Mawalanga 3
3
Wana wa Aruni
1Ayi ndo walanga ya shiyiwuku sha Aruni pamuhera na Musa shaka Mtuwa Mlungu pakayoweriti na Musa kulugongu Sinayi. 2Matawu ga wana wa Aruni gaweriti Nadabu shipanta njira na Abihu na Eleazari na Itamari. 3Wana awa wa Aruni wawatyekiti kuwera watambika. 4Kumbiti Nadabu pamuhera na Abihu wahowiti kulongolu kwa Mtuwa Mlungu, shaka pawamlaviliriti Mtuwa Mlungu motu ntambu yaifiruwa ndiri kushiwala sha Sinai. Womberi waheriti na wana su Eleazari pamuhera na Itihamari watenditi lihengu handa watambika shaka sha makaliru ga Aruni tati gwawu.
Wana wa Lawi wankusyaguluwa kuwatendera watambika
5Shakapanu Mtuwa Mlungu kamgambiriti Musa, 6guwajegi wantu wa likabila la Lawi, guwatuli kulongolu kwa mtambika Aruni su guwapanani lihengu lya kumtendera. 7Hawamtenderi lihengu Aruni pamuhera na shipinga shoseri Muliringu Linanagala pawatenda lihengu Pahala Pananagala. 8Womberi hawaloli weri vyombu vyoseri vya Liringu Linanagala na kuwatanga wana wa Israeli pawatenda lihengu Pahala Pananagala. 9Wana wa Lawi hagumpanani Aruni pamuhera na wana wakuyi, womberi walaviwa pakati pa wana wa Israeli wawatenderi. 10Haguwasyaguli Aruni na wana wakuyi su wawezi kutenda mahengu gawu ga utambika, kumbiti handa muntu yoseri gwingi pakasegelera Liringu Linanagala, hakalagwi.
11Mtuwa Mlungu kamgambiriti Musa, 12guloli vinu nuwasyagula wana wa Lawi pakati pa wana woseri wa Israeli pahala pa shipanta njira mpalu gwa kila mdala muntu gwa Israeli. Wantu wa Lawi waneni 13toziya kila shipanta njira gwa wantu wa Israeli kawera gwangu. Panuwalagiti vipanta njira woseri wa wantu wa Misri, nuwalekiti kila shipanta njira muwantu wa Israeli, kila shipanta njira gwa muntu ama nkanyama hawaweri waneni. Neni ndo Mtuwa Mlungu.
Kulanguwa kwa wantu wa Lawi
14Shakapanu Mtuwa Mlungu kamgambiriti Musa kushiwala sha Sinayi, 15guwawalangi wapalu yawawera mulikabila lya Lawi. Guwawalangi kila mpalu yakawera kwanjira mwezi gumu na kwendreya. 16Su Musa kawawalangiti kulawirana na shisoweri sha Mtuwa Mlungu ntambu yakamlagaliriti.
17Aga ndo matawu ga wana wa Lawi. Gerishoni na Kohati na Merari. 18Gerishoni kaweriti na wana wawili, Libini na Shimei. 19Kohati kaweriti na wana wamsheshi, Amuramu na Ishari na Hebroni na Uzieli. 20Merari kaweriti na wana wawili, Mahili na Mushi. Kaya azi zilawiti muwantu wa Lawi kulawirana na kolu zawu.
21Kolu mbili zyazilawiti kwa Gerishoni ndo walii yawalawiti kwa wana wakuyi Libini pamuhera na Shimei. 22Walanga ya wapalu woseri yawaweriti na umuli gwa mwezi gumu na kwendeleya waweriti elufu saba na miya muhanu. 23Kaya za wantu wa Gerishoni wafiruwituwi wabawili malingu gawu uwega wa kwaguzyeta mshenji, kumbeli kwa Liringu Linanagala. 24Mkulu gwa kaya ayi ya Gerishoni kaweriti Eliasafu mwana gwa Laeli. 25Lihengu lya wana wa Gerishoni liweriti kulilolera weri Liringu Linanagala na Pahala Pananagala pamuhera na mfiniku gwakuyi na mapaziya ga ligomi lya Liringu Linanagala, 26mapaziya ga mdamu yaguwera pakati pa Liringu Linanagala na mapaziya ga ligomi lya mdamu pamuhera na ngowi zakuyi. Mahengu goseri ga vintu avi gaweriti gawu.
27Kaya za wantu wa Amirami na Hebroni na Uzieli walawiti muyuwuku gwa Kohatihi, awa waweriti wa lukolu lwa Kohatihi. 28Walanga ya wapalu woseri yawaweriti na umuli wa mwezi gumu na kwendeleya waweriti elufu nani na miya sita, womberi ndo yawatenditi lihengu Pahala Pananagala. 29Kaya za wana wa Kohatihi wafiruwiti kubawila malingu gawu uwega wa kusika mwa Liringu Linanagala. 30Mkulu gwa kaya ya lukolu lwa Kohatihi kaweriti Elisafani mwana gwa Uzieli. 31Lihengu lya wapalu wa kolu zilii liweriti kulilola weri Lisanduku lya Lipatanu na shintalawanda na luntambi lya shikoluboyi na shitalawanda sha kutambikira na vyombu vyawavitendera watambika Pahala Pananagala na lipaziya, mahengu goseri gakulolera vintu virii Muliringu Linanagala gaweriti gawu.
32Su Eleazari mwana gwa mtambika Aruni, wamtyekuiti kuwera mkulu gwa wakulu wa wantu wa Lawi, viraa kaweri mgolokera gwa watenda lihengu woseri wa Liringu Linanagala.
33Kaya ya wantu wa Mahili pamuhera na wantu wa Mushi walawiti muyuwuku gwa Merari. 34Walanga ya wapalu woseri kulawa mushiyiwuku sha Merari, walii yawaweriti na mwezi gumu na kwendeleya waweriti elufu sita na miya mbili. 35Mkulu gwa lukolu lwa Merari kaweriti Surieli mwana gwa Abihaili, womberi wafiruwituwi kubawila malingu gawu uwega wa kushana Muliringu Linanagala. 36Womberi wapananituwi lihengu lya kuzilolera weri mpanda za Liringu Linanagala na migomba yakuyi na vikwambikwambi vyakuyi na vikaliru na vintu vyakuyi vyoseri na mahengu goseri ga vintu avi gaweriti gawu. 37Mahengu gawu viraa gaweriti kulolera weri mpanda za kukowekera mapaziya pamuhera na vikaliru vyakuyi na mibiki ya kukomelela malingu na ngoyi zakuyi.
38Musa na Aruni pamuhera na wana wawu wafiruwituwi kubawila malingu gawu uwega wa kwagulawa mshenji Muliringu Linanagala kulola kwaguzyeta mshenji kulongolu kwa Liringu Linanagala. Womberi waweriti na lihengu lya kutenda Mupahala Pananagala, mushila shintu shashifiruwa toziya ya wantu wa Israeli. Muntu gwingi pakasegelera Pahala Pananagala hakalagwi.
39Walanga ya wantu wa Lawi yawalangatuwi gambira Mtuwa Mlungu ntambu yakamlagalliriti Musa na Aruni kulawirana na lukolu zawu, kila mpalu yakaweriti na umuli gwa mwezi gumu na kwendeleya waweriti elufu malongu mawili na mbili.
Kukomboluwa kwa wana wapanta njira wapalu.
40Shakapanu Mtuwa Mlungu kamgambiriti Musa, guwawalangi kwa matawu gawu wapanta njira wapalu woseri wa wantu wa Israeli yawawera na mwezi gumu na kwendeleya. 41Na gwenga haguntulili wantu wa Lawi kwajili yangu neni Mtuwa Mlungu pahala pa wapanta njira wa wantu wa Israeli, pamuhera na wankanyama wawu pahala pa wapanta njira wa wankanyama wa wantu wa Israeli. Neni ndo Mtuwa Mlungu.
42Musa kawawalangiti wapanta njira woseri wa wantu wa Israeli gambira Mtuwa Mlungu ntambu yakamlagaliriti. 43Wapanta njira woseri wapalu yawaweriti na mwezi gumu na kwendeleya, yawalembituwi kwa matawu gawu waweriti elufu malongu mawili na mbili na miya mbili na malongu saba na tatu.
44Mtuwa Mlungu viraa kamgambiriti Musa, 45vinu guwatutuli gweka wantu wa Lawi waweri wa neni badala ya wapanta njira wa wantu wa Israeli, viraa virii guwatuli gweka wang'ombi wa wantu wa Lawi woseri badala ya wiwuka wa kwanja wa wang'ombi wa wantu wa Israeli. Neni ndo Mtuwa Mlungu. 46Toziya kwana wapanta njira wa Waisraeli yawongereka nentu ya wapanta njira ya Walawi kwa wantu miya mbili sabani na tatu, awa yawawongerikiti haguwakomboli. 47Kwa kila muntu kalipi vipandi muhanu vya madini ga feza kulawirana na shiyasi shashitulitwi Pahala Pananagala. 48Na vipandi avi kwajili ya ukombola wa kwongereka kwa wantu wa Israeli, hagumpanani Aruni pamuhera na wana wakuyi.
49Su Musa kajimiriti, kajojoniriti vipandi vya madini ga feza kulawa kwa walii yawongerikiti muwalanga ya ukombola wa wantu wa Lawi, 50su yomberi kawankiti vipandi elufu yimu na miya tatu na malongu sita na muhanu. 51Musa kawapananiti Aruni pamuhera na wana wakuyi, vipandi virii vya madini ga feza gambira Mtuwa Mlungu ntambu yakamlagaliriti.
S'ha seleccionat:
Mawalanga 3: PBV
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
The Bible version in the Pogoro Language. @The Word for The World International and Pogoro Language translation. All rights reserved.