مَرقُس 16
16
عیسانینگ دئرّیلمَکی
1شنبه گؤنونونگ آغشامیندا کی مُقدّس شنبه او ساعتدان تؤکنیر، مَجدللی مریم، یَعقوب آناسی مریم و سالومه عَطرلی یاغلار آلدیلار تا مَقبرهیه گئدَلَّر و عیسانینگ جنازهسینی عَطرلهیهلَّر. 2او گؤنونگ صاباسی کی هفتهنینگ اَوّلکی گؤنو ایدی، یئر آچیلاندا آروادلار گئتدیلَر مَقبره یانینا. 3اوللار یولدا گئدَنده بیر بیره دئییرلَردی: «ایندی مَقبره آغیزی دَمیندهکی داشی کیم بئلَمیز ایچی ایتهلیهسی قیراقا؟» 4آما اوللار ائتیشنده گؤردولَر کی او داش کی چوخ ده بویوک ایدی، مَقبرهنینگ آغیزی دَمیندن ایتهلهنمیش قیراقا. 5مَقبره ایچینه گئدَنده، بیر آغ رَختلی جاهال کیشییی گؤردولَر کی ساغ طَرفده اوتورموشدو. آروادلار، اؤنو گؤرَنده تلواسهیه دؤشدولار. 6او جاهال کیشی اوللارا دئدی: «تلواسهیه دؤشمَینز. سیز صَلیبه چَکیلَن ناصِرهلی عیسا قولونجونا گزیرَینز. او دئرّیلمیش؛ بوردا دهییل. اؤنو قؤیدوگو یئری گؤرونز. 7گئدینز و اؤنونگ شاگردلَرینه و پِطرُسا دئیینز کی او، سیزدَن ایلَری جَلیل ولایتینه گئدیر. سیز اؤردا بئلَسینی گؤرهرَینز. ائله اولهیین کی بئلَینزه دئمیشدی.» 8اوللار یازّیا چیخدیلَر و مَقبرهدَن قَچدیلَر. چونکی تیترَمگه دؤشموشلاردی و مات قالمیشلار ایدی. اوللار قورخودان هئچکَسه هئچنه دئمهدیلَر.
9هفتهنینگ اَوّلکی گؤنونده سَحر ناماچاغی عیسا دئرّیلَنده، اَوّل اؤزونو مَجدللی مریمه کی اوندان یئتدی شیطانلی روح یازّیا چیخاردمیشدی، ظاهر ائدی. 10مریم گئتدی و عیسا شاگردلرینه کی یاس توتموشلاردی و آغلاییرلاردی، خبر وئردی. 11آما اوندا کی مریم بئللرینه دئدی: «عیسا دئرّیلمیش و من بئلَسینی گؤرموشَم،» اوللار بو گپی اینانمادیلار.
12اوندان سورا عیسا بیر آیری ظاهر اینان شاگردلَرینگ ایکّیسینه کی شَهردن بیر کَنده ساری گئدیرلَردی ظاهر اولدو. 13او ایکّی نفر بؤکولدولر شَهر ایچینه و شاگردلَرینگ قالیقینا خبر وئردیلر، آما اوللار او ایکّی نفرینگ گپینه ده اینانمادیلار.
14اوندان سورا ائله بئله کی او اون بیر شاگرد، سُفره قیراقینا اوتورموشلاردی، عیسا اوللارا ظاهر اولدو. عیسا اوللارینگ ایمانسیزلیگلاری خاطرینه و اؤرهکلرینینگ داشلیگی سَبرسینه بئللَرینی هَیلهدی، بو سَبریه کی اوللار، او آداملارینگ سؤزلرینی کی اؤنو دئرّیلندن سورا گؤرموشلَردی، اینانمامیشلاردی. 15اوندا عیسا اوللارا بئله دئدی: «دنیانینگ واری یئرینه گئدینز و تارئ پادشاهلیگینینگ خوش خَبرینی واری آداملارا اعلام ائدینز. 16هر کَس کی ایمان گتیره و تَعمید غُسلی توتا، نجات توتار، آما هر کَس کی ایمان گتیرمئیه، محکوم اولور. 17منه ایمانی اولان آداملار بو نیشانالاری گؤرسَدرلَر: اوللار مَنیم آدیمدا شیطانلی روحلاری یازّیا چیخارتارلار؛ اوللار تازّا دیللره دانیشارلار؛ 18اوللار اَللَری اینَن، ایلانلاری توتارلار؛ اوللار اؤلدورَن زَهر ایچسهلَر ده، بئللرینه هئچنه اولماز؛ اوللار اؤز اَللَرینی، مَریضلَر اوستونه قؤیارلار و مَریضلَر شفا توتارلار.»
19رَب عیسا شاگردلَر اینن دانیشاندان سورا، گؤیه آپاریلدی و تارئنینگ ساغ اَلینده اوتوردو. 20شاگردلَر ده گئتدیلَر و واری یئرده خوش خَبری اعلام ائدیلَر. رَب اوللار طَریقیندن عَمل ائدیردی و اؤز کلامینی، اوللار طَریقیندن ائدیلن نیشانالار اینان، تصدیق ائدیردی.
دیاریکراوەکانی ئێستا:
مَرقُس 16: QII
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
@ 2024 Korpu Company