أعمال الرُسُل 6
6
السبْعة مُساعِدين
1وَ فِي الْوَكِتْ دَا، عَدَدْ التَّلَامِيذ قَاعِدْ يِزِيدْ. وَ النَّاسْ الْيِحَجُّوا كَلَامْ يُونَانِي قَمَّوْا يِهَارُجُوا النَّاسْ الْيِحَجُّوا كَلَامْ عِبْرَانِي. هَرَجَوْهُمْ أَشَانْ مَا قَاعِدِينْ يَنْطُوا مُسَاعَدَةْ الْيَوْمِيَّةْ لِأَرَامِلْهُمْ الْمِسْكِينَاتْ.
2وَ الرُّسُلْ الْأَتْنَا عَشَرْ نَادَوْا جَمَاعَةْ التَّلَامِيذ أَشَانْ يِلِمُّوا. وَ قَالَوْا لَيْهُمْ: «أَنِحْنَ الرُّسُلْ نِعَلُّمُوا كَلَامْ اللّٰهْ لِلنَّاسْ وَ مَا وَاجِبْ لَيْنَا نِخَلُّوا خِدْمِتْنَا دِي أَشَانْ نِنَظُّمُوا الْمُسَاعَدَةْ. 3أَشَانْ دَا يَا أَخْوَانَّا، أَعَزُلُوا مِنْ أَمْبَيْنَاتْكُو سَبْعَةْ رُجَالْ، نَاسْ مَعْرُوفِينْ حَالْهُمْ عَدِيلَةْ وَ مَلَانِينْ بِالرُّوحْ الْقُدُّوسْ وَ عِنْدُهُمْ فِكِرْ عَدِيلْ. وَ نِكَلُّفُوهُمْ بِالْخِدْمَةْ دِي. 4وَ لَاكِنْ كَنْ لَيْنَا أَنِحْنَ، نِنْكَرْبُوا فِي الصَّلَاةْ وَ فِي تَعْلِيمْ كَلَامْ اللّٰهْ.»
5وَ الْكَلَامْ دَا عَجَبَاهُمْ كُلُّهُمْ. وَ عَزَلَوْا إِسْتِفَانْ وَ هُو مُؤمِنْ قَوِي مَلَانْ بِالرُّوحْ الْقُدُّوسْ. وَ عَزَلَوْا فِلِبُّسْ وَ بُرْخُورْ وَ نِكَنُورْ وَ تِيمُونْ وَ بَرْمَانْ وَ نِيقُولَا الْمِنْ حِلَّةْ أَنْطَاكِيَةْ، هُو الْأَوَّلْ دَخَلْ فِي دِينْ الْيَهُودْ. 6وَ قَدَّمَوْا الرُّجَالْ السَّبْعَةْ دَوْل لِلرُّسُلْ وَ الرُّسُلْ سَأَلَوْا اللّٰهْ لَيْهُمْ وَ خَطَّوْا إِيدَيْهُمْ فَوْقهُمْ أَشَانْ يَنْطُوهُمْ الْمَسْؤُولِيَّةْ.
7وَ نَاسْ زِيَادَةْ سِمْعَوْا كَلَامْ اللّٰهْ وَ عَدَدْ التَّلَامِيذ زَادْ فِي مَدِينَةْ الْقُدُسْ. وَ كَتِيرِينْ مِنْ رُجَالْ الدِّينْ آمَنَوْا بِعِيسَى الْمَسِيحْ.
اليَهُود تهموا إِسْتِفَان
8وَ إِسْتِفَانْ أَنْمَلَى بِرَحْمَةْ وَ قُدْرَةْ مِنْ اللّٰهْ وَ قَاعِدْ يِسَوِّي عَلَامَاتْ وَ عَجَايِبْ كُبَارْ مَرَّةْ وَاحِدْ فِي أُسْط النَّاسْ. 9وَ نَاسْ وَاحِدِينْ مِنْ بَيْت الصَّلَاةْ الْأُسْمَهْ بَيْت الْمَعْتُوقِينْ قَمَّوْا ضِدَّهْ. وَ يَهُودْ وَاحِدِينْ مِنْ الْقَيْرَوَانْ وَ مِنْ الْإِسْكَنْدَرِيَّةْ كُلَ لَمَّوْا مَعَاهُمْ وَ آخَرِينْ مِنْ بَلَدْ كِلِكِيَّةْ وَ بَلَدْ آسِيَا. وَ قَمَّوْا يِغَالُطُوا إِسْتِفَانْ. 10وَ لَاكِنْ مَا حِمْلَوْا كَلَامَهْ أَشَانْ هُو قَاعِدْ يِكَلِّمْ لَيْهُمْ بِقُدْرَةْ الرُّوحْ الْقُدُّوسْ وَ بِعِلِمْ مِنْ اللّٰهْ. 11وَ أَشَانْ دَا، أَنْطَوْا قُرُسْ لِكَدَّابِينْ وَاحِدِينْ لِيُقُولُوا: «سِمِعْنَا كَلَامْ إِسْتِفَانْ وَ هُو قَالْ كَلَامْ فَسِلْ فِي سَيِّدْنَا مُوسَى وَ فِي اللّٰهْ.»
12وَ بِالتُّهْمَةْ دِي، حَرَّشَوْا النَّاسْ وَ الشُّيُوخْ وَ الْعُلَمَاءْ ضِدّ إِسْتِفَانْ. وَ كَرَبَوْه وَ وَدَّوْه قِدَّامْ الْمَجْلَسْ. 13وَ جَابَوْا كَدَّابِينْ أَشَانْ يَشْهَدَوْا فَوْقَهْ بِكِدِبْ. وَ قَالَوْا: «الرَّاجِلْ دَا يِكَلِّمْ دَايْماً كَلَامْ فَسِلْ فِي الْبَيْت الْمُقَدَّسْ وَ فِي التَّوْرَاةْ. 14وَ سِمِعْنَا هُو قَالْ عِيسَى الْمِنْ النَّاصِرَةْ يِدَمِّرْ بَيْت اللّٰهْ وَ يِغَيِّرْ عَادَاتْنَا الْمُوسَى أَنْطَاهُمْ لَيْنَا.»
15وَ وَكِتْ كُلَّ نَاسْ الْمَجْلَسْ حَمَّرَوْا إِسْتِفَانْ، شَافَوْا وِجْهَهْ يِشَابِهْ وِجِهْ مَلَائِكَةْ.
S'ha seleccionat:
أعمال الرُسُل 6: ع.د.ت19
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
La Bible en arabe tchadien © Alliance biblique du Tchad, 2019