Mɨkolano 24
24
aBayuta abasitaka Polo embere ya kafʉrʉnalɨ Felisi
1Kwabere kwahwa bɨro bɨthano omuheri mʉkʉlʉ Ananɨa mwandagalɨra mo muyi w'iKaisaria hagʉma n'abangʉmwa bagʉma b'aBayuta, n'embuyi yabo, Teritulo. Mobahika embere ya kafʉrʉnalɨ Felisi n'ɨthanga isitaka Polo. 2Babere babɨrɨkɨra Polo, Teritulo mwathanga imusitaka nɨanegena athɨ: «Ee mʉkengwa kafʉrʉnalɨ Felisi, nɨ ɨwe wo ulekire nithwabya na bʉholo ko bɨro byoshi bɨno. Kandɨ obuthegeki bwawe bʉbʉya bo bwalekire bɨngɨ nɨbyahɨndʉka n'ibya bɨbʉya ko ndundi y'ekɨhʉgo kɨno. 3Ko byoshi ebyo mʉkengwa kafʉrʉnalɨ Felisi, ebɨro byoshi na ahoshi-hoshi, othʉkʉsɨma kʉtsɨbʉ. 4Hewethuwe bʉthashʉba kuluhya, enyɨkʉshaba ko lʉkogo lwawe, ʉhʉlɨkɨrɨtsye ebɨnwa bɨke bɨno ebyo othushondya ɨnegena.
5«Omʉndʉ oyu, thwamashʉnga ko ni bwanishe, aletha bʉrʉnga mo Bayuta b'omo kɨhʉgo kyoshi. Kuthyo nɨ ɨye yo mʉkʉlʉ w'ekɨkembe ky'aBanyanasareti.#24:5 aBanyanasareti: Erɨtsɨna eryo erɨnagenda erɨhabwa Yesʉ, hewethuwe hano eryahʉla abɨga bʉwe. Soma Matayo 26:71. 6Na kandɨ mwashondya ibihya eNyʉmba ya Gongo aho mothwamʉtsɨmba. [Mothwashondya ɨmʉthondesa ɨkwamana n'oMʉgomba ethʉ nga ko anegenire, 7hewethuwe omʉkʉlʉ kʉtsɨbʉ w'abashirikani Lʉsɨa mwamʉnyagʉla mo minwe ethʉ. 8Mwanegena athɨ abandʉ bo bathasitaka Polo, nɨ eno yo baye.#24:8 Ɨthoka ko kɨtse kinyuma ky'omʉlondo wa 6 ihika ko mʉlondo wa 8, bɨthalɨ mʉ mashako magʉma wa kera. ] Nawe wowene wamʉthondesa, aho wamɨnya ko kwenene ebyo byalekaga nithwamusitaka.»
9Ebɨnwa bya Teretulo, aBayuta nabo mobahathɨkɨrɨtsya bathɨ ebyo anegena nɨ bya kwenene.
Polo ayɨthondera embere sa kafʉrʉnalɨ Felisi
10Honyuma kw'aho kafʉrʉnalɨ Felisi mwakohetsya Polo athɨ anegene. Aho Polo naye mwanegena athɨ: «Nyetsi ko ɨwe wamamala myaka mɨngɨ ʉnalɨ ʉsoha mo kɨhʉgo kɨno. Bʉshana n'ekyo, nyathonda embere sawe na mʉthɨma ashikire. 11Ɨwe wowene-wene wanganabʉtsya, bakʉbwɨra ko kuthetsi kwatsʉka bɨro birengitsye ikumi na bɨbɨrɨ nyɨrʉkɨre ɨYerʉsalemʉ bʉshana n'iyaramya Gongo. 12Mo kathi k'abandʉ aba, hathalɨ n'omʉgʉma yo wanyegaya nyɨrɨ enyikubisania kʉtse iuhya abandʉ balethe bʉrʉnga, ibye mo Nyʉmba ya Gongo kʉtse mo sosinakoki kʉtse handɨ handʉ mo muyi oyo. 13Abandʉ aba bathangakotsya ikukangania ko byo banyisitakira lɨno ko nɨ bya kwenene. 14Hewethuwe, ekyo nyimire embere sawe mbe mʉkengwa, kye kɨno: ingye enyinaramya Gongo wa bo thatha-kʉlʉ mw'ɨkwama eNzɨra yo ɨbo abahʉlamo ya mabesɨ. Kandɨ ebyoshi bishakirwe mo Mʉgomba wa Mʉsa, na mo bɨtabo by'abamɨnyeretsɨ, nabyo nyɨkɨrɨtsyebyo. 15Na kandɨ nga ko balɨ na maha ko Gongo andalubukya ababʉya n'ababɨ, nangye kuthyo nyɨrɨ n'amaha oyo. 16Kyo kɨnaleka, nangye nɨnyayɨtsɨnga bʉlɨ kɨro ibya na mɨanɨtsye ikwirire yo ɨthangasohwa embere sa Gongo n'embere s'abandʉ.
17«Aho mʉkengwa, honyuma ya mɨaka mɨngɨ nɨ nyɨthalɨ mo muyi w'ɨYerʉsalemʉ, monyashubire mʉwo bʉshana n'iwathikya abandʉ b'ekɨhanda kyaye na buwathikya bwa bushoki n'ɨha Gongo yo bɨhembo. 18Nɨ ebyo byo nyagenda enyɨkola mo ndambi banyegaya mo Nyʉmba ya Gongo. Na nyabyaga nɨ nyamamala ɨyetsya. Na mo Nyʉmba ya Gongo eyo, nyithabyagamo na mʉndʉ, na hathabyaga na kiro na bʉrʉnga bo nyalethagamo. 19Hewethuwe Bayuta bagʉma b'iAsia babyagaho. Nɨ abo bo bangimene embere sawe bʉshana n'inyisitaka, balɨ bawithe kyo banganyisitakira. 20Kʉtse abandʉ balɨ hano aba, banegene balɨ mobanyonvwako kɨbɨ nyɨthabere nyathonda embere y'oBʉshenge Bʉkʉlʉ bwabo. 21Alɨnga ekɨnwa kyo banyonvwagako kʉbɨ, mo mʉgʉlʉ nyahambalaga nyɨthɨ: “Enyɨbʉrana embere senyu munobwire kʉshangwa ko nyɨrɨ na muyinihiro kw'abaholi bandalubuka!”»
22Honyuma kw'aho kafʉrʉnalɨ Felisi, kʉshangwa abyaga nietsi emyatsɨ y'eNzɨra ya Nyinya-kowethʉ, mwimania olʉbanza. Mwanegena athɨ: «Nyabatsɨra olʉbanza olu, Lʉsɨa omʉkʉlʉ kʉtsɨbʉ w'abashirikani abya ahika hano!» 23Honyuma kw'aho mwabwɨra omʉkʉlʉ w'abashirikani athɨ atheye Polo mo biriso, hewethuwe agende amʉha bwiranda bw'ɨkola ebyo ashashire. Na kandɨ athagendaga ahangɨra abira bʉwe mo ndambi bo bamuwathikya bagenda abahika.
Polo athonda embere sa Felisi na Tʉrʉsɨla
24Honyuma wa bɨro bɨke, kafʉrʉnalɨ Felisi na mʉkatsɨwe Tʉrʉsɨla, yo wabyaga Muyuta mobahika. Mwanegena athɨ bamʉbɨrɨkɨrɨre Polo. Mwahʉlɨkɨrɨtsya ebɨnwa Polo agendaga anegena bʉshana n'erɨkɨrɨtsya Yesʉ Kirisito. 25Hewethuwe Polo abere alɨ akangɨrɨtsya bʉshana n'obʉthʉnganene, na bʉshana n'ɨyɨkakɨtsya ko bɨtsɨbʉ, na bʉshana n'ekɨro ky'esohi ya Gongo yo yandahika, Felisi mwʉbaha n'ɨmʉbwɨra athɨ: «Lɨno ʉhera wangagenda. Nyandabya nyabona kathambi nyandashʉba kʉbɨrɨkɨra.» 26Felisi mwagenda abɨrɨkɨra Polo ngendo ngʉma-ngʉma bʉshana n'ɨsɨmola naye niahirireyo maha athɨ Polo amʉha faranga. 27Kwabere kwahwa myaka ibiri, Porikio Fesɨto mwaya mo mwanya wa Felisi nga kafʉrʉnalɨ. Hewethuwe Felisi kʉshangwa abyaga niashondya amoye aBayuta, mwalika Polo mo biriso ebyo.
2025 Group of Associations for the Promotion of Languages, Cultures for Integral Development