یوحنا 11
11
ایلعازَر اؤلومو
1بیر ایلعازَر آدلی کیشی مَریض اولموشدو. او بِیتعَنیا کَندینینگ آدامی ایدی، ائله او کَند کی مریم و مریمینگ باجیسی مارتا اؤراکی ایدیلار. 2مریم ائله او آرواد دیر کی رَب عیسانینگ قیچلَرینه عَطرلی یاغ سؤرتَر و ساچّی اینن ده قورّودار. ایندی مریمینگ کاکاسی ایلعازَر، مَریض اولموشدو. 3پس ایلعازَرینگ باجیلاری عیسایا پیغام یوللادیلار و دئدیلَر: «آقا، سنینگ عزیز یولداشینگ مَریض دیر.» 4آما عیسا بونو ائشیدَنده دئدی: «بو مَریضلیگینگ آخیری اؤلوم دهییل، بلکی بونونگ ایچی دیر کی تارئ شوکتی آشکار اولا تا بئله، بو مَریضلیگ طَریقیندَن، تارئ اوغلونونگ شوکتی ده آشکار اولا.» 5عیسا، مارتایی و مارتانینگ باجیسینی و ایلعازَری چوخ سئیردی. 6با بو حال اوندا کی ائشیتدی ایلعازَر مَریض دیر، ایکّی گؤن داها دا، ائله اؤردا کی وار ایدی، قالدی.
7اوندان سورا عیسا اؤز شاگردلَرینه دئدی: «گلینز تا گئنه یهودیه ولایتینه گئدَک.» 8شاگردلَر اؤنا دئدیلَر: «اُستاد، چوخ وخت دهییل کی یهودیلار سئیرلَردی بئلَینگی سَنگسار ائدَلّر، گئنه گئدیرَینگ ائله اؤرا؟» 9عیسا جواب وئردی: «بئیه گؤندوز اون ایکّی ساعات دهییل؟ هَرکَس گؤندوزده یول گئدسه ییخیلمَز چونکی بو دنیانینگ ایشّیقینی گؤرور. 10آما هَرکَس کی گئجهده یول گئدسه، ییخیلَر چونکی ایشّیقی یوخو.» 11عیسا بو سؤزلَری دئیَندن سورا، شاگردلره دئدی: «یولداشیمیز ایلعازَر یاتمیش، آما من گئدیرَم تا بئلَسینی اویاردام.» 12شاگردلَر اؤنا دئدیلَر: «آقا، اگر یاتمیش، خوب اولور.» 13عیسا، ایلعازَرینگ اؤلمَکیندَن دانیشیردی، آما شاگردلَر گمان ائدیرلَردی کی عیسانینگ مَنظورو بو دور کی ایلعازَر یاتمیش تا استراحت ائده. 14اوندا عیسا آچیق اوللارا دئدی کی: «ایلعازَر اؤلموش 15و سیزینگ خاطرینزه ده خوشحالام کی اؤردا دهییلدیم تا ایمان گتیرَینز. آما ایندی گلینز تا گئدَک اؤنونگ یانینا.» 16پس توما کی اؤنو جومّولو چاغیریرلاردی، باقّی شاگردلَره دئدی: «گلینز تا بیز ده گئدَک تا اؤنونگ اینَن اؤلهک.»
عیسا اؤلولَری دئرّیدیر و اؤزو زندلیگ سَرچشمهسی دیر
17عیسا بِیتعَنیا کَندینه ائتیشَنده، بیلدی کی ایندی دؤرد گؤن دیر کی ایلعازَری مَقبره ایچینه قؤیموشلار. 18بِیتعَنیا اینَن اورشلیم آراسی، یاریم آغاجدان آزتر یول ایدی. 19چوخ آدام یهودیلاردان مارتا و مریم یانینا گلمیشلَر ایدی تا کاکالارینینگ اؤلمَکی ایچی، اوللارا تَسلّی وئرَلَّر. 20اوندا کی مارتا ائشیتدی کی عیسا گلیر، اؤنونگ پیشوازینا گئتدی، آما مریم ائوده اوتورموشدو. 21مارتا عیسایا دئدی: «آقا، اگر بوردا ایدینگ، کاکام اؤلمَزدی. 22آما بیلیرَم کی حتّی ایندی ده، هَرنه کی تارئدان سئیَنگ، تارئ سَنه وئرهر.» 23عیسا بئلَسینه دئدی: «کاکانگ دئرّیلَر.» 24مارتا دئدی: «بیلیرَم کی کاکام قیامت گؤنونده دئرّیلَر.» 25عیسا مارتایا دئدی: «منم کی اؤلولَری دئرّیدیرَم و زندلیگ سَرچشمهسییَم. او کی مَنه ایمان گتیره، حتّی اؤلسه ده، دئرّیلَر، 26و هَر کَس کی منه ایمانی اولدوگو سَبرسینه دئرّیلیگ واری، هئچوخت اؤلمَز؛ آیا بونا ایمان وارینگ؟» 27مارتا دئدی: «بَله آقا، ایمان واریم کی سَن ائله او وَعده وئریلَن مَسیحَینگ، تارئ اوغلو، ائله او کی گلَسی بو دنیا ایچینه.»
28مارتا بونو دئدی و گئتدی باجیسی مریمی چاغیردی. بیسَس مریمه دئدی: «اُستاد بوردا دیر و سَنی چاغیریر.» 29مریم بونو ائشیدَنده فوری توردو آیاقی و گئتدی عیسا یانینا. 30عیسا حلی ائله اؤردا ایدی کی مارتا اؤنونگ پیشوازینا گئدمیش ایدی و حلی کَندینگ ایچینه گلمهمیش ایدی. 31او یهودیلار کی مریم اینَن اوبادا ایدیلار و بئلَسینه تَسلّی وئریرلَردی، اوندا کی گؤردولَر مریم فوری توردو آیاقی و چیخدی یازّیا، اؤنونگ آردی سورا یولا دؤشدولار. اوللار گمان ائدیرلَردی کی مریم گئدیر مَقبره یانینا تا اؤردا آغلایا. 32اوندا کی مریم، عیسا اولدوگو یئره ائتیشدی و عیسایی گؤردو، اؤنونگ قیچینه دؤشدو و دئدی: «آقا، اگر بوردا اولسایدینگ، کاکام اؤلمَزدی.» 33عیسا، مریم و مریم اینن گلَن یهودیلارینگ آغلاماگینی گؤرَنده، روحونو غَم باسدی و سَخت پریشان اولدو 34و دئدی: «ایلعازَری هارا قؤیموشاینز؟» اوللار دئدیلَر: «آقا، گَل و گؤر.» 35عیسا آغلادی. 36اوندا یهودیلار دئدیلَر: «گؤرونز ناغاد ایلعازَری چوخ سئیردی!» 37آما اوللارینگ بیر پاراسی دئدیلَر: «بئیه بو کیشی کی او کورینگ گؤزلَرینی آچدی، ایلعازَر اؤلمَکینینگ جلوسینی ده توتا بیلمَزدی؟»
عیسا، ایلعازَری دئرّیدیر
38گئنه عیسانینگ روحونو غَم باسدی و گلدی مَقبره یانینا. مَقبره بیر شکاف ایدی کی آغیزی دَمینه بیر داش ایتهلنمیشدی. 39عیسا دئدی: «داشی ایتهلهیینز قیراقا.» مارتا کی او اؤلَنینگ باجیسی ایدی، عیسایا دئدی: «آقا، او ایندی داها ایس توتموش، بو سَبریه کی دؤرد گؤن دور کی اؤلموش.» 40عیسا مارتایا دئدی: «بئیه سَنه دئمهدیم کی اگر ایمان گتیرَینگ، تارئ شوکتینی گؤرَرَینگ؟» 41پس اوللار داشی ایتهلهدیلر قیراقا. اوندا عیسا گؤیه باخدی و دئدی: «بووآ، سَنی شُکر ائدیرَم کی منی ائشیدمیشَینگ. 42بیلیردیم کی همیشه منی ائشیدیرَینگ، آما بونو، بوردا توران آداملار خاطرینه دئدیم، تا ایمان گتیرَلَّر کی سَن منی یوللامیشانگ.» 43عیسا بو سؤزلَری دئیَندن سورا، اوجا سَس اینَن چاغیردی: «ایلعازَر، گَل یازّیا.» 44او آدام کی اؤلموشدو، قیچ و قولی خَلعَتده و یاقلوق ایزینه ساریلی، گلدی یازّیا. عیسا اوللارا دئدی: «اؤنو آچینز و قؤینز گئده.»
عیسا اؤلدورمکینینگ نقشهسی
45چوخ آدام یهودیلاردان کی مریم اینن گلمیشلَردی، عیسا ائدیگی ایشی گؤرَنده، عیسایا ایمان گتیردیلَر. 46آما اوللارینگ بیر پاراسی فَریسی فِرقهسینینگ عالِملَری یانینا گئدیلَر و عیسا ائدیگی ایشی، اوللارا دئدیلر. 47پس باش کاهِنلَر کی مَعبد عالِملَری ایدیلر و فَریسیلَر شورا توتدولار و دئدیلَر: «نیجه ائدهسیک؟ بو کیشی چوخ مُعجزهلی نیشانالار ائدیر. 48اگر قؤیاک بو یول اینان کی ایلَری توتموش گئده، واریکَس اؤنا ایمان گتیرَر، اوندان سورا دا روملیلار گلَرلَر هم مَعبدیمیزی، هم ده ملّتیمیزی اَلیمیزدَن آلارلار.» 49آما اوللارینگ بیری کی آدی قیافا ایدی و او ایل، ائنگ بویوک کاهِن ایدی، اوللارا دئدی: «سیز هئچنه بیلمئیرَینز. 50آنگلامئیراینز کی سیزینگ ایچی یئیتَر دیر کی بیر آدام خَلخ یولوندا اؤله تا بو کی بوتون ملّت هلاک اولا.» 51قیافا بو سؤزو اؤز یانیندان دئمهدی، بلکی بو سَبریه کی او ایل ائنگ بویوک کاهِن ایدی، بئله نَبوّت ائدی کی عیسا ملّت یولوندا اؤلَر. 52عیسا اؤلَر آما نه فقط ملّت یولوندا، بلکی تا تارئ اولادلارینی دا کی بوتون دنیادا داغیلمیشلار، بیر یئره ییغه و بیر ائده. 53پس ائله او گؤندَن اوللار داها تَصمیم توتدولار کی عیسایی اؤلومه وئرَلَّر. 54بو خاطره ده، عیسا داها آلهیینده یهودیلار آراسیندا گَزمئیردی، بلکی شاگردلَری اینن اؤردان، بیر اِفرایم آدلی شَهره کی بیابانا یاخین ایدی گئتدی و اؤردا قالدیلار.
55یهودیلارینگ پِسَخ عیدی یاخین ایدی. عیددَن ایلَری، چوخ آداملار واری یئردَن اورشلیم شَهرینه گئتدیلَر تا بوندان ایلَری کی عید گؤنلَری ائتیشه، طاهر اولماگ رَسمینی یئرینه ائتیردَلَّر. 56خلخ عیسا قولونجونا گَزیرلَردی و ائله بئله کی مَعبدده تورموشلاردی، بیر بیره دئییرلَردی: «سیز نه گمان ائدیرَینز؟ گؤرَینگ عیسا عید ایچی گلمَز؟» 57آما باش کاهِنلَر کی مَعبد عالِملَری ایدیلر و فَریسی فِرقهسینینگ عالِملَری فرمان وئرمیشلَردی کی هَر کَس بیلدی عیسا هاردا دیر، اوللارا خبر وئرهسی تا اوللار عیسایی توتالّار.
دیاریکراوەکانی ئێستا:
یوحنا 11: QII
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
@ 2024 Korpu Company