Génesis 4
4
Caín hermanon Abelta wañuchisqanmanta
1Adanmi warmin Evawan puñurqa. Chaymi Evaqa wiksayoq rikurispa, kuraq kaq qari wawanta onqokurqa. Hinaspan Evaqa nirqa:
—Señor Diospa munasqanman hinan kay qari wawayoq kani, nispa. Chayraykun chay wawanmanqa sutinta churarqa Caín sutiwan.
2Chaymantan Evaqa hukmanta wiksayoq rikurillarqataq. Hinaspan huk qari wawanta onqokurqa. Chay wawamanmi sutinta churarqa Abel sutiwan. Abelqa ovejakunata michiqmi karqa. Hermanon Cainñataqmi chakrapi llank'aq karqa.
3Chaymi tiempoq pasasqanman hina, Cainqa Señor Diosman ofrendata haywananpaq chakrapi tarpusqan kawsaykunamanta apamurqa. 4Shaynallataqmi Abelpas apamullarqataq primer kaq nacemuq ovejankunamanta wira kaq allinnin ovejakunata, Señor Diosman haywananpaq. Hinaspan chay ovejankunaqpa allinnin wira aychanta Diosman haywarqa. Hinaqtinmi Señor Diosqa Abelta qawarispa chaskirqa hinallataq chay ofrenda apamusqantapas. 5Caintañataqmi ichaqa Señor Dios qawarispa, mana chaskirqachu nitaq chay ofrenda apamusqantapas. Chaymi Cainqa nishuta phiñakurqa, uyanpas hukmanyasqa kanankamaraq. 6Chaymi Señor Diosqa Cainta khaynata tapurqa:
—¿Imanaqtintaq qanri nishu phiñallaña kashankí? ¿Imanaqtintaq qanri phiñallaña uyayoq purishankí? 7Sichus allin kaqta ruwawaq chayqa, cheqaqtapunin chaskisqa kawaq. Ichaqa sichus mana allin kaqkunata ruwanki chayqa, qepa ladollaykipiñan kashan huchaqa urmarachisunaykipaq. Aswanqa huchan qantaqa atipayta munashasunki huk yarqasqa león hinaraq; ichaqa qanmi chay huchata atipanayki, nispa.
8Ichaqa huk p'unchawmi Cainqa hermanon Abelta khaynata nirqa:
—Hakuchi purikuq, nispa.
Hinaspan campopiña kashaspanku, Cainqa hermanon Abelta qonqayllamanta wañuchirqa. 9Hinaqtinmi Señor Diosqa Cainta tapurqa khaynata:
—¿Maytaq hermanoyki Abelrí? nispa.
Hinaqtinmi Cainqa contestarqa khaynata:
—¡Manan noqaqa yachanichu! ¿Noqari hermanoy cuidaqchu kaní? nispa.
10Chaymi Señor Diosqa Cainta nirqa:
—¿Imatataq ruwarunkirí? Hermanoykiqpa llawarninmi hallp'a pachamanta qapariq hinaraq justiciata ruwanaypaq mañakamuwashan. 11Chaymi qanqa kunan ñakasqa kanki. Hinaspan hermanoykiqpa llawarnin ch'aqchusqaykirayku, kay hallp'amanta wikch'usqa kanki. 12Chakra llank'asqaykipas manañan rurunqachu. Hinaspapas qanqa kay pachapin huk lado nacionniyoq forastero runa hina pakakuspa llaqtan-llaqtan purinki, nispa.
13Chaymi Cainqa Señor Diosta nirqa:
—Kay ñak'ariy qowasqaykiqa nishu hatunmi; manan aguantayta atiymanchu. 14Kunanmi kay hallp'api tiyasqaymanta qarqowashanki. Chayraykun noqaqa manaña qanpa ñawpaqniykimanqa hamuyta atisaqñachu. Hinaspapas noqaqa mana llaqtayoq kaspaymi qanmanta pakakuspa, llaqtan-llaqtan purisaq. Sichus pipas tariwaspaqa, wañurachiwanqachá, nispa.
15Ichaqa Señor Diosmi Cainta nirqa:
—Qanta pipas wañuchisunki chayqa, qanchis kutitan castigasqa kanqa, nispa.
Chaymi Cainmanqa Señor Dios churarqa huk señalta, pipas payta tarispaqa ama wañuchinanpaq. 16Hinaqtinmi Cainqa Señor Diospa ñawpaqninmanta lloqsitamurqa. Hinaspan payqa Nod nisqa sutiyoq hallp'aman rirqa. Chay hallp'apin payqa tiyarqa. Chay Nod hallp'aqa karqa Edén nisqa sutiyoq huertaqpa waq ladon intiqpa lloqsimunanpin.
Cainpa mirayninkunamanta
17Cainmi warminwan puñurqa; hinaspan warminqa wiksayoq rikurispa, huk wawata onqokurqa. Chay wawanmanmi Enoc sutiwan churarqa. Chay tiempopin Cainqa huk llaqtata hatarichisharqa. Hinaspan chay llaqtata suticharqa wawan Enocpa sutinwan. 18Enocpa wawanmi karqa Irad. Iradpa wawanmi karqa Mehujael. Mehujaelpa wawanmi karqa Metusael. Metusaelpa wawanmi karqa Lamec. 19Lamecñataqmi casarakurqa iskay warmiwan. Huknin warminpa sutinmi karqa Ada, hukninpañataq Zila. 20Ada kaq warminmi onqokurqa Jabalta. Chay Jabalmi karqa carpakunapi tiyaq runakunaqpa ñawpaq kaq abuelon hinallataq animalkunata uywaq runakunaqpa abuelon ima. 21Jabalpa hermanontaqmi karqa Jubal. Chay Jubalmi karqa arpa tocaqkunaqpa hinallataq lawato tocaqkunaqpa ñawpaq kaq abuelon. 22Lamecpa huknin kaq Zila sutiyoq warminñataqmi onqokurqa Tubal-caín sutiyoq wawanta. Paymi karqa herrero. Chaymi payqa broncemanta hinallataq fierromanta tukuy laya herramientakunata ruwarqa. Paypa hermananmi karqa Naama.
23Huk p'unchawmi Lamecqa iskaynin warminkunata nirqa:
—Ada hinallataq Zila qankunaqa noqaqpa warmiykunan kankichis.
Kay nisqaytayá uyariwaychis:
Huk runatan wañuchirqani,
noqata k'iriwasqanrayku.
Shaynallataqmi huk joventapas wañurqachini,
noqata maqawasqanrayku.
24Sichus pipas Cainta wañuchinqa chayqa,
qanchis kutitan castigasqa kanqa.
Ichaqa noqa Lamecta pipas wañuchiwanqa chayqa,
qanchis chunka qanchisniyoq kutitan castigasqa kanqa, nispa.
Adanpa Evapawan kimsa kaq wawanmanta
25Adanmi warmin Evawan hukmanta puñurqa. Hinaqtinmi Evaqa wiksayoq rikurispa, qari wawanta onqokurqa. Chay wawanmanmi sutinta churarqa Set sutiwan. Hinaspan Evaqa khaynata nirqa:
—Diosmi qoykuwan huk qari wawatawan, Cainpa wañuchisqan Abelpa rantinta, nispa.
26Shaynallataqmi Setpapas qari wawan nacerqa. Chay wawanmanmi sutinta churarqa Enós sutiwan. Chay Enospa tiemponmantapachan runakunaqa Diosta yupaychayta qallarirqaku.
دیاریکراوەکانی ئێستا:
Génesis 4: QXU
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2025 AIDIA
© 2025 Seed Company