Lucas 4
4
Maxuꞌ ncholaꞌs tokil' Jesus
1Sen' mbere Jesus mbro' Xa' yo' Jordan, dib ben Xa' mde' Mbi Nayon, nde mbe' Mbi Nayon Xaꞌ izyo nagan. 2Tya ngwa Jesus choꞌ wiz, nde re len' cho' wiza leꞌka mchal Maxu' tokil' Maxu' Jesus. Re len' wiz ya ngen kwan ngwa Jesus, lo ngoxob choꞌ wiz mzib lyanꞌ Jesus. 3Zyasa nchab Maxuꞌ lo Jesus:
—Tez lipa nak la Xinꞌ Dios, mnibe' sa yalal ke ba pan.
4Jesus mkab:
—Lo xkiꞌs Dios nchab: "Nanakta benꞌta pan ban men, noga reta diꞌs ndryoꞌ ro Dios ndaꞌ yalnaban lo men."
5Zyasa mbeꞌ Maxuꞌ Jesus thi yek yiꞌ gap toz ndab nde tib a'til mbloꞌ Maxuꞌ reta yalnyebe' dib nax izyo lo Jesus. 6Nde nchab Maxuꞌ lo Jesus:
—Tan dib yalnyebeꞌ nde yalne chanꞌ izyo loa, tak chanꞌ na naka, nde taney a choja lo xa' ncholas na taney. 7Nde tez tyoxub la lon nde li naroa na, retey tan loa.
8Leꞌ Jesus mkab:
—Baxa wa, Maxuꞌ, tak lo xkiꞌs Dios nchab: "Lo Dios la Xa' Nyebe' loa tyoxub la, nde benꞌta lo Xaꞌ lia sinꞌ."
9Xisa mbeꞌ Maxuꞌ Jesus yez Jerusalen nde mto Maxuꞌ Jesus yek yodoꞌ tenꞌ mas gap ndab nde nchab Maxuꞌ lo Jesus:
—Tez Xinꞌ Dios nak la, gobi axta laba, 10tak lo xkiꞌs Dios nchab:
Dios nyebe' lo re anj chanꞌ Dios, sa kenap xa' la.
11Lo ya' xa' tyenke' xa' lu,
sa na'chepta nia ke.
12Jesus mkab:
—Noga nchab lo xkiꞌs Dios: "Naꞌtokilꞌta la Dios Xaꞌ Nyebeꞌ loa."
13Nde senꞌ mbre reta yaltokilꞌ chan' Maxuꞌ, mblaꞌ Maxuꞌ Jesus thi tyemp axta kebe' zyal Maxu' thi wiz.
Jesus mdobte rsinꞌ Jesus
14Zyasa mbere Jesus lo xyon Galilea, nde dib ben Xa' mde' Mbi Nayon, nde mxyob xkiꞌs Xaꞌ reta yez nzi lo xyon Galilea. 15Nde kad yez mdobte Jesus mbloꞌ Jesus xkiꞌs Dios lo men lenꞌ yo tenꞌ ndyop re xaꞌ Israel, nde reta men nabeꞌz ni xa' xis Jesus.
Jesus nda yez Nazaret
16Senꞌ mzin Jesus yez Nazaret tenꞌ mxyen Xa', nde wiz jwanꞌ ndryoꞌxkwen re xaꞌ Israel, ngote Xa' lenꞌ yo tenꞌ ndyop re xaꞌ Israel a xajka nak mod jwan' ngeno Xa' nde mdoli Xa' sa lab Xa' xkiꞌs Dios lo reta men. 17Zyasa mda' xa' ye's jwan' mke' profet Isaias lo Jesus sa lab Jesusa, nde senꞌ mxalꞌ Xaꞌ ye's, mzyal Xaꞌ tenꞌ nchab:
18Mbi Nayon chanꞌ Dios ndonon,
tak mblí Dios na, sa tej na diꞌs wen chanꞌ Dios lo re xaꞌ prob,
mtelꞌ Dios na sa todanꞌ na re xaꞌ ndyak yis nabil,
sa tej na lyaꞌ re xa' nge lizyi'b,
todanꞌ na ngudlo re xaꞌ syeg,
tola'n re xaꞌ nga'sno re yalti,
19nde sa tej na lo re men ngol be' nzo yalwen chanꞌ Dios.
20Xisa mthus Jesus ye's mdaꞌ Jesus sa lo xaꞌ ndli sin' lo yo ndyop xa', nde mdob Jesus. Zyasa reta men nzi tya, ngwiꞌ do' xaꞌ lo Jesus. 21Le' Jesus mdobte nchab lo xaꞌ:
—Naya ngok jwanꞌ nchab lo xkiꞌs Dios ta mblab na lo goꞌ re'.
22Nde reta xa' wen ni xa' xis Jesus, nde nzoyen xaꞌ mbin xaꞌ re diꞌs wen mni Jesus, nde nchab xaꞌ lo ta xaꞌ:
—¿Cho nanakta xaꞌ reꞌ nak xinꞌ Jose?
23Zyasa nchab Jesus lo xaꞌ:
—Mnepa na le' go' ncholaꞌs nye thi di's gol re' lon: "Doctor, ¡Btoyak leꞌga lu!" nde nye goꞌ: "Re jwanꞌ mbin náꞌ mblia yez Capernaum, noga las la re' bliy."
24Nde noga nchab Jesus:
—Lipa nin lo goꞌ, ngen choꞌ thi profet nabe'z lyen men las xa' xa'. 25Nipa na lo go' ngo thoz ngol nguj sal' na' dib Israel tyemp mkete profet Elias, sen' ta na'ndlada yi tson lin' narol nde jwan' toz ngo win dib nax izyo, 26per namtelꞌta Dios Elias lo nek thib ngola, cheꞌla mtelꞌ Dios Elias lo thi ngol nguj sal' na' xa' yez Sarepta jwanꞌ nzi lo xyon Sidon. 27Nde tagaꞌ tyemp mkete profet Eliseo, ngo naꞌr toz men ndyak ye'sya's yez Israel, per nek thib xa' namdyanꞌta, benꞌta Naaman xaꞌ yez Siria mdyanꞌ.
28Senꞌ mbin re xaꞌ jwanꞌ nzi lenꞌ yo tenꞌ ndyop xaꞌ Israel re jwanꞌ nchab Jesus, jwanꞌ toz ngok nayiꞌ xaꞌ. 29Zyasa mbloꞌte xaꞌ Jesus len' yez, mbeꞌ xaꞌ Jesus axta gap yek yi, ten' nzi yez xa', tya ncholaꞌs xaꞌ chixkwe xaꞌ Jesus yek ble toz. 30Per Jesus mbridndaꞌb xij xaꞌ nde nda Jesus.
Thi men bi' nzo mbi narax lazon'
31Zyasa mdola Jesus nda Xa' yez Capernaum, jwanꞌ nax lo xyon Galilea; nde re wiz jwanꞌ ndryoꞌxkwen xa' Israel, ndloꞌ Xa' xkiꞌs Dios lo men. 32Nde le'ka nzoyen re men ngwi' xa' xa ndloꞌ Jesus xki's Dios, tak kon yalnyebeꞌ ni Xa'.
33Nde lenꞌ yo tenꞌ ndyop xaꞌ Israel, ndob thi men biꞌ nzo mbi narax lazon', nde mbrezyaj xaꞌ nchab xaꞌ:
34—¡Blaꞌ náꞌ! ¿Cho kwan nchala's la li noa náꞌ, Jesus Xaꞌ Nazaret? ¿Choꞌ nde lux la náꞌ? Nzolon la, lu nak Xaꞌ Nayon chan' Dios.
35Nde mbresno Jesus mbi naraxa nchab Jesus:
—¡Btowꞌ roa nde bro'te lazo' mbiꞌ re'!
Zyasa nzi wi' re men mblobi mbi naraxa mbiꞌ ya izyo, nde mbroꞌtey per ngen kwan mblinoy mbiꞌ ya. 36Nde reta men nzi tya le'ka nzoyen xaꞌ, nde nchab xaꞌ lo ta xaꞌ:
—¿Cho yalne ndono mbi' ba? Sa kon yalnyebeꞌ, nyebeꞌ mbi' lo mbi narax ryoꞌtey, ¡Nde ndryoꞌtey!
37Nde jwan' toz mxyo'b xkis' Jesus reta yez jwan' nzi tya.
Jesus mtodanꞌ xnaꞌsap Simon Pedr
38Zyasa Jesus mbroꞌte lenꞌ yo tenꞌ ndyop xaꞌ Israel, nde nda Jesus liz Simon, leꞌ xnaꞌsap Simon nax lo yis, jwanꞌ toz nzo xlye xaꞌ. Nde mna'b re xaꞌ lo Jesus sa todanꞌ Jesus xaꞌ. 39Zyasa mbla ke' yek Jesus lo xa', nde mnebeꞌ Jesus ryoꞌ xlye xaꞌ, nde mbroꞌ xlye nde zyaga ngoche xaꞌ nde mdaꞌ xaꞌ jwanꞌ mda reta xaꞌ.
Jesus mtodanꞌ naꞌr men yis
40Senꞌ ndobix wiz, reta xaꞌ jwanꞌ ngeno men yis, jwanꞌ ndyak xaꞌxaꞌ yis ndeno xaꞌ xaꞌ lo Jesus nde Jesus mxoꞌb yaꞌ Jesus yek kad thiba xaꞌ, mtodanꞌ Jesus reta xaꞌ. 41Nde naꞌr re xa' yisa mbroꞌte mbi narax lazon', nde mbrezyaja nchab ba:
—¡Lu nak Xinꞌ Dios!
Per Jesus mbresno mbi naraxa nde naꞌndaꞌd Jesus diꞌs niy, tak le'y mnela ke' Jesus nak Xaꞌ mtelꞌ Dios.
Jesus mketeloꞌ xki's Dios dib lo xyon Galilea
42Senꞌ mduxni, Jesus mbroꞌ yez ya, nda Xa' tenꞌ nagan, per re men ngwa kwanꞌ xaꞌ Jesus, nde senꞌ mzin xaꞌ tenꞌ ndo Jesus, ncholaꞌs xaꞌ tyenkeꞌ xaꞌ Jesus, sa naꞌyad Jesus, 43per Jesus nchab lo xaꞌ:
—Noga nakinꞌ ya tej na diꞌs wen chanꞌ Dios lo re temas yez, re jwan' nak yalnyebe' chan' Dios tak por jwanꞌ naga mtelꞌ Dios na.
44Tamod mkete loꞌ Jesus diꞌs wen chanꞌ Dios lenꞌ re yo tenꞌ ndyop xaꞌ Israel, dib lo xyon Galilea.
S'ha seleccionat:
Lucas 4: zpt
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Active: ©Wycliffe Bible Translators, Inc. All rights reserved.