaqa kallarqataq qari wawankuna hinallataq warmi wawankunapas. 8Setqa esqon pachak chunka iskayniyoq (912) watan kawsarqa. Hinaspan wañukapurqa.
9Enosqa esqon chunka watanpiñan kasharqa. Hinaqtinmi huk qari wawata churiyarqa. Paymanmi sutinta churarqa Cainán sutiwan. 10Enosqa pusaq pachak chunka pishqayoq (815) watataraqmi kawsarqa, Cainanpa nacesqanpa qepanmanqa. Chay tiempopin Enosqa churiyarqa qari wawankunata hinallataq warmi wawankunatapas. 11Enosqa esqon pachak pishqayoq (905) watankaman kawsarqa. Hinaspan wañukapurqa.
12Cainanqa qanchis chunka watayoq kashaspan, huk qari wawanta churiyarqa. Paymanmi sutinta churarqa Mahalaleel sutiwan. 13Mahalaleelpa nacesqanmantan Cainanqa pusaq pachak tawa chunka (840) watataraq kawsakurqa. Chay tiempopin Cainanqa churiyarqa qari wawankunata hinallataq warmi wawankunatapas. 14Cainanqa esqon pachak chunkayoq (910) watankaman kawsarqa. Hinaspan wañukapurqa.
15Mahalaleelqa soqta chunka pishqayoq watanpi kashaspan, huk qari wawata churiyarqa. Paymanmi sutinta churarqa Jared sutiwan. 16Jaredpa nacesqanmantan Mahalaleelqa pusaq pachak kimsa chunka (830) watataraq kawsakurqa. Chay tiempopin Mahalaleelqa churiyarqa qari wawankunata hinallataq warmi wawankunatapas. 17Mahalaleelqa pusaq pachak esqon chunka pishqayoq (895) watankaman kawsakurqa. Hinaspan wañukapurqa.
18Jaredqa pachak soqta chunka iskayniyoq (162) watanpiña kashaspan, huk qari wawanta churiyarqa. Paymanmi sutinta churarqa Enoc sutiwan. 19Enocpa nacesqanmantan Jaredqa pusaq pachak (800) watataraq kawsakurqa. Chay tiempopin Jaredqa churiyarqa qari wawankunata hinallataq warmi wawankunatapas. 20Jaredqa esqon pachak soqta chunka iskayniyoq (862) watankaman kawsakurqa. Hinaspan wañukapurqa.
21Enocqa soqta chunka pishqayoq watanpiña kashaspan, huk qari wawanta churiyarqa. Paymanmi sutinta churarqa Matusalén sutiwan. 22Matusalenpa nacesqanmantan Enocqa kimsa pachak (300) watataraq kawsakurqa. Paypa vidanqa Diospa munasqanman hinan karqa. Hinaspan Enocqa churiyarqa qari wawankunata hinallataq warmi wawankunatapas. 23Enocqa kimsa pachak soqta chunka pishqayoq watankaman kawsakurqa. 24Enocpa vidanqa Diospa munasqanman hina karqa. Chayraykun paytaqa kawsashaqllataraq Señor Dios apakapurqa.
25Matusalenqa pachak pusaq qanchisniyoq (187) watanpiña kashaspan, churiyarqa huk qari wawanta. Paymanmi sutinta churarqa Lamec sutiwan. 26Lamecpa nacesqanmantan Matusalenqa qanchis pachak pusaq chunka iskayniyoq (782) watataraq kawsakurqa. Chay tiempopin Matusalenqa churiyarqa qari wawankunata hinallataq warmi wawankunatapas. 27Matusalenqa esqon pachak soqta chunka esqonniyoq (969) watankaman kawsakurqa. Hinaspan wañukapurqa.
28Lamecqa pachak pusaq chunka iskayniyoq (182) watanpiña kashaspan, huk qari wawanta churiyarqa. 29Hinaspan paytaqa suticharqa Noé sutiwan. Chaymantan khaynata nirqa:
—Kay wawan samariyta qowasun, kay hallp'a pachapi ñak'arispa llank'asqanchismanta. Shaynataqa ñak'arishanchis, kay hallp'a pachata Dios ñakasqanraykun, nispa.
30Noeypa nacesqanmantan Lamecqa pishqa pachak esqon chunka pishqayoq (595) watataraq kawsakurqa. Chay tiempopin Lamecqa churiyarqa qari wawankunata hinallataq warmi wawankunatapas. 31Lamecqa qanchis pachak qanchis chunka (777) watankaman kawsakurqa. Hinaspan wañukapurqa.
32Noeyqa pishqa pachak (500) watanpiña kashaspan, qari wawankunata churiyarqa. Paykunamanmi sutinta churarqa Sem sutiwan, Cam sutiwan hinallataq Jafet sutiwan ima.
دیاریکراوەکانی ئێستا:
Génesis 5: QXU
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2025 AIDIA
© 2025 Seed Company