Ruma 6
6
Ɗal batem ci, mca abə garha a wəzəm a bəza a jiɓ abə Yesu Kərist
1Azha, a may a zlap avaŋga? Həji ava a ndza a ɗal mpət pal aska sənma Bizlaf a fəl tə vərəm vəw? 2Aŋghə, tep ikwas! Ara ndə a ɗa, həji pewha gwara a mci ma ɓizhahəji ka abə mpət, həji asən a ndza a wəzaha a mpət zhana avaŋga? 3Huni kasənə katkadək: Ɗal batem takwa, ma dzəvahəji ka abə Yesu Kərist, tadzəvahəji ka tiwtiw a mci tə. 4Gwara ara ɗal batem, a mci tə, həji takahaya dzəv abə sha, aska a ɗa ya, andza ndə Kərist a gara tə a wəzəm a taba həji ma bazl ta aagi abə ɓərɓər ataa sləf Vava, ŋkwa tə yəm, həji ndza abə miɗ wiyə. 5Ara ndə a ɗa, andza həji tadzəv takwa a mci ma kasaɓ andza aŋtə ŋter, həji agara takwa a wəzəm a jiɓ andza sha yəm. 6Huni zlimaŋkwa ma watsə katkadək: landza takwa ma va a ndza tadaraya ata mpi magəzlaŋgarak abə Kərist. Azha, mpət ma ndza ata həji tasafaya, azha anawatsə həji tagwar a ɗa mava mpət zhana səku. 7Ara ndə a ɗa meni, ala ma mca tə tapəla tə bəza a mpət. 8Ama andza həji tamca takwa abə Kərist, həji kasənə ci, həji andza abə miɗ abə sha yəm. 9Həji kasənə, a ɗa ŋter: Ndə Kərist a gara tə a wəzəm a taba həji ma bazl ta aagi ci, a kazhin a mca akas, kwa ŋgalaŋ mci a heɗe aka zhana səku. 10Ara ndə a ɗa, mci tə, taperehazə bəza abəra mpət ŋter, a mca zhin ŋtaguleŋ kwa vepiy. Ama anawatsə ndza tə abə nja, landza tə tiwtiw, a ndzanə a Bizlaf. 11Andza sha, huni tə yəm, huni kasənə, huni tamca kuni aska a pəreh kuni a bəza abəra mpət ŋter, ama huni abə miɗ abə Bizlaf ndə huni dzəv kuni abə Yesu Kərist.
12Ara mpət a lima ŋgalaŋ bəza a zlikusəm kuni ma bazl ta aagi, aska huni ahawanə a səkən ma gamak ndə zlikusəm kuni a kamayata aagi. 13Huni ɗiw a mbasl zlikusəm kuni ka a ɗal zlən mpət zhana, həna səkən ta ɗal zlən ma gamak səku. Aɓa azha ci, huni ŋcah a zlən a Bizlaf, andza həji ma ndza abə nja ma zhinha ta a bəza a jiɓ a taba həji ma bazl ta aagi. Huni ɗalanə zlən abə zlikusəm kuni andza səkən ta ɗal zlən ma dəlili. 14Ara ndə a ɗa, mpət abə ŋgalaŋ ata huni aka səku, ara ndə a ɗa, ma ma garagar ma marahuni səku. Ama, sənma ataa Bizlaf ana ma kamarahuni.
Zlən ataa landza ma dəlili
15Ma ma garagar ana ma kamarahəji zhana səku, ama mayha Bizlaf aska ŋkwa. Mbara azha, kadək a həji aɗal səkən ma gamak azha vəw? Aŋghə, tep ikwas! 16Huni kasənə, a ɗa ŋter: Andza huni ɗalanə zlən ana ala aska huni a hawanə, huni tabəw kuni a ɗa mava ataa ala madagal ndə huni kahawanə watsa, a ndza andza mpət ma kajaɓahəji a mci, aka səku, a ndza andza hawanə a Bizlaf ma kajaɓahəji ata landza ma kasaɓ andza ndə Bizlaf a kamayə. 17Kiyzaŋkwa ɗalanə wasiy a Bizlaf: ambəɗa tə, huni va a ɗa mava ataa mpət aagi, ama anawatsə huni tahawanə a ma ndə aa sərəkatana a həji aagi abə ꞌunəf kuni tiwtiw, azha huni talamzə. 18Huni tarehakuni bəza a mpət, azha huni tabəw kuni a həji ma kaɗalanə zlən ana ma dəlili aagi. 19Sa zlap andza həji ma dəgnak, ara ndə huni ŋkula zlima zlima katkadək. Ambəɗa tə, huni tambasl zlikusəm kuni ka andza mava ma ɗal zlən ma dadawər aagi abə piw aagi. Azha səkən ndə huni lima, ŋkalzə ma Bizlaf. Ikwa yəm akacihwa, huni tabəw kuni andza mava ma ɗal zlən ma dəlili aagi. Azha səkən ndə huni kalima, landza ma kazhiva ata nja Bizlaf. 20Ndə huni va a ɗa mava ataa mpət aagi, huni ɗal səkən ndə huni kamayə, huni kacecef a ɗal zlən ma dəlili səku. 21Azha anawatsə ya, shiŋ səkən ndə huni ɗal azha veme? Akacihwa, haw kadzahuni, ara ndə səkən ndə huni kalima a ɗa mci. 22Ama anawatsə ya, huni tapəlaya a mpət, azha huni tabəw kuni a mava ataa Bizlaf aagi. Azha anawatsə, huni ɗal zlən ma kazhiva ata nja Bizlaf, səkən ndə həji kaalima ci, miɗ ma ŋkula kəɗaŋ ma ndza ara Bizlaf. 23Ara ndə a ɗa, wəda zlən mpət ci, a ɗa mci, ama səkən ma ɓəlaakaka ndə Bizlaf a vəlazə, sha ana miɗ ma ŋkula kəɗaŋ abə dzəv takwa abə Yesu Kərist, Bay Madagal takwa.
S'ha seleccionat:
Ruma 6: GOU
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió