یوحنا 10
10
خوب چوبان عیسا دیر
1«گرچَکینی سیزه دئییرم، او کی قویونلار آغُلینا دردَن ایچری گئدمئیه، بلکی آغُلینگ چیقیندن اوخاری گئده، اوغرو و گدیگ باغلایان دیر. 2آما او کی دردَن ایچری گلیر، قویونلارینگ چوبانی دیر. 3کیشیک چَکن دری اؤنا آچیر و قویونلار اؤنونگ سَسینه قولاق آسیرلار. او اؤز قویونلارینی آدا چاغیریر و اوللاری یازّیا آپاریر. 4قویونلارینینگ واریسینی یازّیا آپاراندان سورا، اوللاردان ایلَری گئدیر و قویونلار دا اؤنونگ آردی سورا گئدیرلَر بو سَبریه کی اوللار اؤنونگ سَسینی تانییرلار. 5قویونلار غَریبه قولونجوندان گئدمئیرلَر بلکی اوندان قَچیرلَر، بو سَبریه کی غَریبهلَرینگ سَسینی تانیمئیرلار.» 6عیسا بو مَثَلی اوللارا چَکدی، آما اوللار آنگلامادیلار کی عیسا مَنظورو نه دیر.
7پس عیسا گئنه اوللارا دئدی: «گرچَکینی سیزه دئییرم، من قویونلار ایچی دَرم. 8واری اوللار کی مندن ایلَری گلدیلر، اوغرو و گدیگ باغلایان دیرلار، آما قویونلار اوللارا قولاق آسمادیلار. 9من دَرم. هَرکَس منیم طَریقیمدَن ایچَری گلسه، نجات توتار، ایچَری گلَر و یازّیا چیخَر و یاییلماگ ایچی بیر یئر بولار. 10اوغرو گلمئیر بهغیری اوغورلاماک و اؤلدورمَک و نابود ائدمک ایچی. مَن گلمیشَم تا آداملار زندگانلیگ وارلاری اولا و اؤنو فراوان دا وارلاری اولا.
11«خوب چوبان منم. خوب چوبان اؤز جانینی قویونلار ایچی وئریر. 12او آدام کی مُزد آلیر تا چوبانلیگ ائده، چونکی اصلِ چوبان اؤزو دهییل و قویونلار دا اؤزونونگ دهییللَر، هر وخت کی گؤره قورد گلیر، قویونلاری ویل ائدیر قَچیر، قورد ده قَریشیر قویونلار ایچینه و اوللاری داغیدیر. 13مُزد آلان قَچیر بو سَبریه کی فقط مُزد ایچی ایش گؤرور و قویونلار قِیدینده دهییل. 14خوب چوبان منم. من اؤز قویونلاریمی تانییرام و قویونلاریم ده منی تانییرلار، 15ائله اولهیین کی گؤیدهکی بووآ منی تانییر و من بووآیی تانییرام. من اؤز جانیمی قویونلار ایچی وئریرَم. 16من آیری قویونلار ده واریم کی بو سؤرودان دهییللَر. اوللاری دا گتیرَسیم و اوللار دا منیم سَسیمه قولاق آسارلار. او زامان اوللارینگ واریسی بئلینه بیر سؤرو اولارلار، بیر چوبان اینان. 17بووآ بو سَبریه منی چوخ سئیر کی من، اؤز جانیمی وئریرَم تا جانیمی گئری آلام. 18هئچ کَس جانیمی مندَن آلمئیر، بلکی من اؤز میلیم اینَن جانیمی وئریرَم. اختیار واریم اؤنو وئرَم، اختیار دا واریم اؤنو گئری آلام. گؤیدهکی بووآم منه فرمان وئرمیش تا اؤز جانیمی وئرَم.»
19بو سؤزلَر سَبرسینه گئنه یهودیلار آراسیندا اختلاف دؤشدو. 20اوللارینگ چوخو دئدیلَر: «بو کیشیده شیطانلی روح وار و دَلی دیر؛ نه ایچی اؤنا قولاق آسیراینز؟» 21اوللارینگ باقّیسی دئدیلَر: «بو سؤزلر بیر شیطانلی روحا گرفتار اولان آدامینگ سؤزلَری دهییل. بئیه شیطانلی روح بیر کور آدامینگ گؤزلَرینی آچا بیلَر؟»
عیسا و گؤیدهکی بووآ بیر دیرلار
22اورشلیم شَهرینده، مَعبدینگ وَقف عیدینینگ موقعسی ائتیشمیشدی. قیش ایدی 23و عیسا مَعبدده، سُلیمان ایوانیندا یول گئدیردی. 24یهودیلار عیسا دئییرینه ییغیلدیلَر و بئلَسینه دئدیلَر: «هاچانانچاز سئیرَینگ بیزی شَک ایچینده ساخلایانگ؟ اگر سن وَعده وئریلَن مَسیحَینگ، آچیق بیزه دئ.» 25عیسا اوللارا جواب وئردی: «سیزه دئدیم آما اینانمئیراینز. او ایشلَر کی من اؤز گؤیدهکی بووآم آدیندا گؤرورَم، منیم بارهمده گواهلیگ وئریرلَر. 26آما سیز اینانمئیراینز بو سَبریه کی منیم قویونلاریمدان دهییلَینز. 27منیم قویونلاریم منیم سَسیمه قولاق آسیرلار. من اوللاری تانییرام، اوللار دا منیم قولونجومدان گلیرلَر. 28من اوللارا اَبَدی زندلیگ وئریرَم و اوللار هئچوخت هلاک اولمازلار، هئچکَس ده اوللاری منیم اَلیمدَن قاپا بیلمَز. 29منیم گؤیدهکی بووآم کی اوللاری منه وئرمیش، واریکَسدَن بویوکتر دیر و هئچ کَس باشارماز اوللاری گؤیدهکی بووآ اَلیندَن قاپا. 30من و گؤیدهکی بووآ بیرَک.»
31اوندا یهودیلار گئنه داش گؤتوردولَر تا عیسایی سَنگسار ائدَلّر. 32عیسا اوللارا دئدی: «گؤیدهکی بووآ طَرَفیندَن چوخ خوب خوب ایشلَر سیزه گؤرسَدمیشَم. او ایشلَرینگ هانی بیرسی سَبرسینه سئیرَینز منی سَنگسار ائدَینز؟» 33یهودیلار جواب وئردیلَر: «خوب ایش سَبرسینه دهییل کی سئیرَک سنی سَنگسار ائدک، بلکی کُفر دئمَکینگ سَبرسینه دیر، چونکی سن بَشَرَینگ و دئییرَینگ کی تارئیانگ.» 34عیسا اوللارا جواب وئردی: «بئیه سیزینگ مُقدّس یازیلیلارینزدا یازیلمامیش کی، ”دئدیم، سیز تارئلارانز؟“ 35تارئ، او آداملارا کی کلامی بئللرینه ائتیشمیش، دئییر کی ”سیز، تارئلارانز“ و بونو دا بیلیرَینز کی مُقدّس یازیلیلار اِعتباردان دؤشمزلَر. 36پس ایندی نهیین دیر کی سیز بو خاطره کی دئدیم، ”من، تارئ اوغلویام“ منی کُفر دئمَکه مُتَّهم ائدیرَینز؟ من ائله اویام کی گؤیدهکی بووآ وَقف ائدمیش و بو دنیا ایچینه یوللامیش. 37اگر من گؤیدهکی بووآم ایشلَرینی گؤرمئیرَم، پس منه ایمان گتیرمَینز. 38آما اگر گؤیدهکی بووآم ایشلَرینی گؤرورَم، حتّی اگر منه ایمان گتیرمئیرَینز ده، او ایشلَره ایمان گتیرینز، تا بیلَینز و آنگلایانز کی من بووآدایام و بووآ منده دیر.» 39اوندا گئنه یهودیلار سئدیلَر عیسایی توتالّار آما عیسا اوللارینگ اَلیندَن چیخدی و گئتدی.
40عیسا گئنه اوردون چئیینینگ او تئیینه گئتدی و اؤردا قالدی. ائله اؤرایا کی یحیا ایلَرتر اؤردا تَعمید غُسلی وئریردی. 41چوخ آداملار عیسا یانینا گلدیلَر. اوللار دئییرلَردی: «یحیا هئچ مُعجزهلی نیشانا ائدمهدی آما هَرنه یحیا کی عیسا بارهسینده دئدی گرچَک ایدی.» 42و اؤردا چوخ آداملار عیسایا ایمان گتیردیلَر.
دیاریکراوەکانی ئێستا:
یوحنا 10: QII
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
@ 2024 Korpu Company