لوقا 2
2
عیسانینگ آنادان اولماگی
1او گؤنلَرده، روم پادشاهی آگوستوسدان فرمان گلدی کی او یئرلَرده کی روم پادشاهلیگ ائدیر، خَلخینگ واریسی، آدام باشینا ساییلاسیلار. 2بو اَوّلکی سایقوش ایدی کی کورینیوس زامانیندا، کی سوریه والیسی ایدی، اولوندو. 3پس هَر کَس اؤز شَهرینه گئتدی تا سایقوشدا آد یازا. 4یوسف ده ناصِره شَهریندَن کی جَلیل ولایتینده ایدی، یهودیه ولایتینه گلدی تا داوود پادشاه شَهرینده کی آدی بِیتلَحِم ایدی آد یازا، چونکی او، داوود پادشاه سؤیوندان ایدی. 5یوسف، آداخلیسی مریمی ده کی اوشاقلی ایدی اؤزو اینَن آپاردی تا سایقوشدا، آدلارینی یازالّار. 6اوندا کی اؤردایدیلار، مریمینگ دوغماگی وختی ائتیشدی 7و مریم اَوّلکی اوشاقینی کی اوغول ایدی، دوغدو. اوشاقی بِلَدی و بیر آخور ایچینده یاتیرتدی، بو سَبریه کی کاروانسرا دا اوللار ایچی یئر یوخ ایدی.
چوبانلار و فرشتهلَر
8ائله او منطقهنینگ چؤلونده، بیر پارا چوبان وار ایدی کی گئجهلَر سؤرولارینینگ کیشیکینی چَکیرلَردی. 9رَبّینگ بیر فرشتهسی اوللارا ظاهر اولدو و رَبّینگ شوکتی، ایشّیقی اینَن اوللارینگ دئییرینه ایشّیلادی و اوللار سَخت قورخدولار. 10فرشته اوللارا دئدی: «قورخماینز، باخینز من سیزه بیر خوش خبر گتیرمیشَم، بیر بویوک شادلیگ خَبری کی واری خَلخ ایچی دیر. 11بوگؤن داوود پادشاه شَهرینده بیر نجات وئرَن دنیایا گلمیش کی وَعده وئریلَن مَسیح و رَب دیر. 12اؤنونگ نیشاناسی سیزینگ ایچی بو دور کی بیر اوشاقی بِلَلی و آخور ایچینده یاتیلی بولاراینز.» 13بیردَن او فرشته اینَن بیر بویوک آسیمانلی لَشکر فرشتهلَردن گؤرولدو کی ییرلهمَکاینن تارئیی حمد و ثنا ائدیرلَردی و دئییرلَردی:
14«تارئیا کی گؤیونگ ائنگ اوخاریسیندا دیر عِزّت اولسون،
و یئر اوستونده، او آداملار آراسیندا کی تارئ بئللریندَن راضی دیر، صُلح و سلامتلیگ اولسون.»
15فرشتهلَر، چوبانلار یانیندان گؤیه گئدَندَن سورا، چوبانلار بیر بیره دئدیلَر: «گلینز بِیتلَحِم شَهرینه گئدهک و بو اولان ایشی کی رَب بیزه بیلدیرمیش گؤرَک.» 16پس تَلَسیق گئتدیلَر و مریمی، یوسفو و آخور ایچینده یاتان اوشاقی بولدولار. 17اوشاقی گؤرَندَن سورا، هَرنهیی کی اوشاق بارهسینده اوللارا دئییلمیشدی، واری یئرده دئدیلَر. 18واری او آداملار کی چوبانلار سؤزلَرینی ائشیدیرلَردی، تَعجّبدان مات قالیرلاردی. 19آما مریم واری بو زادلاری اؤرهکینده ساخلاتیردی و اوللارا فکر ائدیردی. 20چوبانلار بؤکولدولَر و هَرنه ایچی کی ائشیدمیشلَردی و گؤرموشلَردی، تارئیا عزّت ائدیلَر و بئلَسینی حمد و ثنا ائدیلَر، بو سَبریه کی هَرنه کی اوللارا دئییلمیشدی، یئرینه ائتیشمیشدی.
21سکّیزینجی گؤنونگ آخیریندا کی اوشاقی سُنّت ائدیلَر، آدینی عیسا قؤیدولار، ائله او آد کی مریمینگ اوشاقلی اولماگیندان ایلَری، فرشته طَریقیندَن وئریلمیشدی.
عیسا مَعبدده تقدیم اولونیر
22موسا شریعتینه گؤره، مریمینگ طاهر اولماگی گؤنلَری گچَندَن سورا، مریم و یوسف، اوشاقی گؤتوردولَر و مَعبده کی اورشلیم شَهرینده ایدی آپاردیلار، 23تا ائله اولهیین کی رَبّینگ شَریعتینده یازیلمیش کی: «رَحِمینگ اَوّلکی اوغلو، رَبّه وَقف اولاسی.» اوشاقی رَبّه وَقف ائدَلّر، 24و رَبّینگ شَریعتینده دئییلَن سؤزه گؤره، او قُربانلوقی کی مریمینگ طاهر اولماگی ایچی ائدیلهسیدی، وئرَلَّر؛ یعنی «بیر جُفت قومری و یا ایکّی گؤیاَرچین جیجهسی.»
25او زامان اورشلیم شَهرینده بیر شَمعون آدلی کیشی زندلیگ ائدیردی کی صالح ایدی و تارئیا چوخ وفالی ایدی و تارئ خَلخینی آزاد ائدنینگ یولونو گؤزلهییردی و تارئنینگ قُدّوس روحو اؤنونگ اوستونده ایدی. 26تارئنینگ قُدّوس روحو، شَمعونا آشکار ائدمیشدی کی تا رَبّینگ مَسیحینی گؤرمهیه، اؤلمَز. 27شَمعون تارئ روحونونگ هدایتی اینَن مَعبده گلدی و اوندا کی اوشاقینگ آنا بووآسی، عیسایی گتیردیلَر تا شَریعت رَسمینی اوشاق ایچی یئرینه ائتیردَلَّر، 28شَمعون اوشاقی آلدی قوجاقینا و تارئیی حمد و ثنا ائده-ائده دئدی:
29«ایندی، یا رَب، سؤزونگه گؤره،
اؤز نوکرینگی، سلامتلیگ اینَن مُرخص ائد،
30بو سَبریه کی منیم گؤزلَریم، سَنینگ نجاتینگی گؤرموش،
31او نجاتی کی سن بوتون خَلخ گؤزو دَمینده آماده ائدمیشَینگ،
32او ایشّیقی کی حَقیقتی آیری ملّتلَره آشکار ائدهر
و سَنینگ خَلخینگه عِزّت وئرهر.»
33اوشاقینگ آنا بووآسی، عیسانینگ بارهسینده دئییلَن گپلَردن حیران قالدیلار. 34شَمعون اوللارا بَرکت دُعاسی ائدی و اوشاقینگ آناسی مریمه دئدی: «باخ! بو اوشاق تارئ خَلخی ایچینده، چوخ آداملارینگ ییخیلمَکی و آیاقا تورماکی ایچی مَعین اولموش و بیر نیشانا دیر کی، اؤنونگ ضدّینه دانیشارلار، 35و سنینگ اؤرهکینگه دا بیر قیلیج باتار. بوللارینگ واریسی بو سَبریه اولونار کی چوخ آداملارینگ اؤرهکلَرینده گچَن فکرلَر، آشکار اولا.»
36اؤردا بیر قَرّی آرواد کی پیغمبر ایدی، زندلیگ ائدیردی کی اَشیر طایفهسیندَن ایدی. اؤنونگ آدی حَنّا ایدی و فنوئیل قیزی ایدی. او یئتدی ایل اَره گئدَندَن سورا، اَری اؤلموشدو 37و اوندان سورا، سَگسان دؤرد یاشینانچاز دول قالمیشدی. او، هئچ زامان مَعبددَن چیخمئیردی بلکی گئجه گؤندوز، اوروج و دُعا اینان، اؤردا تارئیی پَرست ائدیردی. 38حَنّا ائله او موقع ایلَری گلدی، تارئیی شُکر ائدی و واری او آداملار ایچی کی اورشلیمی آزاد ائدَنینگ یولونو گؤزلهییرلَردی، عیسادان دانیشدی.
39یوسف و مریم، رَبّینگ شَریعتینده اَمر اولان ایشلَرینگ واریسینی یئرینه ائتیردندَن سورا، جَلیل ولایتینه، اؤز شَهرلَری ناصِرهیه گئری دؤندولَر. 40اوشاق حِکمَتدَن دؤلو، بویوک اولیردی و قوّت توتیردی و تارئ گؤزونده عَزیز ایدی.
عیسا مَعبدده
41عیسانینگ آنا بووآسی، هر ایل پِسَخ عیدی ایچی اورشلیم شَهرینه گئدیرلَردی. 42عیسا اون ایکّی یاشار اولاندا، اوللار، اؤز رَسملَرینه گؤره، عید ایچی اورشلیمه گئتدیلَر. 43عید گؤنلَری تؤکنَنده، اوندا کی اوللار اؤز شَهرلَرینه ساری یولا دؤشدولار، اوغول عیسا، اورشلیم شَهرینده قالدی. آما آنا بووآسی بوندان خبر یوخلاریدی، 44و گمان ائدیرلَردی کی عیسا دا ائله او کاروان ایچینده گلیر. بیر بوتون گؤن یول گئدَندَن سورا، اؤنو قوحوم و خویشلَر و تانیشلار آراسیندا گزدیلَر، 45آما اؤنو بولمیاندا، گزه-گزه اورشلیم شَهرینه دؤندولَر. 46اؤچ گؤندَن سورا اؤنو مَعبدده بولدولار. عیسا، معلّملَر آراسیندا اوتورموشدو و اوللارا قولاق آسیردی و اوللاردان خبر آلیردی. 47واری او آداملار کی اؤنونگ گپلَرینی ائشیدیرلَردی، اؤنونگ آنگلاماگیندان و جوابلاریندان حیران قالمیشلاردی. 48عیسانینگ آنا بووآسی، اؤنو گؤرَنده مات قالدیلار. آناسی اؤنا دئدی: «اوغول، نه ایچی بیزیم اینَن بئله ائدینگ؟ باخ! بووآنگ اینَن من چوخ نگرانلیگ اینان سنینگ قولونجونگا گزیردیک.» 49او دئدی: «نه ایچی مَنیم قولونجوما گزیردینز؟ بئیه بیلمئیردینز کی من بووآم ائوینده اولاسیم؟» 50آما اوللار آنگلامادیلار کی عیسا بئللَرینه نه دئییر.
51اوندان سورا عیسا اوللار اینان ناصِره شَهرینه گئتدی و آنا بووآسیندان اطاعت ائدیردی. عیسانینگ آناسی واری بو زادلاری اؤز اؤرهکینده ساخلاتیردی. 52عیسا حِکمَتده و هیکلده بویوک اولیردی. هم تارئ یانیندا عَزیز ایدی، هم ده خلخ یانیندا.
دیاریکراوەکانی ئێستا:
لوقا 2: QII
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
@ 2024 Korpu Company