Hechos 24
24
Pab ndla lazonꞌ lo Félix
1Senꞌ ngoxoꞌbla gayꞌ wiz, Ananías mbol ngwleyꞌ ro, kon pla xaꞌ nak sinꞌ lo men judí nde kon ti xaꞌ nchak ley ndole Tértulo. Re xaꞌ reꞌ mzin lo Félix xaꞌ nyebeꞌ ro, sa keꞌ xaꞌ yalke yek Pab. 2Senꞌ mbroꞌto Pab, leꞌ Tértulo mdobte mkeꞌ xaꞌ yalke yek Pab, nde nchab xaꞌ:
—Lu Felix, xa' ntak toz, tak lu ndli sa nabeꞌz nzi náꞌ nde naꞌr toz jwanꞌ nawe ndoyaka lo yez por yalnchak chanꞌ la. 3Lu xa' ntak toz Felix, reta jwanꞌ reꞌ oneja plo ngete náꞌ thiblaꞌ nkayaꞌ náꞌy jwanꞌ nasa ndaꞌ náꞌ dyux loa. 4Par naꞌkibta náꞌ bro tyemp loa, nyaꞌb na gon la lud xkiꞌs náꞌ ta nagu'sla's nak la. 5Mne náꞌ mbiꞌ reꞌ nak xaja bzin, tak reta tenꞌ ngete xaꞌ napta byo nkwanꞌ xaꞌ xij re men judí, nde xa' nyebeꞌ lo jwan' kwin' ta mbez ndli lazon' Jesús Xa' Nazaret. 6Nde noga nchola's xa' li bew xa' ten' nak yodo' nayon; jwanꞌ nasa mxen náꞌ xaꞌ, nde ncholas náꞌ nyaꞌb náꞌ kwent lo xaꞌ jwanꞌ xa ngeni ley chanꞌ náꞌ. 7Per xija mbla mbol Lisia xaꞌ nyebeꞌ lo re soldad, kon gob mkib xaꞌ Pab lo yaꞌ náꞌ, 8nde mnabeꞌ xaꞌ, ke re men jwanꞌ ngeno yalke xis mbiꞌ reꞌ yeꞌd tej xaꞌy loa. Leꞌga lu mnaꞌb kwent lo xaꞌ sa nyea ke liga nak xaꞌ re jwanꞌ ta ndej náꞌ loa reꞌ.
9Nde reta xaꞌ judí jwanꞌ nzi tya, nchab xaꞌ: Liy, ta naka. 10Zyasa Félix xaꞌ nyebeꞌ ro, mtaꞌb xaꞌ yaꞌ xaꞌ lo Pab sa kab Pab nde nchab Pab:
—Mnen ndalinꞌ la nak la xaꞌ nyebeꞌ lo xyon reꞌ, jwanꞌ nasa dib nzo lazoꞌn kab na lo yalke jwanꞌ nkeꞌ xaꞌ yek na. 11Leꞌga lu toyal koxyoa cho li jwanꞌ reꞌ, tak naya tera' yoxoꞌb tib senka wiz senꞌ ngwa li naron Dios yez Jerusalén, 12naꞌngosibta xaꞌ na ndoyan di's kon nek tib men, nekla ngete tobxol na re men, xa nak yodoꞌ, nekla re lenꞌ yo tenꞌ ndyop re men judí o nekla dib lenꞌ yez. 13Re men reꞌ, ngenta kwan tob ro xaꞌ sa tej xa' loa ke li re yalke jwanꞌ nkeꞌ xaꞌ yek na. 14Per jwanꞌ goꞌron loa nak, na ndli sin' lo Dios ta ndli lazoꞌ re xaꞌ gox lon ngo pola jwan' xa nak Ned Kub ta ni xaꞌ yalkwinꞌna, tak ndli lazoꞌn re jwanꞌ ngeni ley, nde ndli lazo'n jwanꞌ mkeꞌ re profet. 15Nde jwanꞌ ngembed na lo Dios, jwanꞌ naga ngembed re xaꞌ ba, leꞌ Dios koꞌxban reta xaꞌ nguj, xaꞌ mbli jwanꞌ galꞌ nde re xaꞌ mbli jwanꞌ naꞌgalꞌta. 16Jwanꞌ nasa thiblaꞌ nchal na tyonon ti xgab nambi lo Dios nde lo re men.
17’Ngoxo'bla pla linꞌ ta mketeꞌn xaꞌla re yez sa mberen ten' nak las na, ndanon ti gon lo re men nalat ndyak nde ndanon jwanꞌ yon lo Dios. 18Jwanꞌna ndolin yodoꞌ, lo mzin pla xaꞌ judí mbroꞌ Asia, mne xaꞌ leꞌn ngeli jwanꞌ nyebeꞌ ley chanꞌ Moisés sa ak nambin lo Dios, naꞌnakta na nzino bro toz men nekla ngetobxol na men.#24:18 He. 21:17-28. 19Re xaꞌ ya ndablo ndro'to loa reꞌ, sa ndej xaꞌ nyenꞌ kwan liy sa mxen xaꞌ na, tezka ngeno xaꞌ cho yalke xis na. 20O le'ga re xaꞌ ta nzi ncheꞌ, tej xaꞌ nyenꞌ kwan jwanꞌ narax mbwiꞌ xaꞌ mblin lo ta mbro'tono xaꞌ na lo men nak sinꞌ, 21o nzo plo, lo ta ne mbrez na xij re men, nchab na: “cho nkeꞌ goꞌ yalke yek na tak ndli lazoꞌn ryo'xban re men nguja.”#24:21 He 23:6
22Senꞌ mbin Félix jwanꞌ reꞌ, mto xaꞌ tedib beꞌ, tak mne wen la xaꞌ xomod nak xned Jesucrist, zyasa nchab Félix lo xaꞌ:
—Senꞌ yeꞌd Lisias mbol nyebeꞌ lo soldad, zyasa wi'n xomodpa' nak chanꞌ goꞌ reꞌ.
23Zyasa mnabeꞌ Félix lo xaꞌ nyebeꞌ lo re soldad sa keꞌ lizyiꞌb xaꞌ Pab nde naꞌnkad xaꞌ diꞌs lo re men nzal'ta Pab, tez nzo cho ncholaꞌs laꞌsto xaꞌ Pab o yatna xaꞌ Pab, toyal li xaꞌy.
24Mbridndaꞌb pla wiz, mbyeꞌdno Félix ngol xaꞌ Drusil ti ngol nak judí. Zya mnabeꞌ Félix ngwayoꞌ Pab, sa gon xaꞌ nyen' xomod nak li lazoꞌ men Jesucrist. 25Per senꞌ mdej Pab nakinꞌ galꞌ ban men, ndablo leꞌga men kwek lazoꞌ men, nde tzin ti wiz tayaꞌ men kwent lo Dios, zyasa mzyeb Félix nde nchab xaꞌ lo Pab:
—Bya naya, tedib wiz senꞌ yena lon zyasa bez na lu.
26Noga ncholaꞌs Félix ko Pab tmi yaꞌ Félix sa la' Félix Pab; jwanꞌ nasa naꞌr gob mbrez xaꞌ Pab nde mdodiꞌsno xaꞌ Pab. 27Senꞌ ngoxoꞌb chop linꞌ, mdayaꞌ Félix sinꞌ lo tedib xaꞌ kub ndole Porcio Festo. Nde ncholaꞌs Félix wen yanꞌ xaꞌ lo re men judí, yaja tata mtanꞌ xaꞌ Pab lizyiꞌb.
S'ha seleccionat:
Hechos 24: zpt
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Active: ©Wycliffe Bible Translators, Inc. All rights reserved.