Hawaaritay Ooso 13
13
Barnnabaasannee Saa7oola kiitintteeza
1Anxooka yez woosa keetha nabitayinnee asitamaaritay yeza. Unttii Barnnabaasa, Karith ginttinttiz Simoona, Qerenapp ye7eez Lukosa, Kaatay Heroodisara dicceez Minaahennee Saa7oola. 2Unttii Goda goynnitarannee xoomitarannee Geeshsha Ayyanay, «Taanii xeegeez oosayis Barnnabaasannee Saa7oola taas shagoytta» yeegeeza.
3Yey gishos, unttii xoomeezappennee woosseezaypp guye fa kushayid unttal afa gaddii woossii dakkeeza.
Barnnabaasannee Saa7oola Qoophiroosa yhanigeeza
4Yey gishos, Geeshsha Ayyana unttana azazeeza. Selewuqe yhanigeeza; ezaypp markkabe gelii Qoophiroosa haathar teqintteez biita yhanigeeza. 5Unttii Silmmana hellii Ayihude Woosa Keethitayid Xooss qaala odeeza. Waannisa#13:5 Waannisa: Yha aqa xaafintteez Waannisa, hawaare Waannisa baazin Waannisa Marqqoosa ginttinttiz Marqqoosa Wonggile xaafeezaya. maaddittar unttar yeza.
6Unttii Qoophiroosa haathar teqintteez biitta kanthii Phaafu heliza wode pettii worddo nabe Bar-Yesuusa giz Ayihude ammita denggeeza. 7Ye ammitay gade aqisiz Sarggosa Phawuloosa giz wozinaama athayira yeza. Sarggosa Phawuloosa Barnabaasanne Saa7oola faako xeegii Xooss qaala si7odayis koyeeza. 8Zin Girike doonar ammitay sunthay «Elimmaasa» bilthay gade haarizay ammanamay garkk kayodayis koyii Barnabaasarannee Phawuloosar eqintteeza.
9Zin Phawuloosa giz Saa7oola Geeshsha Ayyanar kumii ammitana dakkii bi7ii, 10«Naati, Xalahe na7ayyo, iitatith ubbay kumeezayo, xillotith ubbayis morkkayo, luule Goda oga mirqiza ashshaamo? 11Yeezako, yhatti Goday kach kushay neell afa yeza. Neenii qooqe maaqqoda; xiqqa wodes awa poo7o be7aamii» yeegeeza.
Izir cagganannee dhuma e aafa goozin, fa kushayid aykkii kaalithiza as koyttar yuuyeeza. 12Gade haarizay yeya be7eez wode Godaabaz tamaarssizayid malabaz gi ammaneeza.
Barnnabaasannee Phawuloosa Phisida Anxooka yhanigeeza
13Phawuloosannee ezar yezitay Phaafupp denddii, Phinfila yez Phergge markkaber yhanigeeza. Waannisa unttapp shaakinttii Yerusalaame maaqqeeza. 14Zin unttii Pherggepp aadhii Phisida yez Anxooka helleeza. Maala gallas gallas Ayihude Woosa Keeth gelii betteeza. 15Muse higgayid nabitay maxaafay nabbabintteezaypp guye Ayihude Woosa Keeth halaqitay, «Nu ishuntho, as minthathiza qaala yinttis yezako asayis odoytte» yeegii unttiko azazeeza.
16Phawuloosa denddii eqqii fa kusher mallii, «Isreele asitannee, Xoossa goynniza Ayihude maaqqekka asayyo, si7oytta. 17Yha Isreele asa Xoossay, nu mayzita dooreeza. Gibxxe biitta imathatithar unttii yezin, unttan gaanthii fa gita wolqqar Gibxxe biittapp kesseeza.#Kes. 1:7; Kes. 12:51 18Liizho biitta oyttam layth maaqqoda unttan danda7eeza.#Tay. 14:34; Nam7i. 1:31 19Kan7aane biitta Ayihude maaqqekka laappun kaatetithita haasii u biitta fa asa laatiseeza.#Nam7i. 7:1; Iyya. 14:1 20Yeyi ubbay oydd xeetannee ishatam maaqqad layth gancce haneeza. Yeypp guye nabe Sami7eela wode hellodayis daynnitay aqisoday garkk inggeeza.#Nam7i. 2:16; 1 Sam. 3:20
21«Yeypp guye, unttii paas kaat inggoday garkk woossin, Xoossii Biiname sheeshaypp Qiise na7a, Saa7oola oyttam laythi kawutoday garkk unttis inggeeza.#1 Sam. 8:5; 10:21 22Xoossay Saa7oola shaareezaypp guye unttal afa Dawute kawutiseeza. Xoossay Dawute bagga markkattittar, ‹Taanii ta shene ubba oothiz ta wozina maaqqeez Issaye na7a Dawute denggeeza› yeegeeza.#1 Sam. 13:14; 16:12; Maz. 89:20
23«Xoossay, ‹Taanii Dawute sheeshaypp Isreele ashshiza ko7oda› gi qaala geleezay garkk Yesuusana ke7eeza. 24Yesuusa ye7odaypp tiina Isreele as ubbay fa nagaraypp maaqqii xammaqinttoday garkk Waannisa qaala odeeza.#Mar. 1:4; Luq. 3:3 25Ma Waannisa fa oosa wurssod hanittar asayiko, ‹Tana yi oona gi qoppee? Taanii yi naagiza Kiristtoosa baaya, zin taanii e caamma bilodayis taas beezowazay taapp guyer yi7iza› yeegeeza.#Mat. 3:11; Mar. 1:7; Luq. 3:16; Wan. 1:20, 27
26«Nu Ishuntho, Afraame sheeshuntho, ma yhaydda Ayihude baazin Xoossis yashittizitayo, yha atotitha qaalay nuus kiitintteeza. 27Abis giiko, Yerusalaame yez asaynnee u halaqitay Yesuusana erekkaya. Maala gallas ubbayid nabbabinttiza nabitay qaala akaakekka gishos ezal afa pirddii nabitay odeez qaala poleeza. 28Yesuusa wodhisodayis pettii sankkekka dhabin Philaaxoosa eza wodhoday garkk woosseeza.#Mat. 27:22-23; Mar. 15:13-14; Luq. 23:21-23; Wan. 19:15 29Unttii Yesuusabaz Geeshsha Maxaafayid xaafintteezibaz ubba poleez wode mazqalepp eza wodhisii moogeeza#13:29 Moogeezay biitta gancce baazin shuchchapp woocintteez duufo gancce gaddeez guussii.#Mat. 27:57-61; Mar. 15:42-47; Luq. 23:50-56; Wan. 19:38-42 30Zin Xoossay yhayiqopp Yesuusa dentheeza. 31Yeypp guye, E paar Galilapp Yerusalaame ye7eezitayis unddenna gallas bentteeza. Unttii yhatti ebaz asayis markkatiza.#Haw. O. 1:3
32«Xoossii nu aditayis immad geez Wonggile nuunii yinttis odiza. 33Dawute fa Mazmuure Maxaafayid nam7intho shemppayid,
« ‹Neenii, ta Na7a,
taanii yhayino nena yeleeza›
giinttintteezay xaafintteeza Yesuusa, Xoossii yhayiqopp denthii nu mayzitayis inggod geeza nuus u na7itayis poleeza.#Maz. 2:7 34E wooqqaamay garkk Xoossay yhayiqopp eza denthor erisodayis,
« ‹Taanii Dawutes inggod geez
ammanintteez geeshsh anjjo yinttis inggoda› yeegii odeeza.#Isa. 55:3
35Yey gishos, Mazmuure Maxaafayid hara aqo ma
‹Ne Xillay aha wooqqisaamii yeegiza.›#Maz. 16:10
36«Dawute fa wode Xoossa qofa poleezaypp guye yhayqqii fa aditayir mooginttii wooqqeeza. 37Zin Xoossay yhayiqopp dentheezay wooqqekkaya.
38«Yey gishos, ta ishuntho, nagara atotithay Yesuusa baggar tiinatii yinttis odintteeza eroytta. Muse higgay nagarapp xillisodayis danda7ooya. 39Zin Yesuusa ammaniza ubbay nagarapp xilliza. 40Yey gishos, nabitay geezay yinttal afa hellaamay garkk naaginttoytta.
41« ‹Xoossay geezbaz leeqisizuntho! Bo7oytta! Malabaz goytta! Dhaboytta!
oonkka odin, yi ammanoowa oosa
taanii yi wode oothoda› » yeegeeza.#Ibr. 1:5
42Phawuloosannee Barnnabaasa Ayihude Woosa keethapp kezodar, kaalliza maala gallasayid yeya gujjii ododay garkk asay unttan woosseeza. 43Shiiqo laalintteezaypp guye gaame Ayihuditayinnee Ayihuditay ammanayid gelii Xoossa goynniza gaamitay Phawuloosannee Barnnabaasa kaalleeza. Ammaneezitay Xooss aadho keehatithayid miinggii yezoday garkk unttan zoreeza.
44Kaalliza maala gallas katama yez asaypp oonkk attekka god hellodayi gaamitay Xooss qaala si7odayis shiiqeeza. 45Zin Ayihuditay gaame asa be7eez wode Phawuloosa qinaattii e nashsha ixxii eza cazheeza.
46Phawuloosannee Barnnabaasa yashittekkaya, «Xoossa qaalay tiinatii yinttis odinttodayis koshshiza. Zin yi qaala ixxii medhina de7o ekkodayis nuus beezooya gi yi, yi ommas pirddeez gishos yikkee nuunii Ayihude baazitayko maaqqoda. 47Yeykka Goday,
« ‹Alame kunithay ne baggar attoday garkk,
taanii nena Ayihude baa woyas poo7o ootheeza yeegii nuna azazeeza› » yeegeeza.#Isa. 42:6; 49:6
48Ayihude baazitay yeya si7ii ufayttii Xooss qaala bonchcheeza. Ma medhina de7os maraxintteez ubbay ammaneeza.
49Goda qaalay ye gade ubba helleeza. 50Zin Ayihuditay, Ayihude baazar Xoosse goynniza bonchintteez maachchitannee katama yez gita asita Phawuloosal afannee Barnnabaasal afa denthitheeza. Ye asitay unttan bayi7ith aykkii fa biittapp kesseeza. 51Zin Phawuloosarannee Barnnabaasara ixxizitayis malla maaqqoday garkk fa toke buli7a tiqisii Iqoononnee katama yhanigeeza.#Mat. 10:14; Mar. 6:11; Luq. 9:5; 10:11 52Ma Anxooka yez ammanizitay Geeshsha Ayyanarannee ufayisar kumeeza.
S'ha seleccionat:
Hawaaritay Ooso 13: MeloNTL
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
The Word for the World Ethiopia