یوحنا 9
9
عیسا بیر کیشییی کی آنادان کور دوغولموش، شفا وئریر
1عیسا بیر یولدان گچیردی کی بیر کیشییی گؤردو کی آنادان اولاندان گؤزلَری کور ایمیش. 2شاگردلَری عیسادان خبر آلدیلار: «اُستاد، کیمینگ گُناهی سَبرسینه دیر کی بو کیشی آنادان کور دوغولموش؟ اؤز گُناهی سَبرسینه یا آنا بووآسی گُناهی سَبرسینه؟» 3عیسا جواب وئردی: «نه اؤز گُناهی سَبرسینه دیر، نه ده آنا بووآسی گُناهی سَبرسینه؛ بلکی بئله اولدو تا تارئ اؤز قُدرتلی ایشلَرینی اؤنونگ طَریقیندن گؤرسَده. 4تا گؤندوز دیر منی یوللایان تارئنینگ ایشلَرینی گؤرهسیک؛ قَرَنگی دؤشیر، قَرَنگیده هئچکَس ایش گؤره بیلمئیر. 5اوندایانچاز کی دنیادایام، دنیانینگ ایشّیقییَم.» 6عیسا بو گپلَری چالدی و یئر اوستونه تیفیردی و تیفرجهکی اینن چامور دؤزَتدی. اوندا دؤزَتدیگی چاموری او کورینگ گؤزلَرینه سؤرتدو، 7و بئلَسینه دئدی: «گئد و گؤزلَرینگی سیلوآم حوضیندا یوو.» سیلوآم، یعنی یوللانمیش. پس او کور گئتدی و یوودو و اؤردان آچیق گؤز اینن گئری گلدی.
8قونشولار و او آداملار کی ایلَرتر اؤنو گدایلیگ ائدَنده، گورموشلَردی، دئییرلَردی: «بئیه بو ائله او آدام دهییل کی اوتوریردی و گدایلیگ ائدیردی؟» 9بیر پارا آداملار دئدیلَر: «ائله او دیر.» بیر پارا داها دئدیلَر: «یو، او دهییل. اؤنا بَنزهییر.» آما اؤنونگ اؤزو ائله بئله دئییردی: «من ائله او آدامام.» 10پس اوندان خبر آلدیلار: «نهیین گؤزلَرینگ آچیلدی؟» 11او جواب وئردی: «او کیشی کی آدی عیسا دیر، چامور دؤزَتدی و گؤزلَریمه سؤرتدو و بئلمه دئدی: ”سیلوآم حوضینا گئد و یوو.“ پس گئدیم یوودوم و گؤزلَریم آچیلدی.» 12اوندان خبر آلدیلار: «او هاردا دیر؟» جواب وئردی: «بیلمئیرَم.»
13پس او کیشییی کی ایلَرتر کور ایدی، فَریسی فِرقهسینینگ عالِملَری یانینا گتیردیلَر. 14او گؤن کی عیسا چامور دؤزتمیش ایدی و اؤنونگ گؤزلَرینی آچمیش ایدی، یهودیلارینگ مُقدّس شنبهسی گؤنو ایدی. 15اوندا فَریسیلَر او کیشیدن خبر آلدیلار کی نهیین گؤزلَری آچیلمیش. کیشی جواب وئردی: «او گؤزلَریمه چامور سؤرتدو و یوودوم و ایندی گؤرورَم.» 16پس بیر پارا آدام فَریسی فِرقهسینینگ عالِملَریندن دئدیلَر: «او کیشی تارئ طَرَفیندَن دهییل، چونکی مُقدّس شنبه گؤنونونگ قانونینا عَمل ائدمئیر.» آما باقّی آداملار دئدیلَر: «نهیین بیر گُناهکار آدام بیر بئلهیین مُعجزهلی نیشانالار ائده بیلیر؟» و اوللار آراسیندا اختلاف دؤشدو. 17پس اوللار او کیشیدن کی ایلَرتر کور ایدی گئنه بئله خبر آلدیلار: «سن اؤنونگ بارهسینده نه دئییرَینگ؟ بو سَبریه کی او سَنینگ گؤزلَرینگی آچمیش.» او دئدی: «او بیر پیغمبر دیر.»
18یهودیلارینگ باشی بویوکلَری اینانمادیلار کی او کور ایمیش و گؤزو آچیلمیش، تا بو کی اؤنونگ آنا بووآسینی چاغیردیلار 19و اوللاردان خبر آلدیلار کی: «بو سیزینگ اوغلونز دور، ائله او کی دئییرَینز آنادان کور دوغولموش؟ پس ایندی نهیین گؤرور؟» 20او کیشینینگ آنا بووآسی جواب وئردیلر: «بیز بیلیرَک کی بو بیزیم اوغلوموز دور و بیلیرَک ده کی کور دوغولموش. 21آما بونو کی ایندی نهیین گؤزلَری آچیلمیش یا دا کیم اؤنونگ گؤزلَرینی آچمیش، بیلمئیرَک. اؤزوندن خبر آلینز. اؤزو بویوک دیر، اؤزو اؤز بارهسینده دانیشا بیلَر.» 22او کیشینینگ آنا بووآسی یهودیلارینگ باشی بویوکلَری قورخوسوندان بئله دئدیلر. بو سَبریه کی باشی بویوکلَر ایلَرتردن قرار کَسمیشلَردی کی هَر کَس دیله گتیرسه کی عیسا ائله او وَعده وئریلَن مَسیح دیر، عبادتگاهدان یازّیا آتیلاسی. 23بو سَبریه ده اؤنونگ آنا بووآسی دئدیلَر: «اؤزو بویوک دور؛ اؤزوندن خَبر آلینز.»
24یهودیلارینگ باشی بویوکلَری گئنه او کیشییی کی ایلَرتر کور ایدی چاغیردیلار و بئلَسینه دئدیلر: «حَقیقتی دئمَک اینن تارئیا عِزّت ائد! بیز بیلیرَک کی او کیشی بیر گُناهکار دیر.» 25او جواب وئردی: «اؤنونگ گُناهکار اولدوگونو یا دا اولمازلیگینی من بیلمئیرَم. من فقط بیر زاد بیلیرَم، او ده بو دور کی کور ایدیم و ایندی گؤرورَم.» 26فَریسیلَر بئلَسیندَن خبر آلدیلار: «او سَنینگ اینَن نه ایش گؤردو؟ نهیین گؤزلَرینگی آچدی؟» 27او جواب وئردی: «من کی ائله ایندیسی ده سیزه دئمیشم، سیز قولاق آسمئیراینز؛ نه ایچی سئیرَینز گئنه ائشیدَینز؟ بئیه سیز ده سئیرَینز اؤنا شاگرد اولاینز؟» 28یهودیلارینگ باش بویوکلَری او کیشییی سؤیدولَر و دئدیلر: «سن، اؤنونگ شاگردیینگ! بیز موسای پیغمبر شاگردلَرییَک. 29بیز بیلیرَک کی تارئ موسای پیغمبر اینن دانیشمیش. آما بو کیشینینگ هاردان گلدیگینی بیلمئیرَک.» 30او جواب وئردی: «عجب! بو کیشی منیم گؤزلَریمی آچمیش و، سیز حَلی ده بیلمئیرَینز او هاردان گلیر. 31بیز بیلیرَک کی تارئ گُناهکارلار سَسینه قولاق آسمئیر، آما اگر بیری تارئ قورخوسونو اؤرهکینده واری اولسا و اؤنونگ سئدیگینی یئرینه ائتیردسه، تارئ اؤنونگ سَسینه قولاق آسیر. 32دنیانینگ بَنا بُنیادی قؤیولاندان بَری هئچوخت بیری ائشیتمهمیش کی بیرکَس، بیر آنادان کور دوغولموش آدامینگ گؤزونو آچا. 33اگر بو کیشی تارئ طَرفیندَن دهییلدی، بیر بئلهیین ایشلَر گؤره بیلمَزدی.» 34فَریسیلَر اؤنا جواب وئردیلر: «سن کی باشینگدان آیاقینگا گُناه ایچینده دوغولموشانگ، ایندی بیزه درس وئریرَینگ؟» و اؤنو عبادتگاهدان یازّیا آتدیلار.
35اوندا کی عیسا ائشیتدی کی او کیشییی آتمیشلار یازّیا، اؤنو بولدو و بئلَسیندَن خبر آلدی: «سن انسان اوغلونا ایمان وارینگ؟» 36او کیشی جواب وئردی: «آقا، دئ او کیم دیر، تا من اؤنا ایمان گتیرَم.» 37عیسا بئلَسینه دئدی: «سن اؤنو گؤرموشانگ! ائله او دور کی ایندی سَنینگ اینَن دانیشیر.» 38او کیشی دئدی: «آقا، ایمان واریم.» و عیسایا سجده ائدی.
39عیسا دئدی: «من حکم ائدمَک ایچی بو دنیا ایچینه گلمیشَم. گلمیشَم تا او آداملار کی کور دورلار، گؤرَلَّر و تا او آداملارا کی گمان ائدیرلَر گؤرورلَر، گؤرسَدَم کی کور دورلار.» 40بیر پارا فَریسیلَردن کی اؤردا ایدیلر، بو سؤزلَری ائشیدَنده عیسایا دئدیلر: «ائدمئیه بیز ده کوراک؟!» 41عیسا اوللارا دئدی: «اگر کور ایدینز، تَقصیر یوخینز ایدی، آما ایندی کی گمان ائدیرَینز گؤرورَینز، تَقصیرکار قالارانز.
دیاریکراوەکانی ئێستا:
یوحنا 9: QII
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
@ 2024 Korpu Company