لوقا 1
1
1عالیجناب تئوفیلوس، ایندییانچاز چوخ آداملار تلاش ائدمیشلَر کی آرامیزدا دؤشَن تَفاقلارینگ حکایتینی یازالّار 2ائله او طور کی بو تَفاقلارینگ باشلانماکیندان بری اوللاری گؤز اینان گؤرَنلَر و تارئ کلامینینگ خادملَری، حکایتلَرینی بیزه ائتیردمیشلَر، 3من ده کی واری بو دؤشَن تَفاقلارینگ حَقّینده خبرلَشمیشَم، مَصلَحت گؤردوم کی اوللاری، ترتیب اوستوندَن سیز عالیجناب تئوفیلوس ایچی یازام. 4تا ائشیتدیگیلَرینزینگ دؤزلوکوندان مطمئن اولاینز.
یحیانینگ آنادان اولماگی خَبری
5هیرودیس پادشاه دورانیندا کی یهودیه پادشاهسی ایدی، اَبیّا بئیلهسینینگ کاهِنلَریندَن کی مَعبد عالِملَری ایدیلَر، بیر زَکریا آدلی کاهِن زندلیگ ائدیردی. زَکریانینگ آروادی، هارونِ کاهِن سؤیوندان ایدی و آدی اِلیزابت ایدی. 6اوللارینگ ایکّیسی ده تارئ گؤزونده صالح ایدیلَر و رَبّینگ حکملارینی و فرمانلارینی بی کم و کسر یئرینه ائتیردیرلَردی. 7آما اوللاردا اولاد یوخ ایدی، بو سَبریه کی اِلیزابت اوشاقلی اولمئیردی و ایکّیسی ده یاشلی ایدیلَر.
8بیر گؤن کی زَکریا بئیلهسینینگ نوبهسی ایدی تا مَعبدده خدمت ائدَلَّر و زَکریا، تارئ حُضوروندا کاهِنلیگ ائدیردی، 9رَب مَعبدینینگ مُقدّس یئرینه گئدمَک و بُخور یاندیرماگ ایچی، کاهِنلَر رَسمینه گؤره، پؤشک آتدیلار و پؤشک زَکریا آدینا دؤشدو. 10بُخور یاندیرماگ وختینده جمعیت واری یازّیدا تورموشلاردی و دُعا ائدیرلَردی. 11بیردَن رَبّینگ بیر فرشتهسی، بُخور قُربانگاهینینگ ساغ طَرفینده تورولو زَکریایا ظاهر اولدو. 12زَکریا اؤنو گؤرَنده پریشان اولدو و جانینا قورخو دؤشدو. 13آما فرشته اؤنا دئدی: «زَکریا قورخما! دُعانگ مُستجاب اولموش و آروادینگ اِلیزابت سنینگ ایچی بیر اوغول دوغار و سَن اؤنونگ آدینی یحیا قؤیارانگ. 14سن شادلیگ و خوشحاللیگدان دولارانگ و چوخ آداملار دا اؤنونگ دنیایا گلمَکیندَن خوشحال اولارلار. 15بو سَبریه کی او، رَب گؤزونده بیر بویوک آدام اولور. یحیا هئچ زامان دوداقینی شرابا یا دا عَرَقه وورمیاسی. حتّی آناسی قارنیندان دا، تارئنینگ قُدّوس روحوندان دؤلو اولور. 16او، تارئ خَلخینینگ چوخونو اؤز رَب، تارئلارینا ساری دؤندورَر. 17او، ائله اِلیاس پیغمبرینگ روحیاینن و قُوّتیاینن، رَبدَن ایلَری گئدهر تا بووآلارینگ اؤرهکلَرینی اوشاقلارینا ساری دؤندوره و یاغیلارا اؤرگده کی جَدلَری لهیین رَبّی چوخ سئیلَّر و بیر خَلخ اولالّار کی تارئدان قورخیرلار.»
18زَکریا فرشتهدَن خبر آلدی: «من هاردان بونو بیلَم؟ من بیر قوجا کیشییَم و آروادیم دا یاشلی دیر.» 19فرشته جواب وئردی: «من جبرائیلم کی تارئ حُضوروندا توریرام. تارئ مَنی یوللامیش تا سنینگ اینَن دانیشام و بو خوش خَبری سنه وئرَم. 20باخ، او گؤنانچاز کی بو ایش اولونا، گُنگ اولورانگ و دانیشا بیلمهینگ. بو سَبریه کی منیم سؤزلَریمی کی اؤز وختینده یئرینه ائتیشَر، اینانمادینگ.»
21بو آرادا جمعیت زَکریایا منتظر ایدیلَر. اوللار چوخ تَعجّب ائدیرلَردی کی نه ایچی زَکریا بوغاد مَعبدینگ مُقدّس یئرینده قالمیش. 22اوندا کی زَکریا یازّیا چیخدی دانیشا بیلمئیردی، اوللار بیلدیلَر کی او، مَعبدینگ مُقدّس یئرینده، رؤیا گؤرموش بو سَبریه کی فقط اشاره ائدیردی و دانیشا بیلمئیردی. 23زَکریا اؤز خدمتینینگ زامانینی تؤکدندَن سورا، ائوینه دؤندو.
24او گؤنلَردَن سورا، زَکریانینگ آروادی اِلیزابت، اوشاقلی اولدو و بئش آی اؤزونو خَلخ گؤزوندَن آرالی ساخلاتدی. اِلیزابت اؤزو اینَن دئییردی: 25«رَب منه گوشا نَظر ائدمیش و بو ایشی منیم ایچی گؤرموش و منیم سرافکندهلیگیمی خَلخ آراسیندان گؤتورموش.»
عیسانینگ آنادان اولماگی پیشگولیگی
26اِلیزابت آلتی آی ایدی اوشاقلی ایدی کی جبرائیل فرشته، تارئ طَرفیندَن جَلیل ولایتینه، بیر ناصِره آدلی شَهره، 27بیر باکره قیز یانینا کی آدی مریم ایدی، یوللاندی. مریم بیر یوسف آدلی کیشینینگ آداخلیسیایدی. یوسف داوود پادشاه سؤیوندان ایدی. 28فرشته مریم یانینا گلدی و دئدی: «سالام، ای سَن کی تارئ گؤزونده عَزیزَینگ، رَب سنینگ اینَن دیر.» 29مریم فرشته دئدیگی سؤزلَردن سَخت پریشان اولدو و سئیردی آنگلایا گؤره بو نهطور سالام دیر. 30فرشته اؤنا دئدی: «مریم، قورخما! بو سَبریه کی سَن تارئ گؤزونده عَزیز اولموشانگ. 31باخ! سَن اوشاقلی اولورانگ و بیر اوغول اوشاقی دوغارانگ و آدینی عیسا قؤیارانگ. 32او بیر بویوک آدام اولور و مُتعال تارئنینگ اوغلو چاغیریلار. رَب تارئ، اؤنونگ جَدّی، داوود پادشاهینگ پادشاهلیگی تختینی اؤنا وئرهر. 33او اَبَدنچاز یعقوب سویونا حُکم سؤرَر و اؤنونگ پادشاهلیگی هئچ زامان تؤکَنمهز.» 34مریم فرشتهیه دئدی: «بو ایش نهیین اولا بیلَر، من حَلی باکرهیم.» 35فرشته مریمه جواب وئردی: «تارئنینگ قُدّوس روحو سَنه گلَر و مُتعال تارئنینگ قوّتی سنه کؤلگه آتار. بو سَبریه ده او اوشاق مُقدّس و تارئ اوغلو چاغیریلار. 36باخ! سنینگ قوحومونگ اِلیزابت، قَرّیلیگینده اوشاقلی دیر و اوشاقی اوغول دور. او کی اوشاقلی اولمئیردی، ایندی آلتی آی دیر کی اوشاقلی دیر. 37چونکی تارئ ایچی هئچ ایش غیرممکن دهییل.» 38مریم دئدی: «باخ، من رَبّینگ کنیزییَم، منه دئدیگینگ سؤز اولسون.» او زامان فرشته اؤنونگ یانیندان گئتدی.
مریم اِلیزابتینگ گؤرمَکینه گئدیر
39او گؤنلَرده مریم توردو آیاقی و تَلَسیق بیر شَهره کی یهودیه داغلیگیندا ایدی گئتدی. 40او، زَکریا ائوینه گئتدی و اِلیزابته سالام وئردی. 41اِلیزابت مریمینگ سالامی سَسینی ائشیدَنده، اوشاق اِلیزابت قارنیندا تَرپندی و اِلیزابت تارئنینگ قُدّوس روحوندان دؤلدو 42و اوجا سَس اینَن دئدی: «آروادلار آراسیندا تارئ سنه گوشا نَظر ائدمیش و بَرکت وئرمیش، و سنینگ قارنینگداکی اوشاق دا تارئ گؤزونده عزیز دیر. 43من کیمَم کی رَبّیمینگ آناسی منیم گؤرمَکیمه گله؟ 44چونکی باخ، سنینگ سَسینگ قولاقیما دهیَنده، اوشاق قارنیمدا شادلیگدان تَرپندی. 45خوش او آدام حالینا کی ایناندی کی رَب دئدیگی سؤز یئرینه ائتیشَر.»
مریمینگ ییری
46مریم دئدی:
«مَنیم جانیم رَبّه عِزّت ائدیر
47و روحوم، منی قورتاران تارئدا، شادلیگ ائدیر.
48چونکی او، اؤز کنیزینینگ حَقیر حالینا، گوشا نَظر ائدمیش.
باخ، بوندان سورا واری نَسللَر منی تارئدان بَرکت آلمیش چاغیرارلار.
49چون او کی قُدرتلی دیر منیم ایچی بویوک ایشلَر گؤرموش،
و اؤنونگ آدی، قُدّوس دیر.
50او، اوندان قورخانلارا،
سؤیدان سؤیا رَحمت ائدیر.
51رَب اؤز قولیاینن، قُدرتلی ایشلَر گؤرموش
و اؤرهکلَرینده مَغرور اولانلاری داغیدمیش؛
52قُدرتلیلَری پادشاهلیگ تَختلَریندَن آشاغی چَکمیش
و گؤنگول آلچاق آداملاری سَرفَراز ائدمیش.
53آج آداملاری خوب زادلار اینان دویاردمیش
آما وارلیلاری، اَلی خالی یولا سالمیش.
54او اؤز رَحمتینی یادینا سالمیش
و اؤز نوکرلَرینه، یعنی اؤز خَلخینه کؤمَک ائدمیش،
55ائله او طور کی بیزیم جَدّلَریمیزه یعنی،
ابراهیم پیغمبره و اؤنونگ نَسلینه وَعده وئردی کی اَبَدنچاز بئله ائده.»
56مریم اؤچ آیانچاز اِلیزابت یانیندا قالدی و اوندان سورا اؤز ائوینه دؤندو.
یحیانینگ آنادان اولماگی
57اِلیزابتینگ دوغماگی وختی ائتیشدی و او بیر اوغول دوغدو. 58اوندا کی قونشولاری و قوحوم و خویشلَری ائشیتدیلَر کی رَب نه بویوک رَحمت اؤنونگ حَقّینده ائدمیش اؤنونگاینن شادلیگ ائدیلَر. 59سَکّیزینجی گؤنده گلدیلَر تا اوشاقی سُنّت ائدَلّر و سئیرلَردی کی بووآسی، زَکریا آدینی اوستونه قؤیالّار. 60آما اوشاقینگ آناسی دئدی: «یو، اؤنونگ آدی یحیا اولاسی.» 61اوللار دئدیلَر: «سَنینگ قوحوم و خویشلَرینگ آراسیندا هئچ کَسده بیر بئلهیین آد یوخ.» 62و اشاره اینَن اوشاقینگ بووآسیندان خبر آلدیلار کی سئیر اوشاق آدینی نه قؤیا. 63زَکریا بیر تخته سئدی و تختهنینگ اوستونه یازدی: «اؤنونگ آدی یحیا دیر.» واری خَلخ مات قالدیلار. 64بیردَن زَکریانینگ دیلی آچیلدی و تارئیی حمد و ثنا ائدی. 65قونشولارینینگ واریسینینگ جانینا قورخو دؤشدو و واری بوزادلار، بوتون یهودیه داغلیگیندا، خَلخ ایچینده آغیزدان آغیزا داغیلیردی. 66هَر کَس کی بونو ائشیدیردی، اؤز اؤرهکینده فکر ائدیردی و دئییردی: «بو اوشاق نهیین آدام اولور؟ چونکی رَبّینگ اَلی اؤنونگ اینان دیر.»
زَکریانینگ نَبوّتی
67اوشاقینگ بووآسی زَکریا، تارئنینگ قُدّوس روحوندان دؤلدو و بئله نَبوّت ائدی:
68«مُتبارَک اولسون رَب، خَلخیمیزینگ تاریسی،
چونکی او اؤز خَلخینینگ کؤمَکینه گلمیش و اوللارینگ آزادلیگینی خرید ائدمیش.
69اؤز نوکری، داوود پادشاهینگ نَسلیندَن
بیزیم ایچی بیر قوّتلی نجات وئرَن یوللامیش.
70ائله او طور کی، قَدیمدَن اؤز مُقدّس پیغمبرلَرینینگ دیلیندَن وَعده وئرمیشدی کی،
71بیزی دشمنلَریمیز
و واری او آداملار اَلیندَن کی بیزدَن نفرت وارلاری، نجات وئرهر،
72تا او رَحمتی کی وَعدهسینی جَدلَریمیزه وئرمیش، گؤرسَده
و اؤز مُقدّس عَهدینی یادا گتیره؛
73و او آندی کی جَدّیمیز ابراهیم پیغمبر ایچی ایچدی،
74کی بیزی دشمنلَریمیز اَلیندَن قورتارا، یئرینه ائتیشتیره؛
تا بیز قورخوسوز، اؤنا قوللوق ائدهک؛
75عُمریمیزینگ بوتون گؤنلَرینده، آرّیلیگ و صالحلیگ اینَن.
76و سَن، اوشاق، مُتعال تارئنینگ پیغمبری چاغیریلارانگ،
چونکی رَبدَن ایلَری گئدهرَینگ، تا یولو رَبّینگ گلمَکی ایچی آچانگ،
77و اؤنونگ خَلخینه بیلدیرَینگ کی نجات نهدیر،
کی گُناهلارینینگ باغیشلانماگی اینان، اوللار نجات توتیرلار،
78بو خاطره کی بیزیم تارئمیزینگ رَحمتیندَن دیر،
کی سَحر گؤنو گؤیدَن بیزه چالار
79تا او آداملارا کی قَرَنگیلیگده و اؤلوم کؤلگهسینده اوتوریرلار اؤز ایشّیقینی چالا،
و بیزیم قدملَریمیزی صُلح و سلامتلیگ یولوندا آپارا.»
80او اوشاق بویوک اولیردی و روحدا قوّتلی اولیردی و او گؤنَنچاز کی اؤزونو تارئ خَلخینه گؤرسَده، بیاباندا باش ائدیردی.
دیاریکراوەکانی ئێستا:
لوقا 1: QII
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
@ 2024 Korpu Company